Rusë́dinëꞌ Jesús que nu ruláꞌ yöl-laꞌ nutsaga naꞌ
10
Buzë́ꞌë Jesús yödzö Capernaum,
ateꞌ guyijëꞌ luyú Judea,
en gudödëꞌ iaꞌtsöláꞌa yegu Jordán sacaꞌ ga rilén gubidza.
Buluꞌdubi leyúbölö bönachi zián ga zoëꞌ,
ateꞌ leyúbölö busë́dinëꞌ légaquiëꞌ ca run cazëꞌ.
2 Níꞌirö bilaꞌdxinëꞌ bönniꞌ yudoꞌ fariseo ga zoëꞌ Jesús,
ateꞌ të́ꞌënnëꞌ ilunëꞌ ga bi innë́ꞌ Jesús para gaca uluꞌzéguiëꞌ Lëꞌ didzaꞌ.
Gulaꞌnábinëꞌ Lëꞌ,
taꞌnnë́ꞌ:
―¿Dë lataj bönniꞌ nutsaga nëꞌë usanëꞌ-nu nigula queëꞌ?
3 Bubiꞌë didzaꞌ Jesús,
rnnëꞌ:
―¿Bizxi gunná béꞌenëꞌ Moisés libíꞌiliꞌ?
4 Gulaꞌnnë́ꞌ:
―Moisés bëꞌë lataj nu bönniꞌ uzúajëꞌ lu guichi le rnna ruláꞌalenëꞌ-nu nigula queëꞌ naꞌ,
ateꞌ níꞌirö usanëꞌ-nu.
5 Bubiꞌë didzaꞌ Jesús,
rnnëꞌ:
―Gunná béꞌenëꞌ Moisés libíꞌiliꞌ caní tuꞌ naca zidi icja ládxiꞌdoꞌoliꞌ,
6 pero cateꞌ gusí lo rataꞌ yödzölió,
Dios benëꞌ légaquiëꞌ bönniꞌ,
en nigula.
7 Gunnë́ꞌ:
“Que lë ni naꞌ ucáꞌanëꞌ bönniꞌ xuz xinë́ꞌë,
en tsöjsóalenëꞌ-nu nigula queëꞌ,
8 ateꞌ chopëꞌ ni uluꞌhuöáquiëꞌ ca tuz bönachi.”
Que lë ni naꞌ bítiꞌrö nácagaquiëꞌ chopëꞌ pero tuz chinácagaquiëꞌ.
9 Que lë ni naꞌ caꞌ,
nu naca bönachi bitiꞌ ral-laꞌ uláꞌa nupa naꞌ chinutságuiëꞌ Dios.
10 Cateꞌ gulaꞌyáziëꞌ yuꞌu,
gulaꞌnabi yúdxinëꞌ bönniꞌ usëda queëꞌ Jesús ca naca didzaꞌ naꞌ bëꞌë.
11 Jesús gudxëꞌ légaquiëꞌ:
―Nútiꞌtës bönniꞌ uláꞌalenëꞌ-nu nigula queëꞌ,
en utsaga náꞌalenëꞌ-nu nigula yúbölö,
runëꞌ dul-laꞌ le riguitsaj xibá que yöl-laꞌ nutsaga naꞌ tuꞌ rusubáguëꞌë-nu dul-laꞌ nigula naꞌ guzóalenëꞌ-nu zíꞌalö.
12 Lëscaꞌ caní channö tu nigula nutsaga náꞌlennu bönniꞌ usannu-nëꞌ,
en síꞌinu-nëꞌ bönniꞌ yúbölö,
runnu caꞌ dul-laꞌ le riguitsaj xibá que yöl-laꞌ nutsaga naꞌ.
Jesús rulidza tsáhuëꞌë-biꞌ yuguꞌ bíꞌidoꞌ
13 Níꞌirö bilaꞌdxín bönachi ga zoëꞌ Jesús dujuáꞌgaquiëꞌ bíꞌidoꞌ quéguequi.
Të́ꞌëni ixóa nëꞌë légacabiꞌ,
ateꞌ gulaꞌsí lógaquiëꞌ bönniꞌ usëda queëꞌ Jesús taꞌdil-la dídzaꞌgaquiëꞌ nupa naꞌ dujuáꞌagaca légacabiꞌ.
14 Cateꞌ biléꞌenëꞌ Jesús lë ni,
gulénëꞌ légaquiëꞌ,
en gunnë́ꞌ:
―Guliꞌgüíꞌ-gácabiꞌ bíꞌidoꞌ lataj ilaꞌdxinbiꞌ quiaꞌ.
Bitiꞌ uzágaꞌgacaliꞌ-biꞌ,
tuꞌ gataꞌ quégaca nupa nácagaca ca bíꞌidoꞌ ni,
lataj ga rinná bëꞌë Dios.
15 Le nácatë reaꞌ libíꞌiliꞌ:
Nu cabí siꞌ lu nëꞌe le rinná bëꞌë Dios ca runbiꞌ tu bíꞌidoꞌ,
bitiꞌ caꞌ tsaza ga niꞌ rinná bëꞌë.
16 Níꞌirö Jesús bunidëꞌ-biꞌ yuguꞌ bíꞌidoꞌ naꞌ.
Guxóa nëꞌë légacabiꞌ,
en bulidza tsáhuëꞌë-biꞌ.
Bönniꞌ cuidiꞌ napëꞌ yöl-laꞌ tsahuiꞌ
17 Cateꞌ buꞌë Jesús nöza,
carelö bidëꞌ tu bönniꞌ,
en buzóa zxibëꞌ lahuëꞌ Jesús,
en gunábinëꞌ Lëꞌ,
rnnëꞌ:
―Bönniꞌ Usedi idú dxiꞌa,
¿nacxi gunaꞌ para idéliꞌdaꞌ yöl-laꞌ naꞌbán idú?
18 Jesús gudxëꞌ lëꞌ:
―¿Bizx que ruꞌu nedaꞌ didzaꞌ,
rnnoꞌ:
“Idú dxiꞌa”?
Cuntu nu bönniꞌ náquiëꞌ idú dxiꞌa.
Tuzëꞌ Dios náquiëꞌ idú dxiꞌa.
19 Chinö́z quézinuꞌ yuguꞌ le gunná bëꞌë Dios,
gunnë́ꞌ:
Bitiꞌ gunuꞌ dul-laꞌ le riguitsaj xibá que yöl-laꞌ nutsaga naꞌ.
Bitiꞌ gútiuꞌ bönachi.
Bitiꞌ cuanuꞌ.
Bitiꞌ inníoꞌ que luzóꞌo le cabí nácatë.
Bitiꞌ ucáchiꞌlanuꞌ.
Ben bal xuz xinóꞌo.
20 Bubiꞌë didzaꞌ bönniꞌ naꞌ,
rëꞌ Jesús:
―Bönniꞌ Usedi,
yúguꞌtë lë ni run cazaꞌ cateꞌ niꞌ nácateaꞌ bíꞌidoꞌ.
21 Len yöl-laꞌ dxiꞌi ladxiꞌ queëꞌ,
Jesús buyúëꞌ lëꞌ,
rnnëꞌ:
―Tu le riyadzaj quiuꞌ.
Guyéaj,
yöjëtiꞌ yúguꞌtë le dë quiuꞌ,
en bunödzaj quégaca bönachi yechiꞌ lë naꞌ siꞌu,
ateꞌ gataꞌ quiuꞌ yöl-laꞌ tsahuiꞌ yehuaꞌ yubá.
Níꞌirö huöduꞌ quiaꞌ,
gacuꞌ ca tu bönniꞌ saꞌyéajëꞌ söjtë́ꞌë lëꞌe yaga cruz,
ateꞌ toꞌo nedaꞌ.
22 Cateꞌ biyönnëꞌ didzaꞌ ni,
buíꞌinnëꞌ,
ateꞌ söhuö́jëꞌ risëbi ládxëꞌë tuꞌ dëdaꞌ yöl-laꞌ tsahuiꞌ queëꞌ.
23 Níꞌirö buyúëꞌ Jesús gásibiꞌilëꞌ,
en gudxëꞌ yuguꞌ bönniꞌ usëda queëꞌ:
―Böniga naca ilaꞌyaza nupa taꞌléꞌe yöl-laꞌ tsahuiꞌ ga rinná bëꞌë Dios.
24 Buluꞌbáninëꞌ bönniꞌ usëda queëꞌ ca naca xtídzëꞌë,
ateꞌ leyúbölö Jesús gudxëꞌ légaquiëꞌ:
―Libiꞌiliꞌ,
zxíꞌinaꞌdoꞌ,
böniga naca ilaꞌyáziëꞌ bönniꞌ tuꞌzxöni ládxiꞌgaquiëꞌ yöl-laꞌ tsahuiꞌ quégaquiëꞌ ga rinná bëꞌë Dios.
25 Nácarö böniga tsáziëꞌ nu bönniꞌ riléꞌenëꞌ yöl-laꞌ tsahuiꞌ ga rinná bëꞌë Dios,
ca tö́dibaꞌ böaꞌ taꞌbía-baꞌ bönachi lu nagui yötsiꞌ.
26 Cateꞌ bilaꞌyönnëꞌ didzaꞌ ni,
buluꞌbánitërönëꞌ caꞌ.
Taꞌnnë́ꞌ laꞌ légacasëꞌ:
―¿Nuzxi caz gaca ulá,
channö?
27 Buyúëꞌ Jesús légaquiëꞌ,
rnnëꞌ:
―Bitiꞌ gaca gun bönachi lë ni,
pero huáquiëꞌ Dios,
tuꞌ rizéquiꞌnëꞌ Dios yúguꞌtë.
28 Níꞌirö Pedro gudxëꞌ Lëꞌ:
―Xan,
netuꞌ nucáꞌanatuꞌ yúguꞌtë,
en dáꞌatuꞌ Liꞌ.
29 Bubiꞌë didzaꞌ Jesús,
rnnëꞌ:
―Le nácatë reaꞌ libíꞌiliꞌ,
nu bönniꞌ ucáꞌanëꞌ lidxëꞌ,
o bö́chëꞌë,
o zanëꞌ,
o xuzëꞌ,
o xinë́ꞌë,
o nigula queëꞌ,
o yuguꞌ zxíꞌinëꞌ,
o xiyúëꞌ,
tuꞌ runëꞌ xichinaꞌ o tuꞌ runëꞌ libán que didzaꞌ dxiꞌa quiaꞌ,
30 bönniꞌ ni huazíꞌ queëꞌ iaꞌtú gayuáꞌtërö caꞌ dza ni zóaruꞌ naꞌa,
yuguꞌ lidxëꞌ,
en yuguꞌ bö́chëꞌë,
en yuguꞌ zanëꞌ,
en yuguꞌ xinë́ꞌë,
en yuguꞌ zxíꞌinëꞌ,
en yuguꞌ xiyúëꞌ,
encaꞌ yuguꞌ le ilaꞌbía ládxiꞌgaca bönachi lëꞌ,
ateꞌ lu yödzölió siꞌ zaꞌ,
gataꞌ yöl-laꞌ naꞌbán idú queëꞌ.
31 Zián nupa nácagaca lo naꞌa,
ilaca cuídiꞌsö niꞌ,
ateꞌ nupa nácagaca cuídiꞌsö naꞌa,
ilaca lo niꞌ.
Leyúbölö riguíxjöꞌë Jesús ca siꞌ ilútiëꞌ Lëꞌ
32 Cateꞌ niꞌ yúꞌugaquiëꞌ nöza,
taꞌbenëꞌ söjáquiëꞌ Jerusalén,
nanö́ruëꞌ Jesús lógaquiëꞌ bönniꞌ usëda queëꞌ.
Nanítiguequinëꞌ,
en lu yöl-laꞌ rádxisö söjácalenëꞌ Lëꞌ.
Leyúbölö Jesús guchë́ꞌë quez idxínnutëꞌ naꞌ.
Gusí lahuëꞌ ruíꞌilenëꞌ légaquiëꞌ didzaꞌ ca naca le ral-laꞌ gaca queëꞌ.
33 Rnnëꞌ:
―Riléꞌe quéziliꞌ ribenruꞌ zéajruꞌ Jerusalén ga niꞌ zoa nu udödi nedaꞌ,
Bönniꞌ Guljëꞌ Bönachi,
lu náꞌagaquiëꞌ bixúz unná bëꞌ,
en lu náꞌagaquiëꞌ bönniꞌ yudoꞌ usedi,
ateꞌ chúguiëꞌ quiaꞌ gátiaꞌ,
en uluꞌdödëꞌ nedaꞌ lu náꞌagaquiëꞌ bönniꞌ ziꞌtuꞌ.
34 Bönniꞌ naꞌ uluꞌtitjëꞌ nedaꞌ,
en ilúndëꞌë nedaꞌ ziꞌ.
Uluꞌchejëꞌ nedaꞌ zxönaꞌ.
Níꞌirö ilútiëꞌ nedaꞌ,
pero cateꞌ gaca tsonna dza ubanaꞌ lu yöl-laꞌ guti.
Jacobo en Juan taꞌnábinëꞌ Jesús bi gunëꞌ quégaquiëꞌ
35 Níꞌirö gulaꞌbiguëꞌë Jacobo,
en Juan,
zxíꞌinëꞌ Zebedeo,
lahuëꞌ Jesús,
en tëꞌ Lëꞌ:
―Bönniꞌ Usedi,
rë́ꞌënituꞌ gunuꞌ queë́tuꞌ le inábatuꞌ.
36 Jesús gudxëꞌ légaquiëꞌ:
―¿Bizxi rë́ꞌëniliꞌ gunaꞌ queë́liꞌ?
37 Gulë́ꞌ Lëꞌ:
―Cateꞌ idxín dza cöꞌu ga inná bëꞌu,
ben ga cö́ꞌötuꞌ tutuꞌ cuituꞌ ibëla,
en iaꞌtutuꞌ cuituꞌ yö́göla.
38 Níꞌirö Jesús gudxëꞌ légaquiëꞌ:
―Bitiꞌ nö́ziliꞌ bi rinábaliꞌ.
¿Naruꞌ huáca síꞌiliꞌ le ral-laꞌ siꞌa nedaꞌ,
le naca le quiꞌi sacaꞌa?
¿Naruꞌ huáca idílaliꞌ nisa ca idilaꞌ nedaꞌ nisa,
gátiaꞌ?
39 Buluꞌbiꞌë didzaꞌ,
taꞌnnë́ꞌ:
―Huácatuꞌ.
Jesús gudxëꞌ légaquiëꞌ:
―Le nácatë,
le quiꞌi sacaꞌa nedaꞌ,
síꞌiliꞌ caꞌ libíꞌiliꞌ,
en ca idilaꞌ nedaꞌ nisa,
idílaliꞌ caꞌ nisa,
40 pero bitiꞌ dë lu naꞌa cö́aꞌ nu cuía cuitaꞌ ibëla,
en nu cuía cuitaꞌ yö́göla.
Dios unödzjëꞌ quégaquiëꞌ bönniꞌ chinupë́ꞌë quégaquiëꞌ yuguꞌ lataj naꞌ.
41 Cateꞌ bilaꞌyönnëꞌ iaꞌchíëꞌ bönniꞌ usëda queëꞌ Jesús didzaꞌ ni,
gulaꞌlenëꞌ Jacobo,
en Juan naꞌ.
42 Níꞌirö Jesús bulidzëꞌ légaquiëꞌ,
rnnëꞌ:
―Nöz quéziliꞌ ca tun nupa taꞌnná beꞌe yuguꞌ yödzö,
tuꞌzenëꞌ bach bönachi,
ateꞌ nupa nácagaca lo ládjagaquiëꞌ taꞌnná beꞌe luzë́ꞌeguequi.
43 Bitiꞌ gaca caní queë́liꞌ,
pero nu guë́ꞌëni gaca zxön ga zóaliꞌ,
ral-laꞌ gun xichinliꞌ iaꞌzícaꞌröliꞌ,
44 ateꞌ nútiꞌtëslöliꞌ nu guë́ꞌëni gaca lo ral-laꞌ gaca ca bönniꞌ huen dxin tsaz queë́liꞌ yúguꞌtëliꞌ.
45 Caní ral-laꞌ gunliꞌ tuꞌ bidaꞌ ni nedaꞌ,
Bönniꞌ Guljëꞌ Bönachi,
calëga para nu gun xichinaꞌ,
pero para gunaꞌ xichíngaca bönachi,
en udödaꞌ yöl-laꞌ naꞌbán quiaꞌ le huöáꞌuidaꞌ bönachi zián.
Jesús ruúnëꞌ Bartimeo, bönniꞌ lo chul-la
46 Níꞌirö bilaꞌdxinëꞌ Jesús,
en yuguꞌ bönniꞌ dáꞌgaquiëꞌ Lëꞌ yödzö Jericó.
Cateꞌ niꞌ rurujëꞌ Jesús yödzö ni,
dzágagaquiëꞌ Lëꞌ yuguꞌ bönniꞌ usëda queëꞌ,
encaꞌ bönachi zián.
Raꞌ nöza niꞌ röꞌë tu bönniꞌ nachul-la lahuëꞌ,
lëꞌ Bartimeo,
zxíꞌinëꞌ Timeo.
Rinabëꞌ nu bi gúnnasö queëꞌ.
47 Cateꞌ biyönnëꞌ Bartimeo ridödëꞌ Jesús,
bönniꞌ Nazaret,
niꞌ,
gusí lahuëꞌ ruꞌë zidzaj didzaꞌ,
rnnëꞌ:
―¡Jesús,
zxíꞌini xiꞌsóëꞌ David!
¡Buéchiꞌ ladxiꞌ nedaꞌ!
48 Nupa taꞌdödi niꞌ gulaꞌdil-la lëꞌ didzaꞌ.
Të lëꞌ:
―Busayaj ruꞌu.
Níꞌirö zídzajrö bulidzëꞌ,
rnnëꞌ:
―¡Zxíꞌini xiꞌsóëꞌ David!
¡Buéchiꞌ ladxiꞌ nedaꞌ!
49 Níꞌirö guzóëꞌ dxisö Jesús,
ribözëꞌ,
ateꞌ rëꞌ légaquiëꞌ:
―Buliꞌlidzëꞌ.
Buluꞌlidzëꞌ bönniꞌ naꞌ nachul-la lahuëꞌ.
Tëꞌ lëꞌ:
―¡Butipa ládxuꞌu!
¡Guyaschi!
¡Rulidzëꞌ liꞌ!
50 Níꞌirö gurúꞌunëꞌ tsöláꞌalö lariꞌ naxóa yenëꞌ.
Laꞌ guyásatëꞌ,
en bidëꞌ ga naꞌ zoëꞌ Jesús.
51 Jesús gunábinëꞌ lëꞌ,
rnnëꞌ:
―¿Bizxi rë́ꞌënuꞌ gunaꞌ quiuꞌ?
Bubiꞌë didzaꞌ bönniꞌ naꞌ nachul-la lahuëꞌ,
rnnëꞌ:
―Bönniꞌ Usedi,
rë́ꞌëndaꞌ gunuꞌ ga huöálaj guiö́j lahuaꞌ.
52 Jesús gudxëꞌ lëꞌ:
―Böaj lidxuꞌ.
Chinuhuöácuꞌ tuꞌ réajlëꞌu nedaꞌ.
Laꞌ böáljatë guiö́j lahuëꞌ,
ateꞌ saꞌyéajlenëꞌ Jesús.