Tu nigula uzëbi, en bönniꞌ ruchiꞌa rusörö́ëꞌ
18
Níꞌirö bucúdzuꞌë didzaꞌ Jesús,
rëꞌ légaquiëꞌ ca run bayudxi ulídzaticaꞌsiruꞌ-nëꞌ Dios,
en bitiꞌ gaca chopa ládxiꞌruꞌ.
San Lucas 18:1-17
―Zoëꞌ tu bönniꞌ ruchiꞌa rusörö́ëꞌ tu yödzö,
bönniꞌ bitiꞌ rádxinëꞌ Dios,
en bitiꞌ runëꞌ nu bönniꞌ bal.
3 Laꞌ yödzö náꞌasö zóanu tu nigula uzëbi,
ateꞌ bidxinnu nigula ni ga zoëꞌ bönniꞌ ruchiꞌa rusörö́ëꞌ naꞌ,
rnnanu:
“Buchiꞌa busörö́ le run quiaꞌ nu ruáꞌ döꞌ quiaꞌ.”
4 Xidzé bitiꞌ gúꞌunnëꞌ bi gunëꞌ queë́nu,
pero gudödi niꞌ guzáꞌ ládxëꞌë,
rnnëꞌ:
“Bitiꞌ rádxidaꞌ-nëꞌ Dios,
en bitiꞌ runaꞌ nu bönniꞌ bal,
5 pero tuꞌ rupízxjanu nigula uzëbi ni nedaꞌ,
que lë ni naꞌ uchiꞌa usörö́aꞌ-nu,
para cabí guídaticaꞌsinu ni,
en para cabí tödi bëꞌ upízxjanu nedaꞌ.”
6 Níꞌirö Xanruꞌ rëꞌ légaquiëꞌ,
rnnëꞌ:
―Guliꞌzë́ nágaliꞌ ca naꞌ gunnë́ꞌ bönniꞌ ruchiꞌa rusörö́ëꞌ naꞌ,
bönniꞌ bitiꞌ náquiëꞌ tsahuiꞌ.
7 ¿Naruꞌ cabí uchiꞌa usörö́ëꞌ Dios bönachi gurö́ cazëꞌ queëꞌ,
nupa naꞌ tuꞌlidza Lëꞌ rëla te dza?
¿Naruꞌ huadzétsenëꞌ gácalenëꞌ légaquiëꞌ?
8 Reaꞌ libíꞌiliꞌ:
Laꞌ uchiꞌa usörö́tenëꞌ légaquiëꞌ.
Cateꞌ huödaꞌ nedaꞌ,
Bönniꞌ Guljëꞌ Bönachi,
¿naruꞌ idzö́lidaꞌ nupa taꞌyéajlëꞌ nedaꞌ luyú ni?
Tu bönniꞌ yudoꞌ fariseo, en tu bönniꞌ uquízxaj
9 Bucúdzuꞌë didzaꞌ Jesús ca naca quégaquiëꞌ bönniꞌ tuꞌbéaj tsahuiꞌ cuíngaquiëꞌ,
en tuꞌcáꞌanëꞌ cáꞌasö iaꞌzícaꞌrö bönachi.
10 Gunnë́ꞌ:
―Bilaꞌdxinëꞌ chopëꞌ bönniꞌ ga naca chila yudoꞌ para uluꞌlidzëꞌ Dios.
Tuëꞌ bönniꞌ naꞌ náquiëꞌ bönniꞌ yudoꞌ fariseo,
ateꞌ iaꞌtúëꞌ naꞌ náquiëꞌ bönniꞌ ruquízxjëꞌ lázagaca bönachi.
11 Guzuínëꞌ bönniꞌ yudoꞌ fariseo naꞌ,
en caní bulidzëꞌ Dios,
rnnëꞌ:
“Dios,
reaꞌ Liꞌ:
Xclenuꞌ,
tuꞌ cabí nacaꞌ ca nácagaquiëꞌ iaꞌzícaꞌrëꞌ bönniꞌ,
nácagaquiëꞌ gubán,
en bitiꞌ nácagaquiëꞌ tsahuiꞌ.
Taꞌguitsjëꞌ xibá que yöl-laꞌ nutsaga naꞌ.
Lëscaꞌ bitiꞌ nacaꞌ ca bönniꞌ uquízxaj ni.
12 Nedaꞌ runaꞌ gubasa chopa luzuí tuꞌ xunuꞌ dza huéaj,
en runödzjaꞌ que yudoꞌ tu cöꞌ huéaj tuꞌ chi cöꞌ que yúguꞌtë le rataꞌ quiaꞌ.”
13 Guzóazëꞌ ziꞌtuꞌ bönniꞌ uquízxaj naꞌ,
en bitiꞌ böázxjanëꞌ ichisa lahuëꞌ uyúëꞌ lúzxiba,
pero gudapëꞌ luchuꞌë,
rnnëꞌ:
“Dios,
buéchiꞌ ladxiꞌ nedaꞌ,
bönniꞌ dul-laꞌ.”
14 Nedaꞌ reaꞌ libíꞌiliꞌ:
Bö́ajëꞌ lidxëꞌ bönniꞌ uquízxaj naꞌ,
nuhuöáquiëꞌ tsahuiꞌ lahuëꞌ Dios,
calëga iaꞌtúëꞌ bönniꞌ niꞌ.
Nútiꞌtës bönniꞌ run ba zxön cuinëꞌ,
gunëꞌ Dios ga huötaꞌ igulëꞌ,
pero nu bönniꞌ rizóëꞌ nöxaj ladxiꞌ,
gunëꞌ Dios ga gácarëꞌ lo.
Jesús rulidza tsáhuëꞌë-biꞌ yuguꞌ bíꞌidoꞌ
15 Níꞌirö bilaꞌdxinëꞌ yuguꞌ bönniꞌ,
en nigula ga zoëꞌ Jesús,
nachë́ꞌgaquiëꞌ-biꞌ yuguꞌ bíꞌidoꞌ quégaquiëꞌ para ixóa nëꞌë Jesús légacabiꞌ.
Cateꞌ bilaꞌléꞌenëꞌ yuguꞌ bönniꞌ usëda queëꞌ Jesús lë ni,
gulaꞌdil-lëꞌ légaquiëꞌ.
16 Níꞌirö Jesús bulidzëꞌ yuguꞌ bönniꞌ dáꞌgaquiëꞌ Lëꞌ,
rnnëꞌ:
―Guliꞌgüíꞌi-biꞌ lataj ilaꞌdxinbiꞌ bíꞌidoꞌ ni ga zoaꞌ.
Bitiꞌ uzágaꞌliꞌ xinö́zagacabiꞌ,
tuꞌ gataꞌ quégaca nupa nácagaca ca biꞌi caní lataj ga rinná bëꞌë Dios.
17 Le nácatë reaꞌ libíꞌiliꞌ:
Nu cabí siꞌ lu nëꞌe le rinná bëꞌë Dios,
ca runbiꞌ tubiꞌ bíꞌidoꞌ,
bitiꞌ caꞌ tsaza ga niꞌ rinná bëꞌë Lëꞌ.
Tu bönniꞌ riléꞌenëꞌ yöl-laꞌ tsahuiꞌ
18 Tu bönniꞌ unná bëꞌ gunábinëꞌ Jesús,
rnnëꞌ:
―Bönniꞌ Usedi idú dxiꞌa.
¿Bizxi ral-laꞌ gunaꞌ para idéliꞌdaꞌ yöl-laꞌ naꞌbán idú?
San Lucas 18:18-43
19 Jesús rëꞌ lëꞌ:
―¿Bizx que rëꞌu nedaꞌ:
“Idú dxiꞌa”?
Cuntu nu bönniꞌ náquiëꞌ idú dxiꞌa.
Tuzëꞌ Dios náquiëꞌ idú dxiꞌa.
20 Nöz quézinuꞌ yuguꞌ le gunná bëꞌë Dios:
Bitiꞌ gunuꞌ dul-laꞌ le riguitsaj xibá que yöl-laꞌ nutsaga naꞌ.
Bitiꞌ gútigacuꞌ bönachi.
Bitiꞌ cuanuꞌ.
Bitiꞌ inníoꞌ que luzóꞌo le cabí nácatë.
Ben bal xuz xinóꞌo.
21 Bönniꞌ naꞌ rëꞌ Jesús,
rnnëꞌ:
―Yúguꞌtë lë ni runaꞌ ga gudelaꞌ nacaꞌ bíꞌidoꞌ.
22 Cateꞌ biyönnëꞌ Jesús didzaꞌ ni,
rëꞌ lëꞌ:
―Iaꞌtú le riyadzaj quiuꞌ gunuꞌ.
Bëtiꞌ yúguꞌtë le dë quiuꞌ,
ateꞌ lë naꞌ siꞌu bunödzaj quégaca bönachi yechiꞌ,
ateꞌ gataꞌ quiuꞌ yöl-laꞌ tsahuiꞌ yehuaꞌ yubá.
Níꞌirö gudá,
gudáꞌ nedaꞌ.
23 Cateꞌ bönniꞌ naꞌ biyönnëꞌ didzaꞌ ni,
ruhuíꞌinnëꞌ,
tuꞌ dëdaꞌ yöl-laꞌ tsahuiꞌ queëꞌ.
24 Cateꞌ biléꞌenëꞌ Jesús ca naꞌ ruhuíꞌinnëꞌ bönniꞌ naꞌ,
rnnëꞌ:
―¡Bicaꞌ böniga gaca,
ilaꞌyaza nupa taꞌléꞌe yöl-laꞌ tsahuiꞌ ga rinná bëꞌë Dios!
25 Gácarö tö́dibaꞌ böaꞌ nagui yötsiꞌ,
ca tsáziëꞌ tu bönniꞌ riléꞌenëꞌ yöl-laꞌ tsahuiꞌ ga rinná bëꞌë Dios.
26 Níꞌirö nupa bilaꞌyöni didzaꞌ ni gulaꞌnná:
―¿Nuzxi caz gaca ulá,
channö?
27 Jesús gudxëꞌ légaquiëꞌ:
―Le bitiꞌ gaca ilunëꞌ bönniꞌ,
huáca gunëꞌ Dios.
28 Níꞌirö Pedro rëꞌ Jesús:
―Buyútsöcaꞌ,
netuꞌ nucáꞌanatuꞌ yúguꞌtë le dë queë́tuꞌ,
en dáꞌatuꞌ Liꞌ.
29 Níꞌirö Jesús rëꞌ légaquiëꞌ:
―Le nácatë reaꞌ libíꞌiliꞌ,
nu bönniꞌ ucáꞌanëꞌ lidxëꞌ,
o xuz xinë́ꞌë,
o yuguꞌ böchiꞌ zanëꞌ,
o nigula queëꞌ,
o yuguꞌ zxíꞌinëꞌ,
tuꞌ ruíꞌi ládxëꞌë inná bëꞌë Dios,
30 bönniꞌ ni huazíꞌirëꞌ dza ni zóaruꞌ naꞌa,
ateꞌ dza siꞌ zaꞌ idéliꞌnëꞌ yöl-laꞌ naꞌbán idú.
Jesús riguíxjöꞌë leyúbölö ca siꞌ ilútiëꞌ Lëꞌ
31 Jesús guchë́ꞌë quez queëꞌ idxínnutëꞌ bönniꞌ usëda queëꞌ,
en rëꞌ légaquiëꞌ:
―Buliꞌyútsöcaꞌ,
ribenruꞌ zéajruꞌ Jerusalén,
ga niꞌ ilaca yúguꞌtë le nazúajgaca lu guichi ca gulaꞌnnë́ꞌ bönniꞌ guluꞌë didzaꞌ uláz queëꞌ Dios ca ral-laꞌ gaca quiaꞌ nedaꞌ,
Bönniꞌ Guljëꞌ Bönachi.
32 Yuguꞌ bönniꞌ Jerusalén uluꞌdödëꞌ nedaꞌ lu náꞌagaquiëꞌ bönniꞌ ziꞌtuꞌ,
ateꞌ uluꞌtitjëꞌ nedaꞌ,
en uluꞌlidza ziꞌë nedaꞌ,
en uluꞌchejëꞌ nedaꞌ zxönaꞌ.
33 Ilaꞌguinëꞌ nedaꞌ,
ateꞌ tö́dirö niꞌ ilútiëꞌ nedaꞌ,
pero cateꞌ gaca tsonna dza ubanaꞌ.
34 Bitiꞌ gulaꞌyéajniꞌinëꞌ bönniꞌ usëda queëꞌ didzaꞌ ni,
en bitiꞌ guléquibeꞌenëꞌ ca saꞌyéaj le ruíꞌilenëꞌ légaquiëꞌ didzaꞌ que,
tuꞌ naca le cabí sequiꞌ ilaꞌyéajniꞌinëꞌ.
Jesús ruúnëꞌ tu bönniꞌ yödzö Jericó nachul-la lahuëꞌ
35 Cateꞌ chizóa idxinëꞌ Jesús yödzö Jericó,
zoëꞌ tu bönniꞌ niꞌ nachul-la lahuëꞌ.
Röꞌë raꞌ nöza rinabëꞌ nu bi gúnnasö queëꞌ.
36 Bönniꞌ niꞌ biyönnëꞌ taꞌdödi bönachi zián niꞌ,
ateꞌ gunabëꞌ bizxi naꞌ raca.
37 Bönachi niꞌ të lëꞌ:
―Jesús,
bönniꞌ Nazaret,
ridödëꞌ ni.
38 Níꞌirö bönniꞌ naꞌ nachul-la lahuëꞌ bëꞌë zidzaj didzaꞌ,
rnnëꞌ:
―¡Jesús,
zxíꞌini xiꞌsóëꞌ David,
buéchiꞌ ladxiꞌ nedaꞌ!
39 Yuguꞌ bönniꞌ nanö́rugaquiëꞌ lahuëꞌ Jesús gulaꞌdil-lëꞌ bönniꞌ naꞌ nachul-la lahuëꞌ para usayaj ruꞌë,
pero lëꞌ zídzajrö bëꞌë didzaꞌ,
rnnëꞌ:
―¡Zxíꞌini xiꞌsóëꞌ David,
buéchiꞌ ladxiꞌ nedaꞌ!
40 Níꞌirö guzë́ꞌ dxiz Jesús ribözëꞌ,
ateꞌ gunná béꞌenëꞌ nu tsöjlidza lëꞌ para idxinëꞌ lahuëꞌ.
Cateꞌ bönniꞌ naꞌ nachul-la lahuëꞌ bidxinëꞌ lahuëꞌ Jesús,
gunábinëꞌ Jesús lëꞌ,
rnnëꞌ:
41 ―¿Bizxi rë́ꞌënuꞌ gunaꞌ quiuꞌ?
Bönniꞌ naꞌ nachul-la lahuëꞌ rnnëꞌ:
―Rë́ꞌënidaꞌ huöálaj guiö́j lahuaꞌ.
42 Jesús rëꞌ lëꞌ:
―Chiböálaj guiö́j loꞌ.
Chiböácuꞌ tuꞌ réajlëꞌu nedaꞌ.
43 Laꞌ níꞌisö buléꞌetenëꞌ,
ateꞌ saꞌyéajlenëꞌ Jesús,
riguꞌë Dios yöl-laꞌ ba.
Lëscaꞌ yúguꞌtë bönachi nacuáꞌ niꞌ,
en bilaꞌléꞌe lë naꞌ guca gulaꞌgúꞌu Dios yöl-laꞌ ba.