Run bönadxi queë́ruꞌ gunruꞌ ga nu gun dul-laꞌ
17
Jesús rëꞌ yuguꞌ bönniꞌ dáꞌgaquiëꞌ Lëꞌ,
rnnëꞌ:
―Nacuáꞌticaꞌsö le tun ga ilún bönachi dul-laꞌ,
pero bicaꞌ bayechiꞌ bönniꞌ naꞌ runëꞌ ga nu gun dul-laꞌ.
San Lucas 17:1-19
2 Dxíꞌarö gaca queëꞌ bönniꞌ naꞌ runëꞌ caní,
nu ugal-laꞌ tu guiö́j riyëtu yaga yenëꞌ,
en tsöjchúꞌuna lëꞌ lu nísadoꞌ,
cáteꞌlö gunëꞌ ga gun dul-laꞌ nu biꞌi néquibiꞌ quiaꞌ.
3 Guliꞌgún chiꞌi cuinliꞌ.
Channö böchiꞌ luzóꞌo guꞌë döꞌ quiuꞌ,
buzéajniꞌi-nëꞌ,
en channö ubíꞌi ládxëꞌë,
buniti lo lëꞌ.
4 Sal-laꞌ gadxi luzuí tu dza guꞌë döꞌ quiuꞌ,
en gadxi luzuí caꞌ guídëꞌ ga zuꞌ,
en guíëꞌ liꞌ:
“Rubíꞌi ládxaꞌa”,
ral-laꞌ uniti loꞌ lëꞌ.
Yöl-laꞌ huáca que le réajlëꞌëruꞌ Cristo
5 Níꞌirö yuguꞌ bönniꞌ gubáz queëꞌ Xanruꞌ tëꞌ Lëꞌ,
taꞌnnë́ꞌ:
―Ben ga tséajlëꞌërötuꞌ-nëꞌ Dios.
6 Xanruꞌ rëꞌ légaquiëꞌ,
rnnëꞌ:
―Laꞌtuꞌ naca cuídiꞌsö yöl-laꞌ réajlëꞌ queë́liꞌ Dios,
nácasö ca tu xisedoꞌ mostaza,
huáca guië́liꞌ yaga zxön ni:
“Gucuíta ni,
en yöjsóa lu nísadoꞌ”,
ateꞌ gun yaga naꞌ ca rnnaliꞌ.
Le ral-laꞌ gun nu naca huen dxin
7 Gunnë́ꞌ caꞌ Jesús:
―Channö zoëꞌ tuëꞌ bönniꞌ ladaj libíꞌiliꞌ,
en zoëꞌ queëꞌ tuëꞌ bönniꞌ nadóꞌo rugáꞌanëꞌ-baꞌ bëdxi o rulapëꞌ,
cateꞌ údxi gunëꞌ xichinëꞌ xanëꞌ,
¿naruꞌ huëtsëꞌ xanëꞌ lëꞌ,
innë́ꞌ:
“Gudá,
gurö́ꞌö gaguꞌ”?
8 ¡Calëga!
Caní guíëꞌ lëꞌ:
“Bupáꞌa le gahuaꞌ.
Guzóa sinaꞌ cuꞌu le guíꞌaj gahuaꞌ,
ateꞌ tö́dirö naꞌ huáca guíꞌaj gaguꞌ liꞌ.”
9 ¿Naruꞌ huëtsëꞌ bönniꞌ nadóꞌo queëꞌ naꞌ:
“Xclenuꞌ”,
tuꞌ benëꞌ ca gunná béꞌenëꞌ lëꞌ?
Runi nedaꞌ,
bitiꞌ gunëꞌ caní.
10 Lëscaꞌ caní gaca queë́liꞌ.
Cateꞌ chinunliꞌ yúguꞌtë le gunná béꞌenëꞌ Dios libíꞌiliꞌ,
ral-laꞌ innaliꞌ:
“Nácatuꞌ huen dxin cabí nácatuꞌ lesacaꞌ,
tuꞌ bénsötuꞌ le run bayudxi guntuꞌ.”
Chiëꞌ bönniꞌ téꞌenëꞌ huëꞌ nudzuꞌ ruzödi
11 Tsanni niꞌ yuꞌë Jesús nöza,
saꞌyéajëꞌ Jerusalén,
ridödëꞌ gapa dë yö́dzödoꞌ nabábagaca luyú Samaria,
en luyú Galilea.
12 Cateꞌ guyáziëꞌ tu yö́dzödoꞌ,
bilaꞌrúajëꞌ dutságagaquiëꞌ Lëꞌ chiëꞌ bönniꞌ téꞌenëꞌ huëꞌ nudzuꞌ ruzödi,
ateꞌ gulaꞌcuꞌë zíꞌtuꞌsö,
13 en tuꞌë zidzaj didzaꞌ,
taꞌnnë́ꞌ:
―¡Jesús,
Bönniꞌ Usedi!
¡Buéchiꞌ ladxiꞌ netuꞌ!
14 Cateꞌ biléꞌenëꞌ Jesús légaquiëꞌ,
rëꞌ légaquiëꞌ:
―Guliꞌtséaj,
guliꞌtsöjluíꞌi cuinliꞌ lógaca bixúz.
Tsanni niꞌ söjáquiëꞌ,
buluꞌhuöáquiëꞌ dxiꞌa.
15 Níꞌirö tuëꞌ bönniꞌ nútsëꞌë ládjagaquiëꞌ,
cateꞌ réquibeꞌenëꞌ chinuhuöáquiëꞌ dxiꞌa,
bö́ajëꞌ ga naꞌ zoëꞌ Jesús,
ruíꞌiticaꞌsëꞌ zidzaj didzaꞌ,
riguꞌë Dios yöl-laꞌ ba.
16 Biyéchuëꞌ,
en busudxín lahuëꞌ lu yu lahuëꞌ Jesús,
en rëꞌ Lëꞌ:
“¡Xclenuꞌ!”
―¿Naruꞌ cabí buluꞌhuöáquiëꞌ dxiꞌa chiëꞌ bönniꞌ?
¿Gazxi nacuáꞌtsëꞌ iaꞌzícaꞌrëꞌ bönniꞌ naꞌ?
18 ¿Naruꞌ cabí zoa nu huöda cuꞌu Dios yöl-laꞌ ba,
pero tuzëꞌ bönniꞌ ziꞌtuꞌ ni?
19 Níꞌirö Jesús gudxëꞌ bönniꞌ naꞌ,
rnnëꞌ:
―¡Guyasa,
en böaj lidxuꞌ!
¡Chiböácuꞌ dxiꞌa tuꞌ réajlëꞌu nedaꞌ!
Ca idxín le rinná bëꞌë Dios
20 Cateꞌ yuguꞌ bönniꞌ yudoꞌ fariseo taꞌnábinëꞌ Jesús bátaxi ral-laꞌ idxín le rinná bëꞌë Dios,
Lëꞌ bubiꞌë didzaꞌ,
rëꞌ légaquiëꞌ:
―Ca idxín le rinná bëꞌë Dios,
bitiꞌ naca le iléꞌeliꞌ.
San Lucas 17:20-37
21 Cuntu nu gaca inná:
“¡Ni bidxín!”,
o inná:
“¡Niꞌ bidxín!”
¡Buliꞌyútsöcaꞌ!
¡Rinná bëꞌë Dios lu icja ládxiꞌdoꞌgaca bönachi!
22 Níꞌirö Jesús gudxëꞌ yuguꞌ bönniꞌ usëda queëꞌ,
rnnëꞌ:
―Huadxín dza cateꞌ guë́ꞌëniliꞌ iléꞌeliꞌ dza huödaꞌ nedaꞌ,
Bönniꞌ Guljëꞌ Bönachi,
pero bitiꞌ iléꞌeliꞌ le.
23 Ilaꞌcuáꞌ nupa ilë́ libíꞌiliꞌ:
“¡Ni zoëꞌ!”,
o ilaꞌnná:
“¡Niꞌ zoëꞌ!”
Bitiꞌ tséajliꞌ niꞌ,
en bitiꞌ tséajlenliꞌ légaquiëꞌ.
24 Ca raca cateꞌ rëpi yösa,
ruzeníꞌ idáꞌalö lúzxiba,
lëscaꞌ caní gaca cateꞌ idxín dza huödaꞌ nedaꞌ,
Bönniꞌ Guljëꞌ Bönachi.
25 Zíꞌalö ca gaca lë ni,
run bayudxi quíꞌi sácaꞌdaꞌ,
ateꞌ bönachi dza ni zóaruꞌ naꞌa uluꞌcáꞌana nedaꞌ cáꞌasö.
26 Ca naꞌ guca dza niꞌ zoëꞌ Noé,
lëscaꞌ caní gaca cateꞌ idxín dza huödaꞌ nedaꞌ,
Bönniꞌ Guljëꞌ Bönachi.
27 Dza niꞌte naꞌ gulëꞌaj gulahuëꞌ.
Buluꞌtsaga náꞌagaquiëꞌ,
en buluꞌdödëꞌ zxíꞌinigaquiëꞌ lu yöl-laꞌ rutsaga naꞌ ga bidxintë dza guyáziëꞌ Noé lëꞌe barco zxön naꞌ nazíꞌi le arca,
ateꞌ bidxintë nisa guiö́j usuniti yödzölió le busuniti yúguꞌtëꞌ.
28 Lëscaꞌ caní guca dza niꞌ zoëꞌ Lot.
Gulëꞌaj gulahuëꞌ.
Guláꞌuëꞌ,
en gulútiꞌë.
Gulazëꞌ xiyúgaquiëꞌ,
en gulunëꞌ yuguꞌ yuꞌu quégaquiëꞌ.
29 Cateꞌ bidxín dza naꞌ burúajëꞌ Lot lu yödzö Sodoma,
böxaj guíꞌ ca tu nisa guiö́j,
encaꞌ le ruzéguidaꞌ nazíꞌi le azufre,
ateꞌ buluꞌsuniti yúguꞌtëꞌ.
30 Lëscaꞌ caní gaca cateꞌ idxín dza uluíꞌi lahuaꞌ nedaꞌ,
Bönniꞌ Guljëꞌ Bönachi.
31 ’Cateꞌ idxín dza naꞌ,
channö zoëꞌ tu bönniꞌ ícjoꞌolö,
en dzöꞌö le dë queëꞌ lu yuꞌu naꞌ,
bitiꞌ ral-laꞌ huötjëꞌ tsöjzxiꞌë le dë queëꞌ,
ateꞌ nu zoa laꞌ guixiꞌ,
lëscaꞌ caní,
bitiꞌ ral-laꞌ huöjëꞌ lidxëꞌ.
32 Guliꞌsáꞌ ládxiꞌliꞌ ca guca queë́nu nigula queëꞌ Lot.
33 Nu bönniꞌ rë́ꞌënëꞌ gun chiꞌë yöl-laꞌ naꞌbán queëꞌ,
unítiëꞌ le,
pero bönniꞌ udödëꞌ yöl-laꞌ naꞌbán queëꞌ niꞌa quiaꞌ,
udélëꞌë le.
34 ’Reaꞌ libíꞌiliꞌ:
Cateꞌ idxín rëla naꞌ,
ilaꞌcuꞌë chopëꞌ bönniꞌ tsözxö́n ga tasiëꞌ,
ateꞌ tuëꞌ uduzxiꞌa-nëꞌ,
en iaꞌtúëꞌ ucáꞌanaꞌ lëꞌ.
35 Ilaꞌcuáꞌanu huëtu tsözxö́n chópanu nigula,
ateꞌ tunu uduzxiꞌa-nu,
en iaꞌtunu ucáꞌanaꞌ-nu.
36 Ilaꞌcuꞌë chopëꞌ bönniꞌ laꞌ guixiꞌ,
ateꞌ tuëꞌ uduzxiꞌa-nëꞌ,
en iaꞌtúëꞌ ucáꞌanaꞌ lëꞌ.
37 Cateꞌ bilaꞌyönnëꞌ lë ni bönniꞌ usëda queëꞌ Jesús,
gulaꞌnábinëꞌ Lëꞌ,
taꞌnnë́ꞌ:
―Xan,
¿gazxi gaca lë ni?
Jesús rëꞌ légaquiëꞌ:
―Ga dë tu le nati,
niꞌ uluꞌdubi quézibaꞌ bíchulab.