9
Jesús gudxëꞌ caꞌ légaquiëꞌ,
rnnëꞌ:
―Le nácatë reaꞌ libíꞌiliꞌ,
nacuáꞌ ni nupa bitiꞌ ilátigaca cateꞌ ilaꞌléꞌerö idinná bëꞌë Dios luyú ni,
en iláꞌ lahui yöl-laꞌ huáca zxön queëꞌ.
Ridzáꞌa ca rináꞌ lahuëꞌ Jesús
2 Cateꞌ chigudödi xopa dza,
Jesús guchë́ꞌë Pedro,
en Jacobo,
en Juan,
ateꞌ légacasëꞌ yöjáquiëꞌ tu lu guíꞌa sibi.
Niꞌ bidzáꞌa ca rináꞌ lahuëꞌ Jesús lógaquiëꞌ yonnëꞌ naꞌ.
3 Guyëpi yösa beníꞌ lariꞌ nácuëꞌ Jesús,
ateꞌ guca chiguíchidoꞌos.
Zxílaꞌdoꞌos guca,
le cuntu nu raꞌ lariꞌ yödzölió ni gaca gun chiguíchidoꞌos ca guca lariꞌ naꞌ.
4 Buluꞌluíꞌi lógaquiëꞌ Elías,
en Moisés,
tuíꞌilenëꞌ Jesús didzaꞌ.
5 Níꞌirö Pedro gudxëꞌ Jesús:
―Bönniꞌ Usedi,
bicaꞌ ba rëꞌu zóaruꞌ ni.
Gúntsöcaꞌtuꞌ tsonna yuꞌu lágaꞌdoꞌ,
tu quiuꞌ,
iaꞌtú queëꞌ Moisés,
en iaꞌtú queëꞌ Elías.
6 Caní gunnë́ꞌ Pedro tuꞌ cabí nö́zinëꞌ bi naꞌ rnnëꞌ,
tuꞌ tádxinëꞌ bönniꞌ usëda queëꞌ Jesús naꞌ.
7 Níꞌirö gurö́ꞌö böaj le gulúꞌu zxul-la légaquiëꞌ,
ateꞌ biyö́n chiꞌi nu ruíꞌi didzaꞌ lu böaj naꞌ,
rnna:
―Bönniꞌ ni Zxíꞌinaꞌ.
Nadxíꞌidaꞌ Lëꞌ.
Buliꞌzë́ nágaliꞌ Lëꞌ.
8 Laꞌ buluꞌyutëꞌ pero cúnturö nu taꞌléꞌenëꞌ.
Tuzëꞌ Jesús zóalenëꞌ légaquiëꞌ.
9 Tsanni niꞌ yúꞌugaquiëꞌ nöza,
tuꞌdínniëꞌ lu guíꞌa sibi naꞌ,
Jesús gunná béꞌenëꞌ légaquiëꞌ cuntu nu uluꞌsiyönnëꞌ caꞌ,
lë naꞌ bilaꞌléꞌenëꞌ,
cateꞌ ubanrëꞌ lu yöl-laꞌ guti Lëꞌ,
Bönniꞌ Guljëꞌ Bönachi.
10 Que lë ni naꞌ gulaꞌgúꞌusëꞌ ícjagaquiëꞌ didzaꞌ ni bëꞌë,
ateꞌ laꞌ légacasëꞌ taꞌnabi yúdxinëꞌ luzáꞌagaquiëꞌ bizxi saꞌyéaj didzaꞌ naꞌ bëꞌë,
gunnë́ꞌ ubanëꞌ lu yöl-laꞌ guti.
11 Gulaꞌnábinëꞌ Jesús,
taꞌnnë́ꞌ:
―¿Bizx que taꞌnnë́ꞌ bönniꞌ yudoꞌ usedi run bayudxi guídëꞌ Elías zíꞌalö ca guídëꞌ Cristo?
12 Bubiꞌë didzaꞌ Jesús,
rnnëꞌ:
―Le nácatë guídëꞌ Elías zíꞌalö,
en ucuꞌë yúguꞌtë ca ral-laꞌ gaca.
Naꞌa,
¿bizxi saꞌyéaj le nazúaj lu guichi rnna run bayudxi quiꞌi sáquëꞌë Bönniꞌ Guljëꞌ Bönachi,
ateꞌ cáꞌasö uluꞌcáꞌana bönachi Lëꞌ?
13 Reaꞌ libíꞌiliꞌ:
Chibidëꞌ Elías,
ateꞌ gulunëꞌ queëꞌ tsca gulë́ꞌënnëꞌ,
tsca nazúaj lu guichi láꞌayi ca ral-laꞌ gaca queëꞌ.
Jesús ruúnëꞌ-biꞌ biꞌi bönniꞌ yuꞌu lëbiꞌ böꞌ xihuiꞌ
14 Cateꞌ niꞌ buluꞌdxinëꞌ Jesús,
en bönniꞌ dzágagaquiëꞌ Lëꞌ ga naꞌ nacuꞌë iaꞌzícaꞌrëꞌ bönniꞌ usëda queëꞌ Jesús,
bilaꞌléꞌenëꞌ nacuáꞌ bönachi zián niꞌ,
ateꞌ bönniꞌ yudoꞌ tuꞌsë́dinëꞌ taꞌdíl-lalenëꞌ yuguꞌ bönniꞌ usëda queëꞌ naꞌ didzaꞌ.
15 Cateꞌ bönachi zián naꞌ bilaꞌléꞌe Jesús,
buluꞌbani,
en carelö záꞌgaca ga naꞌ zëꞌë,
dijö́dxigaca Lëꞌ:
“Padiux.”
16 Níꞌirö Jesús gunábinëꞌ yuguꞌ bönniꞌ usëda queëꞌ naꞌ,
rnnëꞌ:
―¿Bizxi didzaꞌ naꞌ ridíl-lalenliꞌ légaquiëꞌ?
17 Bubiꞌë didzaꞌ tu bönniꞌ nútsëꞌë ladaj bönachi zián naꞌ,
rnnëꞌ:
―Bönniꞌ Usedi,
nachëꞌa-biꞌ biꞌi bö́nniꞌdoꞌ quiaꞌ ni quiuꞌ,
yuꞌu lëbiꞌ böꞌ xihuiꞌ le run ga bitiꞌ raca innëbiꞌ.
18 Cateꞌ böꞌ xihuiꞌ naꞌ ruꞌu lëbiꞌ,
rurixi rutula lëbiꞌ lu yu,
ateꞌ ribía bidxinaꞌ zidiꞌ ruáꞌabiꞌ,
en rutil-la láyaꞌbiꞌ.
Que lë ni naꞌ zeaj ridxítabiꞌ.
Gunábigacadaꞌ-nëꞌ bönniꞌ usëda quiuꞌ uluꞌbéajëꞌ böꞌ xihuiꞌ naꞌ,
pero bitiꞌ gulaꞌzéquiꞌnëꞌ.
19 Bubiꞌë didzaꞌ Jesús,
rnnëꞌ:
―Libiꞌiliꞌ,
bönniꞌ cabí taꞌyéajlëꞌë.
¿Gácaꞌxte caz ral-laꞌ sóalenaꞌ libíꞌiliꞌ?
¿Gácaꞌxte caz ral-laꞌ guáꞌ ilenaꞌ queë́liꞌ?
Guliꞌdiguáꞌ-biꞌ quiaꞌ ni.
20 Dujuáꞌagaquiëꞌ-biꞌ ga naꞌ zoëꞌ Jesús.
Cateꞌ böꞌ xihuiꞌ naꞌ biléꞌe Lëꞌ,
laꞌ buxízitë lëbiꞌ.
Gudzö́ꞌöbiꞌ lu yu,
ateꞌ burixi butula lëbiꞌ,
ateꞌ bidxía bidxinaꞌ zidiꞌ ruáꞌabiꞌ.
21 Níꞌirö Jesús gunábinëꞌ xúzibiꞌ biꞌi naꞌ,
rnnëꞌ:
―¿Gácaꞌxi chiguca raca caní queë́biꞌ?
Rnnëꞌ xúzibiꞌ naꞌ:
―Niꞌ nácatëbiꞌ bíꞌidoꞌ réꞌebiꞌ caní.
22 Zián luzuí rirúꞌuna lëbiꞌ lu guíꞌ,
en lu nisa para guti lëbiꞌ.
Que lë ni naꞌ,
channö racuꞌ latiꞌ,
buéchiꞌ ladxiꞌ netuꞌ,
gácalenuꞌ netuꞌ.
23 Jesús gudxëꞌ lëꞌ:
―Channö huáca tséajlëꞌu,
yúguꞌtë huáca channö tséajlëꞌu Dios.
24 Laꞌ bëꞌtëꞌ zidzaj didzaꞌ xúzibiꞌ biꞌi naꞌ,
rnnëꞌ:
―¡Réajlëꞌa!
¡Gúcalen nedaꞌ para tséajlëꞌëraꞌ Lëꞌ!
25 Cateꞌ biléꞌenëꞌ Jesús záꞌgaca bönachi zián,
tuꞌquí Lëꞌ,
buzenëꞌ bach böꞌ xihuiꞌ naꞌ,
rëꞌ le:
―Liꞌ,
böꞌ xihuiꞌ runuꞌ ga bitiꞌ raca inná,
en bitiꞌ raca yöni bönachi,
rinná béꞌedaꞌ liꞌ urujuꞌ lu biꞌi ni,
en bítiꞌrö tsuꞌu lëbiꞌ.
26 Gurö́dxiꞌa böꞌ xihuiꞌ naꞌ,
en burixi butúladaꞌ biꞌi naꞌ.
Níꞌirö burúajtë,
en bucáꞌana biꞌi naꞌ ca biꞌi nati cázabiꞌ.
Caꞌ naca,
guluíꞌi didzaꞌ bönachi zián niꞌ,
taꞌnná:
―Chinátibiꞌ.
27 Níꞌirö Jesús gudélëꞌë náꞌabiꞌ,
en buchisëꞌ-biꞌ,
ateꞌ guzuíbiꞌ biꞌi naꞌ.
28 Níꞌirö guyáziëꞌ Jesús tu yuꞌu,
ateꞌ laꞌ légacasëꞌ gulaꞌnábinëꞌ bönniꞌ usëda queëꞌ Lëꞌ,
taꞌnnë́ꞌ:
―¿Bizx que bitiꞌ guca ubéajtuꞌ netuꞌ böꞌ xihuiꞌ naꞌ?
29 Jesús gudxëꞌ légaquiëꞌ:
―Bitiꞌ gaca ubéajliꞌ cáꞌasö böꞌ xihuiꞌ caní,
pero tuz channö ulídzaliꞌ-nëꞌ Dios,
en gunliꞌ gubasa.
Jesús riguíxjöꞌë leyúbölö ca siꞌ ilútiëꞌ Lëꞌ
30 Cateꞌ buluꞌzë́ꞌë Jesús,
en yuguꞌ bönniꞌ dáꞌgaquiëꞌ Lëꞌ niꞌ,
gulaꞌdödëꞌ luyú Galilea.
Bitiꞌ rë́ꞌënëꞌ Jesús nu inözi ga naꞌ zoëꞌ
31 tuꞌ rusë́dinëꞌ yuguꞌ bönniꞌ usëda queëꞌ.
Rëꞌ légaquiëꞌ:
―Uluꞌdödëꞌ nedaꞌ,
Bönniꞌ Guljëꞌ Bönachi,
lu náꞌagaquiëꞌ bönniꞌ ilútiëꞌ nedaꞌ,
pero tödi gátiaꞌ,
cateꞌ gaca tsonna dza ubanaꞌ.
32 Bitiꞌ gulaꞌyéajniꞌinëꞌ didzaꞌ ni rëꞌ légaquiëꞌ,
ateꞌ tuꞌ tádxinëꞌ,
bitiꞌ bi gulaꞌnábinëꞌ Lëꞌ.
Nu naca lo
33 Níꞌirö Jesús,
en bönniꞌ dáꞌgaquiëꞌ Lëꞌ bilaꞌdxinëꞌ yödzö Capernaum,
ateꞌ tsanni niꞌ nacuꞌë lu yuꞌu,
Jesús gunábinëꞌ légaquiëꞌ,
rnnëꞌ:
―¿Bizxi didzaꞌ naꞌ gudíl-lalen luzáꞌaliꞌ cateꞌ niꞌ yúꞌuliꞌ nöza?
34 Légaquiëꞌ buluꞌsayaj rúꞌugaquiëꞌ,
tuꞌ gulaꞌdíl-lalen luzáꞌagaquiëꞌ didzaꞌ laꞌ nöza niꞌ núzxilögaquiëꞌ gáquiëꞌ bönniꞌ lo.
35 Níꞌirö guröꞌë Jesús,
en bulidzëꞌ idxínnutëꞌ bönniꞌ usëda queëꞌ.
Rëꞌ légaquiëꞌ:
―Nu rë́ꞌëni gaca lo ral-laꞌ gaca ca tu bönniꞌ cuídiꞌsö,
encaꞌ ca niꞌa náꞌaliꞌ yúguꞌtëliꞌ.
36 Níꞌirö Jesús gudélëꞌë-biꞌ tubiꞌ bíꞌidoꞌ,
en buzóëꞌ-biꞌ gatsaj láhuiꞌlö ga naꞌ nacuꞌë.
Niꞌ runidëꞌ-biꞌ,
rëꞌ légaquiëꞌ:
37 ―Nu bönniꞌ siꞌ lu nëꞌë tu bíꞌidoꞌ caní tuꞌ néquibiꞌ quiaꞌ,
siꞌ lu nëꞌë caꞌ nedaꞌ,
ateꞌ nu bönniꞌ siꞌ lu nëꞌë nedaꞌ,
calëga nédaꞌsö siꞌ lu nëꞌë,
pero siꞌ lu nëꞌë caꞌ Xuzaꞌ,
Bönniꞌ naꞌ nasö́l-lëꞌë nedaꞌ.
Nu bitiꞌ ridáꞌbagaꞌ rëꞌu, rácalen rëꞌu
38 Níꞌirö Juan gudxëꞌ Jesús:
―Bönniꞌ Usedi,
biléꞌetuꞌ-nëꞌ tu bönniꞌ rubéajëꞌ yuguꞌ böꞌ xihuiꞌ,
rugunëꞌ dxin loꞌ.
Gunná béꞌetuꞌ lëꞌ bítiꞌrö gunëꞌ caꞌ,
tuꞌ cabí dëꞌë rëꞌu.
39 Níꞌirö Jesús gudxëꞌ lëꞌ:
―Bitiꞌ inná béꞌeliꞌ-nëꞌ,
tuꞌ channö zoëꞌ nu bönniꞌ runëꞌ tu yöl-laꞌ huáca le zaꞌ yehuaꞌ yubá,
en rugunëꞌ dxin Laꞌ nedaꞌ,
bitiꞌ caꞌ gaca bönniꞌ naꞌ innë́ ziꞌë quiaꞌ.
40 Caní naca,
nu bitiꞌ ridáꞌbagaꞌ rëꞌu,
rácalen nu naꞌ rëꞌu.
41 Nútiꞌtës nu gunna queë́liꞌ tu zxígaꞌdoꞌ nisa guíꞌjaliꞌ tuꞌ dáꞌaliꞌ nedaꞌ,
Cristo,
siꞌi caz nu naꞌ le ral-laꞌ gataꞌ que.
Zoa bönadxi queë́ruꞌ gunruꞌ ga nu gun dul-laꞌ
42 Gunnë́ꞌ caꞌ Jesús:
―Nútiꞌtës nu gun ga gunbiꞌ dul-laꞌ tubiꞌ bíꞌidoꞌ caní réajlëꞌëbiꞌ nedaꞌ,
gácarö dxiꞌa ugal-laꞌ nu naꞌ guichi riyëtu yaga yeni,
en tsöjchúꞌuna cuini lu nísadoꞌ.
43 Channö tu noꞌo gun ga gunuꞌ dul-laꞌ,
guchugu le.
Dxíꞌarö gaca quiuꞌ tsöjtsáziuꞌ ga suꞌ ibanuꞌ zoa tuz noꞌo,
calëga zoa chopa noꞌo,
ateꞌ tsöjtsáziuꞌ lu guíꞌ gabila,
ga niꞌ bitiꞌ ulu guíꞌ que.
44 Lataj niꞌ bitiꞌ ilátibaꞌ buzugaꞌ yúꞌugacabaꞌ nupa tsöjcuáꞌ niꞌ,
ateꞌ guíꞌ naꞌ bitiꞌ caꞌ ulu.
45 Lëscaꞌ caní,
channö tu niꞌu gun ga gunuꞌ dul-laꞌ,
guchugu le.
Gácarö dxiꞌa quiuꞌ,
tsöjtsáziuꞌ ga suꞌ ibanuꞌ zoa tuz niꞌu,
calëga zoa chopa niꞌu,
ateꞌ tsöjtsáziuꞌ lu guíꞌ gabila,
ga niꞌ bitiꞌ ulu guíꞌ que.
46 Lataj niꞌ bitiꞌ ilátibaꞌ buzugaꞌ yúꞌugacabaꞌ nupa tsöjcuáꞌ niꞌ,
ateꞌ guíꞌ naꞌ bitiꞌ caꞌ ulu.
47 Lëscaꞌ caní,
channö tu guiö́j loꞌ gun ga gunuꞌ dul-laꞌ,
guléaj le.
Gácarö dxiꞌa quiuꞌ tsöjtsáziuꞌ ga rinná bëꞌë Dios zoa tuz guiö́j loꞌ,
calëga zoa chopa guiö́j loꞌ,
ateꞌ tsöjtsáziuꞌ lu guíꞌ gabila.
48 Lataj niꞌ bitiꞌ ilátibaꞌ buzugaꞌ yúꞌugacabaꞌ nupa tsöjcuáꞌ niꞌ,
ateꞌ guíꞌ naꞌ bitiꞌ caꞌ ulu.
49 ’Ruxiꞌiruꞌ bëlaꞌ zödiꞌ,
en rugálaꞌruꞌ le raꞌ guíꞌ,
para cabí gaca ditaj.
Lë ni rusedi rëꞌu ca uluꞌhuöáca dxiꞌa yúguꞌtë bönachi.
Lëscaꞌ caní,
rë́ꞌënëꞌ Dios izxíꞌi zödiꞌ yúguꞌtë böaꞌ bë́dxidoꞌ tuꞌzéguiꞌgaquiëꞌ-baꞌ lu bucugu láꞌayi queëꞌ.
50 Dxiꞌa naca zödiꞌ,
pero channö initi yöl-laꞌ sináꞌa que,
¿nacxi úniruꞌ le sináꞌa?
Guliꞌgaca laꞌ libíꞌisiliꞌ ca zödiꞌ dxiꞌa,
sóaliꞌ dxíꞌadoꞌ tuliꞌ len iaꞌtuliꞌ.