Rugahuëꞌ Jesús ziánrö ca choáꞌ gayuáꞌ bönachi
8
Yuguꞌ dza naꞌ buluꞌdubi bönachi zián ga zoëꞌ Jesús.
Tuꞌ cabí dë le ilágugaca,
Jesús bulidzëꞌ bönniꞌ usëda queëꞌ,
ateꞌ bë́ꞌlenëꞌ légaquiëꞌ didzaꞌ.
2 Gudxëꞌ légaquiëꞌ:
―Ruhuechiꞌ ládxaꞌa bönachi zián ni tuꞌ chinaca tsonna dza nacuáꞌlen nedaꞌ ni,
en bitiꞌ dë le ilágugaca.
3 Channö usö́l-laꞌa léguequi lídxigaca taꞌdunsö caꞌ,
hualaꞌcuídiꞌ laꞌ nöza,
tuꞌ záꞌgaca ziꞌtuꞌ bál-lagaca.
4 Buluꞌbiꞌë didzaꞌ bönniꞌ usëda queëꞌ,
tëꞌ Lëꞌ:
―¿Bizxi ugágutsaruꞌ bönachi guizxi yu ni,
ga ni naca lataj cáꞌasö?
5 Gunábinëꞌ Jesús légaquiëꞌ,
rnnëꞌ:
―¿Bál-laxi yöta xtila dë queë́liꞌ?
Tëꞌ Lëꞌ:
―Gádxisö.
6 Níꞌirö Jesús gunná béꞌenëꞌ bönachi zián naꞌ ilaꞌbö́ꞌ lu yu.
Gudélëꞌë gadxi yöta xtila naꞌ,
ateꞌ gudxëꞌ Dios:
“Xclenuꞌ.”
Níꞌirö buzxuzxjëꞌ léguequi,
en bëꞌë quégaquiëꞌ bönniꞌ usëda queëꞌ para ilaꞌguísiëꞌ lógaca bönachi zián naꞌ.
7 Gutaꞌ caꞌ quégaquiëꞌ tu chópabaꞌ böla cuidiꞌ.
Jesús gudxëꞌ Dios:
“Xclenuꞌ”,
ateꞌ gunná béꞌenëꞌ légaquiëꞌ ilaꞌguísiëꞌ caꞌ légacabaꞌ lógaca bönachi.
8 Gulagu yúguꞌtë bönachi naꞌ,
en buluꞌhuö́laj.
Níꞌirö buluꞌtubëꞌ le bizxaj nagáꞌanagaca,
ateꞌ gulaꞌlí idú gadxi gaꞌböra.
9 Bönachi naꞌ gulagu gulaca idú ca choáꞌ gayuáꞌgaca.
Jesús busöl-lëꞌ léguequi lídxigaca,
10 ateꞌ gurenëꞌ lëꞌe bárcodoꞌ tsözxö́n len yuguꞌ bönniꞌ usëda queëꞌ,
ateꞌ bilaꞌdxinëꞌ lu xiyúgaca bönachi Dalmanuta.
Taꞌnábinëꞌ Jesús gunëꞌ tu le gaca bëꞌ nuzxi náquiëꞌ
11 Níꞌirö bilaꞌdxinëꞌ bönniꞌ yudoꞌ fariseo ga zoëꞌ Jesús,
en gulaꞌsí lógaquiëꞌ taꞌdíl-lalenëꞌ Lëꞌ didzaꞌ.
Gulë́ꞌënnëꞌ ilaꞌzíꞌ bëꞌë Jesús.
Que lë ni naꞌ gulaꞌnábinëꞌ Lëꞌ gunëꞌ tu le naca bëꞌ zaꞌ yehuaꞌ yubá.
12 Gunnëdaꞌ ládxëꞌë Jesús,
rnnëꞌ:
―¿Bizx que taꞌnábitsö bönachi ni nedaꞌ gunaꞌ tu le naca bëꞌ zaꞌ yehuaꞌ yubá?
Le nácatë reaꞌ libíꞌiliꞌ,
bitiꞌ caꞌ iléꞌeliꞌ tu le naca bëꞌ zaꞌ yehuaꞌ yubá.
13 Níꞌirö buláꞌalenëꞌ légaquiëꞌ.
Bubenëꞌ lëꞌe bárcodoꞌ,
en saꞌyéajëꞌ iaꞌtsöláꞌa nísadoꞌ.
Le tuꞌsë́dinëꞌ bönniꞌ yudoꞌ naca ca cúa zi que yöta xtila
14 Gulal-la ládxiꞌgaquiëꞌ bönniꞌ usëda queëꞌ Jesús iluꞌë bi ilahuëꞌ,
ateꞌ tuz yöta xtila dë lëꞌe bárcodoꞌ naꞌ.
15 Níꞌirö Jesús buzéajniꞌinëꞌ légaquiëꞌ,
rnnëꞌ:
―Buliꞌyútsöcaꞌ queë́liꞌ.
Guliꞌgún chiꞌi cuinliꞌ para cabí síꞌiliꞌ le naca ca cúa zi que yöta xtila quégaquiëꞌ bönniꞌ yudoꞌ fariseo,
en queëꞌ Herodes.
16 Gulaꞌsí lógaquiëꞌ tuꞌë didzaꞌ bönniꞌ usëda queëꞌ laꞌ légacasëꞌ,
taꞌnnë́ꞌ:
―Gunnë́ꞌ caní tuꞌ cabí dë yöta xtila gáguruꞌ.
17 Réquibeꞌenëꞌ Jesús le taꞌnnë́ꞌ,
ateꞌ rëꞌ légaquiëꞌ:
―¿Bizx que ruíꞌiliꞌ caní didzaꞌ tuꞌ cabí dë yöta xtila gáguruꞌ?
¿Naruꞌ cabí réajniꞌitseliꞌ,
en bitiꞌ réquibeꞌitseliꞌ?
¿Ni nácatsö zidi icja ládxiꞌdoꞌoliꞌ?
18 ¿Zóatsö guiö́j loliꞌ,
en bitiꞌ riléꞌeliꞌ,
en zóatsö guídi nágaliꞌ,
en bitiꞌ riyö́niliꞌ?
¿Naruꞌ cabí röjnétseliꞌ?
19 Cateꞌ niꞌ buzxuzxjaꞌ gayuꞌ yöta xtila,
ateꞌ gulahuëꞌ chi-un gáyuꞌë bönniꞌ,
¿bál-laxi gaꞌböra buliliꞌ le bizxaj butúbiliꞌ?
Gulaꞌnnë́ꞌ:
―Chinnu.
20 Gunnë́ꞌ caꞌ Jesús:
―Cateꞌ niꞌ buzxuzxjaꞌ gadxi yöta xtila,
ateꞌ gulagu choáꞌ gayuáꞌ bönachi,
¿bál-laxi gaꞌböra buliliꞌ le bizxaj butúbiliꞌ?
Gulaꞌnnë́ꞌ:
―Gadxi.
21 Níꞌirö Jesús gudxëꞌ légaquiëꞌ:
―¿Naruꞌ cabí réajniꞌitseliꞌ naꞌa,
bëꞌa didzaꞌ que le tuꞌsë́dinëꞌ bönniꞌ naꞌ?
Jesús ruúnëꞌ bönniꞌ Betsaida nachul-la lahuëꞌ
22 Cateꞌ Jesús,
en bönniꞌ dáꞌgaquiëꞌ Lëꞌ bilaꞌdxinëꞌ yödzö Betsaida,
bilaꞌdxín ga zoëꞌ Jesús nupa dujuáꞌgaquiëꞌ queëꞌ tu bönniꞌ nachul-la lahuëꞌ.
Taꞌtáꞌyuëꞌ lahuëꞌ canëꞌ bönniꞌ naꞌ.
23 Jesús gudélëꞌë nëꞌë bönniꞌ naꞌ nachul-la lahuëꞌ,
ateꞌ guchë́ꞌë lëꞌ níꞌilö raꞌ yödzö.
Niꞌ budxíëꞌ zxönaꞌ guiö́j lahuëꞌ,
en guxóa nëꞌë lëꞌ.
Níꞌirö gunábinëꞌ lëꞌ,
rnnëꞌ:
―¿Ba riléꞌenuꞌ latiꞌ?
24 Buyúëꞌ bönniꞌ naꞌ nachul-la lahuëꞌ,
rnnëꞌ:
―Riléꞌegacadaꞌ bönachi,
naláꞌgaca ca yuguꞌ yaga,
pero taꞌdá bönachi naꞌ.
25 Leyúbölö guxóa nëꞌë Jesús guiö́j lahuëꞌ,
ateꞌ buyúdëꞌë bönniꞌ naꞌ nachul-la lahuëꞌ,
ateꞌ böácatë dxíꞌadoꞌ guiö́j lahuëꞌ.
Naꞌa riléꞌenëꞌ dxíꞌadoꞌ yúguꞌtë.
26 Níꞌirö Jesús gusö́l-lëꞌë lëꞌ lidxëꞌ,
rnnëꞌ:
―Bitiꞌ tsöjdöduꞌ lahuiꞌ yödzö,
en cuntu nu guíoꞌ le benaꞌ nu zoa lu yödzö ni.
Rnnëꞌ Pedro: “Jesús náquiëꞌ Cristo”
27 Gudödi naꞌ,
buluꞌzë́ꞌë Jesús,
en yuguꞌ bönniꞌ usëda queëꞌ niꞌ,
ateꞌ gulaꞌdödëꞌ yuguꞌ yö́dzödoꞌ nabábagaca Cesarea,
ga naꞌ rinná bëꞌë Filipo.
Tsanni niꞌ yúꞌugaquiëꞌ nöza,
Jesús rinabi yudxëꞌ yuguꞌ bönniꞌ usëda queëꞌ,
rnnëꞌ:
―¿Nuzxi taꞌnná bönachi nacaꞌ?
28 Buluꞌbiꞌë didzaꞌ,
taꞌnnë́ꞌ:
―Taꞌnná bal-la bönachi nacuꞌ Juan,
bönniꞌ buquilëꞌ bönachi nisa.
Taꞌnná iaꞌbal-la nacuꞌ Elías,
bönniꞌ bëꞌë didzaꞌ uláz queëꞌ Dios dza niꞌte.
Taꞌnná iaꞌbal-la nacuꞌ bönniꞌ yúbölö bëꞌë didzaꞌ uláz queëꞌ Dios dza niꞌte.
29 Níꞌirö Jesús gunábinëꞌ légaquiëꞌ,
rnnëꞌ:
―Nazxi libíꞌiliꞌ,
¿nuzxi rnnaliꞌ nacaꞌ?
Bubiꞌë didzaꞌ Pedro,
rnnëꞌ:
―Liꞌ nacuꞌ Cristo.
30 Níꞌirö Jesús gunná béꞌenëꞌ légaquiëꞌ cuntu nu uluꞌsiyönnëꞌ Nu náquiëꞌ.
Riguíxjöꞌë Jesús ca siꞌ ilútiëꞌ Lëꞌ
31 Níꞌirö gusí lahuëꞌ Jesús rusë́dinëꞌ bönniꞌ dáꞌgaquiëꞌ Lëꞌ,
rnnëꞌ:
―Run bayudxi quiꞌi sacaꞌa nedaꞌ,
Bönniꞌ Guljëꞌ Bönachi.
Bönniꞌ gula tuꞌzéajniꞌinëꞌ,
en yuguꞌ bixúz unná bëꞌ,
en bönniꞌ yudoꞌ tuꞌsë́dinëꞌ uluꞌzóëꞌ nedaꞌ tsöláꞌalö.
Ilútiëꞌ nedaꞌ,
pero cateꞌ gaca tsonna dza ubanaꞌ.
32 Yálajsö bë́ꞌlenëꞌ légaquiëꞌ didzaꞌ ni.
Níꞌirö Pedro guchë́ꞌë Jesús tsöláꞌalö,
en gusí lahuëꞌ ridil-lëꞌ lëꞌ didzaꞌ.
33 Buécjëꞌ Jesús,
en buyúëꞌ iaꞌzícaꞌrëꞌ bönniꞌ usëda queëꞌ,
ateꞌ buzenëꞌ bach Pedro,
rnnëꞌ:
―Gucuita ga zoaꞌ.
Nacuꞌ ca Satanás,
tuꞌ xihuiꞌ.
Le rizáꞌ ládxuꞌu bitiꞌ zaꞌ lu nëꞌë Dios,
pero ca taꞌzáꞌ ládxiꞌgaca bönachi naca.
34 Níꞌirö Jesús bulidzëꞌ yuguꞌ bönniꞌ usëda queëꞌ,
encaꞌ bönachi nacuáꞌ niꞌ,
en gudxëꞌ légaquiëꞌ:
―Channö rë́ꞌënëꞌ nu bönniꞌ tëꞌë nedaꞌ,
ral-laꞌ uzóëꞌ tsöláꞌalö le rë́ꞌëni quézinëꞌ,
en gáquiëꞌ ca tu bönniꞌ saꞌyéajëꞌ söjtë́ꞌë lëꞌe yaga cruz,
ateꞌ níꞌirö huáca tëꞌë nedaꞌ.
35 Nu bönniꞌ ruíꞌidaꞌ ládxëꞌë yöl-laꞌ naꞌbán queëꞌ,
unítiëꞌ le,
pero nu bönniꞌ unítiëꞌ yöl-laꞌ naꞌbán queëꞌ tuꞌ dëꞌë nedaꞌ,
o tuꞌ dëꞌë didzaꞌ dxiꞌa quiaꞌ,
udéliꞌnëꞌ bönniꞌ ni yöl-laꞌ naꞌbán queëꞌ.
36 ¿Naruꞌ uziꞌtsëꞌ xibé tu bönniꞌ channö utubëꞌ yúguꞌtë le dë yödzölió ni,
pero uniti cuinëꞌ?
37 Bitiꞌ bi gaca unödzjëꞌ tu bönniꞌ le huöáꞌui cuinëꞌ.
38 Channö zoëꞌ nu bönniꞌ rutuíꞌinëꞌ quiaꞌ nedaꞌ,
en que xtídzaꞌa lógaca bönachi ni nucáꞌanagaca Dios,
en tun dul-laꞌ,
lëscaꞌ caní nedaꞌ,
Bönniꞌ Guljëꞌ Bönachi,
utuíꞌidaꞌ queëꞌ bönniꞌ naꞌ cateꞌ guídalenaꞌ yöl-laꞌ huáca zxön queëꞌ Xuzaꞌ,
ateꞌ dzágagaquiëꞌ gubáz láꞌayi nedaꞌ.