Taꞌnábinëꞌ Jesús gunëꞌ tu le gaca bëꞌ nuzxi náquiëꞌ
16
Níꞌirö yuguꞌ bönniꞌ yudoꞌ fariseo len yuguꞌ bönniꞌ yudoꞌ saduceo bilaꞌdxinëꞌ ga zoëꞌ Jesús para ilaꞌzíꞌ bëꞌë Lëꞌ,
ateꞌ gulaꞌnábinëꞌ Lëꞌ gunëꞌ tu le gaca bëꞌ ga zaꞌ yöl-laꞌ unná bëꞌ queëꞌ.
2 Bubiꞌë didzaꞌ Jesús,
en rëꞌ légaquiëꞌ:
―Cateꞌ ridzö́ꞌ,
rnnaliꞌ caní:
“Gun dxiꞌa cuxö́,
tuꞌ röꞌö böaj xiná lúzxiba.”
3 Cateꞌ naca zíladoꞌ,
rnnaliꞌ caní:
“Bitiꞌ gun dxiꞌa naꞌa dza tuꞌ röꞌö böaj xiná,
en ruchul-la lúzxiba.”
Libíꞌiliꞌ,
bönniꞌ ruluíꞌisö tsahuiꞌ cuinliꞌ.
Raca innë́ yaꞌaliꞌ naca gun lúzxiba,
pero bitiꞌ gaca tséajniꞌiliꞌ le tuꞌsedi le taca dza ni zóaruꞌ naꞌa.
4 Yuguꞌ bönachi tuáꞌ döꞌ ni,
en bitiꞌ zoa idú ládxiꞌgaca taꞌnábini nedaꞌ gunaꞌ tu le gaca bëꞌ Nu nacaꞌ,
pero bitiꞌ bi le gaca bëꞌ ilaꞌléꞌenëꞌ.
Ilaꞌléꞌesinëꞌ lë naꞌ guca bëꞌ ca guca queëꞌ Jonás,
bönniꞌ bëꞌë didzaꞌ uláz queëꞌ Dios.
Níꞌirö Jesús bucáꞌanëꞌ légaquiëꞌ,
söhuö́jëꞌ.
Le tuꞌsédinëꞌ bönniꞌ yudoꞌ naca ca cúa zi que yöta xtila
5 Cateꞌ bilaꞌdxinëꞌ iaꞌtsöláꞌa nísadoꞌ niꞌ,
guléquibeꞌenëꞌ bönniꞌ usëda queëꞌ Jesús gulál-la ládxiꞌgaquiëꞌ iluꞌë le ilahuëꞌ.
6 Níꞌirö Jesús gudxëꞌ légaquiëꞌ:
―Buliꞌyútsöcaꞌ.
Guliꞌgún chiꞌi cuinliꞌ que le naca ca cúa zi que yöta xtila quégaquiëꞌ bönniꞌ yudoꞌ fariseo,
en quégaquiëꞌ bönniꞌ yudoꞌ saduceo.
7 Níꞌirö laꞌ légacasëꞌ gulún xtídzaꞌgaquiëꞌ bönniꞌ usëda queëꞌ,
taꞌnnë́ꞌ:
―Rnnëꞌ caní tuꞌ cabí nuáꞌaruꞌ yöta xtila.
8 Réquibeꞌenëꞌ Jesús lë ni,
ateꞌ rëꞌ légaquiëꞌ:
―¿Bizx que run xtídzaꞌliꞌ laꞌ libíꞌisiliꞌ tuꞌ cabí nuáꞌaliꞌ yöta xtila?
Látiꞌdoꞌos réajlëꞌëliꞌ nedaꞌ.
9 ¿Naruꞌ cabí réajniꞌitseliꞌ,
en bitiꞌ röjnétseliꞌ ca guca quégaca gayuꞌ yöta xtila niꞌ,
lë naꞌ gulahuëꞌ chi-un gáyuꞌë bönniꞌ,
ateꞌ tsca xö gaꞌböra butúbiliꞌ?
10 ¿Naruꞌ cabí röjnétseliꞌ caꞌ ca guca quégaca gadxi yöta xtila niꞌ,
lë naꞌ gulahuëꞌ choáꞌ gáyuꞌë bönniꞌ,
ateꞌ tsca xö gaꞌböra butúbiliꞌ?
11 ¿Naruꞌ cabí réajniꞌiliꞌ?
Bitiꞌ bëꞌa didzaꞌ que yöta xtila cateꞌ gudxaꞌ libíꞌiliꞌ gun chiꞌi cuinliꞌ que le naca ca cúa zi que yöta xtila quégaquiëꞌ bönniꞌ yudoꞌ fariseo,
en quégaquiëꞌ bönniꞌ yudoꞌ saduceo.
12 Níꞌirö gulaꞌyéajniꞌinëꞌ bitiꞌ gudxëꞌ Jesús légaquiëꞌ ilún chiꞌi cuíngaquiëꞌ que cúa zi que yöta xtila,
pero ral-laꞌ ilún chiꞌi cuíngaquiëꞌ que le tuꞌsédinëꞌ yuguꞌ bönniꞌ yudoꞌ fariseo,
en yuguꞌ bönniꞌ yudoꞌ saduceo.
Pedro rnnëꞌ Jesús náquiëꞌ Cristo
13 Cateꞌ bidxinëꞌ Jesús lu xiyú yödzö Cesarea,
ga naꞌ rinná bëꞌë Filipo,
gunábinëꞌ yuguꞌ bönniꞌ usëda queëꞌ,
rnnëꞌ:
―¿Bizxi taꞌnná bönachi nu nacaꞌ nedaꞌ,
Bönniꞌ Guljëꞌ Bönachi?
14 Buluꞌbiꞌë didzaꞌ,
taꞌnnë́ꞌ:
―Bal-lëꞌ taꞌnnë́ꞌ:
“Juan nacuꞌ,
bönniꞌ niꞌ buquilëꞌ bönachi nisa.”
Iaꞌzícaꞌrëꞌ taꞌnnë́ꞌ:
“Elías nacuꞌ,
bönniꞌ niꞌ bëꞌë didzaꞌ uláz queëꞌ Dios dza niꞌte.”
Iaꞌzícaꞌrëꞌ taꞌnnë́ꞌ:
“Jeremías nacuꞌ,
o iaꞌtúëꞌ bönniꞌ bëꞌë didzaꞌ uláz queëꞌ Dios.”
15 Níꞌirö Jesús gudxëꞌ légaquiëꞌ:
―Naruꞌ libíꞌiliꞌ,
¿nuzxi rnnaliꞌ nacaꞌ nedaꞌ?
16 Bubiꞌë didzaꞌ Simón Pedro,
en rëꞌ Lëꞌ:
―Liꞌ nacuꞌ Cristo,
Zxíꞌinëꞌ Dios ban.
17 Bubiꞌë didzaꞌ Jesús,
rëꞌ lëꞌ:
―Bicaꞌ xibóꞌ liꞌ,
Simón,
zxíꞌinëꞌ Jonás,
tuꞌ cabí buluíꞌinëꞌ nu bönniꞌ liꞌ lë ni.
Xuzaꞌ zoëꞌ yehuaꞌ yubá buluíꞌinëꞌ liꞌ lë ni.
18 Nedaꞌ reaꞌ liꞌ,
liꞌ nacuꞌ Pedro,
ateꞌ lu guiö́j ni ucuáꞌa nupa uluꞌdubi quiaꞌ,
ateꞌ yöl-laꞌ unná bëꞌ que tuꞌ xihuiꞌ bitiꞌ sequiꞌ uzagaꞌ xinö́zgaquiëꞌ.
19 Gunnaꞌ quiuꞌ yuguꞌ zxíꞌini guíë que lataj ga rinná bëꞌ Nu zoa yehuaꞌ yubá.
Le inná bëꞌu luyú ni,
chigunná bëꞌ caꞌ Nu naꞌ zoa yehuaꞌ yubá,
ateꞌ le guꞌu lataj gaca luyú ni,
chibë́ꞌ lataj gaca lë naꞌ Nu naꞌ zoa yehuaꞌ yubá niꞌ.
20 Níꞌirö Jesús gunná béꞌenëꞌ yuguꞌ bönniꞌ usëda queëꞌ cuntu nu ilë́ꞌë náquiëꞌ Lëꞌ Cristo.
Jesús riguíxjöꞌë ca siꞌ ilútiëꞌ Lëꞌ
21 Laꞌ dza níꞌisö gusí lahuëꞌ Jesús riguíxjöiꞌinëꞌ yuguꞌ bönniꞌ usëda queëꞌ run bayudxi tsejëꞌ Jerusalén,
ga niꞌ yuguꞌ bixúz unná bëꞌ en bönniꞌ gula tuꞌzéajniꞌinëꞌ,
en bönniꞌ yudoꞌ tuꞌsédinëꞌ uluꞌsacaꞌ ziꞌë Lëꞌ,
ateꞌ níꞌirö ilútiëꞌ Lëꞌ,
pero cateꞌ gaca tsonna dza ubanëꞌ lu yöl-laꞌ guti.
22 Níꞌirö Pedro guchë́ꞌë Jesús quez,
en gusí lahuëꞌ ridil-lëꞌ Lëꞌ didzaꞌ,
rnnëꞌ:
―Xan,
bitiꞌ guꞌë Dios lataj.
Bitiꞌ caꞌ gaca quiuꞌ ca rnnoꞌ.
23 Níꞌirö buécjëꞌ Jesús,
en rëꞌ Pedro:
―Gucuita ga zoaꞌ.
Runuꞌ ca run Satanás,
tuꞌ xihuiꞌ.
Runuꞌ ga gaca chopa ládxaꞌa tuꞌ cabí naca le rizáꞌ ládxuꞌu liꞌ ca rizáꞌ ládxëꞌë Dios,
pero ca taꞌzaꞌsö ládxiꞌgaca bönachi.
24 Níꞌirö Jesús gudxëꞌ yuguꞌ bönniꞌ usëda queëꞌ,
rnnëꞌ:
―Channö zoëꞌ tu bönniꞌ rë́ꞌënëꞌ tëꞌë nedaꞌ,
ral-laꞌ uzóëꞌ tsöláꞌalö yuguꞌ le rë́ꞌëni quézinëꞌ,
en gáquiëꞌ ca tu bönniꞌ saꞌyéajëꞌ zeajtë́ꞌë lëꞌe yaga cruz,
ateꞌ níꞌirö gaca tëꞌë nedaꞌ.
25 Nu bönniꞌ guë́ꞌënnëꞌ gun chiꞌë yöl-laꞌ naꞌbán queëꞌ,
unítiëꞌ le,
pero bönniꞌ unítiëꞌ yöl-laꞌ naꞌbán queëꞌ tuꞌ dëꞌë nedaꞌ,
gataꞌ yöl-laꞌ naꞌbán idú queëꞌ.
26 ¿Naruꞌ uziꞌtsëꞌ xibé tu bönniꞌ channö utubëꞌ yúguꞌtë le dë yödzölió ni pero unítiëꞌ yöl-laꞌ naꞌbán idú queëꞌ?
Bitiꞌ bi gaca unödzjëꞌ tu bönniꞌ para gataꞌ yöl-laꞌ naꞌbán idú queëꞌ.
27 Caní rnníaꞌ,
tuꞌ huödaꞌ nedaꞌ,
Bönniꞌ Guljëꞌ Bönachi,
en idzaga yöl-laꞌ unná bëꞌ queëꞌ Xuzaꞌ Dios nedaꞌ,
ateꞌ idzágagaquiëꞌ gubáz láꞌayi quiaꞌ nedaꞌ.
Níꞌirö ubiꞌa que queë bönachi tsca naca le núngaca.
28 Le nácatë reaꞌ libíꞌiliꞌ:
“Bitiꞌ caꞌ ilátigaca bal-la nupa nacuáꞌ ni cateꞌ ilaꞌléꞌerö idinná bëꞌa nedaꞌ,
Bönniꞌ Guljëꞌ Bönachi.”