Rusédinëꞌ Jesús ca naca yöl-laꞌ ruluíꞌisö tsahuiꞌ cuini
12
Laꞌ dza naꞌ buluꞌdubi zián gayuáꞌ bönachi ga zoëꞌ Jesús ga bidxintë taꞌrö́lisö luzë́ꞌeguequi bönachi naꞌ.
Níꞌirö gusí lahuëꞌ Jesús rëꞌ yuguꞌ bönniꞌ usëda queë cazëꞌ,
rnnëꞌ:
―Guliꞌgún chiꞌi cuinliꞌ que le naca ca cúa zi que yöta xtila quégaquiëꞌ bönniꞌ yudoꞌ fariseo,
le naca yöl-laꞌ ruluíꞌisö tsahuiꞌ cuini quégaquiëꞌ.
San Lucas 12:1-31
2 Bitiꞌ bi dë le naca balándoꞌos le cabí iláꞌ lahui,
en bitiꞌ bi dë le nagachiꞌ le cabí gaca bëꞌ.
3 Que lë ni naꞌ,
yúguꞌtë le chigunnáliꞌ ga naca chul-la,
ilaꞌyöni bönachi ga naca lu beníꞌ,
ateꞌ didzaꞌ bë́ꞌëliꞌ bagáchiꞌsö ga guzóa lu yuꞌu nayayaj,
gaca libán que ga naca lógaca bönachi.
Nu ral-laꞌ gádxiruꞌ
4 Gunnë́ꞌ caꞌ Jesús:
―Bö́chaꞌadoꞌ,
reaꞌ libíꞌiliꞌ:
Bitiꞌ gádxiliꞌ bönniꞌ tútigaquiëꞌ bönachi,
ateꞌ tödi naꞌ bítiꞌrö bi gaca ilunëꞌ quéguequi.
5 Uluíꞌidaꞌ libíꞌiliꞌ nu ral-laꞌ gádxiliꞌ.
Guliꞌgadxi Nu naꞌ gaca ugúa yöl-laꞌ naꞌbán queë́liꞌ,
en tödi naꞌ dë lu nëꞌë yöl-laꞌ unná bëꞌ chúꞌunëꞌ libíꞌiliꞌ lu guíꞌ gabila.
Ön,
reaꞌ libíꞌiliꞌ,
guliꞌgadxi Nu naꞌ.
6 ’Tútiꞌgaquiëꞌ-baꞌ gáyuꞌbaꞌ biguínnidoꞌ len chopa dumí lásidoꞌ.
Bitiꞌ ral-la ládxëꞌë-baꞌ Dios tu biguínnidoꞌ naꞌ.
7 Lëscaꞌ caní,
yúguꞌtë guitsaꞌ ícjaliꞌ nabábagaca lahuëꞌ Dios.
Que lë ni naꞌ,
bitiꞌ gádxiliꞌ.
Nazácaꞌtëröliꞌ libíꞌiliꞌ ca zianbaꞌ biguínnidoꞌ.
Nupa taꞌnnasö néquiguequi queëꞌ Jesús
8 Gunnë́ꞌ caꞌ Jesús:
―Reaꞌ libíꞌiliꞌ:
Yúguꞌtë bönniꞌ taꞌnnë́ꞌ néquiguequinëꞌ quiaꞌ nedaꞌ lógaca bönachi,
lëscaꞌ nedaꞌ,
Bönniꞌ Guljëꞌ Bönachi,
inníaꞌ néquiguequinëꞌ quiaꞌ lógaquiëꞌ gubáz láꞌayi queëꞌ Dios,
9 ateꞌ bönniꞌ taꞌdáꞌbaguëꞌë néquiguequinëꞌ quiaꞌ lógaca bönachi,
lëscaꞌ nedaꞌ táꞌbagaꞌa néquiguequinëꞌ quiaꞌ lógaquiëꞌ gubáz láꞌayi queëꞌ Dios.
10 ’Yúguꞌtë nupa bi ilaꞌnnë́ quiaꞌ nedaꞌ,
Bönniꞌ Guljëꞌ Bönachi,
gaca uniti lahuëꞌ Dios léguequi,
pero nu innë́ ziꞌ queëꞌ Dios Böꞌ Láꞌayi,
bitiꞌ uniti lahuëꞌ Dios nu naꞌ .
11 ’Cateꞌ ilaꞌchë́ꞌë libíꞌiliꞌ gapa naca lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
en lógaquiëꞌ bönniꞌ uluꞌchiꞌa uluꞌsörö́ëꞌ libíꞌiliꞌ,
en lógaquiëꞌ bönniꞌ dë lu náꞌagaquiëꞌ,
bitiꞌ ubi uguíꞌiliꞌ nacxi gunliꞌ o bizxi didzaꞌ ubíꞌiliꞌ,
o bizxi innaliꞌ.
12 Laꞌ dza náꞌasö usédinëꞌ Dios Böꞌ Láꞌayi libíꞌiliꞌ le ral-laꞌ innaliꞌ.
Huáca gun yöl-laꞌ tsahuiꞌ queë́ruꞌ ga gal-la ládxiꞌruꞌ-nëꞌ Dios
13 Tu bönniꞌ nútsëꞌë ladaj bönachi zián naꞌ rëꞌ Jesús,
rnnëꞌ:
―Bönniꞌ Usedi,
gudxëꞌ bö́chaꞌa gunnëꞌ uláz quiaꞌ le gutaꞌ queëꞌ xuztuꞌ.
14 Jesús rëꞌ lëꞌ:
―Bönniꞌ.
¿Naruꞌ zoa nu buzóa nedaꞌ ca nu uchiꞌa usörö́ libíꞌiliꞌ,
o nu gun gatsaj le dë queë́liꞌ?
15 Níꞌirö Jesús gudxëꞌ bönachi nacuáꞌ niꞌ,
rnnëꞌ:
―Buliꞌyútsöcaꞌ.
Guliꞌgún chiꞌi cuinliꞌ para cabí uhuídiꞌliꞌ.
Le uziꞌë xibé nu bönniꞌ bitiꞌ nácasö le zián le dë queëꞌ.
16 Níꞌirö Jesús bë́ꞌlenëꞌ légaquiëꞌ didzaꞌ,
bucúdzuꞌë didzaꞌ,
rnnëꞌ:
―Zoëꞌ tu bönniꞌ riléꞌenëꞌ yöl-laꞌ tsahuiꞌ queëꞌ,
ateꞌ runö́dzjadaꞌ gulapa lu xiyúëꞌ.
17 Níꞌirö guzáꞌ ládxëꞌë bönniꞌ naꞌ,
rnnëꞌ:
“¿Nacxi guntsaꞌ?
Bitiꞌ dë ga gapa chiꞌa le ruláꞌ quiaꞌ.”
18 Níꞌirö rnnëꞌ:
“Caní gunaꞌ.
Uquínnajgacaꞌ yuꞌu ga rapa chiꞌa le ruláꞌ quiaꞌ,
ateꞌ gunaꞌ yuguꞌ yuꞌu zxö́ntërö caꞌ,
ateꞌ gapa chiꞌa le ruláꞌ quiaꞌ niꞌ,
len yuguꞌ le dë quiaꞌ.
19 Níꞌirö gaca guíë cuinaꞌ:
Chidë́daꞌ quiaꞌ zián le chinutubaꞌ,
le gáhuidaꞌ zián iz.
Uzíꞌ ládxaꞌa.
Guíꞌaj gahuaꞌ,
en udzéjadaꞌ.”
20 Níꞌirö Dios rëꞌ lëꞌ:
“Liꞌ,
bönniꞌ bitiꞌ bi nö́zinëꞌ.
Naꞌa dzöꞌ gátiuꞌ.
Naꞌa,
¿nuzxi caz guequi que,
lë naꞌ chinutubuꞌ?”
21 Caní raca queëꞌ bönniꞌ rutubëꞌ laꞌ queë́zëꞌ yöl-laꞌ tsahuiꞌ,
en bitiꞌ runëꞌ le naca ca yöl-laꞌ tsahuiꞌ lahuëꞌ Dios.
Dios run chiꞌë yuguꞌ bönachi queëꞌ
22 Gudödi niꞌ Jesús gudxëꞌ yuguꞌ bönniꞌ usëda queëꞌ,
rnnëꞌ:
―Que lë ni naꞌ reaꞌ libíꞌiliꞌ:
Bitiꞌ ubi uguíꞌiliꞌ niꞌa que le guíꞌaj gáguliꞌ,
lë naꞌ nabániliꞌ,
o niꞌa que lariꞌ gáculiꞌ.
23 Nácarö lesacaꞌ yöl-laꞌ naꞌbán queë́liꞌ ca le ráguliꞌ,
ateꞌ nácarö lesacaꞌ idú le nácaliꞌ ca lariꞌ ráculiꞌ.
24 Buliꞌyutëz ca raca quégacabaꞌ boíquiaj.
Bitiꞌ tázabaꞌ,
en bitiꞌ taꞌlápabaꞌ,
en bitiꞌ nacuáꞌ quégacabaꞌ ga ilún chíꞌibaꞌ le ruláꞌ quégacabaꞌ,
pero Dios rugahuëꞌ légacabaꞌ.
¿Naruꞌ cabí nazácaꞌtëröliꞌ libíꞌiliꞌ ca yuguꞌ biguínnidoꞌ?
25 ¿Nuzxi caz bönniꞌ ládjaliꞌ gaca gunëꞌ ga soëꞌ ibanëꞌ iaꞌtú chíꞌidoꞌos tuꞌ ruúbi ruguíꞌi ládxiꞌdaꞌahuëꞌ?
26 Que lë ni naꞌ,
channö cabí gaca gunliꞌ lë ni naca cuídiꞌsö,
¿bizx que ruúbi ruguíꞌiliꞌ niꞌa que le naca zxö́ntërö?
27 ’Buliꞌyutëz ca taꞌzxö́n yöjdoꞌ.
Bitiꞌ tun du lariꞌ,
en bitiꞌ taba lariꞌ,
pero reaꞌ libíꞌiliꞌ,
bitiꞌ gúcarö lachi le gúcuëꞌ Salomón ca nácagaca yöjdoꞌ ni,
sal-laꞌ gútaꞌdaꞌ yöl-laꞌ tsahuiꞌ queëꞌ.
28 Channö Dios runëꞌ lachi yöj guíxiꞌdoꞌ rö́ꞌgaca naꞌa laꞌ guixiꞌ,
ateꞌ cuxö́ huidzaj ilaꞌguꞌë léguequi lu guíꞌ,
¿naruꞌ cabí gunëꞌ le nácarö dxiꞌa queë́liꞌ,
libíꞌiliꞌ naꞌ bitiꞌ réajlëꞌëliꞌ Dios idú ládxiꞌliꞌ?
29 Que lë ni naꞌ,
bitiꞌ güíꞌi ládxiꞌliꞌ le ral-laꞌ gáguliꞌ,
en le ral-laꞌ guíꞌjaliꞌ,
en bitiꞌ ubi uguíꞌi ládxiꞌdoꞌoliꞌ.
30 Yúguꞌtë lë ni taꞌguilaj bönachi yödzölió ni,
pero chinö́z quézinëꞌ Xúziliꞌ Dios le riquíniliꞌ.
31 Guliꞌgüíꞌ ládxiꞌliꞌ tsúꞌuliꞌ ga rinná bëꞌë Dios,
ateꞌ yúguꞌtë lë ni cuꞌë xinöza queë́liꞌ.
Yöl-laꞌ tsahuiꞌ rigúꞌuruꞌ yehuaꞌ yubá
32 Gunnë́ꞌ caꞌ Jesús:
―Bitiꞌ gádxiliꞌ,
libíꞌiliꞌ naꞌ nácaliꞌ böꞌcuꞌ zxílaꞌdoꞌ quiaꞌ.
Nabábasiliꞌ zóaliꞌ,
pero raza ládxëꞌë Xúziliꞌ Dios gunnëꞌ queë́liꞌ lataj tsúꞌuliꞌ ga niꞌ rinná bëꞌë Lëꞌ.
San Lucas 12:32-59
33 Guliꞌgutiꞌ le dë queë́liꞌ,
en buliꞌnödzaj quégaca bönachi yechiꞌ.
Caní gaca,
gunliꞌ queë́liꞌ yöxaj dumí le cabí gaca ditaj,
en cúꞌuliꞌ yöl-laꞌ tsahuiꞌ naꞌ yehuaꞌ yubá le bitiꞌ ubidxi udú,
ga niꞌ bitiꞌ idxinëꞌ bönniꞌ gubán,
en bitiꞌ usunítibaꞌ böaꞌdoꞌ le.
34 Ga niꞌ dë yöl-laꞌ tsahuiꞌ queë́liꞌ,
niꞌ güíꞌi ládxiꞌliꞌ idxinliꞌ.
Ral-laꞌ sóaruꞌ ban ladxiꞌ
35 Gunnë́ꞌ caꞌ Jesús:
―Guliꞌsóa sinaꞌ,
en guliꞌquelaꞌ guíꞌ le uzeníꞌ queë́liꞌ.
36 Guliꞌgaca ca bönniꞌ huen dxin taꞌbözëꞌ dza huödëꞌ xángaquiëꞌ,
bönniꞌ saꞌyéajëꞌ laní que yöl-laꞌ rutsaga naꞌ,
para cateꞌ udxinëꞌ,
en ulidzëꞌ,
laꞌ ilaꞌsáljatëꞌ queëꞌ tsuꞌë.
37 Bicaꞌ bágaca huen dxin naꞌ ilaꞌcuꞌë ban ladxiꞌ cateꞌ huödëꞌ xángaquiëꞌ.
Le nácatë reaꞌ libíꞌiliꞌ,
upáꞌa cuinëꞌ xángaquiëꞌ naꞌ,
ateꞌ gunëꞌ ga ilaꞌböꞌë ga ilahuëꞌ,
ateꞌ cuꞌë le ilahuëꞌ.
38 Sal-laꞌ huödëꞌ cateꞌ chiral-la o idú guluhuëla,
channö idixáquiëꞌ légaquiëꞌ nacuꞌë ban ladxiꞌ,
bicaꞌ bágaca huen dxin naꞌ.
39 Lë ni ral-laꞌ inö́ziliꞌ.
Laꞌtuꞌ nö́zinëꞌ xan yuꞌu bizxi dza huadxinëꞌ bönniꞌ gubán,
usubán ládxëꞌë,
en bitiꞌ guꞌë lataj bönniꞌ naꞌ udxíëꞌ yeru lidxëꞌ,
para cabí cuanëꞌ le dzöꞌö lidxëꞌ.
40 Que lë ni naꞌ,
guliꞌsóa ban ladxiꞌ caꞌ libíꞌiliꞌ,
tuꞌ huödaꞌ nedaꞌ,
Bönniꞌ Guljëꞌ Bönachi,
tu dza bitiꞌ ribö́zaliꞌ nedaꞌ.
Bönniꞌ huen dxin tsahuiꞌ, en bönniꞌ huen dxin bitiꞌ náquiëꞌ tsahuiꞌ
41 Níꞌirö Pedro gunábinëꞌ Jesús,
rnnëꞌ:
―Xan,
¿naruꞌ reoꞌ nétuꞌsö lë ni rucúdzuꞌu didzaꞌ,
o reoꞌ caꞌ caní yúguꞌtë bönachi?
42 Rëꞌ Xanruꞌ lëꞌ:
―¿Nuzxi naꞌ bönniꞌ huen dxin tsahuiꞌ,
en réajniꞌinëꞌ,
dë lu nëꞌë uláz queëꞌ xanëꞌ?
Bönniꞌ ni,
xanëꞌ udödëꞌ lu nëꞌë lidxëꞌ para cateꞌ gálaꞌrö ilahuëꞌ bönniꞌ nacuꞌë lidxëꞌ,
guꞌë que queë́gaquiëꞌ le ilahuëꞌ.
43 Bicaꞌ ba bönniꞌ huen dxin naꞌ cateꞌ huödëꞌ xanëꞌ,
idixáquiëꞌ lëꞌ runëꞌ caní dxin naꞌ nudödëꞌ lu nëꞌë.
44 Le nácatë reaꞌ libíꞌiliꞌ,
udödëꞌ xanëꞌ lu nëꞌë bönniꞌ huen dxin tsahuiꞌ naꞌ idutë le dë queëꞌ.
45 Channö guéquinëꞌ bönniꞌ huen dxin naꞌ huadzenëꞌ huödëꞌ xanëꞌ,
ateꞌ isí lahuëꞌ guꞌë döꞌ quégaquiëꞌ iaꞌzícaꞌrëꞌ huen dxin,
bönniꞌ en nigula,
en isí lahuëꞌ guíꞌaj gahuëꞌ,
en súdxinëꞌ,
46 níꞌirö huödëꞌ xanëꞌ bönniꞌ huen dxin naꞌ cateꞌ bitiꞌ ribözëꞌ lëꞌ,
en cateꞌ bitiꞌ réquibeꞌenëꞌ,
ateꞌ usacaꞌ ziꞌë bönniꞌ huen dxin bitiꞌ náquiëꞌ tsahuiꞌ naꞌ,
en ichúguiëꞌ queëꞌ quiꞌi sáquiëꞌ ca narugu quégaquiëꞌ bönniꞌ bitiꞌ taꞌyéajlëꞌë.
47 ’Bönniꞌ huen dxin naꞌ nö́zinëꞌ le rë́ꞌënëꞌ xanëꞌ,
en bitiꞌ zoëꞌ sinaꞌ,
en bitiꞌ runëꞌ ca rnnëꞌ xanëꞌ,
bönniꞌ ni,
quínitërëꞌ xanëꞌ lëꞌ.
48 Channö cabí nö́zinëꞌ tu bönniꞌ huen dxin le rë́ꞌënëꞌ xanëꞌ,
en gunëꞌ le gun ga ibáguëꞌë le quinëꞌ xanëꞌ lëꞌ,
bönniꞌ ni quinëꞌ lëꞌ látiꞌdoꞌos.
Tu bönniꞌ yuꞌu lu nëꞌë yenniꞌ,
yenniꞌ unabëꞌ xanëꞌ lu nëꞌë,
ateꞌ bönniꞌ naꞌ xanëꞌ nuzxöni ládxëꞌë lëꞌ le zxön,
le zxö́ntërö caꞌ unabëꞌ xanëꞌ lu nëꞌë bönniꞌ huen dxin naꞌ.
Le náquiëꞌ Jesús gun ga ilaꞌrúaj choplö bönachi
49 Gunnë́ꞌ caꞌ Jesús:
―Bidaꞌ nedaꞌ dujénaꞌ ga tsegui guíꞌ yödzölió ni,
en caba ládxaꞌa chinaguélaꞌ guíꞌ naꞌ.
50 Naꞌa,
dë tu le ral-laꞌ quiꞌi sacaꞌa le naca ca tu le idílidaꞌ nisa,
ateꞌ röꞌa böniga ga idxintë gaca caní quiaꞌ.
51 ¿Naruꞌ réquiliꞌ bidaꞌ dulequi dxíaꞌ le raca yödzölió ni?
Reaꞌ libíꞌiliꞌ:
¡Calëga!
Bidaꞌ duléquiaꞌ le gun ga ilaꞌrúaj choplö bönachi.
52 Naꞌa isí lo uluꞌláꞌalen luzë́ꞌeguequi gayuꞌ bönachi nacuáꞌ tu yuꞌu.
Tsonnëꞌ ilaꞌdáꞌbaguëꞌë chopëꞌ nazíꞌigaquiëꞌ xtídzaꞌa,
ateꞌ chopëꞌ naꞌ ilaꞌdáꞌbaguëꞌë tsonnëꞌ naꞌ.
53 Nu bönniꞌ zóabiꞌ biꞌi bönniꞌ queëꞌ táꞌbaguëꞌë zxíꞌinëꞌ naꞌ,
ateꞌ biꞌi bönniꞌ naꞌ táꞌbagaꞌbiꞌ xúzibiꞌ.
Nigula zóabiꞌ biꞌi nigula queë́nu táꞌbagaꞌnu zxíꞌininu naꞌ,
ateꞌ biꞌi nigula naꞌ táꞌbagaꞌbiꞌ xináꞌabiꞌ.
Nigula zóanu nigula zxoaꞌ lídxinu táꞌbagaꞌnu zxoaꞌ lídxinu naꞌ,
ateꞌ nigula zxoaꞌ lídxinu naꞌ táꞌbagaꞌnu xtoꞌ zxíꞌininu.
Le nácagaca bëꞌ le taca naꞌa dza
54 Jesús gudxëꞌ caꞌ bönachi zián nacuáꞌ niꞌ,
rnnëꞌ:
―Cateꞌ riléꞌeliꞌ zaꞌ böaj sacaꞌ ga ribía gubidza,
laꞌ rnnátëliꞌ:
“Hualaj guiö́j”,
ateꞌ caní raca.
55 Cateꞌ recja böꞌ zaꞌ sacaꞌ ga ridödi gubidza beoꞌ ziaga,
rnnaliꞌ:
“Udzáꞌa naꞌa”,
ateꞌ caní raca.
56 Libíꞌiliꞌ,
bönniꞌ ruluíꞌisö tsahuiꞌ cuinliꞌ.
Nö́ziliꞌ le ruluíꞌi le raca lúzxiba,
en le raca luyú ni,
pero bitiꞌ réquibeꞌeliꞌ le ruluíꞌi le nácagaca bëꞌ taca dza ni zóaruꞌ naꞌa.
Ral-laꞌ ugáꞌanalenruꞌ tsahuiꞌ nu rilé rëꞌu
57 Gunnë́ꞌ caꞌ Jesús:
―¿Bizx que bitiꞌ ruchiꞌa rusöröliꞌ laꞌ libíꞌisiliꞌ ca naca le naca tsahuiꞌ?
58 Channö zoa nu bi unabi yudxi liꞌ,
ateꞌ zéajliꞌ idxinliꞌ yúlahuiꞌ,
bëꞌ ladxiꞌ ugáꞌanalenuꞌ tsahuiꞌ nu naꞌ tsanni niꞌ yúꞌuliꞌ nöza,
para cabí uzegui liꞌ lahuëꞌ bönniꞌ uchiꞌa usörö́ëꞌ libíꞌiliꞌ,
ateꞌ bönniꞌ uchiꞌa usörö́ëꞌ naꞌ udödëꞌ liꞌ lu nëꞌë bönniꞌ rusayjëꞌ lidxi guíë,
ateꞌ bönniꞌ naꞌ rusayjëꞌ lidxi guíë cuꞌë liꞌ lidxi guíë naꞌ.
59 Reaꞌ liꞌ,
bitiꞌ urujuꞌ niꞌ cateꞌ údxirö quizxjuꞌ yúguꞌtë dumí lásidoꞌ ral-luꞌu que nu naꞌ.