Taꞌlecjëꞌ do bönniꞌ usëda queëꞌ Jesús dza láꞌayi
12
Dza niꞌ,
le naca dza láꞌayi quégaquiëꞌ bönniꞌ judío,
gudödëꞌ Jesús gapa dë yöla zxoaꞌ xtila,
ateꞌ taꞌdunëꞌ bönniꞌ usëda queëꞌ,
en gusí lógaquiëꞌ taꞌlecjëꞌ do ga dxía zxoaꞌ xtila,
en tahuëꞌ zxoaꞌ xtila naꞌ.
2 Cateꞌ bilaꞌléꞌenëꞌ bönniꞌ yudoꞌ fariseo lë ni,
tëꞌ Jesús:
―Buyútsöcaꞌ,
tunëꞌ bönniꞌ usëda quiuꞌ le cabí ral-laꞌ gunruꞌ dza láꞌayi.
3 Níꞌirö Jesús gudxëꞌ légaquiëꞌ:
―¿Naruꞌ cabí nulábaniliꞌ lu guichi láꞌayi bi benëꞌ David cateꞌ gudunëꞌ,
ateꞌ gulaꞌdún caꞌ nupa gulaꞌcuáꞌlen lëꞌ?
4 Guyuꞌë lu yuꞌu queëꞌ Dios,
en gudahuëꞌ yuguꞌ yöta xtila nagúꞌugaquiëꞌ lu bucugu láꞌayi,
le cabí ral-laꞌ gahuëꞌ lëꞌ,
en bitiꞌ ral-laꞌ ilahuëꞌ bönniꞌ gulaꞌcuáꞌlenëꞌ lëꞌ,
pero légacsëꞌ bixúz dë lataj ilahuëꞌ le.
5 ¿Naruꞌ cabí nulábaniliꞌ le rinná bëꞌ xibá queëꞌ Moisés ca tunëꞌ bixúz yuguꞌ dza láꞌayi?
Tunëꞌ dxin löꞌa yudoꞌ yuguꞌ dza láꞌayi,
en bitiꞌ taꞌbáguëꞌë xíguiaꞌ.
6 Naꞌa,
nedaꞌ reaꞌ libíꞌiliꞌ,
zoaꞌ nedaꞌ ni,
en nacaꞌ bönniꞌ nácarëꞌ lo ca yudoꞌ.
7 Bitiꞌ réajniꞌiliꞌ lë naꞌ nazúaj lu guichi láꞌayi,
le rnna:
“Rë́ꞌëndaꞌ huéchiꞌ ládxiꞌliꞌ luzáꞌaliꞌ,
en calëga gútigacaliꞌ-baꞌ böaꞌ bë́dxidoꞌ ruzéguiꞌgacaliꞌ-baꞌ lu bucugu láꞌayi quiaꞌ.”
Laꞌtuꞌ réajniꞌiliꞌ lë ni,
bitiꞌ ichúguliꞌ quégaca nupa bitiꞌ nabágaꞌgaca xíguiaꞌ.
8 Caꞌ naca,
tuꞌ nacaꞌ nedaꞌ,
Bönniꞌ Guljëꞌ Bönachi,
Xani dza láꞌayi.
Jesús ruúnëꞌ tu bönniꞌ narequiꞌ nëꞌë
9 Níꞌirö buzë́ꞌë Jesús niꞌ,
ateꞌ guyuꞌë lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios.
10 Lu yuꞌu naꞌ zoëꞌ tu bönniꞌ narequiꞌ nëꞌë,
ateꞌ tuꞌ të́ꞌënnëꞌ bönniꞌ judío unná bëꞌ ilaꞌdzö́linëꞌ bi uluꞌzéguiꞌë Jesús didzaꞌ,
que lë ni naꞌ gulaꞌnábinëꞌ Lëꞌ,
taꞌnnë́ꞌ:
―¿Naruꞌ dë lataj unruꞌ nu reꞌe cateꞌ naca dza láꞌayi?
11 Bubiꞌë didzaꞌ Jesús,
rëꞌ légaquiëꞌ:
―Nu bönniꞌ nútsëꞌë ládjaliꞌ,
channö zóabaꞌ tubaꞌ böꞌcuꞌ zxilaꞌ queëꞌ,
en channö ibíxibaꞌ lu yeru cateꞌ naca dza láꞌayi,
¿naruꞌ cabí tsöjxönëꞌ-baꞌ,
en tsöjléajëꞌ-baꞌ?
12 Nazácaꞌtërëꞌ tu bönniꞌ ca tubaꞌ böꞌcuꞌ zxilaꞌ.
Que lë ni naꞌ,
dë lataj gunruꞌ le naca dxiꞌa quégaca bönachi cateꞌ naca dza láꞌayi.
13 Níꞌirö Jesús gudxëꞌ bönniꞌ huëꞌ naꞌ:
―Bulí noꞌo.
Cateꞌ bulí nëꞌë,
laꞌ böácatë dxiꞌa ca naca iaꞌtsöláꞌa nëꞌë.
14 Níꞌirö buluꞌrúajëꞌ bönniꞌ yudoꞌ fariseo naꞌ,
ateꞌ gulún xtídzaꞌgaquiëꞌ para gaca ilútiëꞌ Jesús.
Le gunnë́ꞌ tu bönniꞌ bëꞌë didzaꞌ uláz queëꞌ Dios ca ral-laꞌ gaca queëꞌ Jesús
15 Cateꞌ réquibeꞌenëꞌ Jesús lë ni,
buzë́ꞌë niꞌ,
ateꞌ söjácalen bönachi zián Lëꞌ.
Jesús bunëꞌ yúguꞌtë nupa teꞌe ladaj bönachi naꞌ,
16 en gunná béꞌenëꞌ léguequi bitiꞌ usiyö́nguequi bönachi Nu náquiëꞌ.
17 Caní gunnë́ꞌ,
para gaca lë naꞌ gunnë́ꞌ Isaías,
bönniꞌ bëꞌë didzaꞌ uláz queëꞌ Dios,
gunnë́ꞌ:
18 Buliꞌyútsöcaꞌ,
Bönniꞌ ni náquiëꞌ Huen Dxin quiaꞌ,
naꞌ gurö́ cazaꞌ nedaꞌ Lëꞌ.
Nadxíꞌidaꞌ Lëꞌ,
en raza ládxaꞌa Lëꞌ.
Ichizaꞌ Lëꞌ Böꞌ Láꞌayi.
Lëꞌ usiyönnëꞌ yúguꞌtë bönachi ca gunaꞌ,
uchiꞌa usörö́aꞌ quéguequi.
19 Cuntu nu tíl-lalenëꞌ didzaꞌ,
en bitiꞌ ulidzëꞌ zidzaj.
Cuntu nu yöni chiꞌë ga naca ziꞌtuꞌ.
20 Tu guídoꞌ zoa bö bitiꞌ quitsjëꞌ le,
ateꞌ guíꞌ chizóa ulu,
bitiꞌ usúluëꞌ le,
cateꞌ uzóarëꞌ le naca tsahuiꞌ queëꞌ.
21 Yúguꞌtë bönachi ilún löza Lëꞌ.
Taꞌnnë́ꞌ bönniꞌ judío unná bëꞌ: “Dzaga Jesús tuꞌ xihuiꞌ”
22 Níꞌirö dujuáꞌgaquiëꞌ tu bönniꞌ ga zoëꞌ Jesús,
nachul-la lahuëꞌ,
en bitiꞌ raca guꞌë didzaꞌ,
tuꞌ yuꞌu böꞌ xihuiꞌ lëꞌ,
ateꞌ Jesús bunëꞌ bönniꞌ naꞌ.
Caní guca,
riléꞌenëꞌ,
en ruꞌë didzaꞌ bönniꞌ naꞌ guchul-la lahuëꞌ,
en bitiꞌ guca guꞌë didzaꞌ.
23 Que lë ni naꞌ buluꞌbani yúguꞌtë bönachi nacuáꞌ niꞌ,
taꞌnná:
―¿Naruꞌ nácatsëꞌ bönniꞌ ni Zxíꞌini Xiꞌsóëꞌ David,
Bönniꞌ naꞌ ral-laꞌ guídëꞌ?
24 Cateꞌ bilaꞌyönnëꞌ bönniꞌ yudoꞌ fariseo lë ni,
taꞌzáꞌ ládxëꞌë,
taꞌnnë́ꞌ:
Bönniꞌ ni rubéajëꞌ yuguꞌ böꞌ xihuiꞌ tuꞌ dzaga Beelzebú tuꞌ xihuiꞌ,
xángaca böꞌ xihuiꞌ,
Lëꞌ.
25 Réquibeꞌenëꞌ Jesús lë naꞌ taꞌzáꞌ ládxiꞌgaquiëꞌ,
ateꞌ rëꞌ légaquiëꞌ:
―Gátiꞌtës ga taꞌnná bëꞌ bönachi,
channö bönachi niꞌ ilaꞌrúaj choplö,
en ilaꞌdíl-lalen luzë́ꞌeguequi,
initi yöl-laꞌ unná bëꞌ quéguequi.
Lëscaꞌ caní,
channö ilaꞌrúaj choplö bönachi nacuáꞌ tu yödzö o tu yuꞌu,
en ilaꞌdil-la,
bitiꞌ gaca ilaꞌdíaꞌ bönachi nacuáꞌ yödzö naꞌ o yuꞌu naꞌ.
26 Lëscaꞌ caní,
channö ubéaj Satanás tuꞌ xihuiꞌ laꞌ luzë́ꞌesö,
ateꞌ yuguꞌ böꞌ xihuiꞌ naꞌ ilaꞌdíl-lalen laꞌ léguequisö,
¿naruꞌ idíaꞌ yöl-laꞌ unná bëꞌ que tuꞌ xihuiꞌ?
27 Rnnaliꞌ quiaꞌ rubéajaꞌ yuguꞌ böꞌ xihuiꞌ tuꞌ dzaga Beelzebú tuꞌ xihuiꞌ nedaꞌ.
Channö runaꞌ caní,
¿nuzxi dzaga nupa dáꞌgaca libíꞌiliꞌ cateꞌ tuꞌbéaj yuguꞌ böꞌ xihuiꞌ?
Que lë ni naꞌ le túngaca caz naca bëꞌ nachíxiliꞌ.
28 Naꞌa,
channö nedaꞌ rubéajaꞌ yuguꞌ böꞌ xihuiꞌ tuꞌ zóalen yöl-laꞌ huáca queëꞌ Dios Böꞌ Láꞌayi nedaꞌ,
le nácatë chibidxín le rinná bëꞌë Dios ga zóaliꞌ.
29 ’¿Naruꞌ huácatsö nu bönniꞌ tsuꞌë lidxëꞌ bönniꞌ nal-la,
en cuéajëꞌ yöl-laꞌ tsahuiꞌ dzöꞌö lidxëꞌ channö cabí gúguëꞌë bönniꞌ nal-la naꞌ zíꞌalö?
Níꞌirö gaca tsuꞌë,
en ulatjëꞌ lidxëꞌ bönniꞌ nal-la naꞌ.
30 ’Nu bitiꞌ run nedaꞌ tsözxö́n,
ridáꞌbagaꞌ nedaꞌ,
en nu bitiꞌ rutubi tsözxö́n len nedaꞌ,
rusilasi nu naꞌ.
31 ’Que lë ni naꞌ reaꞌ libíꞌiliꞌ,
ca naca yúguꞌtë dul-laꞌ tun bönachi,
en yuguꞌ didzaꞌ xihuiꞌ taꞌnná,
uniti lahuëꞌ Dios léguequi,
pero nu bönniꞌ innë́ ziꞌë queëꞌ Dios Böꞌ Láꞌayi,
bitiꞌ caꞌ uniti lahuëꞌ Dios lëꞌ.
32 Lëscaꞌ caní,
nu bönniꞌ innë́ꞌ quiaꞌ nedaꞌ,
Bönniꞌ Guljëꞌ Bönachi,
Dios uniti lahuëꞌ lëꞌ,
pero nu bönniꞌ innë́ꞌ queëꞌ Dios Böꞌ Láꞌayi,
bitiꞌ caꞌ uniti lahuëꞌ Dios lëꞌ.
Bitiꞌ uniti lahuëꞌ lëꞌ dza ni zóaruꞌ naꞌa,
en bitiꞌ uniti lahuëꞌ lëꞌ dza siꞌ zaꞌ.
Le runruꞌ naca bëꞌ le nácaruꞌ
33 Gunnë́ꞌ caꞌ Jesús:
―Channö naca dxiꞌa tu yaga,
cuía le naca dxiꞌa,
pero channö naca cáꞌasö yaga naꞌ,
cuía caꞌ le naca cáꞌasö.
Caní naca,
le ribía tu yaga naca bëꞌ yaga naꞌ.
34 Libíꞌiliꞌ nácaliꞌ diꞌa dza quégacabaꞌ bëla síniaꞌ.
¿Nacxi gaca güíꞌiliꞌ dxiꞌa didzaꞌ,
channö cabí nácaliꞌ dxiꞌa?
Ca naca le taꞌzáꞌ ládxiꞌgaca bönachi,
lëscaꞌ caní tuíꞌi didzaꞌ.
35 Tu bönniꞌ tsahuiꞌ ruꞌë didzaꞌ tsahuiꞌ tuꞌ yuꞌu le naca tsahuiꞌ icja ládxiꞌdaꞌahuëꞌ,
pero tu bönniꞌ huiáꞌ döꞌ ruꞌë didzaꞌ bitiꞌ naca tsahuiꞌ tuꞌ yuꞌu le cabí naca tsahuiꞌ icja ládxiꞌdaꞌahuëꞌ.
36 Que lë ni naꞌ reaꞌ libíꞌiliꞌ,
cateꞌ idxín dza ichúguiëꞌ Dios quégaca bönachi,
uchiꞌa usörö́ëꞌ tu tu bönniꞌ ca naca yúguꞌtë didzaꞌ gulaꞌnnazëꞌ caꞌ.
37 Ca naca didzaꞌ ruꞌu,
uchiꞌa usörö́ëꞌ liꞌ,
ateꞌ urujuꞌ tsahuiꞌ o ibáguꞌu xíguiaꞌ niꞌa que didzaꞌ naꞌ bëꞌu.
Taꞌnábinëꞌ Jesús gunëꞌ le gaca bëꞌ nu náquiëꞌ
38 Níꞌirö buluꞌbiꞌë didzaꞌ yuguꞌ bönniꞌ yudoꞌ fariseo,
en yuguꞌ bönniꞌ yudoꞌ tuꞌsédinëꞌ,
en tëꞌ Jesús:
―Bönniꞌ Usedi,
rë́ꞌënituꞌ iléꞌetuꞌ tu le gunuꞌ le gaca bëꞌ dë lu noꞌo yöl-laꞌ unná bëꞌ.
39 Bubiꞌë didzaꞌ Jesús,
en rëꞌ légaquiëꞌ:
―Yuguꞌ bönniꞌ tuáꞌ döꞌ ni,
bitiꞌ zoa idú ládxiꞌdoꞌgaquiëꞌ,
taꞌnábinëꞌ nedaꞌ gunaꞌ tu le gaca bëꞌ nu nacaꞌ.
Bitiꞌ bi le gaca bëꞌ ilaꞌléꞌenëꞌ,
pero le naca bëꞌsö naꞌ ca guca queëꞌ Jonás,
bönniꞌ bëꞌë didzaꞌ uláz queëꞌ Dios.
40 Ca naꞌ guca queëꞌ Jonás naꞌ,
bugáꞌanëꞌ lë́ꞌëbaꞌ tu böla zxön idú tsonna dza tsonna yëla,
lëscaꞌ caní gaca quiaꞌ nedaꞌ,
Bönniꞌ Guljëꞌ Bönachi,
tsonna dza tsonna yëla ugáꞌanaꞌ zxan yu.
41 Ilaꞌyasëꞌ bönniꞌ gulaꞌcuꞌë yödzö Nínive dza ichúguiëꞌ Dios quégaca bönachi cateꞌ uchiꞌa usörö́ëꞌ bönachi nacuáꞌ dza ni zóaruꞌ naꞌa,
ateꞌ le gulunëꞌ usubagaꞌ bönachi ni xíguiaꞌ tuꞌ buluꞌbíꞌi ládxiꞌgaquiëꞌ bönniꞌ Nínive naꞌ cateꞌ niꞌ busiyönnëꞌ Jonás légaquiëꞌ xtídzëꞌë Dios,
ateꞌ naꞌa zoaꞌ ni nedaꞌ,
en nácatëraꞌ lo ca Jonás naꞌ.
42 Lëscaꞌ caní,
nigula niꞌ gunná béꞌenu yödzö dë sacaꞌ ga ridödi gubidza beoꞌ ziaga chásanu dza ichúguiëꞌ Dios quégaca bönachi cateꞌ uchiꞌa usörö́ëꞌ bönachi nacuáꞌ dza ni zóaruꞌ naꞌa,
ateꞌ le bennu usubagaꞌ légaquiëꞌ xíguiaꞌ,
tuꞌ birúajnu nigula naꞌ ga nácatërö ziꞌtuꞌ para yö́ninu didzaꞌ réajniꞌi bëꞌë Salomón,
ateꞌ naꞌa zoaꞌ ni nedaꞌ,
en nácatëraꞌ lo ca Salomón naꞌ.
Cateꞌ rudxín tu böꞌ xihuiꞌ xilataj
43 Gunnë́ꞌ caꞌ Jesús:
―Cateꞌ rirúaj tu böꞌ xihuiꞌ yuꞌu bönniꞌ,
ridá gapa nabidxi,
riguilaj ga uzíꞌ ladxiꞌ.
Channö cabí idzöli ga naꞌ uzíꞌ ladxiꞌ,
44 níꞌirö inná:
“Huöjaꞌ xilatjaꞌ ga niꞌ birúajaꞌ.”
Cateꞌ udxín ga niꞌ birúaj,
tsöjxacaꞌ bönniꞌ naꞌ,
náquiëꞌ ca tu yuꞌu nadachiꞌ,
en nalúaj,
en chinabáꞌa para nu tsöjsóa niꞌ.
45 Níꞌirö tseaj,
tsöjzxíꞌ iaꞌgadxi böꞌ xihuiꞌ nácagacatërö xihuiꞌ ca le,
ateꞌ ilaꞌyaza yúguꞌtë,
en ilaꞌcuáꞌ icja ládxidaꞌahuëꞌ bönniꞌ naꞌ,
ateꞌ ga údxi huayáliꞌtërö ca gaca queëꞌ bönniꞌ naꞌ ca guca queëꞌ zíꞌalö.
Lëscaꞌ caní gaca quégaca bönachi tuáꞌ döꞌ ni.
Xinë́ꞌë Jesús, en yuguꞌ bönniꞌ bö́chëꞌë
46 Cateꞌ niꞌ ruíꞌilenëꞌ Jesús bönachi didzaꞌ ni,
xinë́ꞌë,
en yuguꞌ bönniꞌ bö́chëꞌë bilaꞌdxinëꞌ niꞌ.
Gulaꞌcuꞌë lö́ꞌalö,
en gulë́ꞌëniguequinëꞌ iluíꞌilenëꞌ Jesús didzaꞌ.
47 Níꞌirö tu bönniꞌ busiyönnëꞌ Jesús,
en rëꞌ Lëꞌ:
―Buyútsöcaꞌ,
nacuꞌë xinóꞌo,
en yuguꞌ bönniꞌ bö́chuꞌu lö́ꞌalö,
en të́ꞌënnëꞌ iluíꞌilenëꞌ Liꞌ didzaꞌ.
48 Bubiꞌë didzaꞌ Jesús,
en rëꞌ bönniꞌ naꞌ busiyönnëꞌ Lëꞌ caní,
rnnëꞌ:
―¿Nö́ziliꞌ nuzxi caz xináꞌa,
en nupxi caz bönniꞌ bö́chaꞌa?
49 Níꞌirö bulí nëꞌë,
en buluꞌe yuguꞌ bönniꞌ usëda queëꞌ,
en rnnëꞌ: