Bitiꞌ ral-laꞌ ichugu bë́ꞌëruꞌ böchiꞌ luzáꞌaruꞌ
(Lc. 6:37-38, 41-42)
7
Gunnë́ꞌ caꞌ Jesús:
―Bitiꞌ ichugu bë́ꞌëliꞌ böchiꞌ luzáꞌaliꞌ,
para cabí ichugu bëꞌë Dios queë́liꞌ,
2 tuꞌ ichugu bëꞌë Lëꞌ queë́liꞌ laꞌ leze ca naꞌ richugu bë́ꞌëliꞌ queëꞌ böchiꞌ luzáꞌaliꞌ,
ateꞌ ca naꞌ rurixi rudö́diliꞌ que luzáꞌaliꞌ,
laꞌ cáꞌasö urixi udödëꞌ Dios queë́liꞌ.
3 ¿Bizx que ruyúꞌ bë́budoꞌ yuꞌu guiö́j lahuëꞌ böchiꞌ luzóꞌo,
en bitiꞌ réquibeꞌenuꞌ yuꞌu le zxö́ntërö guiö́j loꞌ liꞌ?
4 ¿Guíëtsoꞌ böchiꞌ luzóꞌo:
“Gulö́z,
cuejaꞌ bë́budoꞌ yuꞌu guiö́j loꞌ”,
ateꞌ liꞌ,
le zxö́ntërö caꞌ yuꞌu guiö́j loꞌ liꞌ?
5 Liꞌ,
bönniꞌ ruluíꞌisö tsahuiꞌ cuinuꞌ.
Guléaj zíꞌalö le zxön yuꞌu guiö́j loꞌ liꞌ,
ateꞌ níꞌirö iléꞌenuꞌ tsáhuiꞌdoꞌ para gaca cuejuꞌ bë́budoꞌ yuꞌu guiö́j lahuëꞌ böchiꞌ luzóꞌo.
6 ’Bitiꞌ güíꞌiliꞌ quégacabaꞌ böꞌcuꞌ le naca láꞌayi,
para cabí uluꞌhuécjabaꞌ,
en iláguyaꞌabaꞌ libíꞌiliꞌ,
en bitiꞌ chúꞌunaliꞌ le naca lesacaꞌ queë́liꞌ láhuigacabaꞌ cuchi,
para cabí uluꞌzadiꞌ níꞌabaꞌ le.
Guliꞌnaba, guliꞌguilaj, en buliꞌlidza raꞌ yuꞌu
(Lc. 11:9-13; 6:31)
7 Gunnë́ꞌ caꞌ Jesús:
―Guliꞌnaba,
ateꞌ Dios gunnëꞌ queë́liꞌ.
Guliꞌguilaj,
ateꞌ gunnëꞌ lataj idzöli queë́liꞌ.
Buliꞌlidza raꞌ yuꞌu,
ateꞌ Lëꞌ isaljëꞌ queë́liꞌ.
8 Nútiꞌtës bönniꞌ rinabëꞌ,
ridéliꞌnëꞌ,
ateꞌ bönniꞌ riguiljëꞌ,
ridzöli queëꞌ,
ateꞌ bönniꞌ rulidzëꞌ raꞌ yuꞌu,
ralaj queëꞌ.
9 ’Channö zoëꞌ nu bönniꞌ ládjaliꞌ libíꞌiliꞌ,
ateꞌ zóabiꞌ biꞌi queëꞌ,
channö inábibiꞌ lëꞌ yöta xtila,
¿naruꞌ unödzjëꞌ-biꞌ guiö́j?
10 Channö inábibiꞌ lëꞌ tubaꞌ böla,
¿naruꞌ unödzjëꞌ-biꞌ bëla?
11 Libíꞌiliꞌ nácaliꞌ huiáꞌ döꞌ,
pero nö́ziliꞌ unö́dzjaliꞌ zxíꞌiniliꞌ le naca tsahuiꞌ.
Nácatërö löza,
Xúziliꞌ zoëꞌ yehuaꞌ yubá unödzjëꞌ nupa taꞌnábini Lëꞌ le naca dxiꞌa.
12 ’Que lë ni naꞌ,
ca naꞌ rë́ꞌëniliꞌ ilún bönachi queë́liꞌ,
lëscaꞌ caní guliꞌgún quégaquiëꞌ.
Lë ni naca le rinná bëꞌ xibá queëꞌ Moisés,
encaꞌ le gulaꞌnnë́ꞌ bönniꞌ guluꞌë didzaꞌ uláz queëꞌ Dios.
Tu ga ral-laꞌ tsúꞌuruꞌ le naca tsúpiꞌdoꞌ
13 Gunnë́ꞌ caꞌ Jesús:
―Guliꞌtsáz ga nu riyaza le naca tsúpiꞌdoꞌ.
Blagaꞌ naca ga nu riyaza,
en yalaj naca nöza le röjácalenëꞌ bönniꞌ ga niꞌ ilaꞌnítiëꞌ,
ateꞌ taꞌyáziëꞌ bönniꞌ zián niꞌ.
14 Tsúpiꞌdoꞌ naca ga nu riyaza,
en lásidoꞌos naca nöza le röjácalen bönachi ga niꞌ ilaꞌdeliꞌ yöl-laꞌ naꞌbán idú,
ateꞌ nabábasö nupa taꞌdzöli le.
Le runruꞌ naca bëꞌ le nácaruꞌ
15 Gunnë́ꞌ caꞌ Jesús:
―Guliꞌgún chiꞌi cuinliꞌ para cabí ilaꞌzíꞌ yéꞌenëꞌ bönniꞌ taꞌzíꞌ yëꞌë libíꞌiliꞌ,
taꞌnnë́ꞌ tuꞌë didzaꞌ uláz queëꞌ Dios.
Ilaꞌdxinëꞌ bönniꞌ caní ga zóaliꞌ,
en uluꞌluíꞌi cuíngaquiëꞌ nöxaj ládxiꞌdoꞌ ca nácagacabaꞌ böꞌcuꞌ zxílaꞌdoꞌ,
pero lu icja ládxiꞌdoꞌgaquiëꞌ nácagaquiëꞌ ca böꞌcuꞌ guíꞌa síniaꞌ.
16 Yuguꞌ le tunëꞌ ilaca bëꞌ le nácagaquiëꞌ.
Bitiꞌ ruchíbiruꞌ le ribía lubá uva lu yaga yötsiꞌ,
en bitiꞌ ruchíbiruꞌ le ribía yaga higo lu guixiꞌ legui lásidoꞌ.
17 Caní naca,
yúguꞌtë yaga dxiꞌa taꞌbía le naca dxiꞌa,
ateꞌ tu yaga cabí naca dxiꞌa ribía le cabí naca dxiꞌa.
18 Yaga dxiꞌa naꞌ bitiꞌ gaca cuía le cabí naca dxiꞌa,
ateꞌ yaga naꞌ bitiꞌ naca dxiꞌa bitiꞌ gaca cuía le naca dxiꞌa.
19 Yúguꞌtë yaga bitiꞌ taꞌbía le naca dxiꞌa ilaꞌrugu,
ateꞌ ilaꞌguꞌë léguequi lu guíꞌ.
20 Caní naca,
yuguꞌ le tunëꞌ bönniꞌ naꞌ ilaca bëꞌ le nácagaquiëꞌ.
Nupa bitiꞌ ilaꞌyáziëꞌ ga rinná bëꞌë Dios
21 Gunnë́ꞌ caꞌ Jesús:
―Zian nupa të nedaꞌ:
“Xan,
Xan”,
pero calëga yúguꞌtëꞌ ilaꞌyáziëꞌ ga rinná bëꞌë Dios yehuaꞌ yubá.
Ilaꞌyázasëꞌ niꞌ bönniꞌ tunëꞌ ca rë́ꞌënëꞌ Xuzaꞌ Dios,
zoëꞌ yehuaꞌ yubá.
22 Cateꞌ idxín dza údxi que yödzölió ni,
bönniꞌ zián ilë́ꞌ nedaꞌ,
ilaꞌnnë́ꞌ:
“Xan,
Xan,
bentuꞌ libán que xtídzëꞌë Dios,
buguntuꞌ dxin Loꞌ,
en buguntuꞌ caꞌ dxin Loꞌ para bubéajtuꞌ yuguꞌ böꞌ xihuiꞌ,
en buguntuꞌ caꞌ dxin Loꞌ bentuꞌ zián yöl-laꞌ huáca zxön.”
23 Níꞌirö nedaꞌ guíaꞌ légaquiëꞌ:
“Bitiꞌ caꞌ núnbëꞌa libíꞌiliꞌ.
Guliꞌcuíta ga zoaꞌ,
libíꞌiliꞌ ruáꞌaliꞌ döꞌ.”
Chopa ca gaca udxíaruꞌ xilibi zöꞌö
24 Gunnë́ꞌ caꞌ Jesús:
―Iaꞌstú caꞌ,
nu bönniꞌ riyönnëꞌ xtídzaꞌa ni,
en gunëꞌ ca rnna,
bönniꞌ ni náquiëꞌ ca tu bönniꞌ réajniꞌinëꞌ,
budxíëꞌ lidxëꞌ ga naca lu guiö́j.
25 Cateꞌ gulaj guiö́jsiuꞌ,
en guzxö́n yegu gubóꞌo,
en guyecja böꞌ,
gudibi nisa cuita yuꞌu naꞌ,
pero bitiꞌ gubixi,
tuꞌ dxía xilibi lu guiö́j.
26 Naꞌa,
nu bönniꞌ riyönnëꞌ xtídzaꞌa ni,
en bitiꞌ runëꞌ ca rnna,
bönniꞌ ni náquiëꞌ ca tu bönniꞌ bitiꞌ réajniꞌinëꞌ,
budxíëꞌ lidxëꞌ lu yu dzöbi.
27 Cateꞌ gulaj guiö́jsiuꞌ,
en guzxö́n yegu gubóꞌo,
en guyecja böꞌ,
níꞌirö gudáꞌa nisa cuita yuꞌu naꞌ,
ateꞌ gubíxitë,
en tsaz biguinnaj.