Run bayudxi ubíꞌi ládxiꞌruꞌ
13
Laꞌ dza níꞌisö bilaꞌdxinëꞌ bönniꞌ taꞌguíxjöiꞌinëꞌ Jesús ca benëꞌ Pilato,
bë́tiëꞌ bal-lëꞌ bönniꞌ Galilea,
en guzxiꞌë rön quégaquiëꞌ,
le bugútsiꞌnëꞌ xichö́ngacabaꞌ böaꞌ bëdxi chigulútiëꞌ légacabaꞌ para ilaꞌguꞌë xichö́ngacabaꞌ naꞌ lahuëꞌ Dios.
San Lucas 13:1-21
―¿Naruꞌ réquiliꞌ gulácarëꞌ bönniꞌ dul-laꞌ bönniꞌ Galilea naꞌ ca iaꞌzícaꞌrëꞌ bönniꞌ Galilea,
tuꞌ gulaꞌguíꞌi gulaꞌzaquiëꞌ caní?
3 Reaꞌ libíꞌiliꞌ:
¡Calëga!
Channö cabí ubíꞌi ládxiꞌliꞌ,
nítiliꞌ caꞌ yúguꞌtëliꞌ.
4 Lëscaꞌ caní guca quégaquiëꞌ chizxunëꞌ bönniꞌ niꞌ,
yöjbagaꞌ yuꞌu sibi naꞌ nazíꞌi le Siloé légaquiëꞌ,
ateꞌ gulátiëꞌ.
¿Naruꞌ réquiliꞌ gulaꞌbágaꞌtërëꞌ légaquiëꞌ xíguiaꞌ ca iaꞌzícaꞌrö bönachi nacuáꞌ Jerusalén?
5 Reaꞌ libíꞌiliꞌ:
¡Calëga!
Channö cabí ubíꞌi ládxiꞌliꞌ,
nítiliꞌ caꞌ yúguꞌtëliꞌ.
Rucúdzuꞌë didzaꞌ Jesús que yaga higo bitiꞌ bi ribía
6 Níꞌirö bucúdzuꞌë didzaꞌ Jesús,
rëꞌ légaquiëꞌ:
―Zoëꞌ tu bönniꞌ,
zoa tu yaga higo nazëꞌ ga naca lu xiyúëꞌ.
Röjtiljëꞌ le ribía yaga naꞌ,
pero bitiꞌ bi ridzö́linëꞌ.
7 Níꞌirö gudxëꞌ bönniꞌ runëꞌ dxin lu xiyúëꞌ naꞌ,
rnnëꞌ:
“Chiguca tsonna iz ridaꞌ rududiljaꞌ le cuía yaga higo ni,
en bitiꞌ bi ridzö́lidaꞌ.
Guchugu le.
¿Bizx que run nigui luyú ni?”
8 Níꞌirö bubiꞌë didzaꞌ bönniꞌ huen dxin naꞌ,
rëꞌ lëꞌ:
“Xan,
bucáꞌanagarö le iaꞌtú ízatëz,
ateꞌ uzatsaꞌ yu zxani,
en cuꞌa bëbu zxani.
9 Channö cuía yaga ni,
gaca dxiꞌa,
pero channö cabí bi cuía,
níꞌirö ichuguꞌ le.”
Ruúnëꞌ Jesús tu nigula réꞌenu cateꞌ naca dza láꞌayi
10 Tu dza rusédinëꞌ Jesús bönachi nacuáꞌ lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios cateꞌ naca dza láꞌayi quégaquiëꞌ.
11 Zóanu tu nigula niꞌ chiguca chizxunuꞌ iz réꞌenu,
tuꞌ yuꞌu lënu böꞌ xihuiꞌ run ga teꞌe bönachi,
ateꞌ nayéchuticaꞌsinu ridanu,
en bitiꞌ caꞌ raca ulí cuinnu.
12 Cateꞌ biléꞌenëꞌ-nu Jesús,
bulidzëꞌ-nu,
rnnëꞌ:
―Nigúladoꞌ,
chiböácuꞌ que yödzöhuë́ꞌ quiuꞌ.
13 Níꞌirö Jesús guxóa nëꞌë lënu,
ateꞌ laꞌ bulitë cuinnu,
en gulúꞌunu-nëꞌ Dios yöl-laꞌ ba.
14 Níꞌirö gulénëꞌ bönniꞌ lo que yuꞌu ga naꞌ tuꞌdubëꞌ tuꞌsëdëꞌ queëꞌ Dios.
Rilenëꞌ tuꞌ bunëꞌ Jesús nigula naꞌ cateꞌ naca dza láꞌayi.
Bönniꞌ lo naꞌ gudxëꞌ nupa nacuáꞌ niꞌ,
rnnëꞌ:
―Xopa dza nacuáꞌ cateꞌ runruꞌ dxin.
Dë lataj yuguꞌ dza ni guídaliꞌ para nu un libíꞌiliꞌ,
en calëga dza láꞌayi.
15 Níꞌirö bubiꞌë didzaꞌ Xanruꞌ,
rnnëꞌ:
―Libiꞌiliꞌ,
bönniꞌ ruluíꞌisö tsahuiꞌ cuinliꞌ,
¿naruꞌ cabí rusédxigacaliꞌ-baꞌ böaꞌ bëdxi que queë́liꞌ ga naꞌ dáꞌgacabaꞌ cateꞌ naca dza láꞌayi,
ateꞌ tsöjuáꞌagacaliꞌ-baꞌ para ilë́ꞌajbaꞌ nisa?
16 Nácanu nigula ni zxíꞌini xiꞌsóëꞌ Abraham,
ateꞌ idú chizxunuꞌ iz chiyúꞌunu lu yalaj que Satanás tuꞌ xihuiꞌ.
¿Naruꞌ cabí ral-laꞌ nu usedxi lënu sal-laꞌ naca dza láꞌayi?
17 Cateꞌ bëꞌë didzaꞌ ni Jesús,
buluꞌtuíꞌinëꞌ yúguꞌtë bönniꞌ nacuꞌë niꞌ taꞌlenëꞌ Lëꞌ,
pero buluꞌdzeja iaꞌzícaꞌrö bönachi,
yúguꞌtë nupa nacuáꞌ niꞌ,
tuꞌ taꞌléꞌenëꞌ yuguꞌ le zxön runëꞌ Jesús.
Rucúdzuꞌë didzaꞌ Jesús que xisedoꞌ mostaza
18 Níꞌirö rnnëꞌ Jesús:
―¿Nacxi caz raca rizxö́n le rinná bëꞌë Dios,
o bizxi uséquiꞌtseruꞌ le?
19 Raca ca raca que xisedoꞌ mostaza,
le guzxiꞌë tu bönniꞌ,
ateꞌ guzëꞌ le ga naca lu xiyúëꞌ.
Guzxö́n yaga mostaza naꞌ,
en guca ca tu yaga zxön,
ateꞌ bilaꞌdxinbaꞌ biguínnidoꞌ,
gulunbaꞌ xcáꞌagacabaꞌ lu niꞌa nëꞌe yaga mostaza naꞌ.
Rucúdzuꞌë didzaꞌ Jesús que cúa zi que yöta xtila
20 Lëscaꞌ caní rnnëꞌ Jesús:
―¿Bizxi caz uséquiꞌtsedaꞌ le rinná bëꞌë Dios?
21 Naca ca cúa zi que yöta xtila,
le guzxíꞌinu tu nigula,
en bugútsiꞌnu tsonna cöꞌ cúa yöta xtila,
ateꞌ guyazxaj idútë cúa naꞌ.
Tu ga tö́diruꞌ le naca guídoꞌ
(Mt. 7:13-14, 21-23)
22 Tsanni niꞌ yuꞌë nöza Jesús,
saꞌyéajëꞌ Jerusalén,
ridödëꞌ yuguꞌ yödzö zxön,
en yuguꞌ yö́dzödoꞌ,
ateꞌ rusédinëꞌ bönachi nacuáꞌ gapa naꞌ.
San Lucas 13:22-35
―Xan,
¿naruꞌ nabábasö nupa uluꞌlágaca?
Jesús rëꞌ nupa nacuáꞌ niꞌ,
rnnëꞌ:
24 ―Guliꞌgüíꞌi ládxiꞌliꞌ tsúꞌuliꞌ sacaꞌ ga nu ridödi le naca guídoꞌ,
tuꞌ reaꞌ libíꞌiliꞌ:
Zián nupa ilë́ꞌëni ilaꞌyaza niꞌ,
pero bitiꞌ ilaꞌzéquiꞌnëꞌ.
25 Tödi chasëꞌ Xan yuꞌu,
en usayjëꞌ yuꞌu,
isí loliꞌ libíꞌiliꞌ naꞌ zóaliꞌ níꞌilö ulídzaliꞌ-nëꞌ raꞌ yuꞌu naꞌ,
ateꞌ guië́liꞌ-nëꞌ:
“Xan,
Xan,
gusalaj queë́tuꞌ.”
Níꞌirö ubiꞌë didzaꞌ Lëꞌ,
en guíëꞌ libíꞌiliꞌ:
“Bitiꞌ nözdaꞌ nuzxi libíꞌiliꞌ.”
26 Níꞌirö isí loliꞌ innaliꞌ:
“Güíꞌi gudágulentuꞌ Liꞌ,
ateꞌ busédinuꞌ gapa naca lu yë́ꞌëyi queë́tuꞌ.”
27 Níꞌirö guíëꞌ libíꞌiliꞌ:
“Reaꞌ libíꞌiliꞌ,
bitiꞌ nözdaꞌ gazxi bönachi libíꞌiliꞌ.
Guliꞌcuíta ga zoaꞌ,
yúguꞌtëliꞌ ruáꞌaliꞌ döꞌ.”
28 Níꞌirö cödxi yéchiꞌliꞌ,
en gagu zxea láyaꞌliꞌ cateꞌ iléꞌegacaliꞌ-nëꞌ Abraham,
en Isaac,
en Jacob,
en yúguꞌtë bönniꞌ guluꞌë didzaꞌ uláz queëꞌ Dios,
nacuꞌë ga niꞌ rinná bëꞌë Dios,
pero libíꞌiliꞌ sóaliꞌ níꞌilö.
29 Ilaꞌdxín bönachi ilaꞌrúaj sacaꞌ ga rilén gubidza,
en sacaꞌ ga ribía gubidza,
en sacaꞌ ga zaꞌ böꞌ ziaga,
en sacaꞌ ga ridödi gubidza beoꞌ ziaga,
ateꞌ ilaꞌböꞌë ilahuëꞌ ga niꞌ rinná bëꞌë Dios.
30 Níꞌirö ilaca lo bal-la bönachi nácagaca cáꞌasö naꞌa,
ateꞌ uluꞌgáꞌana cáꞌasö bal-la nupa nácagaca lo naꞌa.
Ribödxi yechë́ꞌë Jesús niꞌa quégaca bönachi Jerusalén
31 Laꞌ dza níꞌisö bilaꞌdxinëꞌ bal-la bönniꞌ yudoꞌ fariseo ga zoëꞌ Jesús en tëꞌ Lëꞌ:
―¡Burúaj!
¡Buzxunnaj ni!
¡Rë́ꞌënëꞌ Herodes gútiëꞌ Liꞌ!
32 Jesús rëꞌ légaquiëꞌ:
―Guliꞌtséaj,
guliꞌtsöjödxëꞌ bönniꞌ naꞌ náquiëꞌ ca tubaꞌ bözaꞌ,
innaliꞌ:
“Buyútsöcaꞌ,
rubéajgacaꞌ böꞌ xihuiꞌ,
en ruúnaꞌ bönachi naꞌa,
en cuxö́,
en cateꞌ gaca lidzaj,
údxi gunaꞌ dxin quiaꞌ.”
33 Run bayudxi tséajlensaꞌ caꞌ nöza naꞌa,
en cuxö́,
en huidzaj,
ateꞌ idxinaꞌ Jerusalén,
tuꞌ tútigaquiëꞌ bönniꞌ tuꞌë didzaꞌ uláz queëꞌ Dios niꞌ.
34 ’Libíꞌiliꞌ,
zóaliꞌ Jerusalén.
Rútigacaliꞌ-nëꞌ bönniꞌ tuꞌë didzaꞌ uláz queëꞌ Dios,
en ruládxiꞌgacaliꞌ-nëꞌ guiö́j bönniꞌ gubáz risö́l-lëꞌë Dios ga zóaliꞌ.
Cateꞌ xö zián luzuí gúꞌunidaꞌ utubaꞌ libíꞌiliꞌ quiaꞌ ca runbaꞌ yöjede,
rutúbibaꞌ bö́radoꞌ queë́baꞌ zxan xílibaꞌ,
pero bitiꞌ gúꞌuniliꞌ.
35 Buliꞌyútsöcaꞌ,
cáꞌasö ugáꞌana lídxiliꞌ,
ateꞌ reaꞌ libíꞌiliꞌ,
bítiꞌrö iléꞌeliꞌ nedaꞌ cateꞌ idxinrö dza innaliꞌ:
“Bicaꞌ ba Nu naꞌ zaꞌ uláz queëꞌ Xanruꞌ.”