Ruúnëꞌ Jesús tu bönniꞌ réꞌenëꞌ huëꞌ gui
14
Cateꞌ naca dza láꞌayi quégaquiëꞌ bönniꞌ judío,
guyuꞌë Jesús lidxëꞌ tu bönniꞌ unná bëꞌ,
bönniꞌ yudoꞌ fariseo.
Röꞌë Jesús rahuëꞌ,
ateꞌ nacuꞌë bönniꞌ yudoꞌ fariseo niꞌ taꞌnë́ꞌë Lëꞌ.
San Lucas 14:1-24
2 Zoëꞌ caꞌ tu bönniꞌ réꞌenëꞌ huëꞌ gui ga naꞌ zoëꞌ Jesús.
3 Níꞌirö Jesús gunábinëꞌ bönniꞌ yudoꞌ usedi táquiëꞌ xibá queëꞌ Moisés,
en yuguꞌ bönniꞌ yudoꞌ fariseo,
rnnëꞌ:
―¿Naruꞌ dë lataj unruꞌ nu reꞌe cateꞌ naca dza láꞌayi?
4 Légaquiëꞌ buluꞌsayaj ruáꞌagaquiëꞌ.
Níꞌirö Jesús gudélëꞌë bönniꞌ huëꞌ naꞌ,
en bunëꞌ lëꞌ,
ateꞌ laꞌ busö́l-laꞌtëꞌ lëꞌ.
5 Níꞌirö Jesús rëꞌ yuguꞌ bönniꞌ yudoꞌ naꞌ,
rnnëꞌ:
―Channö nu bönniꞌ ládjaliꞌ nacuáꞌabaꞌ queëꞌ böaꞌ bëdxi,
ateꞌ ibíxibaꞌ tubaꞌ lu yeru,
¿naruꞌ cabí tsöjléajtëꞌ-baꞌ,
sal-laꞌ naca dza láꞌayi?
6 Bitiꞌ bi didzaꞌ guca uluꞌbiꞌë ca naca lë ni.
Nu cöꞌ lataj lo
7 Cateꞌ biléꞌenëꞌ Jesús ca tunëꞌ bönniꞌ yudoꞌ fariseo naꞌ,
taꞌböꞌë lataj lo ga naꞌ taꞌböꞌë tahuëꞌ,
níꞌirö bucúdzuꞌë didzaꞌ,
ateꞌ rëꞌ légaquiëꞌ:
8 ―Cateꞌ nu bönniꞌ ulidzëꞌ liꞌ guíduꞌ ga raca laní que yöl-laꞌ rutsaga naꞌ,
bitiꞌ cöꞌu lataj lo.
Nadxi caꞌ nulidzëꞌ caꞌ tu bönniꞌ nácatërëꞌ lo ca liꞌ.
9 Níꞌirö bönniꞌ naꞌ bulidzëꞌ liꞌ huidëꞌ ga zuꞌ,
en guíëꞌ liꞌ:
“Bëꞌ lataj bönniꞌ ni cöꞌë ga zuꞌ”,
ateꞌ níꞌirö lu yöl-laꞌ rutuíꞌi quiuꞌ tsöjchöꞌu zxánitëlö.
10 Que lë ni naꞌ,
cateꞌ nu bönniꞌ ulidzëꞌ liꞌ,
guyéaj yöjchö́ꞌ zxánitëlö,
para cateꞌ idxinëꞌ bönniꞌ naꞌ bulidzëꞌ liꞌ,
huëꞌ liꞌ:
“Bö́chaꞌa,
gudödi iaꞌlatiꞌ nilö.”
Níꞌirö gácaruꞌ liꞌ lo lógaca nupa taꞌböꞌlen liꞌ tsözxö́n.
11 Nu run ba zxön cuini,
ilunëꞌ ga huötaꞌ huöxaj,
pero nu zoa nöxaj ladxiꞌ,
ilunëꞌ ga gácarö lo nu naꞌ.
12 Jesús rëꞌ caꞌ bönniꞌ naꞌ bulidzëꞌ Lëꞌ,
rnnëꞌ:
―Catiꞌ gunuꞌ tu güíꞌi huagu o tu lanídoꞌ,
bitiꞌ ulídzagacuꞌ-nëꞌ yuguꞌ böchiꞌ luzóꞌo,
en yuguꞌ bönniꞌ bö́chuꞌu,
en yuguꞌ diꞌa dza quiuꞌ,
en dzaga yuꞌu quiuꞌ taꞌléꞌenëꞌ yöl-laꞌ tsahuiꞌ quégaquiëꞌ,
tuꞌ uluꞌlidzëꞌ caꞌ liꞌ,
ateꞌ caní gaca,
ubíꞌi quiuꞌ.
13 Cateꞌ gunuꞌ tu güíꞌi huagu,
bulidza yuguꞌ bönachi yechiꞌ,
en nupa nabixi niꞌa náꞌagaca,
en nupa bitiꞌ raca sáꞌgaca,
en yuguꞌ bönniꞌ lo chul-la.
14 Níꞌirö gacuꞌ bicaꞌ ba,
tuꞌ cabí gaca bi uluꞌbiꞌë bönniꞌ caní quiuꞌ,
pero ubíꞌi quiuꞌ cateꞌ idxín dza uluꞌbán nupa gulún le naca tsahuiꞌ,
en gulátigaca.
Rucúdzuꞌë didzaꞌ Jesús que tu laní zxön
15 Cateꞌ tu bönniꞌ röꞌë rágulenëꞌ Jesús biyönnëꞌ didzaꞌ ni,
rëꞌ Lëꞌ:
―Bicaꞌ ba nu gagu ga niꞌ rinná bëꞌë Dios.
16 Jesús rëꞌ lëꞌ:
―Zoëꞌ tu bönniꞌ benëꞌ laní zxön,
ateꞌ zián nupa bulidzëꞌ.
17 Cateꞌ chinabáꞌa laꞌ huagu,
gusö́l-lëꞌë bönniꞌ huen dxin queëꞌ tsöjödxëꞌ nupa naꞌ chinulidzëꞌ,
gunnë́ꞌ:
“¡Guliꞌdá!
¡Yúguꞌtë chinabáꞌa!”
18 Gulaꞌsí lógaquiëꞌ yúguꞌtëꞌ taꞌnabëꞌ lataj cabí tsöjáquiëꞌ.
Bönniꞌ zíꞌalö naꞌ rnnëꞌ:
“Siꞌ guzxiꞌa tu luyú,
en rundaꞌ bayudxi tsöjyúaꞌ le.
Rátaꞌyuaꞌ loꞌ gunnuꞌ nedaꞌ lataj.”
19 Iaꞌtúëꞌ rnnëꞌ:
“Siꞌ guzxiꞌa gayuꞌ nö́zabaꞌ bëdxi,
ateꞌ tsöjzxíꞌ bëꞌa légacabaꞌ ugúngacaꞌ-baꞌ dxin.
Rátaꞌyuaꞌ loꞌ gunnuꞌ nedaꞌ lataj.”
20 Iaꞌtúëꞌ rnnëꞌ:
“Siꞌ butsaga naꞌa,
en que lë ni naꞌ bitiꞌ gaca guídaꞌ.”
21 Cateꞌ bö́ajëꞌ bönniꞌ huen dxin naꞌ,
yöjtíxjöiꞌinëꞌ xanëꞌ yúguꞌtë lë ni.
Níꞌirö gulénëꞌ bönniꞌ xan yuꞌu naꞌ,
ateꞌ gudxëꞌ bönniꞌ huen dxin naꞌ,
rnnëꞌ:
“Guyéajtë naꞌa gapa naca lu yë́ꞌëyi,
en gapa naca laꞌ nöza que yödzö ni,
ateꞌ ichëꞌu yuguꞌ bönachi yechiꞌ ni,
en nupa nabixi niꞌa náꞌagaca,
en nupa bitiꞌ raca sáꞌgaca,
en yuguꞌ bönniꞌ lo chul-la.”
22 Cateꞌ chinunëꞌ bönniꞌ huen dxin naꞌ caní,
rnnëꞌ:
“Xan,
chibenaꞌ ca naꞌ gunná béꞌenuꞌ nedaꞌ,
ateꞌ ni dë lataj.”
23 Níꞌirö xanëꞌ gudxëꞌ bönniꞌ huen dxin naꞌ,
rnnëꞌ:
“Guyéaj gapa naca laꞌ nöza,
en gapa naca nöza lasi,
ateꞌ ben bayudxi guídigaca nupa nacuáꞌ niꞌ para ilí lidxaꞌ,
24 tuꞌ reaꞌ libíꞌiliꞌ:
Bitiꞌ gahuëꞌ que laní quiaꞌ nitúëꞌ bönniꞌ niꞌ bulidzaꞌ zíꞌalö.”
Le sácaꞌruꞌ cateꞌ zéajlenruꞌ-nëꞌ Cristo
25 Yuguꞌ dza niꞌ röjácalen Jesús bönachi zián,
ateꞌ buécjëꞌ Jesús,
en rëꞌ légaquiëꞌ:
San Lucas 14:25-35
26 ―Channö guídalenëꞌ nedaꞌ tu bönniꞌ,
en bitiꞌ idxíꞌirönëꞌ nedaꞌ ca nadxíꞌinëꞌ xuz xinë́ꞌë,
en nigula queëꞌ,
en yuguꞌ zxíꞌinëꞌ,
en yuguꞌ biꞌi bö́chëꞌë,
en yuguꞌ biꞌi zanëꞌ,
en yöl-laꞌ naꞌbán queëꞌ,
bitiꞌ gaca gáquiëꞌ bönniꞌ usëda quiaꞌ.
27 Nu bönniꞌ bitiꞌ gáquiëꞌ ca tu bönniꞌ saꞌyéajëꞌ söjtë́ꞌë lëꞌe yaga cruz,
ateꞌ tëꞌë nedaꞌ,
bitiꞌ gaca gáquiëꞌ bönniꞌ usëda quiaꞌ.
28 Channö zoëꞌ nu bönniꞌ ladaj libíꞌiliꞌ guë́ꞌënnëꞌ gunëꞌ tu yuꞌu zián cuía,
¿naruꞌ cabí cöꞌë zíꞌalö ulabëꞌ gácaꞌxi dumí ral-laꞌ utö́ëꞌ para inö́zinëꞌ channö dë queëꞌ tsca le riquinnëꞌ para údxi gunëꞌ yuꞌu naꞌ?
29 Channö cabí gunëꞌ caní,
en isí lahuëꞌ cuéquiëꞌ xilibi yuꞌu naꞌ,
ateꞌ bitiꞌ gaca údxi gunëꞌ yuꞌu naꞌ,
níꞌirö ilaꞌsí lógaca yúguꞌtë nupa ilaꞌléꞌe le uluꞌtitaj lëꞌ,
30 ilaꞌnná:
“Bönniꞌ ni gusí lahuëꞌ runëꞌ yuꞌu,
pero bitiꞌ guca údxi gunëꞌ le.”
31 Lëscaꞌ caní,
channö zoëꞌ nu bönniꞌ rinná bëꞌë,
en ral-laꞌ tsejëꞌ gudil-la tsöjtíl-lalenëꞌ iaꞌtúëꞌ bönniꞌ rinná bëꞌë,
¿naruꞌ cabí cöꞌë zíꞌalö,
en cuéqui icjëꞌ channö séquiꞌnëꞌ tsöjtíl-lalenëꞌ bönniꞌ niꞌ nachë́ꞌë galaj milëꞌ bönniꞌ,
ateꞌ lëꞌ chi milsëꞌ bönniꞌ nachë́ꞌë?
32 Channö cabí séquiꞌnëꞌ,
cateꞌ niꞌ zoëꞌ ziꞌtuꞌ iaꞌtúëꞌ bönniꞌ naꞌ rinná bëꞌë,
isö́l-lëꞌë bönniꞌ gubáz queëꞌ,
ateꞌ inábinëꞌ lëꞌ nacxi ral-laꞌ gunëꞌ para uluꞌdzáguiëꞌ dxiꞌa.
33 Caní naca,
channö zoëꞌ nu bönniꞌ ladaj libíꞌiliꞌ bitiꞌ ucáꞌanëꞌ yúguꞌtë le dë queëꞌ,
bitiꞌ gaca gáquiëꞌ bönniꞌ usëda quiaꞌ.
Zödiꞌ le naniti yöl-laꞌ sináꞌa que
34 Gunnë́ꞌ caꞌ Jesús: