Rucúdzuꞌë didzaꞌ Jesús ca naca queë́baꞌ böꞌcuꞌ zxilaꞌ gunítibaꞌ
15
Buluꞌdubëꞌ yúguꞌtë bönniꞌ tuꞌquízxjëꞌ lázagaca bönachi,
en yuguꞌ bönniꞌ cáꞌasö ga zoëꞌ Jesús para uluꞌzë́ náguiëꞌ Lëꞌ.
San Lucas 15:1-10
2 Que lë ni naꞌ yuguꞌ bönniꞌ yudoꞌ fariseo,
en yuguꞌ bönniꞌ yudoꞌ usedi gulaꞌnnë́ꞌ queëꞌ Jesús,
taꞌnnë́ꞌ:
―Bönniꞌ ni runëꞌ bal yuguꞌ bönniꞌ dul-laꞌ,
en rágulenëꞌ légaquiëꞌ.
3 Níꞌirö bucúdzuꞌë didzaꞌ Jesús,
rëꞌ légaquiëꞌ:
4 ―Channö zoëꞌ tu bönniꞌ ladaj libíꞌiliꞌ,
nacuáꞌabaꞌ queëꞌ tu gayuáꞌabaꞌ böꞌcuꞌ zxilaꞌ,
en channö nítibaꞌ tubaꞌ,
¿naruꞌ cabí ucáꞌanëꞌ iaꞌzícaꞌröbaꞌ tápalalaj yuꞌ chë́nnabaꞌ naꞌ ga naca lu lataj cáꞌasö,
ateꞌ tsejëꞌ tsöjdiljëꞌ-baꞌ böꞌcuꞌ zxilaꞌ naꞌ nanítibaꞌ,
cateꞌ udzö́lirönëꞌ-baꞌ?
5 Cateꞌ udzö́linëꞌ-baꞌ,
lu yöl-laꞌ rudzeja queëꞌ ixóëꞌ-baꞌ yaꞌ zxicjëꞌ,
6 en cateꞌ udxinëꞌ lidxëꞌ utubëꞌ yuguꞌ böchiꞌ luzë́ꞌë,
en yuguꞌ dzaga yuꞌu queëꞌ,
ateꞌ guíëꞌ légaquiëꞌ:
“Buliꞌdzéjalen nedaꞌ,
tuꞌ chibudzö́lidaꞌ-baꞌ böꞌcuꞌ zxilaꞌ quiaꞌ gunítibaꞌ.”
7 Reaꞌ libíꞌiliꞌ:
Lëscaꞌ caní gácatërö yöl-laꞌ rudzeja yehuaꞌ yubá niꞌa queëꞌ tuëꞌ bönniꞌ dul-laꞌ ubíꞌi ládxëꞌë ca gaca quégaquiëꞌ tápalalaj yuꞌ chënnëꞌ bönniꞌ tsahuiꞌ,
bönniꞌ téquinëꞌ bitiꞌ naquíniguequinëꞌ uluꞌbíꞌi ládxiꞌgaquiëꞌ.
Rucúdzuꞌë didzaꞌ Jesús que tu dumí guniti
8 Rnnëꞌ caꞌ Jesús:
―Channö zóanu tu nigula,
dë queë́nu chi dumí plata,
en channö initi tu dumí plata naꞌ,
¿naruꞌ cabí uquélaꞌnu guíꞌ,
ateꞌ ulúanu yuꞌu,
uguilaj yúdxinu le cateꞌ udzö́lirönu le?
9 Cateꞌ udzö́linu le,
utúbinu yuguꞌ nigula luzáꞌanu,
en yuguꞌ nigula dzaga yuꞌu queë́nu,
ateꞌ guië́nu légacanu:
“Buliꞌdzéjalen nedaꞌ,
tuꞌ chibudzö́lidaꞌ dumí plata naꞌ guniti.”
10 Reaꞌ libíꞌiliꞌ:
Lëscaꞌ caní,
uluꞌdzéjadeꞌerönëꞌ gubáz láꞌayi queëꞌ Dios niꞌa queëꞌ tuëꞌ bönniꞌ dul-laꞌ ubíꞌi ládxëꞌë.
Rucúdzuꞌë didzaꞌ Jesús queë́biꞌ tu biꞌi gunítibiꞌ
11 Rnnëꞌ caꞌ Jesús:
―Zoëꞌ tu bönniꞌ nacuáꞌabiꞌ chópabiꞌ biꞌi bönniꞌ queëꞌ.
San Lucas 15:11-32
12 Biꞌi cuidiꞌ naꞌ rëbiꞌ-nëꞌ xúzibiꞌ:
“Dad,
benna quiaꞌ le dë quiuꞌ le ral-laꞌ guequi quiaꞌ.”
Níꞌirö xúzibiꞌ naꞌ gudísiëꞌ quégacabiꞌ le dë queëꞌ.
13 Nabábasö dza gudzé,
biꞌi cuidiꞌ naꞌ butúbibiꞌ yúguꞌtë,
ateꞌ guyéajbiꞌ tu yödzö ziꞌtuꞌ,
ateꞌ niꞌ butöbiꞌ dërö le dë queë́biꞌ.
Le ruáꞌ döꞌ benbiꞌ.
14 Cateꞌ chibutöbiꞌ dërö le dë queë́biꞌ,
guca gubín lu yödzö ga naꞌ zóabiꞌ,
ateꞌ biyadzaj queë́biꞌ.
15 Níꞌirö guyéajbiꞌ yöjsóabiꞌ huen dxin queëꞌ tu bönniꞌ lu yödzö niꞌ,
ateꞌ bönniꞌ naꞌ gusö́l-lëꞌë-biꞌ ga dë xiyúëꞌ tsöjgágubiꞌ-baꞌ yuguꞌ cuchi queëꞌ.
16 Guca ládxiꞌbiꞌ gágubiꞌ guixiꞌ cáꞌasö naꞌ tágubaꞌ cuchi,
pero cuntu nu bi bëꞌ le gágubiꞌ.
17 Níꞌirö bubíꞌi ládxiꞌbiꞌ,
rnnabiꞌ:
“Cateꞌ xö bönniꞌ huen dxin nacuꞌë lidxëꞌ xuzaꞌ,
en dëdaꞌ le tahuëꞌ,
pero nedaꞌ ni huáti cazaꞌ yöl-laꞌ ridún.
18 Uzáꞌa ni,
huöjaꞌ ga zoëꞌ xuzaꞌ,
en tsöjödxaꞌ-nëꞌ:
Dad,
benaꞌ dul-laꞌ lahuëꞌ Dios,
zoëꞌ yehuaꞌ yubá,
en loꞌ liꞌ.
19 Bítiꞌrö nacaꞌ nedaꞌ lesacaꞌ gacaꞌ zxíꞌinuꞌ.
Ben nedaꞌ ca bönniꞌ huen dxin quiuꞌ.”
20 Níꞌirö guyúꞌubiꞌ nöza,
söhuö́ajbiꞌ ga zoëꞌ xúzibiꞌ.
’Cateꞌ niꞌ zóabiꞌ ziꞌtuꞌ suzáꞌabiꞌ,
biléꞌenëꞌ-biꞌ xúzibiꞌ,
en buéchiꞌ ládxëꞌë-biꞌ.
Carelö yöjzxíꞌgalëꞌ-biꞌ xúzibiꞌ,
en yöjnidëꞌ yenbiꞌ,
gudahuëꞌ-biꞌ zxixi.
21 Níꞌirö zxíꞌinëꞌ naꞌ rëbiꞌ-nëꞌ:
“Dad,
benaꞌ dul-laꞌ lahuëꞌ Dios,
zoëꞌ yehuaꞌ yubá,
en loꞌ liꞌ.
Bítiꞌrö nacaꞌ nedaꞌ lesacaꞌ gacaꞌ zxíꞌinuꞌ.”
22 Níꞌirö xúzibiꞌ rëꞌ yuguꞌ bönniꞌ huen dxin queëꞌ,
rnnëꞌ:
“Guliꞌtsöjléajtë lariꞌ nazácaꞌtërö,
en guliꞌgacu-biꞌ.
Guliꞌcúꞌu le nazacaꞌ xibö́n náꞌabiꞌ,
en buliꞌdáꞌ huarache níꞌabiꞌ.
23 Guliꞌtsöjzxíꞌi-baꞌ bëdxi renniꞌ,
ateꞌ guliꞌguti-baꞌ.
Gáguruꞌ-baꞌ,
en gunruꞌ laní,
24 tuꞌ guca biꞌi bönniꞌ quiaꞌ ni ca tu biꞌi chinátibiꞌ,
ateꞌ bubanbiꞌ.
Gunítibiꞌ,
ateꞌ chibuláꞌabiꞌ naꞌa.”
Níꞌirö gulaꞌsí lógaquiëꞌ tuꞌdzéjanëꞌ.
25 ’Tsanni niꞌ raca lë ni,
zóabiꞌ biꞌi bönniꞌ zíꞌalö queëꞌ bönniꞌ naꞌ laꞌ guixiꞌ.
Cateꞌ suzáꞌabiꞌ rudxinbiꞌ galaꞌ raꞌ yuꞌu,
riyö́nibiꞌ raca huila,
en raca huöꞌa lu yuꞌu naꞌ.
26 Níꞌirö bulídzabiꞌ-nëꞌ tuëꞌ bönniꞌ huen dxin zoëꞌ niꞌ,
en gunábibiꞌ lëꞌ bizxi naꞌ raca.
27 Bönniꞌ huen dxin naꞌ rëꞌë-biꞌ:
“Biꞌi bö́chuꞌu naꞌ budxinbiꞌ,
ateꞌ gunná bëꞌë xuzuꞌ gulútiëꞌ-baꞌ bëdxi renniꞌ,
tuꞌ budxinbiꞌ lu nëꞌë dxiꞌa tsáhuiꞌdoꞌ.”
28 Níꞌirö gulébiꞌ biꞌi zíꞌalö naꞌ,
en bitiꞌ gúꞌunibiꞌ tsúꞌubiꞌ yuꞌu.
Níꞌirö birúajëꞌ xúzibiꞌ,
en gútaꞌyuëꞌ lobiꞌ tsúꞌubiꞌ.
29 Bubíꞌibiꞌ didzaꞌ biꞌi zíꞌalö naꞌ,
rëbiꞌ-nëꞌ xúzibiꞌ:
“Nöz quézinuꞌ cateꞌ xö iz benaꞌ dxin loꞌ,
en catu caz gudáꞌbagaꞌa liꞌ,
pero catu caz bennuꞌ quiaꞌ tubaꞌ böꞌcuꞌ zxílaꞌdoꞌ para güíꞌilenaꞌ xibé yuguꞌ luzáꞌa.
30 Naꞌa,
cateꞌ budxinbiꞌ biꞌi quiuꞌ ni busunítibiꞌ yuguꞌ le gutaꞌ quiuꞌ,
gudálenbiꞌ-nu yuguꞌ nigula udá dzaga,
benuꞌ ga gulútiëꞌ-baꞌ bëdxi renniꞌ niꞌa queë́biꞌ.”
31 Níꞌirö xúzibiꞌ rëꞌë-biꞌ,
rnnëꞌ:
“Zxíꞌinaꞌ,
liꞌ zóalen cazuꞌ nedaꞌ ateꞌ yúguꞌtë le dë quiaꞌ,
quiuꞌ nequi.
32 Ben bayudxi gunruꞌ laní,
en udzéjaruꞌ,
tuꞌ gúcabiꞌ biꞌi bö́chuꞌu ni ca tu biꞌi chinati cázabiꞌ,
ateꞌ nubanbiꞌ.
Gunítibiꞌ ateꞌ chibuláꞌabiꞌ.”