Rusédinëꞌ Jesús ca ral-laꞌ gácalenruꞌ bönachi
6
Gunnë́ꞌ caꞌ Jesús:
―Guliꞌgüíꞌ ládxiꞌliꞌ gaca idú ca reaj ládxiꞌliꞌ-nëꞌ Dios.
Bitiꞌ gúnsiliꞌ lë ni lógaca bönachi para ilaꞌléꞌe ca naꞌ runliꞌ.
Channö runliꞌ caní,
bitiꞌ bi gunnëꞌ Xúziruꞌ Dios zoëꞌ yehuaꞌ yubá queë́liꞌ.
2 Cateꞌ bi unödzjuꞌ que nu bi riyadzaj,
bitiꞌ gunuꞌ ga iláꞌ lahui lë naꞌ runuꞌ ca tunëꞌ bönniꞌ tuꞌluíꞌisö tsahuiꞌ cuíngaquiëꞌ ga naca lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
encaꞌ ga naca lu yë́ꞌëyi.
Caní tunëꞌ para ilaꞌgúꞌu bönachi légaquiëꞌ yöl-laꞌ ba.
Le nácatë reaꞌ libíꞌiliꞌ,
cáꞌasö naca yöl-laꞌ ba gataꞌ quégaquiëꞌ.
3 Pero liꞌ,
cateꞌ bi unödzjuꞌ que nu bi riyadzaj,
bitiꞌ caꞌ guꞌu lataj nu inözi.
4 Naꞌa,
lë naꞌ unödzjuꞌ,
bagáchiꞌsö ral-laꞌ unödzjuꞌ,
ateꞌ Xúziruꞌ Dios,
Nu riléꞌe ca naꞌ runuꞌ bagáchiꞌsö,
Lëꞌ ubiꞌë quiuꞌ.
Rusédinëꞌ Jesús ca ral-laꞌ ulídzaruꞌ-nëꞌ Dios
5 Gunnë́ꞌ caꞌ Jesús:
―Cateꞌ ulídzaliꞌ-nëꞌ Dios,
bitiꞌ gunliꞌ ca tunëꞌ bönniꞌ tuꞌluíꞌisö tsahuiꞌ cuíngaquiëꞌ,
tuꞌ taꞌyaza ládxiꞌgaquiëꞌ taꞌzuínëꞌ tuꞌlidzëꞌ Dios gapa naca lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios,
en gapa naca lu yë́ꞌëyi para ilaꞌléꞌe bönachi légaquiëꞌ.
Le nácatë reaꞌ libíꞌiliꞌ,
cáꞌasö naca yöl-laꞌ ba gataꞌ quégaquiëꞌ.
6 Pero libíꞌiliꞌ,
cateꞌ ulídzaliꞌ-nëꞌ Dios guliꞌtsaza lídxiliꞌ,
en buliꞌsayaj yuꞌu.
Buliꞌlidzëꞌ Dios inábiliꞌ-nëꞌ Xúziruꞌ Dios,
zóalenëꞌ libíꞌiliꞌ ga naꞌ zóaliꞌ queë́ziliꞌ,
ateꞌ Xúziruꞌ Dios,
Nu riléꞌe ca runliꞌ bagáchiꞌsö,
Lëꞌ ubiꞌë queë́liꞌ.
7 ’Cateꞌ ulídzaliꞌ-nëꞌ Dios bitiꞌ gunliꞌ laꞌ yë́ꞌëyi laꞌ lez ca naꞌ tunëꞌ bönniꞌ bitiꞌ núnbëꞌgaquiëꞌ Dios,
tuꞌ téquinëꞌ huayönnëꞌ Dios légaquiëꞌ tuꞌ tuꞌlidzëꞌ laꞌ yë́ꞌëyi laꞌ lez.
8 Bitiꞌ gunliꞌ ca naꞌ tunëꞌ légaquiëꞌ.
Xúziruꞌ Dios,
zíꞌatëlö cateꞌ siꞌ inábaliꞌ-nëꞌ,
chinö́z quézinëꞌ le riyadzaj queë́liꞌ.
9 Que lë ni naꞌ,
ral-laꞌ ulídzaliꞌ-nëꞌ Dios innaliꞌ caní:
Xuz netuꞌ,
zuꞌ yehuaꞌ yubá,
gaca zxön Loꞌ.
10 Gudá inná bëꞌu luyú ni.
Ben ga gaca luyú ni ca raza ládxuꞌu Liꞌ
ca naꞌ raca yehuaꞌ yubá.
11 Benna le gágutuꞌ naꞌa dza.
12 Buniti lo netuꞌ le huiáꞌ döꞌ bentuꞌ Loꞌ Liꞌ
ca runtuꞌ netuꞌ,
runiti lotuꞌ nupa bi tun queë́tuꞌ.
13 Bitiꞌ guꞌu lataj siꞌ bëꞌ tuꞌ xihuiꞌ netuꞌ,
pero busölá netuꞌ lu naꞌ nu ruáꞌ döꞌ.
Nequi quiuꞌ ga rinná bëꞌu,
en yöl-laꞌ unná bëꞌ,
en yöl-laꞌ ba.
Caní rë́ꞌënituꞌ gácaticaꞌsö.
¡Caꞌ gaca!
14 ’Channö uniti loliꞌ luzáꞌaliꞌ,
nupa tuáꞌ döꞌ queë́liꞌ,
uniti lahuëꞌ Xúziruꞌ Dios,
zoëꞌ yehuaꞌ yubá,
libíꞌiliꞌ.
15 Channö cabí uniti loliꞌ luzáꞌaliꞌ,
bitiꞌ uniti lahuëꞌ Xúziruꞌ Dios libíꞌiliꞌ ca naca dul-laꞌ nabágaꞌliꞌ.
Rusédinëꞌ Jesús ca ral-laꞌ gunruꞌ gubasa
16 Gunnë́ꞌ caꞌ Jesús:
―Cateꞌ gunliꞌ gubasa,
bitiꞌ gunliꞌ bayechiꞌ loliꞌ ca tunëꞌ bönniꞌ tuꞌluíꞌisö tsahuiꞌ cuíngaquiëꞌ,
tuꞌ tunëꞌ bayechiꞌ lógaquiëꞌ para iléquibeꞌe bönachi tunëꞌ gubasa.
Le nácatë reaꞌ libíꞌiliꞌ,
cáꞌasö naca yöl-laꞌ ba gataꞌ quégaquiëꞌ.
17 Libíꞌiliꞌ,
cateꞌ gunliꞌ gubasa,
buliꞌpáꞌa ícjaliꞌ,
en guliꞌquibi loliꞌ,
18 para cabí iléquibeꞌe bönachi runliꞌ gubasa.
Bagáchiꞌsö ral-laꞌ gunliꞌ gubasa,
ateꞌ Xúziruꞌ Dios,
zóalenëꞌ libíꞌiliꞌ ga naꞌ zóaliꞌ queë́ziliꞌ,
Lëꞌ ubiꞌë queë́liꞌ.
Yehuaꞌ yubá ral-laꞌ utúbiruꞌ yöl-laꞌ tsahuiꞌ queë́ruꞌ
19 Gunnë́ꞌ caꞌ Jesús:
―Bitiꞌ utúbiliꞌ yöl-laꞌ tsahuiꞌ luyú ni,
ga ni bë́ladoꞌ que tuꞌtöbaꞌ le,
ateꞌ raca ditaj,
en ga ni taꞌyaza gubán,
taꞌbanëꞌ.
20 Buliꞌtubi yöl-laꞌ tsahuiꞌ yehuaꞌ yubá,
ga niꞌ bë́ladoꞌ que bitiꞌ uluꞌtöbaꞌ le,
en bitiꞌ gaca ditaj,
en ga niꞌ bitiꞌ ilaꞌyáziëꞌ bönniꞌ gubán,
en bitiꞌ ilaꞌbanëꞌ.
21 Ga niꞌ dë yöl-laꞌ tsahuiꞌ queë́liꞌ,
niꞌ güíꞌi ládxiꞌliꞌ idxinliꞌ.
Le rigúꞌu beníꞌ icja ládxiꞌdoꞌoruꞌ
22 Gunnë́ꞌ caꞌ Jesús:
―Guiöj loruꞌ naca ca tu le rigúꞌu beníꞌ icja ládxiꞌdoꞌoruꞌ.
Que lë ni naꞌ,
channö guiö́j loliꞌ naca tsahuiꞌ,
idútëliꞌ tsë́piliꞌ yösa beníꞌ.
23 Channö guiö́j loliꞌ bitiꞌ naca tsahuiꞌ,
idútëliꞌ nachúl-laliꞌ.
Que lë ni naꞌ,
channö beníꞌ zóalen libíꞌiliꞌ nuhuöáca le naca chul-la,
yénniꞌtërö nachúl-laliꞌ.
Dios, en dumí
24 Gunnë́ꞌ caꞌ Jesús:
―Cuntu nu bönniꞌ gaca gunëꞌ xichíngaquiëꞌ chopa xanëꞌ,
tuꞌ uzóëꞌ tuëꞌ tsöláꞌalö,
ateꞌ iaꞌtúëꞌ naꞌ idxíꞌinëꞌ,
o ugáꞌanalenëꞌ tuëꞌ,
ateꞌ iaꞌtúëꞌ naꞌ usán ládxëꞌë.
Bitiꞌ gaca gunliꞌ xichinëꞌ Dios,
encaꞌ dumí.
Dios rapa chiꞌë nupa néquiguequi queëꞌ
25 Gunnë́ꞌ caꞌ Jesús:
―Iaꞌstú reaꞌ libíꞌiliꞌ:
Bitiꞌ ubi uguíꞌiliꞌ niꞌa que le gáguliꞌ o niꞌa que le guíꞌjaliꞌ,
yuguꞌ le nabániliꞌ,
o niꞌa que lariꞌ gáculiꞌ.
Nazácaꞌtërö yöl-laꞌ naꞌbán queë́liꞌ ca le gáguliꞌ,
ateꞌ nácatërö lesacaꞌ le nácaliꞌ ca lariꞌ gáculiꞌ.
26 Buliꞌyú ca raca quégacabaꞌ biguínnidoꞌ taꞌdabaꞌ lúzxiba.
Bitiꞌ bi taz tuꞌzóabaꞌ,
en bitiꞌ tuꞌlápabaꞌ,
en bitiꞌ tuꞌtúbibaꞌ ga bi ilaꞌgúꞌubaꞌ quégacabaꞌ,
pero Xúziruꞌ Dios zoëꞌ yehuaꞌ yubá,
rugagu cazëꞌ légacabaꞌ.
Nazácaꞌtëröliꞌ libíꞌiliꞌ ca yuguꞌ biguínnidoꞌ naꞌ.
27 ¿Nuzxi caz bönniꞌ nútsëꞌë ládjaliꞌ gaca gunëꞌ ga soëꞌ ibanëꞌ iaꞌtúz dza tuꞌ ruúbi ruguíꞌinëꞌ para gaca caní queëꞌ?
28 ’¿Bizx que ruúbi ruguíꞌiliꞌ niꞌa que le gáculiꞌ?
Buliꞌyútsöcaꞌ ca raca quégaca yöjdoꞌ rö́ꞌgaca laꞌ guixiꞌ ca taꞌzxö́n.
Bitiꞌ tun dxin,
en bitiꞌ tun du lariꞌ.
29 Nedaꞌ reaꞌ libíꞌiliꞌ,
Salomón,
bönniꞌ niꞌ gunná bëꞌë,
sal-laꞌ gútaꞌdaꞌ yöl-laꞌ tsahuiꞌ queëꞌ,
lariꞌ gúcuëꞌ bitiꞌ gunnáꞌtërö lachi ca rinnáꞌgaca yöjdoꞌ naꞌ.
30 Dios caz runëꞌ lachi yöj guíxiꞌdoꞌ,
le rö́ꞌgaca laꞌ guixiꞌ,
le nacuáꞌ naꞌa dza,
ateꞌ cuxö́ huidzaj ilaꞌyegui lu guíꞌ.
Channö caní ruíꞌi ládxëꞌë yöj guíxiꞌdoꞌ,
runëꞌ léguequi lachi,
gúndaꞌarëꞌ caꞌ queë́liꞌ,
sal-laꞌ bitiꞌ réajlëꞌëliꞌ-nëꞌ idú ládxiꞌliꞌ.
31 Que lë ni naꞌ,
bitiꞌ ubi uguíꞌiliꞌ,
en bitiꞌ innaliꞌ:
“¿Bizxi gágutsatuꞌ?”
o “¿Bizxi guíꞌjatsatuꞌ?”
o “¿Bizxi lariꞌ gácutsatuꞌ?”
32 Bönachi yödzölió ni tuꞌúbi tuꞌguíꞌi niꞌa que yúguꞌtë lë ni,
pero zoëꞌ Xúziruꞌ yehuaꞌ yubá,
ateꞌ Lëꞌ nö́zinëꞌ naquíniliꞌ yúguꞌtë lë ni.
33 Naꞌa,
guliꞌgüíꞌirö ládxiꞌliꞌ inná béꞌenëꞌ Dios libíꞌiliꞌ,
en gunliꞌ le naca tsahuiꞌ lahuëꞌ Lëꞌ,
ateꞌ Lëꞌ cuꞌë xinö́zaliꞌ yúguꞌtë lë ni.
34 Que lë ni naꞌ,
bitiꞌ ubi uguíꞌiliꞌ niꞌa que le ral-laꞌ gaca cuxö́ huidzaj,
tuꞌ huáca güíꞌi ládxiꞌliꞌ cuxö́ huidzaj le gaca queë́liꞌ dza naꞌ.
Tu tu dza ilaca le ral-laꞌ güíꞌi ládxiꞌliꞌ dza naꞌ.