Bönniꞌ réꞌenëꞌ huëꞌ nacúꞌuniëꞌ bin
2
Cateꞌ chigudödi chopa tsonna dza,
buáziëꞌ Jesús yödzö Capernaum,
ateꞌ guzë́ didzaꞌ zoëꞌ yuꞌu.
2 Laꞌ buluꞌdúbitë bönachi zián ga naꞌ zoëꞌ Jesús,
ga bidxintë bítiꞌrö guzxéquiꞌ ilaꞌcuáꞌ niꞌ,
ni raꞌ yuꞌu,
ateꞌ Jesús benëꞌ libán que xtídzëꞌë lógaquiëꞌ.
3 Níꞌirö bilaꞌdxinëꞌ ga naꞌ zoëꞌ Jesús tapëꞌ bönniꞌ,
nuáꞌagaquiëꞌ tu bönniꞌ huëꞌ nacúꞌuniëꞌ bin.
4 Bitiꞌ guca ilaꞌdxinëꞌ lahuëꞌ Jesús tuꞌ nacuáꞌ bönachi zián niꞌ.
Que lë ni naꞌ gulaꞌsaljëꞌ ícjoꞌolö ca dö́dilö ga zoëꞌ Jesús.
Cateꞌ budxi buluꞌdxíëꞌ yeru naꞌ,
niꞌ buluꞌzötjëꞌ le denëꞌ bönniꞌ huëꞌ naꞌ.
5 Cateꞌ gúquibeꞌenëꞌ Jesús ca naꞌ taꞌyéajlëꞌë Lëꞌ,
gudxëꞌ bönniꞌ huëꞌ naꞌ:
―Zxiꞌinaꞌ,
chibunít lahuaꞌ liꞌ ca naca dul-laꞌ nabáguꞌu.
6 Rö́ꞌögaquiëꞌ bal-lëꞌ bönniꞌ yudoꞌ usedi niꞌ.
Taꞌzáꞌ ládxiꞌgaquiëꞌ,
taꞌnnë́ꞌ:
7 ¿Bizx que ruꞌë caní didzaꞌ bönniꞌ ni?
Rucáꞌanëꞌ cáꞌasö Dios.
Cuntu nu bönniꞌ gaca uniti lahuëꞌ dul-laꞌ.
Tuzëꞌ Dios gaca gunëꞌ lë ni.
8 Laꞌ gúquibeꞌetenëꞌ Jesús le taꞌzáꞌ ládxiꞌgaquiëꞌ,
ateꞌ gudxëꞌ légaquiëꞌ:
―¿Bizx que rizáꞌ ládxiꞌliꞌ caní?
9 Bitiꞌ naca böniga nu guië́sö bönniꞌ huëꞌ ni chibuníti lo dul-laꞌ nabáguëꞌë,
pero naca böniga nu gun ga huöásëꞌ,
en uꞌë le denëꞌ,
en uzëꞌe niꞌë.
10 Gunaꞌ le gaca bëꞌ nedaꞌ,
Bönniꞌ Guljëꞌ Bönachi,
dë lu naꞌa luyú ni uniti lahuaꞌ dul-laꞌ nabágaꞌgaca bönachi.
Níꞌirö Jesús gudxëꞌ bönniꞌ huëꞌ naꞌ:
11 ―Liꞌ reaꞌ:
Guyasa.
Buáꞌ le denuꞌ,
en böaj lidxuꞌ.
12 Laꞌ guyásatëꞌ bönniꞌ huëꞌ naꞌ,
buꞌë le gútiꞌnëꞌ,
en burúajëꞌ lógaca yúguꞌtë nupa nacuáꞌ niꞌ.
Buluꞌbáninëꞌ yúguꞌtëꞌ,
en gulaꞌguꞌë Dios yöl-laꞌ ba,
taꞌnnë́ꞌ:
―Catu caz riléꞌetuꞌ le caní.
Jesús rulidzëꞌ Leví
13 Burúajëꞌ Jesús yödzö Capernaum,
naꞌ gudödëꞌ leyúbölö raꞌ nísadoꞌ.
Buluꞌdubi bönachi zián ga zoëꞌ Jesús,
ateꞌ Lëꞌ busédinëꞌ légaquiëꞌ.
14 Cateꞌ ridödëꞌ Jesús niꞌ,
biléꞌenëꞌ Leví,
zxíꞌinëꞌ Alfeo,
röꞌë ga ruquízxjëꞌ uláz que yödzö ziꞌtuꞌ.
Jesús gudxëꞌ lëꞌ:
―Gudáꞌ nedaꞌ.
Laꞌ guyásatëꞌ Leví naꞌ,
saꞌyéajlenëꞌ Jesús.
15 Gudödi guca lë ni,
röꞌë Jesús rahuëꞌ lu yuꞌu lidxëꞌ Leví naꞌ,
ateꞌ zián bönniꞌ uquízxaj,
en iaꞌbal-lëꞌ bönniꞌ cáꞌasö rö́ꞌölengaquiëꞌ tsözxö́n Jesús,
en yuguꞌ bönniꞌ usëda queëꞌ.
Caní guca,
tuꞌ röjaca bönachi zián len Jesús.
16 Cateꞌ yuguꞌ bönniꞌ yudoꞌ usedi,
en yuguꞌ bönniꞌ yudoꞌ fariseo,
bilaꞌléꞌenëꞌ Lëꞌ röꞌë rágulenëꞌ tsözxö́n yuguꞌ bönniꞌ uquízxaj,
en iaꞌbal-lëꞌ bönniꞌ cáꞌasö,
gulë́ꞌ yuguꞌ bönniꞌ usëda queëꞌ Jesús,
taꞌnnë́ꞌ:
―¿Bizxi caz runtsëꞌ?
¡Rëꞌaj rágulentsëꞌ yuguꞌ bönniꞌ uquízxaj,
en iaꞌbal-lëꞌ bönniꞌ dul-laꞌ!
17 Biyönnëꞌ Jesús didzaꞌ ni tuꞌë,
en gudxëꞌ légaquiëꞌ:
―Nupa nacuáꞌ dxiꞌa bitiꞌ naquíniguequi nu un bönachi,
pero nupa teꞌe naquíniguequi nu un bönachi.
Zaꞌa nedaꞌ,
calëga dulídzagacaꞌ bönachi tsahuiꞌ,
pero rulídzagacaꞌ bönachi dul-laꞌ para uluꞌbíꞌi ládxiꞌgaca.
Ruꞌë Jesús didzaꞌ que yöl-laꞌ run gubasa
18 Tu dza niꞌ tunëꞌ gubasa bönniꞌ dáꞌgaquiëꞌ Juan,
en bönniꞌ dáꞌgaquiëꞌ yuguꞌ bönniꞌ yudoꞌ fariseo,
ateꞌ bilaꞌdxín nupa gulaꞌnabi Jesús,
taꞌnná:
―¿Bizx que tunëꞌ gubasa bönniꞌ dáꞌgaquiëꞌ Juan,
en bönniꞌ dáꞌgaquiëꞌ yuguꞌ bönniꞌ yudoꞌ fariseo,
pero bönniꞌ dáꞌgaquiëꞌ Liꞌ bitiꞌ tunëꞌ gubasa?
19 Bubiꞌë didzaꞌ Jesús,
rëꞌ légaquiëꞌ:
―¿Naruꞌ réquitseliꞌ ilún gubasa nupa nacuáꞌ laní queëꞌ bönniꞌ rutsaga nëꞌë tsanni niꞌ bönniꞌ naꞌ rutsaga nëꞌë zóalenëꞌ légaquiëꞌ?
Tsanni niꞌ bönniꞌ naꞌ rutsaga nëꞌë zóalenëꞌ légaquiëꞌ,
bitiꞌ gaca ilunëꞌ gubasa.
20 Idxín dza cateꞌ udúëꞌ bönniꞌ naꞌ rutsaga nëꞌë,
en bítiꞌrö sóalenëꞌ légaquiëꞌ,
ateꞌ dza níꞌirö ilunëꞌ gubasa.
21 ’Cuntu nu bönniꞌ udë́ꞌë tu lariꞌ cúbidoꞌ lu lariꞌ chinatëbi,
tuꞌ utsupiꞌ lariꞌ cubi naꞌ,
en huachözaꞌ lariꞌ tëbi naꞌ,
ateꞌ huarö́zaꞌrö lariꞌ tëbi naꞌ.
22 Lëscaꞌ caní cuntu nu bönniꞌ quëꞌë xisi uva cubi lu buzudi bidxi néquini guídi,
tuꞌ gal-la xisi uva cubi naꞌ,
en uláꞌa buzudi bidxi naꞌ néquini guídi,
ateꞌ ilalaj xisi uva naꞌ,
en gaca ditaj buzudi néquini guídi.
Xisi uva cubi lu buzudi néquini guídi cubi ral-laꞌ cáꞌaruꞌ.
Bönniꞌ dáꞌgaquiëꞌ Jesús taꞌlecjëꞌ do dza láꞌayi
23 Tu dza láꞌayi quégaquiëꞌ bönniꞌ judío,
gudödëꞌ Jesús gapa dë yöla zxoaꞌ xtila,
ateꞌ bönniꞌ usëda queëꞌ gulaꞌsí lógaquiëꞌ taꞌlecjëꞌ do ga dxía zxoaꞌ xtila.
24 Níꞌirö bönniꞌ yudoꞌ fariseo gulë́ꞌ Jesús,
taꞌnnë́ꞌ:
―Buyútsöcaꞌ.
¿Bizx que tunëꞌ bönniꞌ dáꞌgaquiëꞌ Liꞌ le cabí ral-laꞌ gunruꞌ dza láꞌayi?
25 Jesús gudxëꞌ légaquiëꞌ:
―¿Naruꞌ cabí nulábaniliꞌ ca benëꞌ David cateꞌ gudunëꞌ?
Biyadzaj le ilahuëꞌ lëꞌ,
en nupa nacuáꞌlen lëꞌ
26 ateꞌ guyáziëꞌ lu yuꞌu queëꞌ Dios cateꞌ niꞌ náquiëꞌ bixúz lo Abiatar,
en gudahuëꞌ yöta xtila tuꞌcuꞌë lahuëꞌ Dios,
lë naꞌ bitiꞌ dë lataj nu gagu,
pero tuz bixúz dë lataj ilahuëꞌ le.
Bëꞌë caꞌ le ilahuëꞌ bönniꞌ nacuáꞌlenëꞌ lëꞌ.
27 Níꞌirö Jesús gudxëꞌ légaquiëꞌ: