Jesús ruúnëꞌ tu bönniꞌ nacúꞌuniëꞌ bin
9
Níꞌirö bubenëꞌ Jesús lëꞌe bárcodoꞌ,
en gudödëꞌ iaꞌtsöláꞌa nísadoꞌ niꞌ,
ateꞌ budxinëꞌ ga naca ladzëꞌ.
2 Niꞌ dujuáꞌgaquiëꞌ tu bönniꞌ nacúꞌuniëꞌ bin ga zoëꞌ Jesús,
zxoëꞌ lu daꞌa yaga.
Cateꞌ biléꞌenëꞌ Jesús ca naꞌ taꞌyéajlëꞌë bönniꞌ ni Lëꞌ,
gudxëꞌ bönniꞌ naꞌ nacúꞌuniëꞌ bin,
rnnëꞌ:
―Butipa ládxuꞌu,
zxíꞌinaꞌdoꞌ.
Chibuníti lahuaꞌ dul-laꞌ nabáguꞌu.
3 Nacuꞌë caꞌ bönniꞌ yudoꞌ tuꞌsédinëꞌ niꞌ,
ateꞌ taꞌnnë́ꞌ lu icja ládxiꞌdoꞌgaquiëꞌ,
taꞌnnë́ꞌ:
“Didzaꞌ ruꞌë bönniꞌ ni ruzóa Dios tsöláꞌalö.”
4 Cateꞌ réquibeꞌenëꞌ Jesús le taꞌzáꞌ ládxiꞌgaquiëꞌ,
rëꞌ légaquiëꞌ:
―¿Bizx que rizáꞌ ládxiꞌliꞌ caní le cabí naca tsahuiꞌ?
5 Bitiꞌ naca böniga nu guië́sö bönniꞌ ni:
“Yuguꞌ dul-laꞌ nabáguꞌu chibuníti lahuaꞌ”,
pero naca böniga nu gun ga huöásëꞌ,
en uzéꞌenëꞌ.
6 Naꞌa,
uluíꞌidaꞌ libíꞌiliꞌ nedaꞌ,
Bönniꞌ Guljëꞌ Bönachi,
dë lu naꞌa yöl-laꞌ unná bëꞌ uniti lahuaꞌ dul-laꞌ luyú ni.
Níꞌirö Jesús gudxëꞌ bönniꞌ naꞌ nacúꞌuniëꞌ bin,
rnnëꞌ:
―Guyása.
Buchisa daꞌa yaga quiuꞌ,
en böaj lidxuꞌ.
7 Níꞌirö laꞌ guyásatëꞌ bönniꞌ naꞌ nacúꞌuniëꞌ bin,
en bö́ajëꞌ lidxëꞌ.
8 Cateꞌ bilaꞌléꞌenëꞌ bönniꞌ nacuꞌë niꞌ lë ni,
buluꞌbáninëꞌ,
ateꞌ gulaꞌguꞌë Dios yöl-laꞌ ba tuꞌ bunödzjëꞌ yöl-laꞌ huáca caní quégaca bönachi.
Jesús rulidzëꞌ Mateo
9 Cateꞌ buzë́ꞌë Jesús niꞌ,
biléꞌenëꞌ bönniꞌ lëꞌ Mateo,
röꞌë ga naꞌ ruquízxjëꞌ uláz que yödzö ziꞌtuꞌ,
ateꞌ Jesús gudxëꞌ lëꞌ:
―Gudáꞌ nedaꞌ.
Níꞌirö laꞌ guyásatëꞌ Mateo naꞌ,
ateꞌ saꞌyéajlenëꞌ Jesús.
10 Iaꞌtú le guca,
cateꞌ niꞌ röꞌë Jesús rahuëꞌ ga naca lidxëꞌ Mateo,
zián bönniꞌ tuꞌquízxjëꞌ,
en yuguꞌ bönniꞌ cáꞌasö bilaꞌdxinëꞌ ga zoëꞌ,
ateꞌ gulaꞌbö́ꞌlenëꞌ Jesús tsözxö́n len yuguꞌ bönniꞌ usëda queëꞌ.
11 Cateꞌ bönniꞌ yudoꞌ fariseo bilaꞌléꞌenëꞌ lë ni,
gulaꞌnábinëꞌ yuguꞌ bönniꞌ usëda queëꞌ Jesús,
taꞌnnë́ꞌ:
―¿Naruꞌ bönniꞌ rusédinëꞌ libíꞌiliꞌ rágulentsëꞌ tsözxö́n bönniꞌ tuꞌquízxjëꞌ,
en iáꞌzícaꞌrëꞌ bönniꞌ dul-laꞌ?
12 Cateꞌ biyönnëꞌ Jesús lë ni,
rëꞌ légaquiëꞌ:
―Bitiꞌ naquíniguequinëꞌ bönniꞌ nácagaquiëꞌ dxiꞌa nu un bönachi,
pero bönniꞌ téꞌenëꞌ naquíniguequinëꞌ nu un bönachi.
13 Guliꞌtséaj,
en buliꞌsëda le rnna lë naꞌ nazúaj lu guichi láꞌayi,
le rnna caní:
“Rë́ꞌëndaꞌ uluꞌhuéchiꞌ ládxiꞌgaquiëꞌ bönniꞌ luzáꞌagaquiëꞌ,
en calëga ilútiëꞌ-baꞌ böaꞌ bëdxi lu bucugu láꞌayi quiaꞌ.”
Bidaꞌ ni,
calëga para ulídzagacaꞌ-nëꞌ bönniꞌ tsahuiꞌ,
pero bidaꞌ para ulídzagacaꞌ-nëꞌ bönniꞌ dul-laꞌ para uluꞌbíꞌi ládxiꞌgaquiëꞌ.
Rusédinëꞌ Jesús ca ral-laꞌ gunruꞌ gubasa
14 Níꞌirö bönniꞌ dáꞌgaquiëꞌ Juan,
bönniꞌ naꞌ buquilëꞌ bönachi nisa,
bilaꞌdxinëꞌ ga zoëꞌ Jesús,
ateꞌ gulaꞌnábinëꞌ Lëꞌ,
taꞌnnë́ꞌ:
―¿Bizx que naꞌ netuꞌ,
encaꞌ yuguꞌ bönniꞌ yudoꞌ fariseo,
zián luzuí runtuꞌ gubasa,
pero yuguꞌ bönniꞌ usëda quiuꞌ Liꞌ bitiꞌ tunëꞌ gubasa?
15 Bubiꞌë didzaꞌ Jesús,
en rëꞌ légaquiëꞌ:
―¿Naruꞌ huácatsö ilaꞌsëbi ládxiꞌgaca nupa nacuáꞌ laní que yöl-laꞌ rutsaga naꞌ tsanni niꞌ bönniꞌ rutsaga nëꞌë zóalenëꞌ légaquiëꞌ?
Zaꞌ dza cateꞌ idúëꞌ bönniꞌ naꞌ rutsaga nëꞌë ga nacuꞌë.
Dza níꞌirö ilunëꞌ gubasa.
16 Bucúdzuꞌë didzaꞌ Jesús,
rnnëꞌ:
―Cuntu nu un tu lariꞌ tëbi len lariꞌ cubi,
tuꞌ uxúꞌuni lariꞌ cubi naꞌ nuguꞌë lariꞌ tëbi naꞌ,
ateꞌ ichö́zaꞌrö lariꞌ tëbi naꞌ.
17 Lëscaꞌ caní,
cuntu nu bönniꞌ riguë́ꞌënëꞌ xisi uva cubi tu lu buzudi guídi gula,
tuꞌ galaj ilëbi xisi uva cubi naꞌ,
en uzxuzxaj buzudi guídi gula naꞌ,
ateꞌ gaca ditaj xisi uva naꞌ,
ateꞌ initi caꞌ buzudi guídi naꞌ.
Rigáꞌaruꞌ xisi uva cubi tu lu buzudi guídi cubi,
ateꞌ irópatë taca chiꞌi.
Rubanbiꞌ biꞌi nigula queëꞌ Jairo, en ruhuöácanu tu nigula gudannu lariꞌ nácuëꞌ Jesús
18 Tsanni niꞌ Jesús ruíꞌilenëꞌ légaquiëꞌ didzaꞌ ni,
tu bönniꞌ rinná béꞌenëꞌ bönachi judío bidxinëꞌ ga zoëꞌ,
ateꞌ buzóa zxibëꞌ lahuëꞌ Jesús,
en rëꞌ Lëꞌ:
―Biꞌi nigúladoꞌ quiaꞌ laꞌ gútitëbiꞌ.
Gudá ixóa noꞌo lëbiꞌ,
ateꞌ ubanbiꞌ.
19 Laꞌ guzuítenëꞌ Jesús,
en saꞌyéajlenëꞌ lëꞌ.
Dzágagaquiëꞌ bönniꞌ usëda queëꞌ Lëꞌ.
20 Níꞌirö bidxinnu tu nigula zacaꞌ cúdzuꞌlëꞌ Jesús,
chiguca chinnu iz réꞌenu,
bitiꞌ ruhuíꞌi rön queë́nu que huëꞌ quégaca cázanu nigula,
ateꞌ gudannu lariꞌ nácuëꞌ Jesús.
21 Caní bennu tuꞌ rizáꞌ ládxiꞌnu,
rnnanu:
Channö cansaꞌ zxëꞌ,
huöácaꞌ.
22 Níꞌirö buécjëꞌ Jesús,
en ruyúëꞌ lënu,
ateꞌ rëꞌë-nu:
―Butipa ládxuꞌu,
zxíꞌinaꞌdoꞌ.
Chiböácateuꞌ tuꞌ réajlëꞌu nedaꞌ.
Laꞌ náꞌasö böácatënu.
23 Cateꞌ bidxinëꞌ Jesús lidxëꞌ bönniꞌ unná bëꞌ naꞌ,
biléꞌenëꞌ nacuꞌë niꞌ bönniꞌ tuꞌcödxëꞌ gui,
en nupa taꞌbödxi yechiꞌ.
24 Jesús rëꞌ légaquiëꞌ:
―Guliꞌcuita ni,
tuꞌ cabí nátibiꞌ biꞌi nigúladoꞌ ni.
Rásisibiꞌ naꞌ.
Níꞌirö nupa nacuáꞌ niꞌ buluꞌtitaj Lëꞌ.
25 Cateꞌ chinubéajëꞌ Jesús bönachi naꞌ níꞌilö,
guyáziëꞌ,
en gudélëꞌë náꞌabiꞌ biꞌi nigula naꞌ,
ateꞌ laꞌ guyásatëbiꞌ.
26 Guzë́ didzaꞌ ca guca lë ni,
ateꞌ bilaꞌyöni bönachi nacuáꞌ idútë luyú naꞌ.
Jesús ruúnëꞌ bönniꞌ nachul-la guiö́j lógaquiëꞌ
27 Cateꞌ Jesús burúajëꞌ niꞌ,
chopëꞌ bönniꞌ nachul-la guiö́j lógaquiëꞌ söjácalenëꞌ Lëꞌ.
Tuꞌë zidzaj didzaꞌ,
taꞌnnë́ꞌ:
―Zxíꞌini xiꞌsóëꞌ David,
buéchiꞌ ladxiꞌ netuꞌ.
28 Cateꞌ bidxinëꞌ Jesús ga naca lu yuꞌu,
bilaꞌdxinëꞌ chopëꞌ bönniꞌ naꞌ nachul-la guiö́j lógaquiëꞌ ga zoëꞌ.
Jesús gunábinëꞌ légaquiëꞌ,
rnnëꞌ:
―¿Ba réajlëꞌëliꞌ nedaꞌ,
huáca unaꞌ libíꞌiliꞌ?
Légaquiëꞌ taꞌnnë́ꞌ:
―Ön,
Xan.
29 Níꞌirö Jesús gudanëꞌ guiö́j lógaquiëꞌ,
ateꞌ rnnëꞌ:
―Ca réajlëꞌëliꞌ,
caꞌ gaca queë́liꞌ.
30 Laꞌ böáljatë guiö́j lógaquiëꞌ.
Níꞌirö Jesús buzenëꞌ bach légaquiëꞌ,
rnnëꞌ:
―Guliꞌgüíꞌiticaꞌsö ládxiꞌliꞌ cuntu nu inözi lë ni.
31 Cateꞌ buluꞌrúajëꞌ niꞌ,
laꞌ buluꞌzëtëꞌ didzaꞌ idútë luyú niꞌ ca naca lë naꞌ benëꞌ Jesús.
Jesús ruúnëꞌ tu bönniꞌ bitiꞌ ruꞌë didzaꞌ
32 Cateꞌ Jesús,
en yuguꞌ bönniꞌ usëda queëꞌ buluꞌrúajëꞌ tu lu yuꞌu,
bilaꞌdxinëꞌ bönniꞌ ga zoëꞌ Jesús nachë́ꞌgaquiëꞌ lahuëꞌ tu bönniꞌ bitiꞌ ruꞌë didzaꞌ,
tuꞌ yuꞌu lëꞌ böꞌ xihuiꞌ.
33 Cateꞌ bubéajëꞌ Jesús böꞌ xihuiꞌ naꞌ,
laꞌ gunnëtëꞌ bönniꞌ naꞌ bitiꞌ guca guꞌë didzaꞌ.
Buluꞌbáninëꞌ bönniꞌ nacuꞌë niꞌ,
taꞌnnë́ꞌ:
―Catu caz riléꞌetuꞌ le caní ladaj bönachi Israel.
34 Níꞌirö bönniꞌ yudoꞌ fariseo gulaꞌnnë́ꞌ queëꞌ Jesús,
taꞌnnë́ꞌ:
―Bönniꞌ ni rubéajëꞌ yuguꞌ böꞌ xihuiꞌ,
rugunëꞌ dxin yöl-laꞌ unná bëꞌ que xángaca böꞌ xihuiꞌ naꞌ.
Jesús ruhuéchiꞌ ládxëꞌë bönachi zián
35 Gudë́ꞌ Jesús idú gásibiꞌilö gapa nacuáꞌ yödzö zxön,
en gapa nacuáꞌ yö́dzödoꞌ,
ateꞌ gapa naca lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios.
Rusédinëꞌ Jesús bönachi nacuáꞌ niꞌ,
en runëꞌ libán que didzaꞌ dxiꞌa ca rinná bëꞌë Dios.
Bunëꞌ yúguꞌtë nupa bi taꞌguíꞌi taꞌzacaꞌ yuguꞌ lu yödzö naꞌ.
36 Cateꞌ Jesús biléꞌenëꞌ bönniꞌ zián niꞌ,
buéchiꞌ ládxëꞌë légaquiëꞌ,
tuꞌ taꞌguíꞌi taꞌzáquiëꞌ,
en nudú ládxiꞌgaquiëꞌ ca raca quégacabaꞌ böꞌcuꞌ zxilaꞌ bitiꞌ zoa nu ruyú légacabaꞌ.
37 Níꞌirö Jesús rëꞌ yuguꞌ bönniꞌ usëda queëꞌ,
rnnëꞌ: