Bönniꞌ Gadara yuꞌu böꞌ xihuiꞌ lëꞌ
5
Níꞌirö bilaꞌdxinëꞌ Jesús,
en yuguꞌ bönniꞌ dáꞌgaquiëꞌ Lëꞌ iaꞌtsöláꞌa nísadoꞌ ga naca lu xiyúgaca bönachi Gadara.
2 Cateꞌ burúajëꞌ Jesús lëꞌe bárcodoꞌ naꞌ,
tu bönniꞌ rirúajëꞌ zxan bulóaj ga nacuáꞌ yeru ba laꞌ dutságatëꞌ Lëꞌ.
Bönniꞌ ni yuꞌu böꞌ xihuiꞌ lëꞌ,
3 ateꞌ nun xilatjëꞌ ga naꞌ nacuáꞌ yeru ba.
Cuntu nu guca gugaꞌ bönniꞌ naꞌ,
calëga len du guíë.
4 Zián luzuí buluꞌzóëꞌ breguiꞌ guíë yen nëꞌë,
en niꞌë,
en gulúguiꞌë lëꞌ du guíë.
Yuguꞌ du guíë naꞌ bulë́ꞌë,
ateꞌ breguiꞌ guíë naꞌ guditsjëꞌ.
Bitiꞌ rizéquiꞌnëꞌ nu bönniꞌ inná béꞌenëꞌ lëꞌ.
5 Ridáticaꞌsëꞌ ribö́dxiꞌë rëla,
en të dza ga naꞌ nacuáꞌ yeru ba,
en gapa naca lu guíꞌadoꞌ,
run huëꞌ cuinëꞌ yuguꞌ lu guiö́j dzöꞌö niꞌ.
6 Cateꞌ biléꞌenëꞌ zëꞌë ziꞌtuꞌ Jesús,
guxítiꞌë guyijëꞌ ga naꞌ zëꞌë,
ateꞌ buzóa zxibëꞌ lahuëꞌ Lëꞌ.
7 Bëꞌë zidzaj didzaꞌ,
rëꞌ Jesús:
―¿Bizxi ral-laꞌa quiuꞌ Jesús,
Zxíꞌinëꞌ Dios nayë́pisëtërëꞌ?
Niꞌa queëꞌ Xanruꞌ Dios rátaꞌyuaꞌ loꞌ,
bitiꞌ usacaꞌ ziꞌu nedaꞌ.
8 Caní gunnë́ꞌ bönniꞌ naꞌ tuꞌ chigudxëꞌ Jesús böꞌ xihuiꞌ naꞌ:
―Liꞌ,
böꞌ xihuiꞌ,
burúaj lu bönniꞌ ni.
9 Jesús gunábinëꞌ le,
rnnëꞌ:
―¿Bi leuꞌ?
Bubíꞌi didzaꞌ le,
gudxi Lëꞌ:
―Leaꞌ:
Le Zián,
tuꞌ röꞌö ziantuꞌ.
10 Gulaꞌnabi yechiꞌ yuguꞌ böꞌ xihuiꞌ naꞌ Jesús para cabí isö́l-lëꞌë léguequi ziꞌtuꞌ luyú niꞌ.
11 Nacuáꞌabaꞌ cuchi zián lu guíꞌadoꞌ níꞌisö,
taꞌdabaꞌ tágubaꞌ niꞌ.
12 Gulaꞌnabi yechiꞌ böꞌ xihuiꞌ naꞌ Jesús,
taꞌnná:
―Gusöl-laꞌ netuꞌ ga niꞌ dzö́ꞌöbaꞌ cuchi zián.
Bëꞌ netuꞌ lataj tsöjtsúꞌugacatuꞌ-baꞌ.
13 Laꞌ bëꞌtëꞌ Jesús léguequi lataj,
ateꞌ bilaꞌrúaj böꞌ xihuiꞌ naꞌ,
en yöjtsúꞌugaca cuchi zián naꞌ,
ateꞌ gulaꞌxítiꞌbaꞌ cuchi zián naꞌ,
yöjbíxigacabaꞌ ga naca raꞌ guíꞌa,
yöjcházagacabaꞌ nísadoꞌ.
Lu nísadoꞌ naꞌ gulaꞌyë́pibaꞌ nisa,
gulátibaꞌ,
en nácagacabaꞌ ca galaj gayuáꞌabaꞌ.
14 Níꞌirö buluꞌzxunnaj nupa niꞌ gulún chiꞌi cuchi zián naꞌ.
Yöjtíxjöiꞌiguequinëꞌ bönachi lu yödzö niꞌ,
encaꞌ bönachi nacuáꞌ laꞌ guixiꞌ niꞌ.
Bilaꞌrúaj bönachi lu yödzö,
söjyúgaquiëꞌ bizxi naꞌ guca niꞌ.
15 Cateꞌ bilaꞌdxinëꞌ ga niꞌ zoëꞌ Jesús,
bilaꞌléꞌenëꞌ bönniꞌ naꞌ zíꞌalö yúꞌugaca böꞌ xihuiꞌ lëꞌ.
Bönniꞌ ni röꞌë niꞌ,
nácuëꞌ lariꞌ,
en zoëꞌ dxíꞌadoꞌ,
ateꞌ guladxi bönachi naꞌ.
16 Nupa naꞌ bilaꞌléꞌe le benëꞌ Jesús gulaꞌguíxjöiꞌi bönachi naꞌ bilaꞌrúaj lu yödzö ca naꞌ guca queëꞌ bönniꞌ naꞌ zíꞌalö yúꞌugaca böꞌ xihuiꞌ lëꞌ,
encaꞌ ca guca quégacabaꞌ cuchi naꞌ.
17 Níꞌirö gulaꞌsí lógaca bönachi zián naꞌ taꞌtaꞌyu lahuëꞌ Jesús urúajëꞌ lu xiyúguequi.
18 Cateꞌ bubenëꞌ Jesús lëꞌe bárcodoꞌ,
bönniꞌ naꞌ zíꞌalö yúꞌugaca böꞌ xihuiꞌ zián lëꞌ,
gútaꞌyuëꞌ lahuëꞌ Jesús guꞌë lëꞌ lataj tséajlenëꞌ Lëꞌ.
19 Jesús bitiꞌ bëꞌë lëꞌ lataj,
pero gudxëꞌ lëꞌ:
―Böaj lidxuꞌ.
Yöjtíxjöiꞌi diꞌa dza quiuꞌ yuguꞌ le zxön benaꞌ quiuꞌ nedaꞌ,
nacaꞌ Xanuꞌ,
en ca benaꞌ buéchiꞌ ládxaꞌa liꞌ.
20 Söhuö́jëꞌ bönniꞌ naꞌ,
en ruzë́ꞌ didzaꞌ yuguꞌ yödzö Decápolis ca nácagaca le zxön benëꞌ Jesús queëꞌ,
ateꞌ buluꞌbani yúguꞌtë bönachi nacuáꞌ yuguꞌ yödzö niꞌ.
Biꞌi nigula queëꞌ Jairo, en nigula naꞌ gudannu lariꞌ nácuëꞌ Jesús
21 Cateꞌ budxinëꞌ Jesús iaꞌtsöláꞌa nísadoꞌ naꞌ,
níꞌirö buluꞌdubi bönachi zián ga naꞌ zoëꞌ raꞌ nísadoꞌ.
22 Bönniꞌ lëꞌ Jairo,
bönniꞌ rinná bëꞌë lu yuꞌu ga tuꞌdubëꞌ bönniꞌ judío,
en nazëdëꞌ queëꞌ Dios,
bidëꞌ ga zoëꞌ Jesús.
Cateꞌ biléꞌenëꞌ Jesús,
buzóa zxibëꞌ lahuëꞌ,
23 en gútaꞌyuëꞌ lahuëꞌ,
rnnëꞌ:
―Chiraqui gátibiꞌ biꞌi nigúladoꞌ quiaꞌ.
Gudá ixóa noꞌo lëbiꞌ para huöácabiꞌ,
en bitiꞌ gátibiꞌ.
24 Saꞌyéajlenëꞌ Jesús lëꞌ,
ateꞌ bönachi zián söjácalen Jesús,
tuꞌquirö Lëꞌ.
25 Tu nigula,
chinaca chinnu iz réꞌenu,
zóanu caꞌ niꞌ.
Bitiꞌ ruhuíꞌi rön queë́nu que huëꞌ quégaca cázanu nigula.
26 Yenniꞌ chigudíꞌi guzxácaꞌnu lu náꞌagaquiëꞌ zián bönniꞌ tuꞌúnëꞌ bönachi.
Nítisö chibutönu dëra le dë queë́nu,
tuꞌ cabí bi gúcalen lënu,
pero riyaliꞌ queë́nu.
27 Cateꞌ biyö́ninu tuíꞌi didzaꞌ bönachi ca naca queëꞌ Jesús,
gudö́dinu ládjalö bönachi zián naꞌ,
en bidxinnu zacaꞌ cúdzuꞌlëꞌ Jesús,
en gudannu lariꞌ nácuëꞌ.
28 Caní bennu tuꞌ rnnanu:
“Channö cansaꞌ le nácuëꞌ,
huöácaꞌ.”
29 Laꞌ buíꞌitë rön queë́nu,
ateꞌ réquibeꞌenu chiböácanu que le guca queë́nu.
30 Laꞌ gúquibeꞌetenëꞌ Jesús ben dxin yöl-laꞌ huáca queëꞌ,
ateꞌ buécjëꞌ,
ruyúëꞌ bönachi zián naꞌ.
Rnnëꞌ:
―¿Nuzxi naꞌ gudán nedaꞌ?
31 Níꞌirö bönniꞌ dáꞌgaquiëꞌ Lëꞌ tëꞌ Lëꞌ,
taꞌnnë́ꞌ:
―Riléꞌe quézinuꞌ bönachi zián ni tuꞌquirö Liꞌ,
en rnnatsoꞌ:
“¿Nuzxi naꞌ gudán nedaꞌ?”
32 Ruyúëꞌ Jesús gásibiꞌilëꞌ para iléꞌenëꞌ nuzxi naꞌ gudán Lëꞌ.
33 Níꞌirö nigula naꞌ gubígaꞌnu lahuëꞌ.
Rádxinu,
en rizxízinu tuꞌ chinö́zinu bi naꞌ guca queë́nu,
ateꞌ buzóa zxíbinu lahuëꞌ Jesús,
en gúdxinu Lëꞌ idútë le nácatë.
34 Jesús rëꞌë-nu:
―Nigúladoꞌ.
Chiböácuꞌ tuꞌ réajlëꞌu nedaꞌ.
Böaj lidxuꞌ idú ládxuꞌu.
Tsaz nuhuöácuꞌ que le guca quiuꞌ.
35 Tsanni niꞌ ruꞌë caní didzaꞌ Jesús,
bönniꞌ narúajgaquiëꞌ lidxëꞌ bönniꞌ naꞌ rinná bëꞌë lu yuꞌu ga tuꞌdubëꞌ tuꞌsëdëꞌ queëꞌ Dios bilaꞌdxnëꞌ niꞌ,
en tëꞌ bönniꞌ naꞌ:
―Chigútibiꞌ biꞌi nigúladoꞌ quiuꞌ.
Bítiꞌrö upízxjanuꞌ Bönniꞌ Usedi.
36 Bitiꞌ bëꞌ ládxëꞌë Jesús lë naꞌ taꞌnnë́ꞌ,
ateꞌ gudxëꞌ bönniꞌ unná bëꞌ naꞌ,
rnnëꞌ:
―Bitiꞌ gádxinuꞌ.
Guyéajlëꞌësëꞌ Dios.
37 Bitiꞌ bëꞌë lataj Jesús tsöjácalen Lëꞌ iaꞌzícaꞌrö bönachi,
pero légacasëꞌ Pedro,
en Jacobo,
en Juan,
bö́chëꞌë Jacobo naꞌ.
38 Cateꞌ bidxinëꞌ lidxëꞌ bönniꞌ naꞌ rinná bëꞌë ga tuꞌdubëꞌ tuꞌsëdëꞌ queëꞌ Dios,
biléꞌenëꞌ raca dzatsa,
encaꞌ nupa niꞌ taꞌbödxi,
en nupa taꞌbödxi yechiꞌ.
39 Guyáziëꞌ Jesús,
en gudxëꞌ légaquiëꞌ:
―¿Bizx que rutsátsaliꞌ,
en ribö́dxiliꞌ caní?
Bitiꞌ nátibiꞌ biꞌi nigúladoꞌ ni.
Rásisibiꞌ naꞌ.
40 Níꞌirö buluꞌtitjëꞌ Jesús,
pero Lëꞌ bubéajëꞌ yúguꞌtë bönachi naꞌ níꞌilö,
ateꞌ guchë́ꞌë xuz xináꞌabiꞌ biꞌi nigúladoꞌ naꞌ,
encaꞌ nupa nacuáꞌlen Lëꞌ,
ateꞌ guyáziëꞌ ga naꞌ dëbiꞌ.
41 Gudélëꞌë náꞌabiꞌ biꞌi nigúladoꞌ naꞌ,
en gudxëꞌ-biꞌ:
―Talita,
cumi.
Didzaꞌ hebreo ni rnna lu didzaꞌ xidzaꞌ:
Biꞌi nigúladoꞌ,
guyasa.
42 Laꞌ guyásatëbiꞌ biꞌi nigúladoꞌ naꞌ,
en buzéꞌebiꞌ.
Chiyúꞌubiꞌ chinnu iz.
Buluꞌbani nupa nacuáꞌ niꞌ.
43 Níꞌirö Jesús gunná béꞌenëꞌ légaquiëꞌ cuntu nu uluꞌsiyönnëꞌ lë naꞌ guca.
Gudxëꞌ légaquiëꞌ:
―Guliꞌgüíꞌ le gágubiꞌ biꞌi nigúladoꞌ ni.