Jesús ribö́ëꞌ bönniꞌ ilácagaquiëꞌ gubáz queëꞌ
10
Níꞌirö bulidzëꞌ Jesús idxínnutëꞌ bönniꞌ usëda queëꞌ,
en budödëꞌ lu náꞌagaquiëꞌ yöl-laꞌ unná bëꞌ para uluꞌbéajëꞌ böꞌ xihuiꞌ yúꞌugaca bönachi,
en uluꞌúnëꞌ yúguꞌtë nupa teꞌe,
en yúguꞌtë nupa bi taꞌguíꞌi taꞌzacaꞌ.
2 Caní naca lágaquiëꞌ idxínnutëꞌ gubáz naꞌ nasö́l-lëꞌë Jesús:
Simón,
(lëꞌ caꞌ Pedro),
Andrés,
(bö́chëꞌë Simón naꞌ),
Jacobo,
(zxíꞌinëꞌ Zebedeo),
Juan,
(bö́chëꞌë Jacobo naꞌ),
3 Felipe,
Bartolomé,
Tomás,
Mateo,
(bönniꞌ uquízxaj),
Jacobo,
(zxíꞌinëꞌ Alfeo),
Lebeo,
(lëꞌ caꞌ Tadeo),
4 Simón,
(bönniꞌ ruíꞌi ládxëꞌë yödzö queëꞌ),
Judas Iscariote,
(bönniꞌ udödëꞌ Jesús lu náꞌagaquiëꞌ bönniꞌ ilútiëꞌ Lëꞌ).
Jesús risö́l-lëꞌë gubáz queëꞌ tsöjéngaquiëꞌ libán
5 Níꞌirö Jesús gusö́l-lëꞌë idxínnutëꞌ bönniꞌ ni tsöjéngaquiëꞌ libán,
ateꞌ gunná béꞌenëꞌ légaquiëꞌ,
rnnëꞌ:
―Bitiꞌ tséajliꞌ ga nacuáꞌ bönachi bitiꞌ nácagaca judío,
en bitiꞌ tsúꞌuliꞌ ládzagaca bönachi nacuáꞌ luyú Samaria.
6 Guliꞌtséaj ga nacuáꞌ bönachi Israel,
nácagaquiëꞌ ca böꞌcuꞌ zxílaꞌdoꞌ nanítigacabaꞌ.
7 Guliꞌtsöjén libán,
innaliꞌ:
“Chibidxín galaꞌ dza Dios,
Nu naꞌ zoa yehuaꞌ yubá,
inná bëꞌë luyú ni.”
8 Buliꞌún nupa teꞌe.
Buliꞌún dxiꞌa nupa teꞌe huëꞌ nudzuꞌ ruzödi.
Buliꞌsubán nupa chinátigaca.
Buliꞌbéaj böꞌ xihuiꞌ yúꞌugaca bönachi.
Bénnasaꞌ queë́liꞌ yöl-laꞌ unná bëꞌ ni.
Buliꞌgún dxin le,
en bitiꞌ bi uquízxjaliꞌ.
9 ’Bitiꞌ bi guáꞌaliꞌ lu buzudi queë́liꞌ,
calëga dumí oro,
en calëga dumí plata,
en calëga dumí lásidoꞌ.
10 Bitiꞌ guáꞌaliꞌ yöxaj yöta queë́liꞌ le gáguliꞌ laꞌ nöza.
Tuz lariꞌ ixóa yenliꞌ,
en bitiꞌ guáꞌaliꞌ xiráchuliꞌ o xiyaga queë́liꞌ,
tuꞌ idzöli quézinëꞌ bönniꞌ huen dxin le gahuëꞌ.
11 ’Gátiꞌtës yödzö zxön o yö́dzödoꞌ ga idxinliꞌ,
guliꞌnaba nuzxi naca idú ladxiꞌ lu yödzö niꞌ,
ateꞌ ugáꞌanaliꞌ lidxi nu naꞌ cateꞌ gálaꞌrö dza urúajliꞌ yödzö naꞌ.
12 Cateꞌ tsúꞌuliꞌ tu lu yuꞌu,
buliꞌgapa Dios bönachi nacuáꞌ lu yuꞌu naꞌ,
inábiliꞌ-nëꞌ Dios unödzjëꞌ quégaquiëꞌ le cuéqui dxi icja ládxiꞌdoꞌgaquiëꞌ.
13 Channö bönachi nacuáꞌ lu yuꞌu niꞌ nácagaca lesacaꞌ,
ugáꞌanalen le ribequi dxi ladxiꞌ naꞌ léguequi,
pero channö bönachi naꞌ cabí nácagaca lesacaꞌ,
inábaliꞌ cabí ugáꞌana lë naꞌ ribequi dxi ladxiꞌ len léguequi.
14 Gátiꞌtës ga idxinliꞌ ga bönachi niꞌ bitiꞌ ilún libíꞌiliꞌ bal,
en bitiꞌ uluꞌzë́ nagui xtídzaꞌliꞌ,
buliꞌrúaj lu yuꞌu niꞌ o yödzö niꞌ,
ateꞌ guliꞌcuíbi bëchtö daꞌ lëꞌe lábaliꞌ,
le uluíꞌi léguequi nabágaꞌgaca xíguiaꞌ.
15 Le nácatë reaꞌ libíꞌiliꞌ,
cateꞌ idxín dza ichúguiëꞌ Dios quégaca bönachi,
ilaꞌguíꞌi ilaꞌzácaꞌrö bönachi yödzö naꞌ ca ilaꞌguíꞌi ilaꞌzacaꞌ bönachi gulaꞌcuáꞌ yödzö Sodoma,
en yödzö Gomorra,
nupa niꞌ busunítiëꞌ Dios.
Nupa bitiꞌ taꞌyéajlëꞌ uluꞌsacaꞌ ziꞌ nupa dáꞌgaca Cristo
16 Gunnë́ꞌ caꞌ Jesús:
―Buliꞌyútsöcaꞌ,
nedaꞌ risö́l-laꞌa libíꞌiliꞌ,
ateꞌ gácaliꞌ ca böꞌcuꞌ zxílaꞌdoꞌ taꞌdabaꞌ ga dzö́ꞌöbaꞌ böꞌcuꞌ guíꞌa síniaꞌ.
Guliꞌgaca sinaꞌ ca nácagacabaꞌ sinaꞌ bëla síniaꞌ,
pero guliꞌgaca caꞌ nöxaj ladxiꞌ ca nácagacabaꞌ guꞌdödoꞌ.
17 Guliꞌgún chiꞌi cuinliꞌ quégaca bönachi,
tuꞌ uluꞌdödëꞌ libíꞌiliꞌ lu náꞌagaquiëꞌ bönniꞌ yúlahuiꞌ,
en ilaꞌguínëꞌ libíꞌiliꞌ gapa naca lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios .
18 Lëscaꞌ caní,
ilaꞌchë́ꞌë libíꞌiliꞌ lógaquiëꞌ bönniꞌ lo,
en lógaquiëꞌ bönniꞌ taꞌnná bëꞌë,
tuꞌ dáꞌaliꞌ nedaꞌ.
Caní gaca para gaca gunliꞌ ba nalí quiaꞌ lógaquiëꞌ bönniꞌ niꞌ,
en lógaquiëꞌ bönniꞌ bitiꞌ nácagaquiëꞌ judío.
19 Níꞌirö cateꞌ uluꞌdödëꞌ libíꞌiliꞌ lu náꞌagaquiëꞌ bönniꞌ unná bëꞌ naꞌ,
bitiꞌ cö́ꞌöliꞌ böniga nacxi innaliꞌ,
tuꞌ ichizëꞌ Dios icja ládxiꞌdoꞌoliꞌ didzaꞌ güíꞌiliꞌ,
en ca innaliꞌ laꞌ dza náꞌasö.
20 Calëga libíꞌisiliꞌ naꞌ innaliꞌ,
pero Dios Böꞌ Láꞌayi,
Nu naꞌ risö́l-lëꞌë Xúziruꞌ Dios queë́liꞌ,
Lë cazëꞌ sóalenëꞌ libíꞌiliꞌ,
en guꞌë didzaꞌ.
21 ’Ilaꞌcuáꞌ bönachi uluꞌdödi bö́chiꞌguequi lu náꞌagaquiëꞌ bönniꞌ ilútiëꞌ légaquiëꞌ,
en lëscaꞌ caní,
bönniꞌ nácagaquiëꞌ xuz uluꞌdödëꞌ zxíꞌinigaquiëꞌ,
ateꞌ ilaꞌcuáꞌabiꞌ biꞌi ilaꞌdáꞌbagaꞌbiꞌ xúzgacabiꞌ,
en ilunbiꞌ ga ilátiëꞌ xúzgacabiꞌ naꞌ.
22 Yúguꞌtë bönachi uluꞌzóa libíꞌiliꞌ tsöláꞌalö tuꞌ dáꞌaliꞌ nedaꞌ,
pero nu ugáꞌana tsutsu ga idxinrö dza údxi,
nu ni ulá.
23 Cateꞌ uluꞌsacaꞌ ziꞌ bönachi libíꞌiliꞌ tu lu yödzö,
buliꞌzxunnaj niꞌ,
ateꞌ tséajliꞌ iaꞌtú yödzö,
tuꞌ reaꞌ libíꞌiliꞌ,
huödaꞌ nedaꞌ,
Bönniꞌ Guljëꞌ Bönachi,
zíꞌalö cateꞌ údxi gunliꞌ libán gapa nacuáꞌ yuguꞌ yödzö quégaca bönachi Israel.
24 ’Nútiꞌtës bönniꞌ náquiëꞌ bönniꞌ usëda bitiꞌ nácarëꞌ lo ca nu rusëdi lëꞌ,
en lëscaꞌ caní,
nu bönniꞌ náquiëꞌ huen dxin bitiꞌ nácarëꞌ lo ca xanëꞌ.
25 Nu naꞌ naca bönniꞌ usëda ral-laꞌ udzéjanëꞌ channö huadéliꞌnëꞌ gáquiëꞌ ca naca nu rusëdi lëꞌ,
ateꞌ bönniꞌ huen dxin naꞌ ral-laꞌ udzéjanëꞌ channö gáquiëꞌ ca naca xanëꞌ.
Channö taꞌnnë́ꞌ quiaꞌ nedaꞌ,
bönniꞌ xan yuꞌu,
taꞌnnë́ꞌ nacaꞌ Belzebú tuꞌ xihuiꞌ,
ilaꞌnnë́ zíꞌirëꞌ quégaca bönachi táꞌgaquiëꞌ nedaꞌ.
Nu ral-laꞌ gádxiruꞌ
26 Gunnë́ꞌ caꞌ Jesús:
―Que lë ni naꞌ,
bitiꞌ gádxiliꞌ bönachi.
Hualáꞌ lahui yúguꞌtë le raca bëdxi lándoꞌos,
ateꞌ huáca bëꞌ yúguꞌtë le nagachiꞌ.
27 Yuguꞌ didzaꞌ ruíꞌilenaꞌ libíꞌiliꞌ ga naca chul-la,
guliꞌquixjöꞌ ga naca lu beníꞌ,
ateꞌ le reaꞌ libíꞌiliꞌ ga nagachiꞌ,
guliꞌnnë́ zidzaj ga naca lahuiꞌ lógaca bönachi.
28 Bitiꞌ gádxiliꞌ nupa tuti le nácagaca caz bönachi,
pero bitiꞌ gaca uluꞌsuniti böꞌ naca cázaruꞌ.
Guliꞌgadxi Dios,
Bönniꞌ naꞌ gaca gútiëꞌ idútë le nácaliꞌ,
en chúꞌunëꞌ böꞌ naca cázaliꞌ lu guíꞌ gabila.
29 ’Taꞌdáꞌubaꞌ chópabaꞌ biguínnidoꞌ len tu dumí lásidoꞌ,
pero bitiꞌ ibíxibaꞌ tubaꞌ lu yu channö cabí ruꞌë Xúziruꞌ Dios lataj gaca caní.
30 Lëscaꞌ caní,
nabábagaca yúguꞌtë guitsaꞌ ícjaliꞌ lahuëꞌ Dios.
31 Que lë ni naꞌ,
bitiꞌ gádxiliꞌ.
Ruíꞌitërö ládxëꞌë Dios libíꞌiliꞌ ca ruíꞌi ládxëꞌë-baꞌ zianbaꞌ biguínnidoꞌ.
Yuguꞌ bönniꞌ taꞌzíꞌ lu náꞌagaquiëꞌ Cristo lógaca bönachi
32 Gunnë́ꞌ caꞌ Jesús:
―Nu bönniꞌ siꞌ lu nëꞌë nedaꞌ lógaca bönachi,
nedaꞌ siꞌ lu naꞌa bönniꞌ naꞌ lahuëꞌ Xuzaꞌ zoëꞌ yehuaꞌ yubá.
33 Bönniꞌ taꞌdáꞌbaguëꞌë lógaca bönachi,
ilaꞌnnë́ꞌ bitiꞌ taꞌdë́ꞌë nedaꞌ,
lëscaꞌ caní nedaꞌ táꞌbagaꞌa légaquiëꞌ lahuëꞌ Xuzaꞌ zoëꞌ yehuaꞌ yubá.
Jesús náquiëꞌ le run ga ilaꞌrúaj choplö bönachi
34 Gunnë́ꞌ caꞌ Jesús:
―Bitiꞌ guéquiliꞌ zaꞌa idiguꞌa le ribequi dxi bönachi yödzölió ni.
Bitiꞌ zaꞌa idiguꞌa le ribequi dxi,
pero zaꞌa idiguꞌa le gun ga ilaꞌrúaj choplö bönachi.
35 Zaꞌa ni,
ateꞌ gunaꞌ ga ilaꞌdáꞌbagaꞌ bönachi xúzguequi,
ateꞌ yuguꞌ nigula ilaꞌdáꞌbagaꞌnu caꞌ xináꞌagacanu.
Lëscaꞌ caní,
yuguꞌ nigula zxoaꞌ lídxigacanu ilaꞌdáꞌbagaꞌnu xtoꞌ zxíꞌininu .
36 Caní gaca,
laꞌ diꞌa dzasö quégaca bönachi uluꞌsacaꞌ ziꞌ luzë́ꞌeguequi.
37 ’Nu nadxíꞌirö xuz xinëꞌe ca nadxíꞌi nedaꞌ,
bitiꞌ naca bachi nu naꞌ taꞌ nedaꞌ,
ateꞌ nu nadxíꞌirö biꞌi bönniꞌ que o biꞌi nigula que ca nadxíꞌi nedaꞌ,
bitiꞌ naca bachi nu naꞌ taꞌ nedaꞌ.
38 Nu bitiꞌ siꞌ lu nëꞌe gaca ca tu bönniꞌ söjtë́ꞌë lëꞌe yaga cruz,
en taꞌ nedaꞌ,
bitiꞌ naca bachi guequi quiaꞌ nedaꞌ.
39 Nu ruíꞌi ladxiꞌ gun chiꞌi yöl-laꞌ naꞌbán que,
uniti le,
pero nu uniti yöl-laꞌ naꞌbán que tuꞌ daꞌ nedaꞌ,
ulá nu naꞌ.
Yuguꞌ le ubiꞌë Dios queë́ruꞌ
(Mr. 9:41)
40 Gunnë́ꞌ caꞌ Jesús:
―Nu gun libíꞌiliꞌ bal,
nedaꞌ caꞌ gun bal,
ateꞌ nu naꞌ gun nedaꞌ bal,
gun bal caꞌ Dios Xuz nasö́l-lëꞌë nedaꞌ.
41 Nu gun bal tu bönniꞌ ruꞌë didzaꞌ uláz queëꞌ Dios tuꞌ ruꞌë didzaꞌ uláz queëꞌ Dios,
huadeliꞌ nu naꞌ lu nëꞌë Dios laꞌ leze naꞌ idéliꞌnëꞌ bönniꞌ ruꞌë didzaꞌ uláz queëꞌ Dios.
Lëscaꞌ caní,
nu gun bal tu bönniꞌ tsahuiꞌ tuꞌ náquiëꞌ bönniꞌ tsahuiꞌ,
huadeliꞌ nu naꞌ lu nëꞌë Dios laꞌ leze naꞌ idéliꞌnëꞌ bönniꞌ tsahuiꞌ.
42 Nútiꞌtës nu unödzaj queëꞌ tu bö́nniꞌdoꞌ ni tu zxibíndoꞌos nisa tuꞌ náquiëꞌ bönniꞌ usëda quiaꞌ nedaꞌ,
le nácatë reaꞌ libíꞌiliꞌ,
bitiꞌ uniti nu naꞌ le ral-laꞌ siꞌ lu nëꞌë Dios.