Taꞌdxinëꞌ bönniꞌ nasö́l-lëꞌë Juan ga zoëꞌ Jesús
11
Cateꞌ Jesús budxi buzéajniꞌinëꞌ yuguꞌ bönniꞌ usëda queëꞌ,
buzë́ꞌë niꞌ,
saꞌyéajëꞌ röjsédinëꞌ bönachi,
en röjenëꞌ libán yuguꞌ lu ládzagaca bönachi naꞌ.
2 Juan,
bönniꞌ buquilëꞌ bönachi nisa,
niꞌ yuꞌë lidxi guíë,
ateꞌ biyönnëꞌ ca nácagaca le runëꞌ Jesús.
Níꞌirö Juan naꞌ gusö́l-lëꞌë chopëꞌ bönniꞌ dáꞌgaquiëꞌ lëꞌ,
ateꞌ bilaꞌdxinëꞌ ga naꞌ zoëꞌ Jesús.
3 Chopëꞌ ni gulaꞌnábinëꞌ Jesús,
tëꞌ Lëꞌ:
―¿Nacuꞌ Liꞌ Cristo,
Bönniꞌ naꞌ ral-laꞌ idxinëꞌ yödzölió ni,
o ral-laꞌ cöztuꞌ dza idxinëꞌ iaꞌtúëꞌ bönniꞌ?
4 Bubiꞌë didzaꞌ Jesús,
rëꞌ légaquiëꞌ:
―Guliꞌtséaj tsöjtíxjöiꞌiliꞌ-nëꞌ Juan lë ni riyö́niliꞌ,
en riléꞌeliꞌ.
5 Guliꞌtsöjödxëꞌ ca raca,
tuꞌléꞌenëꞌ bönniꞌ guchul-la guiö́j lógaquiëꞌ,
ateꞌ tuꞌzë́ꞌë bönniꞌ bitiꞌ guca ilaꞌdë́ꞌ.
Nuhuöácagaquiëꞌ bönniꞌ güíꞌiguequinëꞌ huëꞌ nudzuꞌ ruzödi,
ateꞌ taꞌyönnëꞌ bönniꞌ gulaꞌcö́dzuëꞌ.
Nnitaꞌ nabángaquiëꞌ bönniꞌ gulátiëꞌ,
ateꞌ raca libán que didzaꞌ dxiꞌa lógaca bönachi yechiꞌ.
6 Bicaꞌ ba nu bönniꞌ bitiꞌ gáquiëꞌ chopa ládxëꞌë,
bitiꞌ ubéaj ládxëꞌë nedaꞌ.
7 Cateꞌ yuguꞌ bönniꞌ naꞌ dáꞌgaquiëꞌ Juan buluꞌzë́ꞌë söjhuö́jgaquiëꞌ,
níꞌirö gusí lahuëꞌ Jesús ruíꞌilenëꞌ bönachi nacuáꞌ niꞌ didzaꞌ ca naca queëꞌ Juan naꞌ.
Rëꞌ légaquiëꞌ:
―¿Bizxi gúꞌuniliꞌ iléꞌeliꞌ cateꞌ niꞌ guyéajliꞌ lu lataj cáꞌasö?
¿Naruꞌ gúꞌuniliꞌ iléꞌeliꞌ-nëꞌ tu bönniꞌ náquiëꞌ ca tu gui ruzecaj böꞌ recja le?
8 Channö cabí,
¿bizxi gúꞌuniliꞌ iléꞌeliꞌ?
¿Naruꞌ gúꞌuniliꞌ iléꞌeliꞌ-nëꞌ tu bönniꞌ nácuëꞌ lariꞌ dxíꞌadoꞌ?
Nöz quéziliꞌ bönniꞌ nácugaquiëꞌ lariꞌ dxíꞌadoꞌ nacuꞌë lídxigaquiëꞌ bönniꞌ taꞌnná bëꞌë.
9 Channö cabí,
¿bizxi gúꞌuniliꞌ iléꞌeliꞌ?
¿Naruꞌ gúꞌuniliꞌ iléꞌeliꞌ-nëꞌ tu bönniꞌ ruꞌë didzaꞌ uláz queëꞌ Dios?
Caꞌ naca,
réquidaꞌ.
Reaꞌ libíꞌiliꞌ,
biléꞌeliꞌ-nëꞌ tu bönniꞌ nácatërëꞌ lo ca iaꞌzícaꞌrëꞌ bönniꞌ guluꞌë didzaꞌ uláz queëꞌ Dios.
10 Caní naca,
tuꞌ náquiëꞌ Juan bönniꞌ naꞌ ruíꞌi didzaꞌ le nazúaj lu guichi láꞌayi ca naca queëꞌ,
le rnna:
Buyú,
risö́l-laꞌa bönniꞌ gubáz quiaꞌ,
inö́ruëꞌ ca Liꞌ.
Lëꞌ upë́ꞌë nöza ga töduꞌ.
11 Le nácatë reaꞌ libíꞌiliꞌ.
Idútë yödzölió ni,
cuntu nu zoa nácarö lo ca Juan,
bönniꞌ niꞌ buquilëꞌ bönachi nisa,
pero nu naca cuídiꞌdoꞌos ga rinná bëꞌ Nu naꞌ zoa yehuaꞌ yubá nácatërö lo ca Juan naꞌ.
12 ’Cateꞌ niꞌ gusí lahuëꞌ buquilëꞌ Juan bönachi nisa,
ga ridxintë naꞌa dza,
bayudxi túngaca bönachi para taꞌyaza ga rinná bëꞌë Bönniꞌ naꞌ zoëꞌ yehuaꞌ yubá,
ateꞌ nupa tunsö bayudxi taꞌdeliꞌ le.
13 Ga bidxintë dza naꞌ blëꞌë Juan,
le rinná bëꞌ xibá queëꞌ Moisés,
en le buluꞌzúajëꞌ lu guichi yúguꞌtë bönniꞌ guluꞌë didzaꞌ uláz queëꞌ Dios guluíꞌi didzaꞌ ca rinná bëꞌë Bönniꞌ naꞌ zoëꞌ yehuaꞌ yubá.
14 Channö rë́ꞌëniliꞌ siꞌ lu náꞌaliꞌ lë ni,
ral-laꞌ inö́ziliꞌ Juan naꞌ náquiëꞌ Elías,
bönniꞌ niꞌ bëꞌë didzaꞌ uláz queëꞌ Dios,
bönniꞌ naꞌ Dios gunnë́ꞌ ral-laꞌ iláꞌ lahuëꞌ leyúbölö dza ni zóaruꞌ naꞌa.
15 Nu zoa nagui,
en riyöni ral-laꞌ uzë́ nagui.
16 ’¿Bizxi ubéquiꞌtsedaꞌ ca nácagaca bönachi nacuáꞌ dza ni zóaruꞌ naꞌa?
Nácagaquiëꞌ ca yuguꞌ bíꞌidoꞌ taꞌbö́ꞌöbiꞌ lu yë́ꞌëyi.
Zidzaj tuꞌlídzabiꞌ luzáꞌagacabiꞌ,
17 taꞌnnabiꞌ:
“Rucö́dxituꞌ queë́liꞌ gui.
¿Bizx que bitiꞌ ruyáꞌaliꞌ?
Rul-la yéchiꞌtuꞌ queë́liꞌ.
¿Bizx que bitiꞌ ribödxi yéchiꞌliꞌ?”
18 Caní nácaliꞌ,
tuꞌ bidëꞌ Juan,
ateꞌ tuꞌ cabí güíꞌi gudahuëꞌ ca ráguliꞌ libíꞌiliꞌ,
gunnëliꞌ queëꞌ,
gunnaliꞌ:
“Tuꞌ xihuiꞌ dzágui lëꞌ.”
19 Níꞌirö bidxinaꞌ nedaꞌ,
Bönniꞌ Guljëꞌ Bönachi,
ateꞌ reꞌaj rahuaꞌ,
ateꞌ rnnëliꞌ quiaꞌ,
rnnaliꞌ:
“Náquiëꞌ bönniꞌ huágulëꞌë,
en bönniꞌ reꞌjëꞌ.
Náquiëꞌ luzáꞌagaquiëꞌ bönniꞌ uquízxaj,
en iaꞌzícaꞌrö huen dul-laꞌ.”
Yöl-laꞌ réajniꞌi queëꞌ Dios naca bëꞌ niꞌa que le tun nupa taꞌzíꞌ lu në́ꞌeguequi le.
Le gaca que nu bitiꞌ run ca rnna xtídzëꞌë Dios
20 Níꞌirö gusí lahuëꞌ Jesús ruzenëꞌ bach bönachi nacuáꞌ yuguꞌ yödzö gapa niꞌ benëꞌ zián yöl-laꞌ huáca,
tuꞌ cabí tuꞌbíꞌini ládxiꞌguequi.
21 Gudxëꞌ léguequi:
―Bicaꞌ bayechiꞌ libíꞌiliꞌ,
bönachi Corazín.
Bicaꞌ bayechiꞌ libíꞌiliꞌ,
bönachi Betsaida.
Laꞌtuꞌ gulaca lu yödzö Tiro,
en lu yödzö Sidón yuguꞌ yöl-laꞌ huáca benaꞌ ga zóaliꞌ,
dza níꞌtëlö uluꞌbíꞌi ládxiꞌgaca bönachi yödzö Tiro,
en yödzö Sidón naꞌ,
en ilácugaca lariꞌ tëbi,
en uluꞌdxía dö ícjaguequi,
le uluꞌluíꞌi tuꞌbíꞌi ládxiꞌgaca bönachi naꞌ.
22 Naꞌa,
nedaꞌ reaꞌ libíꞌiliꞌ,
cateꞌ idxín dza ichúguiëꞌ Dios quégaca bönachi,
quíꞌi sácaꞌröliꞌ libíꞌiliꞌ ca ilaꞌguíꞌi ilaꞌzacaꞌ bönachi yödzö Tiro,
en yödzö Sidón,
nupa naꞌ busunítiëꞌ Dios.
23 Libíꞌiliꞌ,
bönachi Capernaum,
guca queë́liꞌ ca bidxíntëliꞌ ga nu riyaza yehuaꞌ yubá.
Huö́tjaliꞌ lu guíꞌ gabila.
Laꞌtuꞌ gulaca yuguꞌ yöl-laꞌ huáca benaꞌ ga zóaliꞌ lu yödzö Sodoma,
uluꞌgáꞌana bönachi yödzö niꞌ ga ridxintë naꞌa dza.
24 Naꞌa,
nedaꞌ reaꞌ libíꞌiliꞌ,
cateꞌ idxín dza ichúguiëꞌ Dios quégaca bönachi,
quíꞌi sácaꞌröliꞌ libíꞌiliꞌ ca ilaꞌguíꞌi ilaꞌzacaꞌ bönachi Sodoma naꞌ.
Rnnëꞌ Jesús: “Guliꞌdá ga zoaꞌ, uzíꞌ ládxiꞌliꞌ”
25 Dza naꞌ bëꞌë didzaꞌ Jesús,
rnnëꞌ:
―Xuzaꞌ,
nacuꞌ Xani yehuaꞌ yubá,
en Xani luyú ni.
Riguꞌa Liꞌ yöl-laꞌ ba,
tuꞌ bucáchuꞌu lë ni,
para cabí ilaꞌléꞌenëꞌ bönniꞌ taꞌyéajniꞌideꞌenëꞌ le,
pero buluíꞌinuꞌ nupa nácagaca ca yuguꞌ bíꞌidoꞌ le.
26 Caꞌ gaca,
Xuzaꞌ,
tuꞌ caní guyaza ládxuꞌu Liꞌ.
27 Yúguꞌtë nudödëꞌ Xuzaꞌ lu naꞌa.
Cuntu nu nunbëꞌ nedaꞌ,
Zxíꞌinëꞌ Dios,
pero tuzëꞌ Dios Xuz,
en cuntu nu nunbëꞌ Dios Xuz,
pero tuzaꞌ nedaꞌ,
Zxíꞌinëꞌ Dios,
encaꞌ nupa naꞌ rë́ꞌëndaꞌ uluíꞌidaꞌ léguequi Dios Xuz.
28 Guliꞌdá ga zoaꞌ yúguꞌtëliꞌ röjxéquiꞌliꞌ tuꞌ rúnticaꞌsiliꞌ dxin que yöl-laꞌ yudoꞌ,
en nuáꞌaliꞌ yuaꞌ ziꞌi quégaca xibá que,
ateꞌ nedaꞌ gunaꞌ ga uzíꞌ ládxiꞌliꞌ.
29 Lu yöl-laꞌ nöxaj ladxiꞌ queë́liꞌ guliꞌgún xichinaꞌ,
gácaliꞌ ca bëdxi taꞌzíꞌibaꞌ yuguꞌ quégacabaꞌ.
Guliꞌsëda lu naꞌa nedaꞌ,
tuꞌ nacaꞌ nöxaj ladxiꞌ,
en doꞌ ladxiꞌ,
ateꞌ idzöli yöl-laꞌ ruzíꞌ ladxiꞌ queë́liꞌ,
le cuéqui dxi ládxiꞌliꞌ.
30 Yuguꞌ naꞌ uguꞌa libíꞌiliꞌ,
le naca le inná béꞌedaꞌ libíꞌiliꞌ,
bitiꞌ naca böniga,
ateꞌ yuaꞌ uguꞌa libíꞌiliꞌ le naca le rusédidaꞌ,
dzáꞌdoꞌos naca.