Jesús ruúnëꞌ-biꞌ biꞌi huen dxin queëꞌ tu bönniꞌ unná bëꞌ
7
Cateꞌ Jesús budxi bë́ꞌlenëꞌ légaquiëꞌ didzaꞌ ni,
guyáziëꞌ yödzö Capernaum.
San Lucas 7:1-35
2 Lu yödzö niꞌ zoëꞌ tu bönniꞌ Roma rinná béꞌenëꞌ bönniꞌ röjáquiëꞌ gudil-la.
Zóabiꞌ biꞌi huen dxin queëꞌ nadxíꞌideꞌenëꞌ-biꞌ,
ateꞌ biꞌi ni réꞌebiꞌ,
en chirequi gátibiꞌ.
3 Cateꞌ biyönnëꞌ bönniꞌ ni didzaꞌ tuꞌë bönachi ca naca queëꞌ Jesús,
laꞌ gusö́l-laꞌtëꞌ bal-lëꞌ bönniꞌ gula tuꞌzéajniꞌinëꞌ bönniꞌ judío ga naꞌ zoëꞌ Jesús,
tsöjö́taꞌyugaquiëꞌ lahuëꞌ Lëꞌ guídëꞌ uduhuénëꞌ-biꞌ biꞌi huen dxin queëꞌ naꞌ réꞌebiꞌ.
4 Bönniꞌ gula tuꞌzéajniꞌinëꞌ naꞌ bilaꞌdxinëꞌ ga zoëꞌ Jesús,
ateꞌ gulátaꞌyuëꞌ lahuëꞌ idú ládxiꞌgaquiëꞌ,
taꞌnnë́ꞌ:
―Náquiëꞌ lesacaꞌ bönniꞌ naꞌ gunuꞌ queëꞌ lë ni,
5 tuꞌ runëꞌ bal bönachi uládz queë́ruꞌ,
en benëꞌ tu yuꞌu queë́ruꞌ ga rudúbiruꞌ rusë́daruꞌ queëꞌ Dios.
6 Níꞌirö Jesús guyéajlenëꞌ légaquiëꞌ.
Cateꞌ chizóa ilaꞌdxinëꞌ lidxëꞌ bönniꞌ naꞌ,
lëꞌ gusö́l-lëꞌë bal-lëꞌ böchiꞌ luzë́ꞌë ga zëꞌë Jesús,
ateꞌ tëꞌ Lëꞌ:
―Xan,
rnnëꞌ bönniꞌ naꞌ:
“Bitiꞌ uguíꞌinuꞌ,
tuꞌ cabí nacaꞌ lesacaꞌ tsáziuꞌ lidxaꞌ,
7 en bitiꞌ nacaꞌ lesacaꞌ guídaꞌ ga zuꞌ.
Que lë ni naꞌ bitiꞌ burúguidaꞌ guídaꞌ ga zuꞌ.
Bë́ꞌësö didzaꞌ,
ateꞌ huöácatëbiꞌ biꞌi huen dxin quiaꞌ.
8 Nedaꞌ caꞌ,
zoa nu rinná beꞌe nedaꞌ,
ateꞌ nacuꞌë caꞌ bönniꞌ röjáquiëꞌ gudil-la rinná béꞌedaꞌ légaquiëꞌ.
Reaꞌ-nëꞌ tuëꞌ:
Guyéaj niꞌ,
ateꞌ rejëꞌ.
Reaꞌ-nëꞌ iaꞌtúëꞌ:
Gudá ni,
ateꞌ ridëꞌ.
Reaꞌ-nëꞌ caꞌ huen dxin quiaꞌ:
Ben dxin ni,
ateꞌ runëꞌ dxin naꞌ.”
9 Cateꞌ biyönnëꞌ Jesús didzaꞌ ni,
bubáninëꞌ queëꞌ bönniꞌ naꞌ,
ateꞌ buécjëꞌ,
en gudxëꞌ bönachi naꞌ záꞌgaca cúdzuꞌlëꞌ,
rnnëꞌ:
―Le nácatë reaꞌ libíꞌiliꞌ,
cuntu nu bönniꞌ Israel bitiꞌ röjxáquiꞌdaꞌ-nëꞌ réajlëꞌë quiaꞌ ca réajlëꞌë quiaꞌ bönniꞌ ni.
10 Cateꞌ buluꞌdxinëꞌ bönniꞌ naꞌ gusö́l-lëꞌë bönniꞌ rinná béꞌenëꞌ bönniꞌ röjáquiëꞌ gudil-la,
gulaꞌyáziëꞌ ga naca lu yuꞌu lidxëꞌ,
en bilaꞌléꞌenëꞌ chiböácabiꞌ biꞌi huen dxin naꞌ.
Jesús rusubanëꞌ-biꞌ biꞌi bönniꞌ queë́nu tu nigula uzëbi
11 Gudödi guca lë ni,
saꞌyéajëꞌ Jesús yödzö Naín,
ateꞌ dzágagaquiëꞌ bönniꞌ usëda queëꞌ Lëꞌ,
len bönachi zián.
12 Cateꞌ bidxinëꞌ galaꞌ raꞌ yödzö naꞌ,
biléꞌenëꞌ yuguꞌ bönniꞌ nuáꞌagaquiëꞌ-biꞌ tubiꞌ biꞌi bönniꞌ nati.
Söjcáchiꞌgaquiëꞌ-biꞌ.
Biꞌi nati naꞌ nácabiꞌ laꞌs dui biꞌi queë́nu tu nigula uzë́bidoꞌ.
Zián bönachi uladza queë́nu nigula uzëbi naꞌ söjácalen-nu.
13 Cateꞌ Xanruꞌ biléꞌenëꞌ-nu,
buéchiꞌ ládxëꞌë-nu,
ateꞌ gudxëꞌ-nu:
―Bítiꞌrö cödxuꞌ.
14 Níꞌirö gubíguiꞌë Jesús,
en gudanëꞌ daꞌa yaga ga naꞌ dëbiꞌ biꞌi nati naꞌ.
Gulaꞌbözëꞌ bönniꞌ naꞌ nuáꞌagaquiëꞌ-biꞌ,
ateꞌ Jesús gunnë́ꞌ:
―Biꞌidoꞌ,
liꞌ reaꞌ,
guyasa.
15 Níꞌirö bubanbiꞌ.
Gurö́ꞌöbiꞌ biꞌi naꞌ zíꞌalö nátibiꞌ,
ateꞌ gusí lobiꞌ ruíꞌibiꞌ didzaꞌ.
Jesús budödëꞌ-biꞌ lu náꞌanu xináꞌabiꞌ.
16 Cateꞌ bönniꞌ niꞌ bilaꞌléꞌenëꞌ lë ni,
guládxinëꞌ yúguꞌtëꞌ,
ateꞌ gulaꞌguꞌë Dios yöl-laꞌ ba,
taꞌnnë́ꞌ:
―Bidxín queë́ruꞌ tu bönniꞌ lo,
ruꞌë didzaꞌ uláz queëꞌ Dios.
Dios caz rácalenëꞌ bönachi queëꞌ.
17 Guzë́ didzaꞌ ca naca yöl-laꞌ huáca queëꞌ Jesús,
ateꞌ bilaꞌyöni bönachi yúguꞌtë yödzö luyú Judea,
en yúguꞌtë yödzö idú gásibiꞌilö.
Le rinabëꞌ Juan, bönniꞌ buquilëꞌ bönachi nisa
18 Bönniꞌ dáꞌgaquiëꞌ Juan gulaꞌguíxjöiꞌinëꞌ lëꞌ yúguꞌtë lë ni runëꞌ Jesús.
Niꞌ yuꞌë Juan lidxi guíë,
bulidzëꞌ chopëꞌ bönniꞌ naꞌ dáꞌgaquiëꞌ lë,
19 ateꞌ gusö́l-lëꞌë légaquiëꞌ ga naꞌ zoëꞌ Jesús para ilaꞌnábinëꞌ Lëꞌ,
ilaꞌnnë́ꞌ:
“¿Nacuꞌ Liꞌ Cristo,
bönniꞌ ral-laꞌ guídëꞌ,
o naruꞌ ral-laꞌ cöztuꞌ-nëꞌ bönniꞌ yúbölö?”
20 Cateꞌ bilaꞌdxinëꞌ bönniꞌ naꞌ nasö́l-lëꞌë Juan ga naꞌ zoëꞌ Jesús,
tëꞌ Lëꞌ:
―Juan,
bönniꞌ buquilëꞌ bönachi nisa,
nasö́l-lëꞌë netuꞌ para inábituꞌ Liꞌ,
innatuꞌ:
“¿Nacuꞌ Liꞌ Cristo,
bönniꞌ naꞌ ral-laꞌ guídëꞌ,
o naruꞌ ral-laꞌ cöztuꞌ-nëꞌ bönniꞌ yúbölö?”
21 Laꞌ náꞌasö ruúnëꞌ Jesús zián nupa teꞌe,
yuguꞌ bönniꞌ huëꞌ,
en bönniꞌ yúꞌugaca légaquiëꞌ böꞌ xihuiꞌ,
ateꞌ zián bönniꞌ lo chul-la busaljëꞌ guiö́j lógaquiëꞌ.
22 Bubiꞌë didzaꞌ Jesús,
rëꞌ chopëꞌ bönniꞌ naꞌ nasö́l-lëꞌë Juan,
rnnëꞌ:
―Guliꞌtséaj,
guliꞌtsöjtíxjöiꞌi-nëꞌ Juan ca naca le biléꞌeliꞌ,
en le biyö́niliꞌ.
Tuꞌléꞌenëꞌ bönniꞌ guchul-la lógaquiëꞌ.
Tuꞌzë́ꞌë bönniꞌ gulatsjëꞌ.
Nuhuöácagaquiëꞌ bönniꞌ güíꞌiguequinëꞌ huëꞌ nudzuꞌ ruzödi.
Tuꞌyö́nnëꞌ bönniꞌ gulaꞌcö́dzuëꞌ.
Nubángaquiëꞌ bönniꞌ gulátiëꞌ.
Taꞌyönnëꞌ bönniꞌ yechiꞌ didzaꞌ dxiꞌa.
23 Bicaꞌ ba nu bitiꞌ gaca chopa ladxiꞌ,
ateꞌ zaꞌlen nedaꞌ sal-laꞌ bitiꞌ runaꞌ ca réqui nu naꞌ ral-laꞌ gunaꞌ.
24 Cateꞌ bönniꞌ naꞌ gusö́l-lëꞌë Juan buluꞌzë́ꞌë niꞌ,
gusí lahuëꞌ Jesús ruluíꞌinëꞌ bönachi niꞌ ca naca queëꞌ Juan naꞌ,
rnnëꞌ:
―¿Bizxi birúajliꞌ yöjyuliꞌ lu lataj cáꞌasö?
¿Naruꞌ birúajliꞌ yöjyuliꞌ tu gui rutá böꞌ recja le?
25 ¿Bizxi caz birúajliꞌ yöjyuliꞌ?
¿Naruꞌ birúajliꞌ yöjyuliꞌ-nëꞌ tu bönniꞌ nácuëꞌ lariꞌ nazácaꞌdeꞌe?
Nöz quéziliꞌ nupa nácugaca lariꞌ nazácaꞌdeꞌe,
en tuꞌzíꞌ xibé yöl-laꞌ tsahuiꞌ,
nacuáꞌ lídxigaquiëꞌ bönniꞌ taꞌnná bëꞌë.
26 ¿Bizxi caz birúajliꞌ yöjyuliꞌ?
¿Naruꞌ birúajliꞌ yöjyuliꞌ-nëꞌ tu bönniꞌ ruꞌë didzaꞌ uláz queëꞌ Dios?
Ön,
reaꞌ libíꞌiliꞌ,
ateꞌ nayë́pisëtërëꞌ ca nu ruíꞌi didzaꞌ uláz queëꞌ Dios.
27 Náquiëꞌ Juan bönniꞌ naꞌ nazúaj lu guichi láꞌayi ca naca queëꞌ,
rnna:
Buyútsöcaꞌ,
risö́l-laꞌa-nëꞌ gubáz quiaꞌ,
inö́ruëꞌ ca Liꞌ.
Bönniꞌ ni uchiꞌë nöza ga töduꞌ.
28 ’Nedaꞌ reaꞌ libíꞌiliꞌ:
Gapa nacuáꞌ bönachi,
channö zoëꞌ nu bönniꞌ ruꞌë didzaꞌ uláz queëꞌ Dios,
bitiꞌ nácarëꞌ lo ca Juan,
bönniꞌ naꞌ buquilëꞌ bönachi nisa,
pero nu nácatërö cuídiꞌsö ga rinná bëꞌë Dios nayë́pisëtërö ca Juan naꞌ.
29 Cateꞌ bönachi niꞌ,
en bönniꞌ tuꞌquizxjëꞌ lázagaca bönachi bilaꞌyönnëꞌ didzaꞌ ni bëꞌë Juan,
guléquibeꞌenëꞌ le naca tsahuiꞌ lahuëꞌ Dios,
en bilaꞌdilëꞌ nisa lu nëꞌë Juan,
30 pero yuguꞌ bönniꞌ yudoꞌ fariseo,
en bönniꞌ yudoꞌ tuꞌsédinëꞌ xibá queëꞌ Moisés bitiꞌ bilaꞌdilëꞌ nisa lu nëꞌë Juan,
ateꞌ caní guca,
buluꞌcáꞌanëꞌ cáꞌasö le gúꞌunnëꞌ Dios gunëꞌ quégaquiëꞌ.
31 Gunnë́ꞌ caꞌ Xanruꞌ:
―¿Nacxi uséquiꞌtsedaꞌ bönachi nacuáꞌ dza ni zóaruꞌ naꞌa?
¿Nacxi caz nácagaquiëꞌ?
32 Nácagaquiëꞌ ca bíꞌidoꞌ taꞌguítjabiꞌ.
Taꞌbö́ꞌöbiꞌ lu yë́ꞌëyi,
en taꞌbö́dxiꞌabiꞌ.
Taꞌnnabiꞌ tubiꞌ iaꞌtubiꞌ:
“Rucö́dxituꞌ queë́liꞌ gui,
pero bitiꞌ ruyáꞌaliꞌ.
Rul-la yéchiꞌtuꞌ,
pero bitiꞌ ribö́dxiliꞌ.”
33 Caní nácaliꞌ tuꞌ bidëꞌ Juan,
bönniꞌ buquilëꞌ bönachi nisa,
en bitiꞌ gudahuëꞌ yöta xtila,
en bitiꞌ guꞌë xisi uva,
ateꞌ rnnaliꞌ queëꞌ:
“Tuꞌ xihuiꞌ dzaga lëꞌ.”
34 Cateꞌ bidaꞌ nedaꞌ,
Bönniꞌ Guljëꞌ Bönachi,
en rëꞌaj rahuaꞌ,
rnnaliꞌ quiaꞌ:
“Bönniꞌ ni náquiëꞌ bönniꞌ huágulëꞌë,
en bönniꞌ reꞌjëꞌ.
Náquiëꞌ luzáꞌagaquiëꞌ bönniꞌ tuꞌquizxjëꞌ,
en iaꞌzícaꞌrëꞌ bönniꞌ dul-laꞌ.”
35 Reaꞌ libíꞌiliꞌ:
Naca bëꞌ nupa nápagaca yöl-laꞌ réajniꞌi queëꞌ Dios niꞌa que le túngaca.
Le benëꞌ Jesús lidxëꞌ tu bönniꞌ yudoꞌ fariseo
36 Tu bönniꞌ yudoꞌ fariseo bulidzëꞌ Jesús gágulenëꞌ lëꞌ tsözxö́n,
ateꞌ guyáziëꞌ Jesús lidxëꞌ bönniꞌ naꞌ,
en guröꞌë rahuëꞌ.
San Lucas 7:36-50
37 Zóanu lu yödzö naꞌ tu nigula udá dzaga,
en cateꞌ nö́zinu röꞌë rahuëꞌ Jesús lidxëꞌ bönniꞌ yudoꞌ fariseo naꞌ,
níꞌirö bidxinnu niꞌ nuáꞌanu tu bö́gaꞌdoꞌ néquini guiö́j nazacaꞌ le yudzu tu le riláꞌ zxixi.
38 Cateꞌ bidxinnu zacaꞌ cúdzuꞌlëꞌ Jesús,
gurö́ꞌönu xiniꞌë ribö́dxinu.
Níꞌirö gusí lonu rigúꞌunu nisa ribö́dxinu niꞌë Jesús,
en ruzxinu niꞌë len guitsaꞌ ícjanu.
Butsaga lonu niꞌë,
en gulúꞌunu niꞌë lë naꞌ riláꞌ zxixi.
39 Cateꞌ bönniꞌ yudoꞌ fariseo naꞌ nulidzëꞌ Jesús biléꞌenëꞌ lë ni,
guzáꞌ ládxëꞌë,
rnnëꞌ:
“Laꞌtuꞌ náquiëꞌ bönniꞌ ni bönniꞌ ruꞌë didzaꞌ uláz queëꞌ Dios,
huéquibeꞌenëꞌ nuzxi naꞌ,
en nacxi nácanu nigula ni rigannu Lëꞌ,
tuꞌ nácanu nigula udá dzaga.”
40 Níꞌirö Jesús gudxëꞌ bönniꞌ fariseo naꞌ,
rnnëꞌ:
―Simón,
dë tu le ral-laꞌ guíaꞌ liꞌ.
Bubiꞌë didzaꞌ bönniꞌ naꞌ,
rnnëꞌ:
―Gunná,
Bönniꞌ Usedi.
41 Jesús rëꞌ lëꞌ:
―Zoëꞌ tu bönniꞌ dë dumí queëꞌ,
ateꞌ nacuꞌë chopëꞌ bönniꞌ tál-lëꞌë dumí queëꞌ.
Tuëꞌ bönniꞌ naꞌ ral-lëꞌë queëꞌ lazxjëꞌ que chopa iz,
ateꞌ iaꞌtúëꞌ naꞌ ral-lëꞌë queëꞌ lazxjëꞌ que chopa beoꞌ.
42 Tuꞌ cabí dë quégaquiëꞌ dumí uluꞌguízxjëꞌ lë naꞌ tál-lëꞌë queëꞌ,
que lë ni naꞌ buniti lahuëꞌ iropëꞌ lë naꞌ tál-lëꞌë queëꞌ.
Gunnátsöcaꞌ naꞌa.
¿Núzxilëꞌ bönniꞌ chopëꞌ ni idxíꞌirönëꞌ bönniꞌ naꞌ buniti lahuëꞌ légaquiëꞌ?
43 Bubiꞌë didzaꞌ Simón naꞌ,
rnnëꞌ:
―Réquidaꞌ nedaꞌ,
bönniꞌ naꞌ rálaꞌrëꞌ queëꞌ dumí,
lë naꞌ buniti lahuëꞌ.
Jesús gudxëꞌ lëꞌ:
―Le nácasö rnnoꞌ.
44 Níꞌirö buécjëꞌ Jesús,
ateꞌ niꞌ ruyúëꞌ-nu nigula naꞌ,
rëꞌ Simón:
―¿Naruꞌ riléꞌenuꞌ nigula ni?
Guyáziaꞌ lidxuꞌ,
ateꞌ bitiꞌ bennuꞌ quiaꞌ nisa quíbidaꞌ niꞌa,
pero nigula ni gulúꞌunu niꞌa nisa ribö́dxinu,
en buzxinu niꞌa len guitsaꞌ ícjanu.
45 Bitiꞌ butsaga loꞌ nedaꞌ,
pero cateꞌ bidxínteaꞌ lidxuꞌ,
bitiꞌ ruzóa dxinu nigula ni,
rutsaga lonu niꞌa.
46 Bitiꞌ gulúꞌu icjaꞌ le za,
pero nigula ni gulúꞌunu niꞌa lë naꞌ riláꞌ zxixi.
47 Que lë ni naꞌ reaꞌ liꞌ,
dul-laꞌ zián gubágaꞌnu nigula ni,
chiguyúꞌu yöl-laꞌ runiti lo quéguequi,
ateꞌ nadxíꞌideꞌenu nedaꞌ.
Nu naꞌ Dios runiti lahuëꞌ le látiꞌdoꞌos,
látiꞌdoꞌos nadxíꞌi Dios nu naꞌ.
48 Níꞌirö Jesús gudxëꞌ-nu nigula naꞌ,
rnnëꞌ:
―Dul-laꞌ gubáguꞌu chiguyúꞌu yöl-laꞌ runiti lo que.
49 Yuguꞌ bönniꞌ naꞌ taꞌbö́ꞌlenëꞌ Jesús tahuëꞌ gulaꞌsí lógaquiëꞌ tëꞌ luzáꞌagaquiëꞌ,
taꞌnnë́ꞌ:
―¿Nuzxi caz bönniꞌ ni,
runiti lotsëꞌ caꞌ dul-laꞌ?
50 Níꞌirö Jesús gudxëꞌ-nu nigula naꞌ,
rnnëꞌ:
―Tuꞌ réajlëꞌu nedaꞌ,
chibulóꞌ liꞌ.
Böaj lidxuꞌ,
zoa dxi ládxuꞌu.