Risö́l-lëꞌë Jesús tsónnalalaj yuꞌ chiëꞌ bönniꞌ tsöjéngaquiëꞌ libán
10
Gudödi gulaca yuguꞌ lë ni,
gurö́ëꞌ Xanruꞌ iaꞌtsónnalalaj yuꞌ chiëꞌ bönniꞌ usëda queëꞌ,
ateꞌ gusö́l-lëꞌë légaquiëꞌ chopa huéajgaquiëꞌ para ilaꞌnö́ruëꞌ ca Lëꞌ,
en tsöjáquiëꞌ yúguꞌtë yödzö,
en yö́dzödoꞌ gapa chizóa tödëꞌ Lëꞌ.
San Lucas 10:1-24
―Le nácatë,
dëdaꞌ dxin quiaꞌ,
le naca ca tu laꞌ yëla zxön ga nu tsöjlapaꞌ,
pero nabábasö huen dxin quiaꞌ nacuáꞌ.
Que lë ni naꞌ,
guliꞌgátaꞌyu lahuëꞌ Dios,
náquiëꞌ Xan laꞌ yëla naꞌ,
isö́l-lëꞌë yuguꞌ huen dxin ga naca laꞌ yëla queëꞌ.
3 Guliꞌtséaj naꞌa.
Buliꞌyútsöcaꞌ,
nedaꞌ risö́l-laꞌa libíꞌiliꞌ,
nácaliꞌ ca yuguꞌ böꞌcuꞌ zxilaꞌ söjácabaꞌ ládjagacabaꞌ böꞌcuꞌ guíꞌa síniaꞌ.
4 Bitiꞌ guáꞌaliꞌ yöxaj dumí,
en calëga buzudi yöta,
en bitiꞌ guáꞌaliꞌ iaꞌtú cöꞌ xiráchuliꞌ,
en bitiꞌ tseliꞌ para güíꞌilenliꞌ bönachi didzaꞌ gapa naca laꞌ nöza.
5 Gátiꞌtës yuꞌu ga tsúꞌuliꞌ,
innaliꞌ:
“Le ribequi dxi ladxiꞌ gaca quégaca bönachi nacuáꞌ yuꞌu ni.”
6 Channö zoa niꞌ nu bönniꞌ siꞌë yöl-laꞌ ribequi dxi ladxiꞌ,
ugáꞌanalen lëꞌ le ribequi dxi ladxiꞌ naꞌ inábaliꞌ,
pero channö cabí zoa niꞌ nu bönniꞌ caní,
ugáꞌanalen libíꞌiliꞌ le ribequi dxi ladxiꞌ naꞌ inábaliꞌ.
7 Guliꞌgáꞌana yuꞌu ga naꞌ tsúꞌuliꞌ,
en guliꞌguíꞌaj guliꞌgagu bi ilunnëꞌ queë́liꞌ,
tuꞌ udzöli quézinëꞌ bönniꞌ huen dxin le gahuëꞌ.
Bitiꞌ tö́diliꞌ yuꞌu yuꞌu.
8 Gátiꞌtës yödzö ga tsúꞌuliꞌ,
ateꞌ ilún libíꞌiliꞌ bal,
guliꞌgagu le uluꞌcuꞌë loliꞌ.
9 Buliꞌún nupa teꞌe nacuáꞌ yödzö naꞌ,
en guliꞌguíë léguequi:
“Chibidxín le rinná bëꞌë Dios ga zóaliꞌ.”
10 Gátiꞌtës yödzö ga tsúꞌuliꞌ,
channö cabí ilún libíꞌiliꞌ bal,
guliꞌrúaj,
tsöjsóaliꞌ laꞌ nöza que yödzö naꞌ,
en innaliꞌ:
11 “Bëchtö que ládzaliꞌ le daꞌ lëꞌe lábatuꞌ ruquínnajtuꞌ,
le ruluíꞌi nabágaꞌliꞌ xíguiaꞌ,
pero ral-laꞌ inö́ziliꞌ lë ni,
chibidxín le rinná bëꞌë Dios ga zóaliꞌ.”
12 Nedaꞌ reaꞌ libíꞌiliꞌ,
cateꞌ idxín dza ichúguiëꞌ Dios quégaca bönachi,
ilaꞌguíꞌi ilaꞌzacaꞌrö bönachi yödzö niꞌ ca ilaꞌguíꞌi ilaꞌzacaꞌ bönachi yödzö Sodoma,
nupa niꞌ busunítiëꞌ Dios.
Le gaca quégaca nupa bitiꞌ uluꞌbíꞌi ládxiꞌgaca
13 Gunnë́ꞌ caꞌ Jesús:
―Bicaꞌ bayechiꞌ libíꞌiliꞌ,
bönachi yödzö Corazín.
Bicaꞌ bayechiꞌ libíꞌiliꞌ,
bönachi yödzö Betsaida.
Laꞌtuꞌ gulaca lu yödzö Tiro,
en lu yödzö Sidón yuguꞌ yöl-laꞌ huáca rubani ca yuguꞌ le benaꞌ ga zóaliꞌ,
dza niꞌte uluꞌbíꞌi ládxiꞌgaquiëꞌ bönniꞌ niꞌ,
ateꞌ ilácuëꞌ lariꞌ cáꞌasö,
en ilaꞌguꞌë dö ícjagaquiëꞌ,
le uluíꞌigaca chibuluꞌbíꞌi ládxiꞌgaquiëꞌ.
14 Que lë ni naꞌ,
cateꞌ idxín dza ichúguiëꞌ Dios quégaca bönachi,
quíꞌi sácaꞌröliꞌ ca ilaꞌguíꞌi ilaꞌzáquiëꞌ bönniꞌ yödz Tiro,
en yödz Sidón.
15 Libíꞌiliꞌ,
bönachi Capernaum.
Réquiliꞌ tsázaliꞌ yehuaꞌ yubá.
Huö́tjaliꞌ tsöjtsázaliꞌ lataj chul-la quégaca nupa nátigaca.
16 Níꞌirö Jesús gudxëꞌ yuguꞌ bönniꞌ usëda queëꞌ,
rnnëꞌ:
―Nu ruzë́ nagui libíꞌiliꞌ,
ruzë́ nagui caꞌ nedaꞌ,
ateꞌ nu rucáꞌana libíꞌiliꞌ cáꞌasö,
rucáꞌana caꞌ nedaꞌ cáꞌasö,
en nu rucáꞌana nedaꞌ cáꞌasö,
rucáꞌana caꞌ cáꞌasö Xuzaꞌ,
nasö́l-lëꞌë nedaꞌ.
Bönniꞌ yöjéngaquiëꞌ libán tuꞌdxinëꞌ ga zoëꞌ Jesús
17 Cateꞌ tsónnalalaj yuꞌ chiëꞌ bönniꞌ naꞌ gusö́l-lëꞌë Jesús buluꞌdxinëꞌ ga zoëꞌ Lëꞌ,
bönniꞌ naꞌ yöjéngaquiëꞌ libán,
taꞌnnë́ꞌ:
―Xan,
tun böꞌ xihuiꞌ ca rnnatuꞌ cateꞌ ruguntuꞌ dxin Loꞌ.
18 Jesús gudxëꞌ légaquiëꞌ:
―Nedaꞌ biléꞌedaꞌ Satanás tuꞌ xihuiꞌ,
gubixi zxan lúzxiba ca run yösa,
le riyaza luyú.
19 Buliꞌyútsöcaꞌ,
nedaꞌ nudödaꞌ lu náꞌaliꞌ yöl-laꞌ unná bëꞌ para gaca sö́ngacaliꞌ-baꞌ bëla síniaꞌ,
en xöjnö́ꞌ,
en bitiꞌ bi gaca queë́liꞌ,
ateꞌ ucúl-laliꞌ yöl-laꞌ unná bëꞌ que tuꞌ xihuiꞌ,
nu bitiꞌ riléꞌe rëꞌu dxiꞌa.
20 Naꞌa,
buliꞌdzeja,
calë́gasö tuꞌ tun böꞌ xihuiꞌ ca rnnaliꞌ,
pero tuꞌ nuzúajgaca laliꞌ lu guichi niꞌ yehuaꞌ yubá.
Rudzéjanëꞌ Jesús
21 Laꞌ níꞌisö rudzéjanëꞌ Jesús,
dzáguiëꞌ Dios Böꞌ Láꞌayi Lëꞌ,
rnnëꞌ:
―Riguꞌa Liꞌ yöl-laꞌ ba,
Xuzaꞌ,
nacuꞌ Xani yehuaꞌ yubá,
en Xani luyú ni,
tuꞌ bucáchuꞌu yuguꞌ lë ni lógaquiëꞌ bönniꞌ táquiëꞌ yenniꞌ,
en bönniꞌ taꞌyéajniꞌinëꞌ,
pero buluíꞌiguequinuꞌ-biꞌ bíꞌidoꞌ ca naca.
¡Caꞌ gaca,
Xuzaꞌ,
tuꞌ caní guyaza ládxuꞌu!
22 Níꞌirö gunnë́ꞌ:
―Yúguꞌtë budödëꞌ Xuzaꞌ lu naꞌa.
Cuntu nu bönniꞌ nö́zinëꞌ Nu náquiëꞌ Zxíꞌinëꞌ Dios,
pero tuzëꞌ Dios Xuz nö́zinëꞌ,
ateꞌ cuntu nu nözi Nu náquiëꞌ Dios Xuz,
pero tuzëꞌ Zxíꞌinëꞌ nö́zinëꞌ,
ateꞌ inö́zigaca caꞌ nupa naꞌ Zxíꞌinëꞌ rë́ꞌënëꞌ uluíꞌinëꞌ léguequi Xuzëꞌ.
23 Níꞌirö Jesús buyúëꞌ yuguꞌ bönniꞌ usëda queëꞌ,
en rëꞌ légaquiëꞌ:
―Bicaꞌ bágaca nupa taꞌléꞌe le riléꞌeliꞌ libíꞌiliꞌ,
24 tuꞌ reaꞌ libíꞌiliꞌ:
Zián bönniꞌ guluꞌë didzaꞌ uláz queëꞌ Dios,
encaꞌ bönniꞌ gulaꞌnná bëꞌë,
gulë́ꞌënnëꞌ ilaꞌléꞌenëꞌ le riléꞌeliꞌ,
pero bitiꞌ bilaꞌléꞌenëꞌ le.
Gulë́ꞌënnëꞌ ilaꞌyönnëꞌ le riyö́niliꞌ,
pero bitiꞌ bilaꞌyönnëꞌ le.
Tu bönniꞌ Samaria, bönniꞌ tsahuiꞌ
25 Níꞌirö guyasëꞌ tu bönniꞌ yudoꞌ usedi,
en para siꞌ bëꞌë Jesús,
gunábinëꞌ Lëꞌ,
rnnëꞌ:
―Bönniꞌ Usedi,
¿bizxi ral-laꞌ gunaꞌ para idéliꞌdaꞌ yöl-laꞌ naꞌbán idú?
San Lucas 10:25-42
26 Jesús rëꞌ lëꞌ:
―¿Bizxi caz nazúaj lu guichi lu xibá queëꞌ Moisés?
¿Nacxi rusacaꞌ quiuꞌ lë naꞌ rulabuꞌ?
27 Bubiꞌë didzaꞌ bönniꞌ naꞌ,
rnnëꞌ:
―Caní rnna:
“Idxíꞌinuꞌ Xanuꞌ Dios idú ládxuꞌu,
en len idú icja ládxiꞌdoꞌo,
en len idú yöl-laꞌ run quiuꞌ,
en len idú yöl-laꞌ réajniꞌi quiuꞌ,
ateꞌ idxíꞌinuꞌ bönniꞌ luzóꞌo ca nadxíꞌi cuinuꞌ.”
28 Jesús rëꞌ lëꞌ:
―Dxíꞌadoꞌ bubiꞌu didzaꞌ.
Ben caní,
ateꞌ gataꞌ quiuꞌ yöl-laꞌ naꞌbán naꞌ.
29 Tuꞌ gúꞌunnëꞌ bönniꞌ naꞌ ubéaj dxiꞌa cuinëꞌ,
rëꞌ Jesús:
―¿Nuzxi naꞌ bönniꞌ luzáꞌa?
30 Bubiꞌë didzaꞌ Jesús,
rëꞌ lëꞌ:
―Buzë́ꞌë tu bönniꞌ Jerusalén,
rudínniëꞌ,
saꞌyéajëꞌ yödzö Jericó.
Laꞌ nöza niꞌ gulaꞌzönëꞌ gubán lëꞌ.
Gulaꞌgúëꞌ lariꞌ nácuëꞌ,
en gulunëꞌ lëꞌ huëꞌ.
Níꞌirö buluꞌzë́ꞌë niꞌ,
en nucáꞌanagaquiëꞌ lëꞌ,
chirati cazëꞌ.
31 Níꞌirö gudödëꞌ tu bixúz laꞌ nöza niꞌ.
Cateꞌ biléꞌenëꞌ bönniꞌ huëꞌ naꞌ,
tsöláꞌalö gudödëꞌ.
32 Gudödëꞌ caꞌ niꞌ tu bönniꞌ nababëꞌ zxíꞌini xiꞌsóëꞌ Leví,
yuguꞌ bönniꞌ naꞌ tunëꞌ dxin que yudoꞌ.
Cateꞌ biléꞌenëꞌ lëꞌ,
tsöláꞌalö caꞌ gudödëꞌ.
33 Lëscaꞌ yuꞌë tu bönniꞌ Samaria nöza naꞌ,
ateꞌ bidxinëꞌ galaꞌ ga dëꞌ bönniꞌ huëꞌ naꞌ.
Cateꞌ biléꞌenëꞌ lëꞌ,
buéchiꞌ ládxëꞌë lëꞌ.
34 Gubíguiꞌë ga naꞌ dëꞌ,
ateꞌ guluꞌë le za,
en xisi uva nál-la lu huëꞌ queëꞌ,
ateꞌ buchö́linëꞌ le lariꞌ.
Níꞌirö budxíëꞌ lëꞌ cúdzuꞌbaꞌ böaꞌ queëꞌ,
en buꞌë lëꞌ yuꞌu ga taꞌdxinëꞌ bönniꞌ yúꞌugaquiëꞌ nöza,
ateꞌ niꞌ gudapa chiꞌë lëꞌ.
35 Cateꞌ zaꞌ reníꞌ iaꞌtú dza,
en chizóa uzë́ꞌë bönniꞌ Samaria naꞌ,
guléajëꞌ lázxjaruꞌ que chopa dza,
le bucáꞌanëꞌ lu nëꞌë bönniꞌ xan yuꞌu naꞌ,
en rëꞌ lëꞌ:
“Gudapa chiꞌë bönniꞌ ni,
en channö utö́uꞌ iaꞌlatiꞌ dumí,
ubiꞌa nedaꞌ quiuꞌ cateꞌ huödaꞌ.”
36 Naꞌa,
¿nacxi runi liꞌ?
¿Núzxilëꞌ bönniꞌ yonna ni gúquiëꞌ bönniꞌ luzë́ꞌë bönniꞌ naꞌ guluꞌë döꞌ bönniꞌ gubán queëꞌ?
37 Bubiꞌë didzaꞌ bönniꞌ yudoꞌ usedi naꞌ,
rëꞌ Jesús:
―Bönniꞌ naꞌ buéchiꞌ ládxëꞌë lëꞌ.
Níꞌirö Jesús gudxëꞌ lëꞌ:
―Guyéaj naꞌa,
yöjén caꞌ liꞌ.
Le benëꞌ Jesús lídxigacanu Marta, en María
38 Níꞌirö buꞌë nöza Jesús,
ateꞌ bidxinëꞌ tu yö́dzödoꞌ ga niꞌ tu nigula lënu Marta guchë́ꞌënu Lëꞌ lídxinu.
39 Marta ni zóanu nigula zxílanu lënu María,
ateꞌ María naꞌ gurö́ꞌötënu ga naca xiniꞌë Jesús,
en ruzë́ náganu xtídzëꞌë.
40 Marta naꞌ bubi buguíꞌinu,
zián dxin runnu,
ateꞌ gubígaꞌnu ga naꞌ zoëꞌ Jesús,
en rënu Lëꞌ:
―Xan,
¿naruꞌ cabí ruíꞌi ládxiꞌtsoꞌ nedaꞌ tuꞌ nucáꞌanabiꞌ biꞌi zxilaꞌ ni nedaꞌ,
ateꞌ tuzaꞌ runaꞌ dxin?
Gudxi-biꞌ gácalenbiꞌ nedaꞌ.
41 Bubiꞌë didzaꞌ Jesús,
rëꞌë-nu: