Riguíxjöꞌë Jesús ca siꞌ uluꞌquínnajëꞌ yudoꞌ
24
Birúajëꞌ Jesús chila yudoꞌ,
en tsanni niꞌ rizë́ꞌë niꞌ,
gulaꞌbíguiꞌë bönniꞌ usëda queëꞌ ga naꞌ zoëꞌ,
ateꞌ buluꞌluíꞌinëꞌ Lëꞌ ca nácagaca zöꞌö nagúꞌugaca lëꞌa yudoꞌ.
2 Bubiꞌë didzaꞌ Jesús,
ateꞌ rëꞌ légaquiëꞌ:
―¿Riléꞌetseliꞌ yúguꞌtë lë ni?
Le nácatë reaꞌ libíꞌiliꞌ,
bitiꞌ caꞌ ugáꞌana guiö́j nabagaꞌ luzë́ꞌe ni,
le cabí iguínnaj.
Le ilaca bëꞌ chizóa idxín dza údxi que yödzölió
3 Cateꞌ niꞌ röꞌë Jesús ga naca lu Guíꞌa Yaga Olivo,
bilaꞌdxinëꞌ bönniꞌ usëda queëꞌ ga naꞌ zoëꞌ queë́zëꞌ,
en tëꞌ Lëꞌ:
―Gudíxjöiꞌi netuꞌ,
¿bátaxi ilaca lë ni,
en bizxi gaca bëꞌ dza huöduꞌ,
en dza údxi que yödzölió ni?
4 Níꞌirö bubiꞌë didzaꞌ Jesús,
ateꞌ rëꞌ légaquiëꞌ:
―Buliꞌyú para cabí nu siꞌ yeꞌe libíꞌiliꞌ,
5 tuꞌ záꞌgaquiëꞌ zián bönniꞌ lë́gaquiëꞌ ca leaꞌ nedaꞌ.
Ilaꞌnnë́ꞌ nácagaquiëꞌ Cristo,
en ilaꞌzíꞌ yéꞌenëꞌ bönachi zián.
6 Huayö́niliꞌ raca gudil-la,
en le ruíꞌi didzaꞌ que gudil-la,
pero bitiꞌ cö́ꞌöliꞌ böniga,
tuꞌ ral-laꞌ ilaca yúguꞌtë lë ni,
pero cabí ridxini dza údxi cateꞌ ilácarö lë ni.
7 Til-la tu yödzö len iaꞌtú yödzö,
ateꞌ tu ga nu rinná bëꞌ len iaꞌtú ga nu rinná bëꞌ.
Ilatsaj yödzöhuë́ꞌ zxön,
en gaca gubín,
ateꞌ zián lataj tödi budóꞌ zxuꞌ.
8 Yúguꞌtë lë ni nácagaca le isí lógaca yuguꞌ le ilaꞌguíꞌi ilaꞌzacaꞌ bönachi.
9 ’Níꞌirö uluꞌdödi bönachi libíꞌiliꞌ lu naꞌ nu usacaꞌ ziꞌ libíꞌiliꞌ.
Yúguꞌtë bönachi uluꞌdíꞌi libíꞌiliꞌ tuꞌ dáꞌaliꞌ nedaꞌ,
en ilútiëꞌ bál-laliꞌ libíꞌiliꞌ.
10 Cateꞌ gaca caní,
gaca chopa ládxiꞌgaca zián bönachi,
en uluꞌcáꞌana nedaꞌ,
ateꞌ udödi tu iaꞌtú luzë́ꞌe,
en tu iaꞌtú udíꞌi luzë́ꞌe.
11 Níꞌirö uluꞌluíꞌi lógaquiëꞌ zián bönniꞌ taꞌzíꞌ yëꞌë.
Uluꞌluíꞌi cuíngaquiëꞌ ca yuguꞌ bönniꞌ tuꞌë didzaꞌ uláz queëꞌ Dios,
en ilaꞌzíꞌ yéꞌenëꞌ bönachi zián.
12 Iluáꞌadaꞌ döꞌ bönachi,
ateꞌ que lë ni naꞌ bítiꞌrö ilaꞌdxíꞌi böchiꞌ luzéꞌeguequi.
13 Nu guequi tsaz queëꞌ Dios ga idxintë dza údxi,
nu ni ulá.
14 Idú yödzölió gaca libán que didzaꞌ dxiꞌa ca rinná bëꞌë Dios para gaca ba nalí que lógaca yúguꞌtë bönachi izáꞌa,
ateꞌ níꞌirö idxín dza údxi.
15,16 ’Nu ulaba lë ni ral-laꞌ uzéajniꞌi ladxiꞌ. Gunnë́ꞌ Daniel, bönniꞌ bëꞌë didzaꞌ uláz queëꞌ Dios, gunnë́ꞌ: “Tsaza le rudíꞌinëꞌ Dios lataj láꞌayi queëꞌ Dios, lë naꞌ rusuniti.” Cateꞌ iléꞌeliꞌ gaca caní, níꞌirö nuliꞌ zóaliꞌ luyú Judea ral-laꞌ tsöjzxúnnajliꞌ sacaꞌ guíꞌadoꞌ.
17 Nu dxía ícjoꞌolö bitiꞌ gal-laꞌ huötaj tsöjzxíꞌ bi dë que lu yuꞌu,
pero ral-laꞌ izxúnnajtë.
18 Nu zoa laꞌ guixiꞌ,
bitiꞌ gal-laꞌ huö́aj tsöjzxíꞌ lariꞌ que.
19 Bicaꞌ bayechiꞌ yuguꞌ nigula siꞌ uluꞌzóanu bíꞌidoꞌ quégacanu,
encaꞌ nigula niꞌ tuꞌgádxiꞌnu-biꞌ bíꞌidoꞌ quégacanu cateꞌ idxín dza niꞌ.
20 Buliꞌlidzëꞌ Dios inábiliꞌ-nëꞌ cabí idxín dza niꞌ izxúnnajliꞌ cateꞌ raca beoꞌ ziaga o cateꞌ naca dza láꞌayi,
21 tuꞌ ilaꞌguíꞌi ilaꞌzácaꞌtërö bönachi dza niꞌ ca gulaꞌguíꞌi gulaꞌzacaꞌ bönachi dza niꞌte cateꞌ siꞌ gutaꞌ gurö́ꞌö yödzölió,
ga ridxintë naꞌa dza,
en calëga dza záꞌgaca bitiꞌ ilaꞌguíꞌi ilaꞌzacaꞌ caní.
22 Cateꞌ idxín dza niꞌ,
channö Dios bitiꞌ cuéqui lahuëꞌ quégaquiëꞌ,
cuntu nu ulá,
pero cuéqui lahuëꞌ quégaquiëꞌ dza niꞌ,
en gácalenëꞌ nupa gurö́ cazëꞌ Lëꞌ.
23 ’Níꞌirö bitiꞌ tséajlëꞌëliꞌ channö nu idxín queë́liꞌ,
en guíë libíꞌiliꞌ:
“Buliꞌyútsöcaꞌ,
ni zoëꞌ Cristo”,
o inná:
“Niꞌ zoëꞌ.”
24 Uluꞌluíꞌi lógaquiëꞌ zián bönniꞌ taꞌzíꞌ yëꞌë,
en ilaꞌnnë́ꞌ nácagaquiëꞌ Cristo,
o ilaꞌnnë́ꞌ tuꞌë didzaꞌ uláz queëꞌ Dios.
Ilunëꞌ le ilaca bëꞌ,
en le ilún ga uluꞌbani bönachi,
ateꞌ ilaꞌzíꞌ yéꞌenëꞌ nupa gurö́ cazëꞌ Dios channö hualaꞌzéquiꞌnëꞌ.
25 Buliꞌyútsöcaꞌ,
chigudxi cazaꞌ libíꞌiliꞌ yúguꞌtë lë ni zíꞌatëlö ca siꞌ ilaca.
26 Que lë ni naꞌ,
bitiꞌ irúajliꞌ channö ilaꞌdxín queë́liꞌ nupa ilë́ libíꞌiliꞌ:
“Buliꞌyútsöcaꞌ,
niꞌ zoëꞌ Cristo lu lataj cáꞌasö.”
Lëscaꞌ caní,
bitiꞌ tséajlëꞌëliꞌ channö ilaꞌnná:
“Buliꞌyútsöcaꞌ,
lu yuꞌu zoëꞌ.”
27 Ca naꞌ raca cateꞌ rëpi yösa ga rilén gubidza,
en ruzeníꞌ ga ribía gubidza,
lëscaꞌ caní gaca cateꞌ huödaꞌ nedaꞌ,
Bönniꞌ Guljëꞌ Bönachi.
28 Ilácatë caní,
ca naꞌ taꞌnná bönachi:
“Gátiꞌtës ga dë tu le nati,
niꞌ uluꞌdubi cázabaꞌ bíchulab.”
Ca gaca cateꞌ huödëꞌ Bönniꞌ Guljëꞌ Bönachi
29 Gunnë́ꞌ caꞌ Jesús:
―Tödi yuguꞌ dza niꞌ cateꞌ ilaꞌguíꞌi ilaꞌzacaꞌ bönachi caní,
ichul-la gubidza,
ateꞌ beoꞌ bitiꞌ gunna beníꞌ que.
Ilaꞌguínnajbaꞌ bölaj lúzxiba,
ateꞌ ilaꞌzxízi le naláꞌgaca naca tsutsu lúzxiba.
30 Níꞌirö iláꞌ lahui lúzxiba le gaca bëꞌ huödaꞌ nedaꞌ,
Bönniꞌ Guljëꞌ Bönachi,
ateꞌ ilaꞌbödxi yechiꞌ yúguꞌtë bönachi yödzölió ni,
cateꞌ ilaꞌléꞌe nedaꞌ,
Bönniꞌ Guljëꞌ Bönachi,
suzáꞌa lu böaj lúzxiba,
dë lu naꞌa yöl-laꞌ unná bëꞌ,
en yöl-laꞌ huáca zxön.
31 Níꞌirö isö́l-laꞌgacaꞌ-nëꞌ gubáz láꞌayi quiaꞌ.
Uluꞌcödxëꞌ zidzaj lúzubaꞌ böaꞌ guixiꞌ,
ateꞌ uluꞌtubëꞌ nupa nabö́aꞌ quiaꞌ,
nacuáꞌ idapa laꞌatë yödzölió,
en yúguꞌtë lataj zxan lúzxiba.
32 ’Buliꞌzéajniꞌi ládxiꞌliꞌ le rusedi libíꞌiliꞌ le raca que yaga higo.
Cateꞌ taꞌlén niꞌa nëꞌe yúludoꞌ,
en chirubía xilaguiꞌ yúludoꞌ,
inö́ziliꞌ chizóa idxín cusubá.
33 Lëscaꞌ caní,
cateꞌ iléꞌeliꞌ taca yúguꞌtë lë ni,
inö́ziliꞌ chizóa idxín dza údxi naꞌ,
en chiridzaga lahui.
34 Le nácatë reaꞌ libíꞌiliꞌ,
yúguꞌtë lë ni ilaca zíꞌatëlö ca ilátigaca bönachi nacuáꞌ dza niꞌ.
35 Huadödi quégaca lúzxiba,
en luyú ni,
pero yuguꞌ xtídzaꞌa bitiꞌ ilaꞌdödi cáꞌasö.
36 ’Cateꞌ idxín dza niꞌ cuntu nu nözi.
Bitiꞌ nö́zguequinëꞌ gubáz láꞌayi queëꞌ Dios nacuꞌë yehuaꞌ yubá,
en bitiꞌ nözdaꞌ nedaꞌ,
Zxíꞌinëꞌ Dios,
pero tuzëꞌ Dios Xuz nö́zinëꞌ.
37 ’Ca naꞌ guca dza cateꞌ niꞌ zoëꞌ Noé,
lëscaꞌ caní gaca cateꞌ huödaꞌ nedaꞌ,
Bönniꞌ Guljëꞌ Bönachi.
38 Yuguꞌ dza niꞌ zíꞌatëlö ca siꞌ idxín nisa guiö́j le busuniti yödzölió,
gulëꞌaj gulahuëꞌ,
buluꞌtsaga náꞌagaquiëꞌ,
en buluꞌdödëꞌ zxíꞌinigaquiëꞌ lu yöl-laꞌ rutsaga naꞌ ga bidxintë dza guyáziëꞌ Noé lëꞌe barco zxön niꞌ benëꞌ,
39 en bitiꞌ guléquibeꞌenëꞌ cateꞌ bidxintë nisa guiö́j le busuniti yödzölió,
ateꞌ gulaꞌnítiëꞌ yúguꞌtëꞌ.
Lëscaꞌ caní gaca cateꞌ siꞌ huödaꞌ nedaꞌ,
Bönniꞌ Guljëꞌ Bönachi,
cuntu nu guéquibeꞌe.
40 Dza huödaꞌ ilaꞌcuꞌë chopëꞌ bönniꞌ laꞌ guixiꞌ.
Tuëꞌ uchëꞌa-nëꞌ quiaꞌ,
ateꞌ iaꞌtúëꞌ ucáꞌanaꞌ-nëꞌ.
41 Ilaꞌcuáꞌanu chópanu nigula nacuáꞌanu huëtu.
Tunu uchëꞌa-nu quiaꞌ,
ateꞌ iaꞌtunu ucáꞌanaꞌ-nu.
42 ’Buliꞌsubán ládxiꞌliꞌ tuꞌ cabí nö́ziliꞌ bizxi dza huödaꞌ nedaꞌ,
Xanliꞌ.
43 Naꞌa,
guliꞌtséajniꞌi lë ni.
Laꞌtuꞌ nö́zinëꞌ xan yuꞌu bizxi dza guídëꞌ gubán,
huanë́ꞌë yëla,
en bitiꞌ guꞌë lataj nu quidaj zöꞌö para cuan le dzöꞌö lidxëꞌ.
44 Que lë ni naꞌ,
buliꞌsubán ládxiꞌliꞌ caꞌ libíꞌiliꞌ,
tuꞌ huödaꞌ nedaꞌ,
Bönniꞌ Guljëꞌ Bönachi,
tu dza bitiꞌ nuzóa icjaliꞌ.
Bönniꞌ huen dxin tsahuiꞌ, en bönniꞌ huen dxin bitiꞌ náquiëꞌ tsahuiꞌ
45 Gunnë́ꞌ caꞌ Jesús:
―¿Nuzxi caz bönniꞌ huen dxin náquiëꞌ tsahuiꞌ,
en réajniꞌinëꞌ,
bönniꞌ huen dxin naꞌ,
xanëꞌ cuꞌë lu nëꞌë bönachi nacuáꞌ lidxëꞌ para guꞌë le ilágugaca cateꞌ idxín dza?
46 Bicaꞌ ba bönniꞌ huen dxin naꞌ náquiëꞌ tsahuiꞌ,
bönniꞌ naꞌ,
cateꞌ udxinëꞌ xanëꞌ,
uduxáquiëꞌ lëꞌ caní runëꞌ le nudödëꞌ xanëꞌ lu nëꞌë.
47 Le nácatë reaꞌ libíꞌiliꞌ,
yúguꞌtë le dë queëꞌ xanëꞌ,
udödëꞌ lu nëꞌë bönniꞌ huen dxin naꞌ runëꞌ caní.
48 Channö huöáquiëꞌ bönniꞌ huen dxin queëꞌ huiáꞌ döꞌ,
en saꞌ ládxëꞌë,
innë́ꞌ:
“Huadzenëꞌ xanaꞌ,
en bitiꞌ huö́datiëꞌ”,
49 en channö isí lahuëꞌ gundëꞌ ziꞌ bönniꞌ túnlenëꞌ lëꞌ tsözxö́n dxin,
en isí lahuëꞌ caꞌ guíꞌaj gágulenëꞌ nupa taꞌzudxi,
50 níꞌirö huödëꞌ xanëꞌ bönniꞌ huen dxin naꞌ tu dza cateꞌ bitiꞌ zoëꞌ ribözëꞌ,
o tu yëla bitiꞌ réquinëꞌ.
51 Níꞌirö xanëꞌ naꞌ usacaꞌ zíꞌdëꞌë bönniꞌ huen dxin naꞌ,
en gunëꞌ ga gaca queëꞌ ca naꞌ ral-laꞌ gaca quégaca nupa tuꞌluíꞌisö tsahuiꞌ cuínguequi.
Níꞌirö cödxi yechë́ꞌë,
en gagu zxea láyëꞌë.