Le tun ga bitiꞌ nácaruꞌ tsahuiꞌ lahuëꞌ Dios
15
Níꞌirö yuguꞌ bönniꞌ yudoꞌ fariseo,
en bönniꞌ yudoꞌ tuꞌsédinëꞌ,
narúajgaquiëꞌ Jerusalén,
bilaꞌdxinëꞌ ga zoëꞌ Jesús,
ateꞌ tëꞌ Lëꞌ:
2 ―¿Bizx que tunëꞌ bönniꞌ usëda quiuꞌ le ridödi bëꞌ ca naca le nulaga loruꞌ runruꞌ ca gulunëꞌ xuz xtóꞌoruꞌ?
Bitiꞌ taꞌguíbi nëꞌë ca naca que yudoꞌ cateꞌ siꞌ ilahuëꞌ.
3 Bubiꞌë didzaꞌ Jesús,
en gunábinëꞌ légaquiëꞌ,
rnnëꞌ:
―¿Bizx que libíꞌiliꞌ caꞌ rucáꞌanaliꞌ cáꞌasö xibá queëꞌ Dios para gunliꞌ le nulaga loliꞌ runliꞌ?
4 Caní raca,
tuꞌ gunná béꞌenëꞌ Dios libíꞌiliꞌ,
gunnë́ꞌ:
“Ben bal xuz xinoꞌo”,
en gunnë́ꞌ caꞌ:
“Nu innë́ ziꞌ que xuz xinëꞌe,
tsaz gati nu naꞌ.”
5 Pero libíꞌiliꞌ rnnaliꞌ:
“Channö nu guíë xuz xinëꞌe:
Bitiꞌ bi gaca gunnaꞌ quiuꞌ tuꞌ chiguzxíꞌ lu naꞌa gunnaꞌ yúguꞌtë queëꞌ Dios,
6 bítiꞌrö bi run bayudxi gun nu naꞌ que xuz xinëꞌe.”
Caní runliꞌ,
rucáꞌanaliꞌ cáꞌasö le gunná bëꞌë Dios,
para gunliꞌ le nulaga loliꞌ runliꞌ.
7 Libíꞌiliꞌ,
bönniꞌ ruluíꞌisö tsahuiꞌ cuinliꞌ,
idú ca nácaliꞌ gudíxjöꞌë Isaías,
bönniꞌ bëꞌë didzaꞌ uláz queëꞌ Dios,
gunnë́ꞌ:
8 Bönniꞌ ni,
len rúꞌagacsëꞌ tunëꞌ nedaꞌ bal,
en calëga idú ládxiꞌgaquiëꞌ.
9 Nítisö naca le taꞌyéaj ládxiꞌgaquiëꞌ nedaꞌ,
tuꞌ tuꞌsédinëꞌ yuguꞌ le gulaꞌnná bëꞌ bönachi.
10 Níꞌirö bulidzëꞌ Jesús bönachi nacuáꞌ niꞌ,
en rëꞌ léguequi:
―Buliꞌzë́ nágaliꞌ le guíaꞌ libíꞌiliꞌ,
en guliꞌtséajniꞌi.
11 Calëga le riyaza ruꞌë nu bönniꞌ run ga bitiꞌ náquiëꞌ tsahuiꞌ lahuëꞌ Dios,
pero le rirúaj ruꞌë,
lë ni run ga bitiꞌ náquiëꞌ tsahuiꞌ lahuëꞌ Dios.
12 Níꞌirö yuguꞌ bönniꞌ usëda queëꞌ Jesús gulaꞌbíguiꞌë ga zoëꞌ,
en tëꞌ Lëꞌ:
―¿Naruꞌ nö́ztsenuꞌ gulaꞌlenëꞌ yuguꞌ bönniꞌ yudoꞌ fariseo cateꞌ bilaꞌyönnëꞌ didzaꞌ ni bëꞌu?
13 Níꞌirö bubiꞌë didzaꞌ Jesús,
en rëꞌ légaquiëꞌ:
―Yúguꞌtë le nadúz,
le cabí guzëꞌ Xuzaꞌ zoëꞌ yehuaꞌ yubá,
huadúljagaca idú luí.
14 Buliꞌcáꞌana légaquiëꞌ.
Chinachúl-la lógaquiëꞌ,
en taꞌchë́ꞌë nupa nachul-la lógaca.
Channö tu bönniꞌ lo chul-la ichë́ꞌë iaꞌtúëꞌ bönniꞌ lo chul-la,
iropëꞌ ilaꞌbixëꞌ tu lu yeru.
15 Níꞌirö bubiꞌë didzaꞌ Pedro,
en rëꞌ Jesús:
―Buzéajniꞌi netuꞌ lë ni rucúdzuꞌu didzaꞌ.
16 Jesús rëꞌ légaquiëꞌ:
―¿Naruꞌ cabí réajniꞌitseliꞌ caꞌ libíꞌiliꞌ?
17 ¿Naruꞌ cabí réajniꞌitseliꞌ riyaza lë́ꞌëruꞌ yúguꞌtë le riyaza ruáꞌaruꞌ,
ateꞌ rurúaj lë́ꞌëruꞌ?
18 Naꞌa,
le rirúaj rúaꞌaliꞌ,
lu icja ládxiꞌdoꞌoliꞌ zaꞌ,
ateꞌ lë ni run ga bitiꞌ nácaliꞌ tsahuiꞌ lahuëꞌ Dios.
19 Caní raca,
tuꞌ taꞌlén lu icja ládxiꞌdoꞌoliꞌ yuguꞌ le rizáꞌ ládxiꞌliꞌ le ruáꞌ döꞌ,
le ilún ga gútiliꞌ bönachi,
en le ilún ga quítsjaliꞌ xibá que yöl-laꞌ nutsaga naꞌ,
en le ruáꞌ döꞌ runliꞌ,
en yuguꞌ le rizë́ ládxiꞌliꞌ cuanliꞌ,
en yuguꞌ le rinnëliꞌ que luzáꞌaliꞌ le cabí nácate,
en yuguꞌ le rinnë́ xíhuiꞌliꞌ.
20 Yuguꞌ le caní tun ga bitiꞌ náquiëꞌ tu bönniꞌ tsahuiꞌ lahuëꞌ Dios,
pero channö cabí nayari nëꞌë ca naca que yudoꞌ cateꞌ bi gahuëꞌ,
bitiꞌ gun ga bitiꞌ náquiëꞌ tsahuiꞌ lahuëꞌ Dios.
Tu nigula izáꞌa réajlëꞌënu Jesús
21 Níꞌirö buzë́ꞌë Jesús niꞌ,
en guyéajëꞌ lu xiyú yödzö Tiro,
en yödzö Sidón.
22 Tu nigula nabábanu luyú Canaán birúajnu yödzö niꞌ,
ateꞌ bë́ꞌënu zidzaj didzaꞌ,
rënu Jesús:
―Xan,
zxíꞌini xiꞌsóëꞌ David,
buéchiꞌ ladxiꞌ nedaꞌ.
Biꞌi nigúladoꞌ quiaꞌ riguíꞌi rizácaꞌdaꞌabiꞌ tuꞌ yuꞌu böꞌ xihuiꞌ lëbiꞌ.
23 Bitiꞌ bi didzaꞌ bubiꞌë Jesús.
Níꞌirö gulaꞌbíguiꞌë bönniꞌ usëda queëꞌ ga zoëꞌ,
ateꞌ gulë́ꞌ Lëꞌ,
taꞌnnë́ꞌ:
―Busö́l-laꞌ-nu,
tuꞌ záꞌanu cúdzuꞌruꞌ ribö́dxiꞌanu.
24 Níꞌirö bubiꞌë didzaꞌ Jesús,
ateꞌ rëꞌë-nu:
―Dios nasö́l-lëꞌë nedaꞌ gácalenaꞌ bönachi Israel,
nupa nácagaca ca böꞌcuꞌ zxílaꞌdoꞌ nanítigacabaꞌ.
25 Níꞌirö gubígaꞌnu nigula naꞌ ga zoëꞌ Jesús,
en guyéaj ládxiꞌnu Lëꞌ,
ateꞌ rënu Lëꞌ:
―Xan,
gúcalen nedaꞌ.
26 Bubiꞌë didzaꞌ Jesús,
rnnëꞌ:
―Bitiꞌ naca dxiꞌa ugúaruꞌ yöta quégacabiꞌ bíꞌidoꞌ,
en chúꞌunaruꞌ le lógacabaꞌ bö́ꞌcuꞌdoꞌ.
27 Níꞌirö nigula naꞌ rënu Jesús,
rnnanu:
―Ön,
Xan,
pero tágubaꞌ bö́ꞌcuꞌdoꞌ naꞌ le bizxaj tuꞌhuö́xaj ga tagu xángacabaꞌ.
28 Níꞌirö bubiꞌë didzaꞌ Jesús,
rnnëꞌ:
―Nigúladoꞌ.
Idú naca ca réajlëꞌu nedaꞌ.
Gaca quiuꞌ ca rë́ꞌënnuꞌ.
Laꞌ níꞌisö böácatëbiꞌ biꞌi nigúladoꞌ queë́nu.
Jesús ruúnëꞌ zián nupa teꞌe
29 Níꞌirö buzë́ꞌë Jesús niꞌ,
en gudödëꞌ ga naca raꞌ nísadoꞌ que Galilea.
Gurenëꞌ tu lu guíꞌadoꞌ,
ateꞌ guröꞌë niꞌ.
30 Bönachi zián dujuáꞌgaquiëꞌ nupa bitiꞌ guca ilaꞌzáꞌ,
en nupa nachul-la guiö́j lógaca,
en nupa bitiꞌ guca ilaꞌnnë́,
en nupa narugu niꞌa në́ꞌeguequi,
en iaꞌzícaꞌrö zián nupa teꞌe,
ateꞌ gulaꞌguíxaj léguequi xiniꞌë Jesús,
ateꞌ Lëꞌ bunëꞌ léguequi.
31 Buluꞌbani bönachi niꞌ ca naca le benëꞌ Jesús,
tuꞌ bilaꞌléꞌe tuꞌnnë́ nupa bitiꞌ guca ilaꞌnnë́,
ateꞌ nuhuöácagaca nupa gurugu niꞌa në́ꞌeguequi,
ateꞌ tuꞌzáꞌ nupa bitiꞌ guca ilaꞌzáꞌ,
ateꞌ tuꞌléꞌe nupa guchul-la lógaca.
Que lë ni naꞌ gulaꞌguꞌë yöl-laꞌ ba Dios quégaca bönachi Israel.
Jesús rugahuëꞌ ziánrö ca choáꞌ gayuáꞌ bönachi
32 Níꞌirö Jesús bulidzëꞌ yuguꞌ bönniꞌ usëda queëꞌ,
en rëꞌ légaquiëꞌ:
―Ruhuechiꞌ ládxaꞌa bönachi zián ni,
tuꞌ chiguca tsonna dza záꞌlenguequi nedaꞌ,
en bitiꞌ bi dë le ilagu.
Bitiꞌ rë́ꞌëndaꞌ usö́l-laꞌgacaꞌ-nëꞌ tsöjhuö́ajgaquiëꞌ lídxigaquiëꞌ taꞌdunsëꞌ caꞌ,
nadxi caꞌ udú ládxiꞌgaquiëꞌ laꞌ nöza.
33 Níꞌirö yuguꞌ bönniꞌ usëda queëꞌ tëꞌ Lëꞌ,
taꞌnnë́ꞌ:
―¿Gazxi caz idzö́lituꞌ yöta xtila zián lu lataj cáꞌasö ni,
le ugágutuꞌ bönachi zián ni?
34 Gunábinëꞌ Jesús légaquiëꞌ,
rnnëꞌ:
―¿Bal-laxi yöta xtila dë queë́liꞌ?
Buluꞌbiꞌë didzaꞌ,
taꞌnnë́ꞌ:
―Gadxi,
ateꞌ nabábasöbaꞌ böla cuidiꞌ dëbaꞌ queë́tuꞌ ni.
35 Níꞌirö Jesús gunná béꞌenëꞌ bönachi zián naꞌ ilaꞌbö́ꞌ lu yu.
36 Gudélëꞌë gadxi yöta xtila naꞌ,
en yuguꞌ böla naꞌ,
ateꞌ gudxëꞌ Dios:
“Xclenuꞌ.”
Níꞌirö buzxuzxjëꞌ iroptë naꞌ,
en bunödzjëꞌ quégaquiëꞌ bönniꞌ usëda queëꞌ,
ateꞌ légaquiëꞌ gulaꞌguísiëꞌ le lógaca bönachi zián naꞌ.
37 Gulahuëꞌ yúguꞌtëꞌ,
en buluꞌhuö́ljanëꞌ.
Gudödi niꞌ buluꞌtubëꞌ le bizxaj nagáꞌanagaca,
ateꞌ buluꞌlíëꞌ gadxi gaꞌböra.
38 Yuguꞌ bönniꞌ naꞌ gulahuëꞌ nácagaquiëꞌ choáꞌ gáyuꞌë,
pero cuntu nu bulaba yuguꞌ nigula,
en bíꞌidoꞌ.
39 Níꞌirö busöl-lëꞌë Jesús bönachi naꞌ tsöjhuö́ajgaquiëꞌ lídxigaquiëꞌ,
ateꞌ gurenëꞌ lëꞌe bárcodoꞌ niꞌ,
en saꞌyéajëꞌ lu xiyú yödzö Magdala.