Rucúdzuꞌë didzaꞌ Jesús ca tunëꞌ bönniꞌ huen dxin
20
Gunnë́ꞌ caꞌ Jesús:
―Ca gun Bönniꞌ naꞌ rinná bëꞌë yehuaꞌ yubá naca ca benëꞌ tu bönniꞌ xan yuꞌu.
Birúajëꞌ zíladoꞌ,
yöjdiljëꞌ yuguꞌ bönniꞌ ilunëꞌ dxin ga naca lu xiyúëꞌ ga naꞌ nadúzgaca lubá uva.
2 Cateꞌ chibugáꞌanalenëꞌ tsahuiꞌ yuguꞌ bönniꞌ huen dxin naꞌ,
quizxjëꞌ légaquiëꞌ tu dumí lazxaj que tu dza,
gusö́l-lëꞌë légaquiëꞌ ilunëꞌ dxin ga naca lu xiyúëꞌ.
3 Cateꞌ burúajëꞌ idú xsila,
biléꞌenëꞌ iaꞌzícaꞌrëꞌ bönniꞌ nacuáꞌasëꞌ caꞌ ga naca lu yë́ꞌëyi.
4 Rëꞌ légaquiëꞌ:
“Guliꞌtséaj caꞌ libíꞌiliꞌ ga naca lu xiyúaꞌ,
ateꞌ quizxjaꞌ libíꞌiliꞌ le naca tsahuiꞌ.”
Laꞌ yöjácatëꞌ caꞌ légaquiëꞌ.
5 Burúajëꞌ bönniꞌ xan yuꞌu naꞌ leyúbölö idú huagubidza,
encaꞌ idú xihuö́ udzö́ꞌ,
en laꞌ tuz ca benëꞌ,
gusö́l-lëꞌë yuguꞌ bönniꞌ yöjxáquiëꞌ lu xiyúëꞌ.
6 Burúajëꞌ caꞌ cateꞌ niꞌ zoa iaꞌlátiꞌdoꞌos gubidza,
en yöjxáquiëꞌ iaꞌzícaꞌrëꞌ bönniꞌ nacuáꞌasëꞌ caꞌ niꞌ,
ateꞌ rëꞌ légaquiëꞌ:
“¿Bizx que zóatsaliꞌ ni cáꞌasö idú dza,
bitiꞌ bi dxin runliꞌ?”
7 Yuguꞌ bönniꞌ naꞌ tëꞌ lëꞌ,
taꞌnnë́ꞌ:
“Cuntu nu benna xichintuꞌ.”
Níꞌirö rëꞌ légaquiëꞌ:
“Guliꞌtséaj caꞌ libíꞌiliꞌ ga naca lu xiyúaꞌ,
ateꞌ quizxjaꞌ libíꞌiliꞌ le naca tsahuiꞌ.”
8 Cateꞌ chizóa gal-la,
bönniꞌ xan yu naꞌ rëꞌ bönniꞌ yuꞌu lu nëꞌë yuguꞌ huen dxin naꞌ,
rnnëꞌ:
“Bulidza yuguꞌ bönniꞌ huen dxin naꞌ,
ateꞌ guꞌu lázxjagaquiëꞌ.
Quizxjuꞌ zíꞌalö yuguꞌ bönniꞌ naꞌ bilaꞌdxinëꞌ yöjsetë.
Udxi naꞌ quizxjuꞌ yuguꞌ bönniꞌ naꞌ bilaꞌdxinëꞌ zíꞌatëlö.”
9 Níꞌirö bilaꞌdxinëꞌ bönniꞌ yöjéngaquiëꞌ dxin cateꞌ niꞌ zoa iaꞌlátiꞌdoꞌos gubidza,
en gulaꞌziꞌë tu tuhuéajëꞌ dumí lazxaj que tu dza.
10 Cateꞌ bilaꞌdxinëꞌ bönniꞌ yöjéngaquiëꞌ dxin zíꞌatëlö,
guléquinëꞌ huazíꞌgaquiëꞌ iaꞌlatiꞌ,
pero lëscaꞌ gulaꞌziꞌë tu tuhuéajëꞌ dumí lazxaj que tu dza.
11 Cateꞌ gulaꞌziꞌë le,
gulaꞌnnë́dëꞌë queëꞌ bönniꞌ xan yuꞌu naꞌ,
12 taꞌnnë́ꞌ:
“Yuguꞌ bönniꞌ ni bilaꞌdxinëꞌ ga yöjsetë,
tu chíꞌisö gulunëꞌ dxin,
en tuz ca gudízxjatsoꞌ légaquiëꞌ ca netuꞌ,
ateꞌ netuꞌ ni bentuꞌ dxin idú dza,
en gúguidaꞌatuꞌ gubidza.”
13 Bubiꞌë didzaꞌ xan yu naꞌ,
en rëꞌ tuëꞌ:
“Bö́chaꞌa,
bitiꞌ bi runaꞌ quiuꞌ le cabí naca tsahuiꞌ.
¿Naruꞌ cabí bugáꞌana tsáhuiꞌruꞌ siꞌu tu dumí lazxaj que tu dza?
14 Guzxíꞌ lazxjuꞌ,
en böaj lidxuꞌ.
Nedaꞌ rë́ꞌëndaꞌ quizxjaꞌ bönniꞌ ni yöjenëꞌ dxin ga yöjsetë laꞌ leze ca naꞌ riguizxjaꞌ liꞌ.
15 ¿Naruꞌ cabí dë lu naꞌa gunaꞌ ca rë́ꞌëndaꞌ len le nequi quiaꞌ?
¿Naruꞌ ruzxéꞌetsenuꞌ-nëꞌ luzóꞌo tuꞌ rúnnadaꞌa queëꞌ?”
16 Caní naca,
bal-lëꞌ bönniꞌ,
tuꞌcáꞌana bönachi légaquiëꞌ cáꞌasö,
ilácagaquiëꞌ lo,
ateꞌ iaꞌzícaꞌrëꞌ bönniꞌ,
nácagaquiëꞌ lo naꞌa,
uluꞌgáꞌanëꞌ cáꞌasö.
Zián nupa nulidzaꞌ,
pero nabábasö nupa narö́gaca.
Riguíxjöꞌë Jesús leyúbölö ca siꞌ ilútiëꞌ Lëꞌ
17 Cateꞌ niꞌ yuꞌë Jesús nöza,
saꞌyéajëꞌ Jerusalén,
guchë́ꞌë quez idxínnutëꞌ bönniꞌ usëda queëꞌ,
en rëꞌ légaquiëꞌ:
18 ―Buliꞌyútsöcaꞌ,
ribenruꞌ zéajruꞌ Jerusalén,
ateꞌ niꞌ soa nu udödi nedaꞌ,
Bönniꞌ Guljëꞌ Bönachi,
lu náꞌagaquiëꞌ bixúz unná bëꞌ,
en lu náꞌagaquiëꞌ bönniꞌ yudoꞌ usëdi,
ateꞌ ilaꞌchúguiëꞌ quiaꞌ gátiaꞌ.
19 Uluꞌdödëꞌ nedaꞌ lu náꞌagaquiëꞌ bönniꞌ ziꞌtuꞌ para uluꞌtitjëꞌ nedaꞌ.
Ilaꞌguinëꞌ nedaꞌ,
en uluꞌdë́ꞌë nedaꞌ lëꞌe yaga cruz,
pero cateꞌ gaca tsonna dza,
Dios usubanëꞌ nedaꞌ lu yöl-laꞌ guti.
Le gunábanu xináꞌagaquiëꞌ Jacobo, en Juan
20 Níꞌirö bidxinnu xináꞌagaquiëꞌ Jacobo,
en Juan,
yuguꞌ zxíꞌinëꞌ Zebedeo,
ga zoëꞌ Jesús,
dzágagaquiëꞌ-nu chopëꞌ ni,
ateꞌ buzóa zxíbinu lahuëꞌ Jesús,
en gunábinu Lëꞌ tu le uzáꞌ ládxëꞌë queë́nu.
21 Jesús gunábinëꞌ-nu,
rnnëꞌ:
―¿Bizxi rë́ꞌënuꞌ?
Rënu Lëꞌ:
―Gunná bëꞌ cö́ꞌöbiꞌ tubiꞌ zxíꞌinaꞌ ni cuita lëꞌu ibëla,
en iaꞌtubiꞌ cö́ꞌöbiꞌ cuita lëꞌu yö́göla ga niꞌ inná bëꞌu.
22 Bubiꞌë didzaꞌ Jesús,
rëꞌ légaquiëꞌ:
―Bitiꞌ nö́ziliꞌ le rinábaliꞌ.
¿Naruꞌ huáca guáꞌ ilenliꞌ le quiꞌi sacaꞌ nedaꞌ,
en idílaliꞌ nisa ca idilaꞌ nedaꞌ nisa,
gátiaꞌ?
Tëꞌ Lëꞌ:
―Huácatuꞌ.
23 Níꞌirö Jesús rëꞌ légaquiëꞌ:
―Le nácatë le ral-laꞌ quiꞌi sacaꞌa nedaꞌ,
gaca caꞌ queë́liꞌ,
en le ral-laꞌ idilaꞌ nedaꞌ nisa,
gátiaꞌ,
idílaliꞌ caꞌ nisa libíꞌiliꞌ,
pero que cö́ꞌöliꞌ cuita lëꞌa ibëla o cuita lëꞌa yö́göla,
bitiꞌ dë lu naꞌa nu guꞌa que,
pero gataꞌ quégaca nupa niꞌ chinupë́ꞌë Xuzaꞌ quéguequi.
24 Cateꞌ iaꞌchíëꞌ bönniꞌ usëda queëꞌ Jesús bilaꞌyönnëꞌ lë ni,
gulaꞌlenëꞌ.
25 Níꞌirö Jesús bulidzëꞌ légaquiëꞌ,
rnnëꞌ:
―Nözquéziliꞌ ca tunëꞌ yuguꞌ bönniꞌ taꞌnná béꞌenëꞌ bönachi izáꞌa,
ridö́ditë bëꞌ taꞌnná béꞌenëꞌ légaquiëꞌ,
ateꞌ nupa niꞌ nácagacarö lo taꞌnná beꞌe laꞌ luzë́ꞌeguequisö.
26 Bitiꞌ gaca caní queë́liꞌ.
Nútiꞌtëslöliꞌ libíꞌiliꞌ nu rë́ꞌëni gaca zxön ga zóaliꞌ,
nu ni ral-laꞌ gun dxin que iaꞌzícaꞌröliꞌ.
27 Lëscaꞌ caní,
nútiꞌtëslöliꞌ libíꞌiliꞌ nu guë́ꞌëni gaca lo,
ral-laꞌ gaca ca tu bönniꞌ nadóꞌo que iaꞌzícaꞌröliꞌ.
28 Lëscaꞌ nedaꞌ,
Bönniꞌ Guljëꞌ Bönachi,
bidaꞌ ni,
calëga para nu gun xichinaꞌ,
pero para gunaꞌ xichíngaca bönachi,
en udödaꞌ yöl-laꞌ naꞌbán quiaꞌ,
le quízxjadaꞌ niꞌa quégaca bönachi zián para uluꞌlágaca.
Ruúnëꞌ Jesús chopëꞌ bönniꞌ nachul-la lógaquiëꞌ
29 Cateꞌ niꞌ tuꞌrúajëꞌ yödzö Jericó,
bönachi zián söjácalen Jesús.
30 Nacuꞌë chopëꞌ bönniꞌ nachul-la lógaquiëꞌ niꞌ,
rö́ꞌgaquiëꞌ raꞌ nöza.
Cateꞌ bilaꞌyönnëꞌ ridödëꞌ Jesús niꞌ,
guluꞌë zidzaj didzaꞌ,
taꞌnnë́ꞌ:
―Xan,
zxíꞌini xiꞌsóëꞌ David,
buéchiꞌ ladxiꞌ netuꞌ.
31 Bönachi zián nacuáꞌ niꞌ gulë́ légaquiëꞌ ilaꞌcuꞌë dxisö,
pero zídzajrö guluꞌë didzaꞌ,
taꞌnnë́ꞌ:
―Xan,
zxíꞌini xiꞌsóëꞌ David,
buéchiꞌ ladxiꞌ netuꞌ.
32 Níꞌirö guzë́ꞌ ribözëꞌ Jesús,
en bulidzëꞌ légaquiëꞌ,
ateꞌ gunábinëꞌ légaquiëꞌ,
rnnëꞌ:
―¿Bizxi rë́ꞌëniliꞌ gunaꞌ queë́liꞌ?
33 Tëꞌ Jesús:
―Xan,
rë́ꞌënituꞌ gunuꞌ ga huöálaj guiö́j lotuꞌ.
34 Níꞌirö Jesús buéchiꞌ ládxëꞌë légaquiëꞌ,
ateꞌ gudanëꞌ guiö́j lógaquiëꞌ.
Laꞌ böáljatëgaca guiö́j lógaquiëꞌ,
ateꞌ yöjácalenëꞌ Jesús.