Ridxinëꞌ Jesús yödzö Jerusalén len yöl-laꞌ ba zxön
21
Cateꞌ bilaꞌdxíngalëꞌ yödzö Jerusalén,
en niꞌ nacuꞌë ga dë yödzö Betfagé ga naꞌ zoa Guíꞌa Yaga Olivo,
níꞌirö gusö́l-lëꞌë Jesús chopëꞌ bönniꞌ usëda queëꞌ,
2 ateꞌ rëꞌ légaquiëꞌ:
―Guliꞌtséajtsöcaꞌ yö́dzödoꞌ niꞌ ca dö́dilö ga ni zóaruꞌ,
ateꞌ laꞌ tsöjxácaꞌtëliꞌ-baꞌ tubaꞌ burro gunáꞌ nágaꞌbaꞌ,
ateꞌ dzaga lëbaꞌ tubaꞌ burro biguiúꞌdoꞌ.
Guliꞌtsöjsedxi-baꞌ,
en ichë́ꞌëliꞌ-baꞌ quiaꞌ ni.
3 Channö nu bi guíë libíꞌiliꞌ,
guliꞌguíë nu naꞌ:
“Xanruꞌ riquinnëꞌ-baꞌ.”
Níꞌirö isö́l-lëꞌë légacabaꞌ quiaꞌ.
4 Caní guca para gaca lë naꞌ buzúajëꞌ lu guichi bönniꞌ bëꞌë didzaꞌ uláz queëꞌ Dios,
gunnë́ꞌ:
5 Guliꞌguíë nupa nacuáꞌ yödzö Sión,
Buliꞌyútsöcaꞌ,
zëꞌë Bönniꞌ inná béꞌenëꞌ libíꞌiliꞌ.
Lu yöl-laꞌ nöxaj ladxiꞌ queëꞌ dxíëꞌ-baꞌ tubaꞌ burro.
Dxíëꞌ cúdzuꞌbaꞌ búrrodoꞌ nácabaꞌ zxíꞌinibaꞌ böaꞌ ruáꞌabaꞌ yuaꞌ.
6 Níꞌirö bönniꞌ usëda queëꞌ yöjáquiëꞌ niꞌ,
ateꞌ gulunëꞌ ca naꞌ gunná béꞌenëꞌ Jesús légaquiëꞌ.
7 Gulaꞌchë́ꞌë-baꞌ burro gunáꞌ naꞌ,
en burro biguiúꞌdoꞌ naꞌ,
ateꞌ buluꞌdxíëꞌ cúdzuꞌgacabaꞌ yuguꞌ lariꞌ guitsaꞌ quégaquiëꞌ,
ateꞌ gudxíëꞌ Jesús lahuiꞌ lariꞌ naꞌ.
8 Nacuáꞌ caꞌ bönachi zián niꞌ,
ateꞌ gulaꞌchilaj yuguꞌ lariꞌ taꞌxóa cúdzuꞌguequi laꞌ nöza.
Iaꞌzícaꞌrëꞌ buluꞌchibëꞌ zin le buluꞌzxóëꞌ ga naca laꞌ nöza.
9 Guluíꞌi zidzaj didzaꞌ bönachi naꞌ nanö́rugaca,
en nupa naꞌ söjácalen Jesús,
taꞌnná:
―¡Yöl-laꞌ ba Lëꞌ,
zxíꞌini xiꞌsóëꞌ David!
¡Bicaꞌ ba nu ni zaꞌ niꞌa que Lëꞌ Xanruꞌ!
¡Yöl-laꞌ ba Dios!
10 Cateꞌ guyáziëꞌ Jesús yödzö Jerusalén,
buluꞌdzatsa yúguꞌtë bönachi lu yödzö naꞌ,
ateꞌ zián nupa gulë́ luzë́ꞌeguequi,
taꞌnná:
―¿Nuzxi caz bönniꞌ ni?
11 Iaꞌbal-la bönachi niꞌ taꞌnná:
―Nu ni Jesús,
bönniꞌ ruꞌë didzaꞌ uláz queëꞌ Dios,
ateꞌ naca ladzëꞌ Nazaret luyú Galilea.
Jesús rulatjëꞌ löꞌa yudoꞌ
12 Cateꞌ guyáziëꞌ Jesús löꞌa yudoꞌ queëꞌ Dios,
buláguiꞌë níꞌilö yúguꞌtë nupa tutiꞌ toꞌo ga naca löꞌa yudoꞌ naꞌ.
Burixëꞌ caꞌ yuguꞌ blaga quégaquiëꞌ bönniꞌ tuꞌtsë́ꞌë dumí yödzö ziꞌtuꞌ,
en yuguꞌ le taꞌböꞌi nupa tutiꞌ guꞌdödoꞌ.
13 Rëꞌ légaquiëꞌ:
―Nazúaj lu guichi láꞌayi le rnna:
“Lidxaꞌ siꞌi le,
yuꞌu ga nu ulidza Dios”,
pero libíꞌiliꞌ chinunliꞌ lataj ni ca naca yuꞌu lídxigaca gubán.
14 Cateꞌ niꞌ zoëꞌ Jesús chila yudoꞌ,
bal-lëꞌ bönniꞌ nachul-la lógaquiëꞌ,
en bönniꞌ bitiꞌ raca ilaꞌzë́ꞌë bilaꞌdxinëꞌ ga naꞌ zoëꞌ,
ateꞌ Lëꞌ bunëꞌ légaquiëꞌ.
15 Gulaꞌlenëꞌ yuguꞌ bixúz unná bëꞌ,
en bönniꞌ yudoꞌ tuꞌsédinëꞌ cateꞌ bilaꞌléꞌenëꞌ yuguꞌ yöl-laꞌ huáca ni runëꞌ Jesús,
en bilaꞌyönnëꞌ tuíꞌibiꞌ bíꞌidoꞌ zidzaj didzaꞌ ga naca chila yudoꞌ,
taꞌnnabiꞌ:
―¡Bicaꞌ ba Lëꞌ,
zxíꞌini xiꞌsóëꞌ David!
16 Níꞌirö tëꞌ Jesús:
―¿Naruꞌ cabí riyönnuꞌ ca taꞌnnabiꞌ biꞌi ni?
Bubiꞌë didzaꞌ Jesús,
rnnëꞌ:
―Ön,
riyöndaꞌ.
¿Naruꞌ catu caz nulábaniliꞌ le nazúaj lu guichi láꞌayi caní caz ral-laꞌ gaca?
Caní rnna:
“Liꞌ benuꞌ ga yuguꞌ biꞌi cuidiꞌ,
en yuguꞌ bíꞌidoꞌ niꞌ tádxiꞌbiꞌ gulúl-labiꞌ yöl-laꞌ ba le naca idú.”
17 Níꞌirö Jesús bucáꞌanëꞌ légaquiëꞌ,
ateꞌ burúajëꞌ Jerusalén.
Guyijëꞌ yödzö Betania ga niꞌ bugáꞌanëꞌ idú yëla.
Jesús rulidza ziꞌë yaga higo
18 Cateꞌ zaꞌ reníꞌ,
ateꞌ niꞌ söhuö́jëꞌ Jesús Jerusalén,
ridunëꞌ.
19 Biléꞌenëꞌ tu yaga higo röꞌ gal-laꞌ cuite nöza,
ateꞌ gubíguiꞌë ga naꞌ röꞌ,
pero bitiꞌ bi bidzö́linëꞌ lu yaga naꞌ.
Xiláguiꞌsö dxía.
Níꞌirö Jesús gudxëꞌ le:
―Bítiꞌrö cuía le ribía quiuꞌ.
Laꞌ gubídxitë yaga higo naꞌ.
20 Cateꞌ bilaꞌléꞌenëꞌ bönniꞌ usëda queëꞌ lë ni,
buluꞌbáninëꞌ,
ateꞌ gulaꞌnábinëꞌ Jesús,
taꞌnnë́ꞌ:
―¿Nacxi caz guca,
gubídxitë yaga ni?
21 Bubiꞌë didzaꞌ Jesús,
rëꞌ légaquiëꞌ:
―Le nácatë reaꞌ libíꞌiliꞌ,
channö tséajlëꞌëliꞌ Dios,
en bitiꞌ gaca chopa ládxiꞌliꞌ,
calë́gasö huáca gunliꞌ ca naꞌ benaꞌ que yaga ni,
pero channö guië́liꞌ guíꞌa ni:
Gucuíta,
en yöjsóa lu nísadoꞌ,
gaca ca naꞌ innaliꞌ.
22 Lëscaꞌ caní,
yúguꞌtë le inábaliꞌ cateꞌ ulídzaliꞌ-nëꞌ Dios,
channö huayéjlëꞌëliꞌ gunnëꞌ Dios queë́liꞌ,
huazíꞌiliꞌ lë naꞌ inábaliꞌ.
Yöl-laꞌ unná bëꞌ dë lu nëꞌë Jesús
23 Níꞌirö guyáziëꞌ Jesús chila yudoꞌ,
ateꞌ tsanni niꞌ rusédinëꞌ bönachi nacuáꞌ niꞌ,
bilaꞌdxinëꞌ yuguꞌ bixúz unná bëꞌ len bönniꞌ gula tuꞌzéajniꞌinëꞌ ga zoëꞌ,
ateꞌ gulaꞌnábinëꞌ Jesús,
taꞌnnë́ꞌ:
―¿Bizxi yöl-laꞌ unná bëꞌ dë lu noꞌo,
runtsoꞌ yuguꞌ lë ni?
¿Nuzxi budödi lu noꞌo yöl-laꞌ unná bëꞌ ni?
24 Bubiꞌë didzaꞌ Jesús,
rëꞌ légaquiëꞌ:
―Lëscaꞌ nedaꞌ inábatsöquiꞌdaꞌ libíꞌiliꞌ tu didzaꞌ.
Channö quíxjöiꞌiliꞌ nedaꞌ ca naca,
nedaꞌ caꞌ guíaꞌ libíꞌiliꞌ bizxi yöl-laꞌ unná bëꞌ dë lu naꞌa runaꞌ caní.
25 ¿Nuzxi caz gusöl-laꞌ Juan para buquilëꞌ bönachi nisa?
¿Naruꞌ Dios gusö́l-lëꞌë lëꞌ,
o gulaꞌsö́l-lëꞌë yuguꞌ bönniꞌ lëꞌ?
Níꞌirö gulaꞌsí lógaquiëꞌ bönniꞌ yudoꞌ naꞌ taꞌnnë́ꞌ laꞌ légacasëꞌ:
―Channö innaruꞌ:
Dios gusö́l-lëꞌë lëꞌ,
laꞌ guië́tëꞌ rëꞌu:
“¿Bizx que bitiꞌ guyéajlëꞌëliꞌ lëꞌ?”
26 Naꞌa,
channö innaruꞌ:
Gulaꞌsö́l-lëꞌë yuguꞌ bönniꞌ lëꞌ,
rádxiruꞌ le ilún bönachi lu yödzö tuꞌ taꞌyéajlëꞌë yúguꞌtëꞌ Juan naꞌ bëꞌë didzaꞌ uláz queëꞌ Dios.
27 Que lë ni naꞌ buluꞌbiꞌë didzaꞌ,
tëꞌ Jesús:
―Bitiꞌ nöztuꞌ.
Jesús rëꞌ légaquiëꞌ:
―Nedaꞌ caꞌ,
bitiꞌ guíaꞌ libíꞌiliꞌ bizxi yöl-laꞌ unná bëꞌ dë lu naꞌa runaꞌ lë ni.
Rucúdzuꞌë didzaꞌ Jesús ca gulunbiꞌ chópabiꞌ zxíꞌinëꞌ tu bönniꞌ
28 Níꞌirö Jesús gudxëꞌ yuguꞌ bönniꞌ yudoꞌ naꞌ:
―¿Nacxi rusácaꞌliꞌ queë́liꞌ?
Guzóëꞌ tu bönniꞌ nacuáꞌabiꞌ chópabiꞌ biꞌi bönniꞌ queëꞌ,
ateꞌ yöjödxëꞌ-biꞌ tubiꞌ biꞌi queëꞌ naꞌ,
gunnë́ꞌ:
“Zxíꞌinaꞌ,
guyéaj naꞌa tsöjenuꞌ dxin ga naca luyú quiaꞌ ga rö́ꞌgaca lubá uva.”
29 Bubíꞌibiꞌ didzaꞌ biꞌi naꞌ,
gúdxibiꞌ-nëꞌ:
“Bitiꞌ rë́ꞌëndaꞌ tsejaꞌ.”
Gudödi niꞌ bubíꞌi ládxiꞌbiꞌ,
ateꞌ yöjenbiꞌ dxin.
30 Níꞌirö bönniꞌ naꞌ yöjödxëꞌ-biꞌ iaꞌtubiꞌ biꞌi queëꞌ naꞌ,
en laꞌ tuz ca gunnë́ꞌ,
ateꞌ bubíꞌibiꞌ didzaꞌ biꞌi ni,
gúdxibiꞌ-nëꞌ:
“Huaca,
Dad.
Uyéajaꞌ.”
Bitiꞌ guyéajbiꞌ biꞌi ni.
31 ¿Núzxilöbiꞌ biꞌi chopa ni benbiꞌ le guyaza ládxëꞌë xúzibiꞌ?
Buluꞌbiꞌë didzaꞌ,
tëꞌ Jesús:
―Biꞌi zíꞌalö naꞌ.
Níꞌirö Jesús rëꞌ légaquiëꞌ:
―Le nácatë reaꞌ libíꞌiliꞌ,
ilaꞌnö́ruëꞌ bönniꞌ uquízxaj tuáꞌ döꞌ,
en yuguꞌ nigula udá dzaga ca libíꞌiliꞌ,
ateꞌ ilaꞌyáziëꞌ ga niꞌ rinná bëꞌë Dios.
32 Caní gaca,
tuꞌ bidëꞌ Juan,
bönniꞌ buquilëꞌ bönachi nisa,
ga zóaliꞌ,
en busédinëꞌ libíꞌiliꞌ le naca tsahuiꞌ ca ral-laꞌ gunliꞌ,
ateꞌ libíꞌiliꞌ bitiꞌ guyéajlëꞌëliꞌ lëꞌ,
pero yuguꞌ bönniꞌ uquízxaj,
en yuguꞌ nigula udá dzaga gulaꞌyéajlëꞌë lëꞌ.
Sal-laꞌ biléꞌeliꞌ lë ni,
bitiꞌ bubíꞌi ládxiꞌliꞌ para tséajlëꞌëliꞌ lëꞌ.
Rucúdzuꞌë didzaꞌ Jesús ca béngaquiëꞌ bönniꞌ huen dxin bitiꞌ nácagaquiëꞌ tsahuiꞌ
33 Gunnë́ꞌ caꞌ Jesús:
―Buliꞌzë́ nágaliꞌ iaꞌtú le ucúdzuꞌa didzaꞌ.
Guzóëꞌ tu bönniꞌ xan yuꞌu,
ateꞌ bönniꞌ ni budë́ꞌë yuguꞌ lubá uva luyú queëꞌ.
Guléquiëꞌ lëꞌaj que,
en guchö́ꞌönëꞌ tu lerui guiö́j ga isíëꞌ xisi uva naꞌ.
Benëꞌ caꞌ tu yuꞌu xitsáꞌ ga gaca nu uyú idútë luyú queëꞌ.
Níꞌirö budödëꞌ luyú naꞌ lu náꞌagaquiëꞌ bönniꞌ huen dxin,
para ilaꞌziꞌë quégaquiëꞌ gatsaj huéaj,
ateꞌ saꞌyéajëꞌ yödzö ziꞌtuꞌ.
34 ’Cateꞌ chibidxín dza uluꞌchibëꞌ yuguꞌ lubá uva naꞌ,
gusö́l-lëꞌë bönniꞌ xan luyú naꞌ bal-lëꞌ niꞌa nëꞌë ga naꞌ nacuꞌë bönniꞌ huen dxin niꞌ para uluꞌziꞌë lu náꞌagaquiëꞌ uláz queëꞌ.
35 Níꞌirö gulaꞌzönëꞌ bönniꞌ huen dxin naꞌ yuguꞌ niꞌa nëꞌë naꞌ.
Gulunëꞌ huëꞌ tuëꞌ,
en iaꞌtúëꞌ bë́tigaquiëꞌ lëꞌ,
en iaꞌtúëꞌ buluꞌladxëꞌ lëꞌ guiö́j.
36 Leyúbölö bönniꞌ xan luyú naꞌ gusö́l-lëꞌë caꞌ iaꞌzícaꞌrëꞌ niꞌa nëꞌë,
ateꞌ guláquiëꞌ ziántërëꞌ ca nupa naꞌ gusö́l-lëꞌë zíꞌalö,
ateꞌ laꞌ tuz ca gulunëꞌ bönniꞌ huen dxin niꞌ quégaquiëꞌ.
37 ’Ga yöjsete,
gusö́l-lëꞌë caꞌ zxíꞌinëꞌ ga naꞌ nacuꞌë.
Guzáꞌ ládxëꞌë,
rnnëꞌ:
Hualunëꞌ bal biꞌi quiaꞌ.
38 Cateꞌ yuguꞌ bönniꞌ huen dxin naꞌ bilaꞌléꞌenëꞌ-biꞌ zxíꞌinëꞌ,
laꞌ gulaꞌnnatëꞌ laꞌ légacasëꞌ:
“Biꞌi ni guequi queë́biꞌ luyú ni.
Guliꞌdá,
gútiruꞌ-biꞌ,
ateꞌ le ral-laꞌ guequi queë́biꞌ guequi queë́ruꞌ.”
39 Níꞌirö gulaꞌzönëꞌ-biꞌ,
ateꞌ buluꞌbéajëꞌ-biꞌ níꞌilö luyú ga naꞌ rö́ꞌgaca lubá uva,
ateꞌ bë́tigaquiëꞌ-biꞌ niꞌ.
40 Níꞌirö Jesús gunábinëꞌ légaquiëꞌ,
gunnë́ꞌ:
―Cateꞌ udxinëꞌ bönniꞌ xan luyú naꞌ,
¿nacxi gunëꞌ quégaquiëꞌ bönniꞌ huen dxin niꞌ?
41 Buluꞌbiꞌë didzaꞌ bönniꞌ yudoꞌ naꞌ,
tëꞌ Jesús:
―Usunítiëꞌ bönniꞌ tuáꞌ döꞌ naꞌ,
ateꞌ luyú queëꞌ naꞌ udödëꞌ lu náꞌagaquiëꞌ iaꞌzícaꞌrëꞌ bönniꞌ huen dxin,
bönniꞌ iluꞌë lëꞌ uláz queëꞌ cateꞌ idxín dza uluꞌchibëꞌ le.
42 Níꞌirö Jesús gudxëꞌ légaquiëꞌ:
―¿Naruꞌ catu caz nulábaniliꞌ lë naꞌ nazúaj lu guichi láꞌayi ca naca lë ni?
Caní rnna:
Guiö́j naꞌ gulaꞌrúꞌunëꞌ bönniꞌ tuꞌcuꞌë zöꞌö,
laꞌ guiö́j náꞌasö chinaca guiö́j len zöꞌö.
Lë cazëꞌ Xanruꞌ benëꞌ ga naca caní,
ateꞌ naca tu le run ga rubániruꞌ.
43 ’Que lë ni naꞌ reaꞌ libíꞌiliꞌ,
xilátjaliꞌ ga naꞌ rinná bëꞌë Dios idúa queë́liꞌ,
en gataꞌ quégaca bönachi ilún ca ral-laꞌ gun nu nadeliꞌ lataj niꞌ.
44 Nu tsöjcheguꞌ lu guiö́j ni,
laꞌ cuinsi quitsaj,
ateꞌ channö guiö́j ni tseajbagaꞌ bönniꞌ naꞌ,
uzxuzxaj lëꞌ.
45 Cateꞌ yuguꞌ bixúz unná bëꞌ,
en yuguꞌ bönniꞌ yudoꞌ fariseo bilaꞌyönnëꞌ lë naꞌ bucúdzuꞌë didzaꞌ Jesús,
téquibeꞌenëꞌ bëꞌë Jesús didzaꞌ ca naca quégaquiëꞌ.
46 Gulaꞌzóa gulaꞌböꞌë ilaꞌzönëꞌ Jesús,
pero guládxinëꞌ bi ilún bönachi zián nacuáꞌ niꞌ tuꞌ taꞌyéajlëꞌ náquiëꞌ Jesús bönniꞌ ruꞌë didzaꞌ uláz queëꞌ Dios.