Laní que yöl-laꞌ rutsaga naꞌ le guca lu yödzö Caná
2
Cateꞌ chiguca tsonna dza,
guca laní que yöl-laꞌ rutsaga naꞌ lu yödzö Caná luyú Galilea,
ateꞌ zóanu xinë́ꞌë Jesús niꞌ.
2 Lëscaꞌ zoa nu bulidza Jesús,
en yuguꞌ bönniꞌ usëda queëꞌ dijáquiëꞌ laní naꞌ.
3 Cateꞌ biyadzaj xisi uva ilë́ꞌajëꞌ,
níꞌirö xinë́ꞌë Jesús gúdxinu Lëꞌ,
rnnanu:
―Bitiꞌrö dë xisi uva ilë́ꞌajëꞌ.
4 Bubiꞌë didzaꞌ Jesús,
rëꞌë-nu:
―Nigúladoꞌ.
¿Bizx que rulidzuꞌ nedaꞌ?
Bitiꞌ caꞌ ridxini dza uluꞌa lahui yöl-laꞌ huáca quiaꞌ.
El milagro en Caná (Juan 2.1-12)
5 Níꞌirö xinë́ꞌë Jesús gúdxinu bönniꞌ huen dxin taꞌguꞌë le tahuëꞌ,
rnnanu:
―Guliꞌgún yúguꞌtë le guíëꞌ libíꞌiliꞌ.
6 Nacuáꞌ niꞌ xopa yusuꞌ guiö́j tuꞌgunëꞌ dxin bönniꞌ judío cateꞌ tuꞌpáꞌa cuíngaquiëꞌ ca nalë́biguequinëꞌ tunëꞌ,
en rúdzugaca chopa tsonna röꞌö nisa tu tu yusuꞌ naꞌ.
7 Jesús gudxëꞌ yuguꞌ bönniꞌ huen dxin naꞌ,
rnnëꞌ:
―Buliꞌlí yuguꞌ yusuꞌ ni nisa.
―Guliꞌgachiꞌ naꞌa,
en guliꞌtsöjuáꞌ lahuëꞌ bönniꞌ zoëꞌ raꞌ yusuꞌ.
Yöjuáꞌgaquiëꞌ naꞌ.
9 Buyúëꞌ bönniꞌ naꞌ zoëꞌ raꞌ yusuꞌ channö nazxíꞌi nisa naꞌ nuhuöáca xisi uva,
pero bitiꞌ réquibeꞌenëꞌ gazxi zaꞌ.
Nö́ziguequinëꞌ bönniꞌ huen dxin naꞌ guláchëꞌë nisa naꞌ.
Níꞌirö bönniꞌ naꞌ zoëꞌ raꞌ yusuꞌ bulidzëꞌ bönniꞌ rutsaga nëꞌë,
10 en rëꞌ lëꞌ:
―Zíꞌalö tuꞌnödzjëꞌ yúguꞌtë bönniꞌ xisi uva nácarö sizxíꞌi,
en cateꞌ chigulë́ꞌajëꞌ yenniꞌ,
níꞌirö tuꞌnödzjëꞌ le cabí nazxíꞌi.
Liꞌ,
ga bidxintë naꞌa ben chiꞌu xisi uva nácarö sizxíꞌi.
11 Yöl-laꞌ huáca naca bëꞌ ni benëꞌ Jesús lu yödzö Caná luyú Galilea naca le risí lo yuguꞌ yöl-laꞌ huáca gunëꞌ.
Caní guca,
buluꞌe lahui yöl-laꞌ zxön queëꞌ,
ateꞌ gulaꞌyéajlëꞌë Lëꞌ bönniꞌ usëda queëꞌ.
12 Gudödi naꞌ guyijëꞌ Jesús yödzö Capernaum,
ateꞌ dzágagaquiëꞌ xinë́ꞌë,
en yuguꞌ bönniꞌ bö́chëꞌë,
en yuguꞌ bönniꞌ usëda queëꞌ Lëꞌ,
ateꞌ zián dza gulaꞌcuꞌë Capernaum naꞌ.
Rulatjëꞌ Jesús löꞌa yudoꞌ, rubéajëꞌ nupa tun le cabí ral-laꞌ ilún niꞌ
13 Cateꞌ chizóa idxín Laní Pascua cateꞌ tuꞌsubanëꞌ bönniꞌ judío ca benëꞌ Dios,
ca naꞌ bubéajëꞌ xuz xtóꞌogaquiëꞌ luyú Egipto,
guyijëꞌ Jesús yödzö Jerusalén.
Jesús en el patio del templo (Juan 2.13-25)
14 Lu yödzö naꞌ yöjxáquiëꞌ Jesús nacuꞌë bönniꞌ löꞌa yudoꞌ ga naꞌ tútiꞌë-baꞌ yuguꞌ bëdxi,
en yuguꞌ böꞌcuꞌ zxilaꞌ,
en yuguꞌ guꞌdödoꞌ,
böaꞌ bëdxi naꞌ tútigaquiëꞌ-baꞌ lahuëꞌ Dios.
Rö́ꞌögaquiëꞌ caꞌ niꞌ bönniꞌ tuꞌtsë́ꞌë dumí zaꞌ idútë yödzölió.
15 Cateꞌ biléꞌenëꞌ Jesús lë ni,
buzalëꞌ yuguꞌ du lasi le quindëꞌ bönachi naꞌ,
ateꞌ buláguiꞌë yúguꞌtëꞌ níꞌilö löꞌa yudoꞌ,
en buláguiꞌë-baꞌ caꞌ níꞌilö yuguꞌ böꞌcuꞌ zxilaꞌ,
en yuguꞌ bëdxi.
Bësiëꞌ dumí quégaquiëꞌ bönniꞌ naꞌ tuꞌtsë́ꞌë dumí lu yu,
en burixëꞌ yuguꞌ blaga quégaquiëꞌ.
16 Níꞌirö Jesús gudxëꞌ bönniꞌ naꞌ tútiꞌë-baꞌ yuguꞌ guꞌdödoꞌ,
rnnëꞌ:
―Guliꞌcúa yuguꞌ lë ni.
Bitiꞌ úniliꞌ lidxëꞌ Xuzaꞌ tu yë́ꞌëyi.
17 Níꞌirö yöjnéguequinëꞌ bönniꞌ usëda queëꞌ Jesús le nazúaj lu guichi láꞌayi,
rnna:
Tuꞌ ruíꞌidaꞌ ládxaꞌa lidxuꞌ,
régui rilá ládxiꞌdaꞌahuaꞌ.
18 Níꞌirö buluꞌbiꞌë didzaꞌ bönniꞌ judío unná bëꞌ nacuꞌë niꞌ,
tëꞌ Jesús:
―¿Bizxi yöl-laꞌ huáca uluíꞌinuꞌ netuꞌ le gaca bëꞌ dë lu noꞌo runuꞌ yuguꞌ lë ni?
19 Bubiꞌë didzaꞌ Jesús,
rëꞌ légaquiëꞌ:
―Guliꞌquínnaj yudoꞌ ni,
ateꞌ tsonna dzasö uchisaꞌ le.
20 Níꞌirö tëꞌ Lëꞌ bönniꞌ judío,
taꞌnnë́ꞌ:
―Idú xopa-un iz guyáꞌ yudoꞌ ni,
ateꞌ Liꞌ,
¿tsonna dzasö uchísatsoꞌ le?
21 Yudoꞌ naꞌ bëꞌë didzaꞌ que Jesús naca laꞌ cuin cazëꞌ.
22 Que lë ni naꞌ,
cateꞌ bubanëꞌ Jesús lu yöl-laꞌ guti,
yöjnéguequinëꞌ bönniꞌ usëda queëꞌ Jesús ca naꞌ gunnë́ꞌ,
ateꞌ gulaꞌyéajlëꞌë le nazúaj lu guichi láꞌayi,
encaꞌ yuguꞌ didzaꞌ bëꞌë Jesús.
Jesús núnbëꞌë yúguꞌtë bönachi
23 Cateꞌ niꞌ zoëꞌ Jesús Jerusalén,
cateꞌ raca Laní Pascua naꞌ,
gulaꞌyéajlëꞌ bönachi zián Lëꞌ,
tuꞌ bilaꞌléꞌenëꞌ yuguꞌ yöl-laꞌ huáca runëꞌ.
24 Bitiꞌ buzxöni ládxëꞌë Jesús légaquiëꞌ,
tuꞌ nunbëꞌ cazëꞌ yúguꞌtë bönachi.
25 Bitiꞌ naquínnëꞌ Jesús nu quíxjöiꞌi Lëꞌ ca nácagaca bönachi,
tuꞌ nöz quézinëꞌ Lëꞌ le yuꞌu icja ládxiꞌdoꞌgaca bönachi.