Jesús, en Zaqueo
19
Níꞌirö guyáziëꞌ Jesús yödzö Jericó,
en ridödëꞌ lu yödzö naꞌ.
San Lucas 19:1-27
2 Zoëꞌ tu bönniꞌ lëꞌ Zaqueo niꞌ,
bönniꞌ lo ládjagaquiëꞌ bönniꞌ uquízxaj,
ateꞌ dë yöl-laꞌ tsahuiꞌ queëꞌ.
3 Ruíꞌi ládxëꞌë bönniꞌ ni iléꞌenëꞌ Jesús,
pero bitiꞌ guca queëꞌ tuꞌ nacuáꞌ bönachi zián niꞌ,
en náquiëꞌ bönniꞌ ga rë́ꞌëdoꞌ.
4 Níꞌirö carelö yöjnö́ruëꞌ lógaca bönachi zián naꞌ,
ateꞌ yöjchenëꞌ tu lu yaga para gaca iléꞌenëꞌ Jesús,
tuꞌ ral-laꞌ tödëꞌ niꞌ.
5 Cateꞌ bidxinëꞌ Jesús niꞌ,
guchisa lahuëꞌ ruyúëꞌ ga naꞌ dxíëꞌ Zaqueo naꞌ,
en rëꞌ lëꞌ:
―Zaqueo,
bö́tjatë lu yaga naꞌ,
tuꞌ run bayudxi tsöjgáꞌanaꞌ lidxuꞌ naꞌa.
6 Níꞌirö laꞌ bö́tjatëꞌ Zaqueo lu yaga,
ateꞌ lu yöl-laꞌ rudzeja queëꞌ guchë́ꞌë Jesús lidxëꞌ.
7 Cateꞌ bilaꞌléꞌe bönachi nacuáꞌ niꞌ lë ni,
gulaꞌsí lógaquiëꞌ yúguꞌtëꞌ taꞌnnë́ꞌ queëꞌ,
taꞌnnë́ꞌ:
―Guyáziëꞌ Jesús ugáꞌanalenëꞌ bönniꞌ dul-laꞌ.
8 Níꞌirö guzuínëꞌ Zaqueo,
en rëꞌ Xanruꞌ:
―Xan,
buyútsöcaꞌ.
Gatsaj le dë quiaꞌ guꞌa quégaca bönachi yechiꞌ,
en channö bi gudödi bëꞌ buquizxjaꞌ bönachi,
ubiꞌa quégaca bönachi naꞌ tapa cö́ꞌtëlö caꞌ.
9 Jesús rëꞌ lëꞌ:
―Naꞌa dza ni bidxín yöl-laꞌ rusölá quégaca nupa nacuáꞌ yuꞌu ni,
tuꞌ nababëꞌ bönniꞌ ni diꞌa dza queëꞌ Abraham.
10 Bidaꞌ nedaꞌ,
Bönniꞌ Guljëꞌ Bönachi,
ududiljaꞌ,
en udusöláꞌ nupa nanítigaca.
Rucúdzuꞌë didzaꞌ Jesús que chi cöꞌ dumí
11 Tsanni niꞌ taꞌyönnëꞌ didzaꞌ ni ruꞌë Jesús,
rëꞌ légaquiëꞌ le rucúdzuꞌë didzaꞌ,
tuꞌ chizóa ilaꞌdxinëꞌ yödzö Jerusalén,
ateꞌ téquinëꞌ chizóatë iláꞌ lahui le rinná bëꞌë Dios.
12 Caní rnnëꞌ Jesús:
―Zoëꞌ tu bönniꞌ lo,
saꞌyéajëꞌ tu yödzö ziꞌtuꞌ para siꞌ lu nëꞌë yöl-laꞌ unná bëꞌ,
ateꞌ níꞌirö huödëꞌ.
13 Cateꞌ chizóa tsejëꞌ niꞌ bulidzëꞌ chiëꞌ bönniꞌ huen dxin queëꞌ,
en bëꞌë que queë́gaquiëꞌ tu cöꞌ huéaj dumí,
ateꞌ rëꞌ légaquiëꞌ:
“Guliꞌguílajlen dumí ni tsanni huödaꞌ.”
14 Yuguꞌ bönniꞌ uládz queëꞌ bitiꞌ taꞌléꞌenëꞌ lëꞌ dxiꞌa,
ateꞌ gulaꞌsö́l-lëꞌë yuguꞌ gubáz quégaquiëꞌ ga niꞌ tsejëꞌ,
ilaꞌnnë́ꞌ:
“Bitiꞌ rë́ꞌënituꞌ inná béꞌenëꞌ bönniꞌ ni netuꞌ.”
15 Níꞌirö guzxíꞌ lu nëꞌë yöl-laꞌ unná bëꞌ,
ateꞌ budxinëꞌ ladzëꞌ.
Cateꞌ bidxinëꞌ niꞌ gunná béꞌenëꞌ nu tsöjlidza yuguꞌ bönniꞌ huen dxin naꞌ budödëꞌ lu náꞌagaquiëꞌ dumí naꞌ,
para inö́zinëꞌ gácaꞌxi buluꞌguílajlenëꞌ le tu tuëꞌ.
16 Cateꞌ bönniꞌ zíꞌalö naꞌ bidxinëꞌ lahuëꞌ,
rnnëꞌ:
“Xan,
tu cöꞌ dumí quiuꞌ naꞌ chibén icja iaꞌchí cöꞌ caꞌ.”
17 Xanëꞌ naꞌ rëꞌ lëꞌ:
“Tsahuiꞌ benuꞌ.
Nacuꞌ huen dxin tsahuiꞌ.
Tuꞌ dxíꞌadoꞌ bugunuꞌ dxin látiꞌdoꞌos naꞌ gutaꞌ lu noꞌo,
naꞌa,
gunaꞌ ga inná béꞌenuꞌ chi yödzö.”
18 Níꞌirö bidxinëꞌ iaꞌtúëꞌ bönniꞌ huen dxin naꞌ lahuëꞌ lëꞌ,
rnnëꞌ:
“Xan,
tu cöꞌ dumí quiuꞌ naꞌ chibén icja iaꞌgayuꞌ cöꞌ caꞌ.”
19 Xanëꞌ naꞌ rëꞌ caꞌ lëꞌ:
“Inná béꞌenuꞌ gayuꞌ yödzö.”
20 Níꞌirö bidxinëꞌ iaꞌtúëꞌ lahuëꞌ lëꞌ,
rnnëꞌ:
“Xan,
ni dë tu cöꞌ dumí quiuꞌ naꞌ.
Ben chiꞌa le,
butúlidaꞌ le lariꞌ.
21 Caní benaꞌ tuꞌ rádxidaꞌ liꞌ,
tuꞌ nacuꞌ bönniꞌ bizxaj.
Runuꞌ ca naꞌ taꞌnná bönachi:
Ruziꞌu le cabí buzúꞌ,
en rulapuꞌ ga bitiꞌ guzuꞌ.”
22 Níꞌirö xanëꞌ naꞌ rëꞌ lëꞌ:
“Nacuꞌ huen dxin bitiꞌ naca tsahuiꞌ.
Niꞌa que didzaꞌ bëꞌu uchiꞌa usörö́aꞌ liꞌ.
¿Réquibeꞌenuꞌ nacaꞌ bönniꞌ bizxaj:
Ruziꞌa le cabí buzóaꞌ,
en rulapaꞌ ga bitiꞌ guzaꞌ?
23 Naꞌa,
¿bizx que bitiꞌ yöjlúꞌu dumí quiaꞌ naꞌ ga gun icja,
para cateꞌ huödaꞌ,
uziꞌa le idú len icja naꞌ?”
24 Níꞌirö rëꞌ nupa nacuáꞌ niꞌ:
“Guliꞌcúa lu nëꞌë dumí naꞌ,
ateꞌ guliꞌgüíꞌi queëꞌ bönniꞌ naꞌ dë queëꞌ chi cöꞌ dumí.”
25 Légaquiëꞌ tëꞌ lëꞌ:
“Xan,
chidë́ queëꞌ chi cöꞌ dumí.”
26 Níꞌirö bubiꞌë didzaꞌ xángaquiëꞌ,
rnnëꞌ:
“Reaꞌ libíꞌiliꞌ:
Nu rugún dxiꞌa dxin le doꞌ dë lu nëꞌe,
uluꞌzxöni ládxiꞌgaca lëꞌ iaꞌlateꞌ,
pero nu bitiꞌ rugún dxiꞌa dxin le doꞌ dë lu nëꞌe,
uluꞌbéaj lu nëꞌe lë naꞌ gutaꞌ lu nëꞌe.
27 Ca naca quégaquiëꞌ bönniꞌ niꞌ bitiꞌ taꞌléꞌenëꞌ nedaꞌ dxiꞌa,
en bitiꞌ gulë́ꞌënnëꞌ inná béꞌedaꞌ légaquiëꞌ,
guliꞌtsöjzxíꞌ légaquiëꞌ para ídigaquiëꞌ ni,
ateꞌ guliꞌguti légaquiëꞌ.”
Len yöl-laꞌ ba zxön raziëꞌ Jesús yödzö Jerusalén
28 Cateꞌ budxi gunnë́ꞌ caní Jesús,
buguélëꞌë xinözëꞌ,
saꞌyéajëꞌ zacaꞌ yödzö Jerusalén.
San Lucas 19:28-48
29 Cateꞌ bilaꞌdxinëꞌ galaꞌ ga nacuáꞌ yödzö Betfagé,
en yödzö Betania,
ga naca raꞌ guíꞌadoꞌ nazíꞌi le Guíꞌa Yaga Olivo,
gusö́l-lëꞌë Jesús chopëꞌ bönniꞌ usëda queëꞌ,
30 ateꞌ rëꞌ légaquiëꞌ:
―Guliꞌtséaj yö́dzödoꞌ niꞌ ca dö́dilö ga zóaruꞌ,
en cateꞌ idxinliꞌ niꞌ,
tsöjxácaꞌliꞌ-baꞌ tubaꞌ búrrodoꞌ nágaꞌbaꞌ niꞌ,
búrrodoꞌ naꞌ cuntu nu ribíani lëbaꞌ.
Guliꞌsedxi-baꞌ,
en guliꞌduchë́ꞌ-baꞌ quiaꞌ ni.
31 Channö zoa nu rinábini libíꞌiliꞌ,
inná:
“¿Bizx que risédxiliꞌ-baꞌ?”,
ubíꞌiliꞌ didzaꞌ caní innaliꞌ:
“Xanruꞌ riquinnëꞌ-baꞌ.”
32 Söjáquiëꞌ bönniꞌ usëda queëꞌ naꞌ nasö́l-lëꞌë,
ateꞌ yöjxácaꞌgaquiëꞌ-baꞌ ca naꞌ chigudxëꞌ Jesús légaquiëꞌ.
33 Cateꞌ gulaꞌsedxëꞌ-baꞌ búrrodoꞌ naꞌ,
yuguꞌ bönniꞌ xanbaꞌ tëꞌ légaquiëꞌ:
―¿Bizx que risédxiliꞌ-baꞌ búrrodoꞌ naꞌ?
34 Buluꞌbiꞌë didzaꞌ,
taꞌnnë́ꞌ:
―Xanruꞌ riquinnëꞌ-baꞌ.
35 Gulaꞌchë́ꞌë-baꞌ ga naꞌ zoëꞌ Jesús.
Cateꞌ chigulaꞌxóëꞌ yuguꞌ lariꞌ tsöláꞌa quégaquiëꞌ cúdzuꞌbaꞌ búrrodoꞌ naꞌ,
buluꞌdxíëꞌ Jesús cúdzuꞌbaꞌ lahui lariꞌ naꞌ.
36 Gapa ral-laꞌ tödëꞌ Jesús,
gulaꞌchiljëꞌ lariꞌ quégaquiëꞌ laꞌ nöza.
37 Cateꞌ chibilaꞌdxinëꞌ galaꞌ ga zoa lidinni que Guíꞌa Yaga Olivo,
lu yöl-laꞌ rudzeja quégaquiëꞌ gulaꞌsí lógaquiëꞌ yúguꞌtë bönniꞌ dáꞌgaquiëꞌ Jesús,
tuꞌë zidzaj didzaꞌ,
taꞌguꞌë Dios yöl-laꞌ ba,
niꞌa quégaca yuguꞌ yöl-laꞌ huáca zxön bilaꞌléꞌenëꞌ benëꞌ Jesús.
38 Taꞌnnë́ꞌ:
―¡Yöl-laꞌ ba bönniꞌ unná bëꞌ ni zëꞌë uláz queëꞌ Xanruꞌ Dios!
¡Yehuaꞌ yubá zaꞌ le ribequi dxi ládxiꞌruꞌ!
¡Yöl-laꞌ ba Dios!
39 Níꞌirö yuguꞌ bönniꞌ yudoꞌ fariseo nútsaꞌgaquiëꞌ ladaj bönachi zián niꞌ tëꞌ Jesús,
taꞌnnë́ꞌ:
―¡Bönniꞌ Usedi,
gudil-la yuguꞌ bönniꞌ usëda quiuꞌ!
40 Bubiꞌë didzaꞌ Jesús,
rëꞌ légaquiëꞌ:
―Reaꞌ libíꞌiliꞌ:
Channö ilaꞌcuáꞌ dxíëꞌ bönniꞌ ni,
yuguꞌ guiö́j hualuíꞌi caz zidzaj didzaꞌ.
―Raca ládxaꞌa huanö́ziliꞌ naꞌa dza le gaca gun ga cuéqui dxi ládxiꞌliꞌ lahuëꞌ Dios,
pero naꞌa chinagachiꞌ queë́liꞌ,
para cabí iléꞌeliꞌ le.
43 Hualaꞌdxín queë́liꞌ dza cateꞌ nupa bitiꞌ taꞌléꞌe libíꞌiliꞌ dxiꞌa ilaꞌbequi zöꞌö idú gásibiꞌilö ga zóaliꞌ,
en ilaꞌgúꞌu libíꞌiliꞌ lë́ꞌalö,
ateꞌ yúguꞌtë lataj idú gásibiꞌilö ilúnlenëꞌ libíꞌiliꞌ gudil-la.
44 Uluꞌquínnajëꞌ zöꞌö run chiꞌi yödzö queë́liꞌ,
en ilútiëꞌ nupa nacuáꞌ lu yödzö ni.
Bitiꞌ ugáꞌana guiö́j lahui luzë́ꞌe.
Yúguꞌtë lë ni gaca queë́liꞌ tuꞌ cabí gúquibeꞌeliꞌ dza bidëꞌ Dios buduyúëꞌ libíꞌiliꞌ.
Rulatjëꞌ Jesús löꞌa yudoꞌ
45 Níꞌirö guyáziëꞌ Jesús löꞌa yudoꞌ,
en gusí lahuëꞌ rubéajëꞌ níꞌilö yúguꞌtë nupa tutiꞌ,
en nupa toꞌo ga naca löꞌa yudoꞌ.
46 Rëꞌ légaquiëꞌ:
―Nazúaj lu guichi láꞌayi,
rnna:
“Lidxaꞌ naca yuꞌu ga uluꞌlidza bönachi Dios”,
pero libíꞌiliꞌ chinunliꞌ le ca tu lídxigaca bönniꞌ gubán.