María rigúꞌunu le riláꞌ zxixi niꞌë Jesús
12
Cateꞌ niꞌ nagáꞌanagaca iaꞌxopa dza cateꞌ idxín Laní Pascua cateꞌ tuꞌsubanëꞌ bönniꞌ judío ca benëꞌ Dios,
bubéajëꞌ bönachi queëꞌ luyú Egipto,
níꞌirö bidxinëꞌ Jesús lu yödzö Betania,
ga naꞌ zoëꞌ Lázaro,
bönniꞌ naꞌ gútiëꞌ,
en bubanëꞌ lu yöl-laꞌ guti.
2 Gulaꞌguꞌë tu güíꞌi huagu niꞌ le gahuëꞌ Jesús.
Gulúꞌunu María le ilahuëꞌ,
ateꞌ nútsëꞌë Lázaro ladaj bönniꞌ rö́ꞌölengaquiëꞌ Jesús ga naꞌ tahuëꞌ.
María unge a Jesús (Juan 12.1-11)
3 Níꞌirö gudélaꞌnu María ca tu guíë le riláꞌ zxixi que yöj susén lasi idú,
le nazácaꞌdaꞌ,
en gulúꞌunu le niꞌë Jesús.
Buzxinu niꞌë len guitsaꞌ ícjanu.
Idútë lu yuꞌu naꞌ guzé böꞌ zxixi.
4 Níꞌirö bëꞌë didzaꞌ tu bönniꞌ usëda queëꞌ Jesús,
lëꞌ Judas Iscariote,
zxíꞌinëꞌ tu bönniꞌ lëꞌ Simón,
en náquiëꞌ bönniꞌ naꞌ udödëꞌ Jesús lu náꞌagaquiëꞌ yuguꞌ bönniꞌ yudoꞌ,
rnnëꞌ:
5 ―¿Bizx que bitiꞌ gudóꞌo le riláꞌ zxixi naꞌ,
le nazacaꞌ lázxjaruꞌ que tu iz,
ateꞌ huáca nu quisi dumí naꞌ quégaca bönachi yechiꞌ?
6 Gunnë́ꞌ caní,
calëga tuꞌ ruíꞌi ládxëꞌë bönachi yechiꞌ,
pero tuꞌ náquiëꞌ gubán,
en lë cazëꞌ nuꞌë buzudi dumí quégaquiëꞌ,
en rubéajlanëꞌ dumí naꞌ tuꞌchejëꞌ lu buzudi naꞌ.
7 Níꞌirö Jesús rëꞌ lëꞌ:
―Bëꞌë-nu lataj,
tuꞌ naca lë ni bennu tu le nabáꞌa para dza igáchaꞌa.
8 Yuguꞌ bönachi yechiꞌ ilaꞌcuáꞌlenticaꞌsö libíꞌiliꞌ,
pero nedaꞌ bitiꞌ ugáꞌanaticaꞌsaꞌ ga zóaliꞌ.
Tun xtídzaꞌgaquiëꞌ bönniꞌ judío unná bëꞌ ilútiëꞌ Lázaro
9 Cateꞌ bilaꞌyönnëꞌ bönniꞌ judío zoëꞌ Jesús yödz Betania,
bilaꞌdxinëꞌ ziánëꞌ niꞌ,
calë́gasö tuꞌ zoëꞌ Jesús niꞌ,
pero lëscaꞌ tuꞌ të́ꞌënnëꞌ ilaꞌléꞌenëꞌ Lázaro,
bönniꞌ naꞌ busubanëꞌ Jesús lu yöl-laꞌ guti.
10 Níꞌirö gulún xtídzaꞌgaquiëꞌ yuguꞌ bixúz unná bëꞌ,
ilútiëꞌ caꞌ Lázaro,
11 tuꞌ taꞌyéajlëꞌë zián bönniꞌ judío Jesús niꞌa queëꞌ Lázaro naꞌ,
en chinuláꞌalengaquiëꞌ yuguꞌ bixúz unná bëꞌ naꞌ.
Len yöl-laꞌ ba zxön raziëꞌ Jesús Jerusalén
12 Bönachi zián bilaꞌdxín Jerusalén dza Laní Pascua,
ateꞌ dza buropi naꞌ taꞌyöni zëꞌë Jesús niꞌ.
Entrada triunfal a Jerusalén (Juan 12.12-19)
13 Níꞌirö gulaꞌguítsjëꞌ zin,
en bilaꞌrúajëꞌ söjxíꞌgalaꞌgaquiëꞌ Jesús,
ateꞌ guluꞌë zidzaj didzaꞌ,
taꞌnnë́ꞌ:
―¡Yöl-laꞌ ba Dios!
¡Yöl-laꞌ ba Bönniꞌ ni zëꞌë uláz queëꞌ Xanruꞌ,
para inná béꞌenëꞌ bönachi Israel!
14 Budzö́linëꞌ Jesús tubaꞌ búrrodoꞌ,
ateꞌ gudxíëꞌ-baꞌ ca naꞌ nazúaj lu guichi láꞌayi,
rnna:
15 ¡Bitiꞌ gádxiliꞌ,
libíꞌiliꞌ,
zóaliꞌ yödzö Sión!
¡Buliꞌyútsöcaꞌ,
zëꞌë Bönniꞌ inná béꞌenëꞌ libíꞌiliꞌ!
¡Dxíëꞌ-baꞌ tubaꞌ búrrodoꞌ!
16 Cateꞌ niꞌ siꞌ guca lë ni,
bitiꞌ gulaꞌyéajniꞌinëꞌ bönniꞌ usëda queëꞌ Jesús,
pero gudödi niꞌ,
cateꞌ bubanëꞌ Jesús lu yöl-laꞌ guti,
en buëpëꞌ yehuaꞌ yubá queëꞌ,
níꞌirö yöjnéguequinëꞌ lë ni nazúaj lu guichi láꞌayi ca ral-laꞌ gaca queëꞌ,
ateꞌ guca queëꞌ caní.
17 Lëscaꞌ yuguꞌ bönniꞌ naꞌ gulaꞌcuáꞌlenëꞌ Jesús cateꞌ niꞌ bulidzëꞌ Lázaro,
bönniꞌ naꞌ yuꞌë yeru ba,
en busubanëꞌ lëꞌ lu yöl-laꞌ guti,
gulunëꞌ ba nalí queëꞌ.
18 Que lë ni naꞌ caꞌ bilaꞌrúajëꞌ bönniꞌ yöjxíꞌgalaꞌgaquiëꞌ Jesús,
tuꞌ bilaꞌyönnëꞌ ca naca yöl-laꞌ huáca ni benëꞌ Lëꞌ.
19 Níꞌirö gulaꞌnnë́ꞌ laꞌ légacasëꞌ bönniꞌ yudoꞌ fariseo,
taꞌnnë́ꞌ:
―Chinaca bëꞌ bitiꞌ bi séquiꞌruꞌ gunruꞌ.
Buliꞌyú ca dáꞌgaca yúguꞌtë bönachi Lëꞌ.
Yuguꞌ bönniꞌ ziꞌtuꞌ tuꞌguiljëꞌ Jesús
20 Bal-lëꞌ bönniꞌ ziꞌtuꞌ dzágagaquiëꞌ nupa naꞌ bilaꞌdxín Jerusalén dza Laní Pascua naꞌ para ilaꞌyéaj ládxiꞌgaquiëꞌ Dios.
Jesús predice su muerte (Juan 12.20-36)
21 Yuguꞌ bönniꞌ ziꞌtuꞌ naꞌ bilaꞌdxinëꞌ ga zoëꞌ Felipe,
bönniꞌ Betsaida que luyú Galilea,
ateꞌ gulátaꞌyuëꞌ lahuëꞌ,
taꞌnnë́ꞌ:
―Bönniꞌ,
rë́ꞌënituꞌ iléꞌetuꞌ-nëꞌ Jesús.
22 Guyijëꞌ Felipe naꞌ,
en yöjödxëꞌ caꞌ Andrés.
Níꞌirö Andrés,
en Felipe naꞌ gulë́ꞌ caꞌ Jesús.
23 Bubiꞌë didzaꞌ Jesús,
rëꞌ légaquiëꞌ:
―Chizóa idxín dza gátiaꞌ nedaꞌ,
Bönniꞌ Guljëꞌ Bönachi,
huöjaꞌ xilatjaꞌ yehuaꞌ yubá.
24 Le nácatë reaꞌ libíꞌiliꞌ:
Ugáꞌana cáꞌasö tu xisedoꞌ channö cabí igachiꞌ luyú,
en údxi que.
Channö údxi que xisedoꞌ naꞌ,
ateꞌ ilén,
yénniꞌtërö unödzaj.
25 Nu bönniꞌ ruíꞌi ládxiꞌdëꞌë yöl-laꞌ naꞌbán queëꞌ,
unítiëꞌ le,
tuꞌ gátiëꞌ tsaz bönniꞌ naꞌ.
Nu bönniꞌ bitiꞌ ruíꞌi ládxëꞌë yöl-laꞌ naꞌbán dë queëꞌ yödzölió ni gun chiꞌë le ga idxinrö dza gataꞌ yöl-laꞌ naꞌbán idú queëꞌ.
26 Channö rë́ꞌënëꞌ nu bönniꞌ gunëꞌ xichinaꞌ,
ral-laꞌ tëꞌë nedaꞌ bönniꞌ naꞌ,
ateꞌ ga niꞌ tsöjsóaꞌ nedaꞌ,
niꞌ tsöjsóëꞌ caꞌ bönniꞌ naꞌ runëꞌ xichinaꞌ.
Channö runëꞌ xichinaꞌ nu bönniꞌ,
Xuzaꞌ Dios gunëꞌ bal bönniꞌ naꞌ.
Riguíxjöꞌë Jesús ca siꞌ ilútiëꞌ Lëꞌ
27 Gunnë́ꞌ caꞌ Jesús:
―Naꞌa röꞌa böniga nedaꞌ.
¿Nacxi innatsaꞌ?
¿Naruꞌ inníaꞌ:
Xuzaꞌ,
busölá nedaꞌ lu le gaca quiaꞌ naꞌa?
Que lë ni naꞌ bidaꞌ,
para guáꞌ ilenaꞌ le ral-laꞌ gaca quiaꞌ naꞌa.
28 Xuzaꞌ,
ben ga iláꞌ lahui yöl-laꞌ zxön quiuꞌ.
Níꞌirö biyö́n chiꞌi Nu ruíꞌi didzaꞌ yehuaꞌ yubá,
rnna:
―Chibénaꞌ ga naláꞌ lahui yöl-laꞌ zxön quiaꞌ,
ateꞌ leyúbölö gunaꞌ ga iláꞌ lahui yöl-laꞌ zxön quiaꞌ naꞌ.
29 Bilaꞌyöni bönachi zián nacuáꞌ niꞌ chiꞌi ni,
ateꞌ taꞌnná:
―Guziúꞌ naꞌ gunnë́.
Iaꞌbal-la bönachi naꞌ taꞌnná:
―Tu gubáz láꞌayi queëꞌ Dios bë́ꞌlenëꞌ Lëꞌ didzaꞌ.
30 Níꞌirö bubiꞌë didzaꞌ Jesús,
rëꞌ légaquiëꞌ:
―Biyö́n chiꞌi ni,
calëga para uziꞌa xibé nedaꞌ,
pero para uzíꞌiliꞌ xibé libíꞌiliꞌ.
31 Chibidxín dza uchiꞌa usörö́ëꞌ Dios bönachi yödzölió ni.
Naꞌa chúꞌunëꞌ Dios tuꞌ xihuiꞌ níꞌilö,
nu naꞌ rinná beꞌe bönachi yödzölió ni.
32 Naꞌa,
channö ilútiëꞌ bönniꞌ nedaꞌ,
en uluꞌchisëꞌ nedaꞌ xitsáꞌ,
gunaꞌ ga uluꞌdubi yúguꞌtë bönachi ga zoaꞌ.
―Netuꞌ biyö́nituꞌ nupa buluꞌlaba le rnna xibá queëꞌ Dios,
lë naꞌ rnna:
Sóaticaꞌsëꞌ Cristo.
¿Nacxi caz naca,
rnnoꞌ Liꞌ:
“Run bayudxi Bönniꞌ Guljëꞌ Bönachi,
uluꞌchisëꞌ Lëꞌ xitsáꞌ”?
¿Nuzxi naꞌ Bönniꞌ Guljëꞌ Bönachi?
35 Níꞌirö Jesús rëꞌ légaquiëꞌ:
―Iaꞌtú chíꞌidoꞌosö sóalenaꞌ nedaꞌ libíꞌiliꞌ,
en nacaꞌ beníꞌ queë́liꞌ.
Guliꞌtá tsanni ni zóalenaꞌ libíꞌiliꞌ,
en zóalen beníꞌ libíꞌiliꞌ,
para cabí ichul-la inítiliꞌ.
Nu bönniꞌ ridë́ꞌ ga chul-la niti bitiꞌ nö́zinëꞌ gazxi saꞌyéajëꞌ.
36 Tsanni ni zóalenaꞌ libíꞌiliꞌ,
nacaꞌ beníꞌ queë́liꞌ.
Guliꞌtséajlëꞌ nedaꞌ nacaꞌ beníꞌ queë́liꞌ para iléꞌeliꞌ beníꞌ naꞌ naca idú.
Cateꞌ Jesús budxi bëꞌë didzaꞌ ni,
yöjhuöjëꞌ yöjcachiꞌ lahuëꞌ lógaquiëꞌ.
Le run nigui bönachi judío, para cabí ilaꞌyéajlëꞌ Jesús
37 Sal-laꞌ benëꞌ Jesús zián yöl-laꞌ huáca lógaquiëꞌ,
bitiꞌ gulaꞌyéajlëꞌë Lëꞌ.
Creyentes y no creyentes (Juan 12.37-50)
Xan,
¿nuzxi caz guyéajlëꞌ didzaꞌ bë́ꞌëtuꞌ?
¿Nuzxi caz buluíꞌinëꞌ Xanruꞌ yöl-laꞌ huáca queëꞌ?
39 Caní guca,
bitiꞌ guca ilaꞌyéajlëꞌë Jesús.
Guca ca naꞌ gunnë́ꞌ caꞌ Isaías:
40 Dios benëꞌ ga gulaꞌchul-la gulaꞌnítiëꞌ,
ateꞌ guca zidi ládxiꞌdoꞌgaquiëꞌ
para cabí ilaꞌléꞌenëꞌ len guiö́j lógaquiëꞌ,
en cabí ilaꞌyéajniꞌinëꞌ lu icja ládxiꞌdoꞌgaquiëꞌ.
Bitiꞌ uluꞌhuöáquiëꞌ quiaꞌ para úngacaꞌ-nëꞌ.
41 Bëꞌë Isaías didzaꞌ ni tuꞌ biléꞌenëꞌ yöl-laꞌ zxön queëꞌ Cristo,
en bëꞌë didzaꞌ ca naca queëꞌ Lëꞌ.
42 Sal-laꞌ raca caní,
gulaꞌyéajlëꞌ bönachi zián Jesús,
ga bidxintë gulaꞌyéajlëꞌë bal-lëꞌ bönniꞌ unná bëꞌ Lëꞌ,
pero tuꞌ tádxinëꞌ yuguꞌ bönniꞌ yudoꞌ fariseo,
bitiꞌ gulunëꞌ ba nalí queëꞌ yálajdoꞌ,
para cabí uluꞌbéajëꞌ légaquiëꞌ tsaz ga naꞌ tuꞌdubëꞌ tuꞌsëdëꞌ queëꞌ Dios.
43 Caní gulunëꞌ tuꞌ tunrëꞌ zxön le tun bönachi légaquiëꞌ bal ca le runëꞌ Dios légaquiëꞌ bal.
Ilún didzaꞌ bëꞌë Jesús ga irugu quégaca bönachi ilátigaca
44 Bëꞌë zidzaj didzaꞌ Jesús,
rnnëꞌ:
―Nu bönniꞌ réajlëꞌë nedaꞌ,
calëga nédaꞌsö réajlëꞌë,
pero réajlëꞌë caꞌ Xuzaꞌ nasö́l-lëꞌë nedaꞌ.
45 Lëscaꞌ caní,
nu bönniꞌ riléꞌenëꞌ nedaꞌ,
riléꞌenëꞌ caꞌ Xuzaꞌ nasö́l-lëꞌë nedaꞌ.
46 Nedaꞌ nacaꞌ beníꞌ,
en bidaꞌ yödzölió ni,
para cabí uluꞌgáꞌanëꞌ ga chul-la yúguꞌtë bönniꞌ ilaꞌyéajlëꞌë nedaꞌ.
47 Channö riyönnëꞌ nu bönniꞌ xtídzaꞌa,
en bitiꞌ runëꞌ le bal,
calëga nedaꞌ ichugaꞌ queëꞌ bönniꞌ naꞌ gátiëꞌ,
tuꞌ bidaꞌ ni,
calëga para ichugaꞌ quégaca bönachi yödzölió ni,
pero para usöláꞌ bönachi yödzölió ni.
48 Nu bönniꞌ ruzóëꞌ nedaꞌ tsöláꞌalö,
en bitiꞌ rizíꞌ lu nëꞌë xtídzaꞌa,
chizóa le ichugu queëꞌ bönniꞌ naꞌ.
Didzaꞌ naꞌ chibë́ꞌlenaꞌ libíꞌiliꞌ naca tu le ichugu queëꞌ bönniꞌ naꞌ dza údxi.
49 Caní naca,
ruáꞌa didzaꞌ,
calëga rácasö quiaꞌ,
pero Xuzaꞌ nasö́l-lëꞌë nedaꞌ gudxëꞌ nedaꞌ le ral-laꞌ inníaꞌ,
encaꞌ ca ral-laꞌ guꞌa didzaꞌ.
50 Nözdaꞌ gunná bëꞌë Dios caní para gataꞌ yöl-laꞌ naꞌbán idú quégaca bönachi.
Caní naca,
didzaꞌ naꞌ ruáꞌa,
ruáꞌa didzaꞌ ca naꞌ Xuzaꞌ chigudxi cazëꞌ nedaꞌ.