Jesús riguibëꞌ níꞌagaquiëꞌ bönniꞌ usëda queëꞌ
13
Niꞌ naca dza siꞌ idxín Laní Pascua cateꞌ tuꞌsubanëꞌ bönniꞌ judío ca benëꞌ Dios,
bubéajëꞌ bönachi queëꞌ luyú Egipto.
Nö́zinëꞌ Jesús chibidxín dza queëꞌ gátiëꞌ,
cateꞌ ral-laꞌ uzë́ꞌë yödzölió ni,
en huöjëꞌ ga zoëꞌ Xuzëꞌ.
Ca naꞌ nadxíꞌinëꞌ bönachi queëꞌ nacuáꞌ yödzölió ni,
naꞌa nadxíꞌinëꞌ légaquiëꞌ ga idxintë gátiëꞌ uláz quégaquiëꞌ.
2 Satanás tuꞌ xihuiꞌ chinagúꞌu yöl-laꞌ Judas Iscariote,
zxíꞌinëꞌ tu bönniꞌ lëꞌ Simón,
para udödëꞌ Jesús lu náꞌagaca nupa iluti Lëꞌ.
Jesús lava los pies de los discipulos (Juan 13.1-17)
3 Nö́zinëꞌ Jesús ca naca,
birúajëꞌ ga zoëꞌ Dios,
en huöjëꞌ caꞌ ga naꞌ zoëꞌ Dios,
ateꞌ Dios Xuzëꞌ chinudödëꞌ lu nëꞌë Lëꞌ idútë yöl-laꞌ unná bëꞌ queëꞌ.
4 Que lë ni naꞌ,
cateꞌ niꞌ tahuëꞌ,
guzuínëꞌ Jesús,
en gudúëꞌ lariꞌ rixóa yenëꞌ.
Gudélëꞌë tu lariꞌ ruzxini náꞌaruꞌ le budë́ꞌë lëꞌë.
5 Níꞌirö gudë́ꞌë nisa tu lu zxigaꞌ guíë,
ateꞌ gusí lahuëꞌ riguibëꞌ níꞌagaquiëꞌ bönniꞌ usëda queëꞌ,
en ruzxinëꞌ níꞌagaquiëꞌ len lariꞌ naꞌ daꞌ lëꞌë.
6 Cateꞌ bidxinëꞌ ga röꞌë Simón Pedro,
Pedro naꞌ rëꞌ Lëꞌ:
―Xan,
¿naruꞌ Liꞌ quíbitsoꞌ niꞌa?
7 Bubiꞌë didzaꞌ Jesús,
rëꞌ lëꞌ:
―Lë ni runaꞌ,
bitiꞌ réajniꞌininuꞌ naꞌa,
pero huadzé tséajniꞌinuꞌ.
8 Níꞌirö Pedro rëꞌ Lëꞌ:
―Bitiꞌ caꞌ quíbi cazuꞌ Liꞌ niꞌa.
Jesús rëꞌ lëꞌ:
―Channö nedaꞌ bitiꞌ quibaꞌ liꞌ,
bitiꞌ caꞌ séquiꞌnuꞌ gunuꞌ nedaꞌ tsözxö́n.
9 Níꞌirö Simón Pedro rëꞌ Lëꞌ:
―Xan,
calë́gasö niꞌa quibuꞌ,
pero quibuꞌ caꞌ naꞌa,
en icjaꞌ.
10 Jesús rëꞌ lëꞌ:
―Nu nayari,
níꞌasö run bayudxi tsari,
tuꞌ naca cazëꞌ dxiꞌa idutëꞌ,
ateꞌ libíꞌiliꞌ nácaliꞌ dxiꞌa,
pero calëga yúguꞌtëliꞌ.
11 Gunnë́ꞌ caní Jesús:
“Calëga yúguꞌtëliꞌ nácaliꞌ dxiꞌa”,
tuꞌ nö́zinëꞌ núlögaquiëꞌ naꞌ udödi Lëꞌ.
12 Gudödi gudibëꞌ Jesús níꞌagaquiëꞌ,
buguélëꞌë lariꞌ naꞌ buxóa yenëꞌ.
Buböꞌë ga tahuëꞌ,
ateꞌ rëꞌ légaquiëꞌ:
―¿Réajniꞌiliꞌ lë naꞌ siꞌ benaꞌ queë́liꞌ?
13 Libíꞌiliꞌ ruíꞌiliꞌ Laꞌ:
Bönniꞌ Usedi encaꞌ:
Xan.
Dxiꞌa naca ca rnnaliꞌ,
tuꞌ caní nacaꞌ.
14 Naꞌa,
channö nedaꞌ nacaꞌ Xanliꞌ,
en Bönniꞌ Usedi queë́liꞌ,
ateꞌ gudibaꞌ níꞌaliꞌ,
lëscaꞌ caní ral-laꞌ gunliꞌ libíꞌiliꞌ,
quíbiliꞌ niꞌa luzáꞌaliꞌ tuliꞌ iaꞌtuliꞌ.
15 Tu le buluíꞌidaꞌ libíꞌiliꞌ para gunliꞌ libíꞌiliꞌ ca naꞌ benaꞌ nedaꞌ.
16 Le nácatë reaꞌ libíꞌiliꞌ:
Bitiꞌ nayë́pisëtërëꞌ tu bönniꞌ huen dxin ca xanëꞌ,
ateꞌ bönniꞌ gubáz bitiꞌ nayë́pisëtërëꞌ ca nu nasöl-laꞌ lëꞌ.
17 Channö réajniꞌiliꞌ yúguꞌtë lë ni,
bicaꞌ ba libíꞌiliꞌ channö gunliꞌ caní.
18 Didzaꞌ ni ruáꞌa bitiꞌ reaꞌ yúguꞌtëliꞌ.
Nöz quézidaꞌ nupa gurö́ cazaꞌ nedaꞌ,
pero run bayudxi gaca lë naꞌ nazúaj lu guichi láꞌayi,
le rnna:
“Nu rágulen nedaꞌ tsözxö́n,
nu ni táꞌbagaꞌ nedaꞌ.”
Jesús predice la traición (Juan 13.18-38)
19 Naꞌa riguíxjöiꞌidaꞌ libíꞌiliꞌ zíꞌalö ca gaca,
para cateꞌ gaca caní,
tséajlëꞌëliꞌ zoa cazaꞌ nedaꞌ.
20 Le nácatë reaꞌ libíꞌiliꞌ:
Nu bönniꞌ gunëꞌ bal gubáz isö́l-laꞌa nedaꞌ,
nedaꞌ caꞌ gunëꞌ bal,
ateꞌ nu bönniꞌ gunëꞌ nedaꞌ bal,
gunëꞌ caꞌ bal Xuzaꞌ,
nasö́l-lëꞌë nedaꞌ.
Riguíxjöꞌë Jesús ca gunëꞌ Judas, udödëꞌ Lëꞌ
21 Cateꞌ Jesús budxi bëꞌë didzaꞌ ni,
buíꞌinnëꞌ,
ateꞌ yálajdoꞌ gunnë́ꞌ:
―Le nácatë reaꞌ libíꞌiliꞌ:
Tu bönniꞌ nútsëꞌë ládjaliꞌ udödëꞌ nedaꞌ.
22 Níꞌirö buluꞌyú lo luzáꞌagaquiëꞌ tuëꞌ iaꞌtúëꞌ bönniꞌ usëda queëꞌ,
en gulaꞌcuꞌë böniga,
ateꞌ taꞌnaba ládxiꞌgaquiëꞌ nuzxi que naꞌ gunnë́ꞌ Jesús caní.
23 Tuëꞌ bönniꞌ usëda queëꞌ Jesús,
bönniꞌ naꞌ Jesús nadxíꞌinëꞌ lëꞌ,
zoëꞌ cuita lëꞌë.
24 Simón Pedro buláꞌa buluíꞌisëꞌ bönniꞌ ni para inábinëꞌ Jesús nuzxi que naꞌ gunnë́ꞌ caní.
25 Níꞌirö bönniꞌ naꞌ zoëꞌ cuita lëꞌë Jesús rëꞌ Lëꞌ:
―Xan,
¿nuzxi naꞌ ruꞌu didzaꞌ que?
26 Bubiꞌë didzaꞌ Jesús,
rëꞌ lëꞌ:
―Náquiëꞌ bönniꞌ naꞌ guꞌa-nëꞌ yöta xtila nabisa.
Níꞌirö busubísiëꞌ yöta xtila naꞌ,
en bëꞌë queëꞌ Judas Iscariote,
zxíꞌinëꞌ tu bönniꞌ lëꞌ Simón.
27 Gudödi gudahuëꞌ Judas yöta xtila naꞌ,
guyaza Satanás tuꞌ xihuiꞌ icja ládxiꞌdaꞌahuëꞌ.
Níꞌirö Jesús rëꞌ lëꞌ:
―Lë naꞌ gunuꞌ,
yöjentë naꞌa.
28 Bitiꞌ taꞌyéajniꞌinëꞌ iaꞌzícaꞌrëꞌ bönniꞌ usëda queëꞌ rö́ꞌögaquiëꞌ tahuëꞌ bizx que naꞌ Jesús gudxëꞌ lëꞌ caní.
29 Tuꞌ nuꞌë Judas buzudi dumí quégaquiëꞌ,
téquinëꞌ bal-lëꞌ Jesús gudxëꞌ lëꞌ:
Yöxíꞌ le gáguruꞌ laní,
o gunnë́ꞌ:
Bëꞌ latiꞌ quégaca bönachi yechiꞌ.
30 Cateꞌ budxi gudahuëꞌ Judas yöta xtila naꞌ,
en niꞌ naca chiꞌi dzö́ꞌölö,
laꞌ birúajtëꞌ.
Tu xibá cubi
31 Cateꞌ chibirúajëꞌ Judas naꞌ,
níꞌirö gunnë́ꞌ Jesús:
―Naꞌa chizóa iláꞌ lahui yöl-laꞌ zxön quiaꞌ nedaꞌ,
Bönniꞌ Guljëꞌ Bönachi,
en iláꞌ lahui caꞌ yöl-laꞌ zxön queëꞌ Dios.
32 Channö iláꞌ lahui yöl-laꞌ zxön queëꞌ Dios niꞌa quiaꞌ nedaꞌ,
Zxíꞌinëꞌ,
lëscaꞌ Lë cazëꞌ Dios gunëꞌ ga iláꞌ lahui yöl-laꞌ zxön quiaꞌ nedaꞌ,
Zxíꞌinëꞌ,
en laꞌ guntëꞌ caní.
33 Libíꞌiliꞌ,
zxíꞌinaꞌdoꞌ,
iaꞌtú chíꞌisö zóalenaꞌ libíꞌiliꞌ.
Uguíljaliꞌ nedaꞌ,
ateꞌ ca naꞌ chigúdxigacaꞌ-nëꞌ bönniꞌ judío,
lëscaꞌ reaꞌ libíꞌiliꞌ naꞌa:
Ga naꞌ tsejaꞌ nedaꞌ,
bitiꞌ gaca guídaliꞌ rácasö queë́liꞌ.
34 Reaꞌ libíꞌiliꞌ tu xibá cubi le rnna caní:
Guliꞌdxíꞌi luzáꞌaliꞌ tuliꞌ iaꞌtuliꞌ.
Ca naꞌ nedaꞌ nadxíꞌidaꞌ libíꞌiliꞌ,
lëscaꞌ caní ral-laꞌ idxíꞌiliꞌ luzáꞌaliꞌ tuliꞌ iaꞌtuliꞌ.
35 Channö huadxíꞌi luzáꞌaliꞌ tuliꞌ iaꞌtuliꞌ,
iléquibeꞌe yúguꞌtë bönachi dáꞌaliꞌ nedaꞌ.
Rnnëꞌ Jesús innë́ꞌ Pedro bitiꞌ núnbëꞌë Lëꞌ
36 Níꞌirö Simón Pedro gunábinëꞌ Jesús,
rnnëꞌ:
―Xan,
¿gazxi caz tsejuꞌ?
Bubiꞌë didzaꞌ Jesús,
rnnëꞌ:
―Ga naꞌ tsejaꞌ nedaꞌ,
bitiꞌ gaca sáꞌlenuꞌ nedaꞌ naꞌa,
pero huadzé guíduꞌ ga tsejaꞌ nedaꞌ.
37 Pedro rëꞌ Lëꞌ:
―Xan,
¿bizx que bitiꞌ gaca sáꞌlenaꞌ Liꞌ naꞌa?
Chizóaꞌ udödaꞌ yöl-laꞌ naꞌbán quiaꞌ,
gátiaꞌ tuꞌ nadxíꞌidaꞌ Liꞌ.
38 Bubiꞌë didzaꞌ Jesús,
rëꞌ lëꞌ:
―¿Naruꞌ udöduꞌ yöl-laꞌ naꞌbán quiuꞌ tuꞌ nadxíꞌinuꞌ nedaꞌ?
Le nácatë reaꞌ liꞌ,
zíꞌalö ca cö́dxibaꞌ böra,
liꞌ táꞌbáguꞌu tsonna luzuí,
innóꞌ bitiꞌ núnbëꞌu nedaꞌ.