Náquiëꞌ Jesús nöza tséajlenruꞌ para idxinruꞌ ga zoëꞌ Dios Xuz
14
Rnnëꞌ Jesús:
―Bitiꞌ cöꞌliꞌ baniga lu icja ládxiꞌdoꞌoliꞌ.
Guliꞌtséajlëꞌ Dios,
en guliꞌtséajlëꞌ caꞌ nedaꞌ.
2 Lu yuꞌu lidxëꞌ Xuzaꞌ lataj zián nacuáꞌ.
Laꞌtuꞌ cabí naca caní,
nedaꞌ chigudxi cazaꞌ libíꞌiliꞌ.
Tsejaꞌ naꞌa,
tsöjpáꞌa lataj queë́liꞌ ga tsöjsóaliꞌ.
El único camino a Dios (Juan 14.1-14)
3 Channö huayéajaꞌ,
en tsöjpáꞌa lataj queë́liꞌ ga tsöjsóaliꞌ,
huödaꞌ leyúbölö,
ateꞌ uchëꞌa libíꞌiliꞌ lataj quiaꞌ,
para ga naꞌ tsöjsóaꞌ nedaꞌ,
tsöjsóaliꞌ caꞌ libíꞌiliꞌ.
4 Nöz quéziliꞌ ga niꞌ tsejaꞌ,
en núnbëꞌëliꞌ caꞌ nöza.
5 Tomás rëꞌ Lëꞌ:
―Xan,
bitiꞌ nöztuꞌ gazxi naꞌ tsejuꞌ.
¿Nacxi caz gaca gúnbëꞌëtuꞌ nöza?
6 Bubiꞌë didzaꞌ Jesús,
rëꞌ lëꞌ:
―Nedaꞌ naca cazaꞌ nöza,
en nacaꞌ caꞌ le naca idútë li,
en nacaꞌ caꞌ Nu nabánigaca bönachi.
Niꞌa quiaꞌ nédaꞌsö gaca nu idxín ga zoëꞌ Dios Xuz.
7 Laꞌtuꞌ núnbëꞌëliꞌ nedaꞌ,
Xuzaꞌ caꞌ núnbëꞌëliꞌ-nëꞌ.
Naꞌa,
núnbëꞌëliꞌ-nëꞌ,
en chibiléꞌeliꞌ-nëꞌ.
8 Níꞌirö Felipe rëꞌ Lëꞌ:
―Xan,
buluíꞌi netuꞌ Xuzuꞌ,
ateꞌ nácatë queë́tuꞌ.
9 Bubiꞌë didzaꞌ Jesús,
rëꞌ lëꞌ:
―Felipe,
xidzé chiguca zóalenaꞌ libíꞌiliꞌ.
¿Naruꞌ cabí núnbëꞌëtsoꞌ nedaꞌ?
Nu bönniꞌ riléꞌenëꞌ nedaꞌ,
riléꞌenëꞌ caꞌ Xuzaꞌ.
¿Rnnatsoꞌ:
“Buluíꞌi netuꞌ Xuzuꞌ”?
10 ¿Naruꞌ cabí réajlëꞌu zóalen cazaꞌ-nëꞌ Xuzaꞌ,
ateꞌ Xuzaꞌ zóalen cazëꞌ nedaꞌ?
Yuguꞌ didzaꞌ ni ruíꞌilenaꞌ libíꞌiliꞌ,
calëga rácasö quiaꞌ ruáꞌa didzaꞌ ni,
pero Xuzaꞌ zóalen cazëꞌ nedaꞌ,
Lë cazëꞌ runëꞌ dxin ni.
11 Guliꞌtséajlëꞌ nedaꞌ,
zóalen cazaꞌ-nëꞌ Xuzaꞌ,
ateꞌ Xuzaꞌ zóalen cazëꞌ nedaꞌ.
Channö cabí gaca gunliꞌ caní,
guliꞌtséajlëꞌ nedaꞌ niꞌa quégaca dxin ni runaꞌ.
12 Le nácatë reaꞌ libíꞌiliꞌ:
Yuguꞌ dxin ni runaꞌ nedaꞌ,
lëscaꞌ gunëꞌ bönniꞌ naꞌ réajlëꞌë nedaꞌ,
ateꞌ le zxö́ntërö caꞌ gunëꞌ bönniꞌ naꞌ tuꞌ huöjaꞌ ga zoëꞌ Dios Xuz.
13 Yúguꞌtë le inábiliꞌ Dios Xuz,
en ugunliꞌ dxin Laꞌ nedaꞌ,
nedaꞌ gunaꞌ lë naꞌ inábaliꞌ,
para uluꞌa lahui nedaꞌ,
Zxíꞌinëꞌ,
yöl-laꞌ zxön queëꞌ Dios Xuz.
14 Bítiꞌtës bi inábaliꞌ,
en ugunliꞌ dxin Laꞌ nedaꞌ,
nedaꞌ gunaꞌ le.
Jesús isö́l-lëꞌë Dios Böꞌ Láꞌayi, para idisóalenëꞌ bönachi queëꞌ
15 Rnnëꞌ caꞌ Jesús:
―Channö nadxíꞌiliꞌ nedaꞌ,
guliꞌgún le reaꞌ libíꞌiliꞌ,
Jesús habla del Espíritu Santo (Juan 14.15-31)
16 ateꞌ nedaꞌ gátaꞌyuaꞌ lahuëꞌ Dios Xuz,
ateꞌ Lëꞌ isö́l-lëꞌë queë́liꞌ Nu yúbölö Nu gácalen libíꞌiliꞌ,
Nu utipa ládxiꞌliꞌ,
en sóalenticaꞌsö libíꞌiliꞌ.
Nu ni naca Dios Böꞌ Láꞌayi,
Nu ruíꞌi didzaꞌ idútë li.
17 Bitiꞌ gaca uluꞌzíꞌ bönachi yödzölió ni xibë́ꞌ Lëꞌ,
tuꞌ cabí gaca ilaꞌléꞌe Lëꞌ,
en bitiꞌ gaca ilúnbeꞌe Lëꞌ.
Zóalen cazëꞌ libíꞌiliꞌ,
ateꞌ soëꞌ lu icja ládxiꞌdoꞌoliꞌ.
18 Bitiꞌ ucáꞌanaꞌ libíꞌiliꞌ ca yuguꞌ biꞌi uzë́bidoꞌ.
Huödaꞌ udusóalenaꞌ libíꞌiliꞌ.
19 Iaꞌtú chíꞌidoꞌosö bítiꞌrö ilaꞌléꞌe bönachi yödzölió ni nedaꞌ,
pero libíꞌiliꞌ uléꞌeliꞌ nedaꞌ.
Tuꞌ zoa cazaꞌ nabanaꞌ nedaꞌ,
libíꞌiliꞌ caꞌ,
tsaz sóaliꞌ ibanliꞌ.
20 Dza níꞌirö cateꞌ Dios Böꞌ Láꞌayi naꞌ idisóalenëꞌ libíꞌiliꞌ,
inö́z quéziliꞌ zóalen cazaꞌ-nëꞌ Xuzaꞌ Dios,
ateꞌ libíꞌiliꞌ zóalenliꞌ nedaꞌ,
ateꞌ nedaꞌ caꞌ zóalen cazaꞌ libíꞌiliꞌ.
21 Nu bönniꞌ rizíꞌ lu nëꞌë xtídzaꞌa,
en runëꞌ ca rnna,
naca bëꞌ nadxíꞌinëꞌ nedaꞌ.
Xuzaꞌ Dios idxíꞌinëꞌ bönniꞌ naꞌ nadxíꞌinëꞌ nedaꞌ,
ateꞌ nedaꞌ idxíꞌidaꞌ-nëꞌ bönniꞌ naꞌ,
en uluíꞌi lahuaꞌ lahuëꞌ.
22 Judas rëꞌ lëꞌ,
pero calëga Judas Iscariote,
rnnëꞌ:
―Xan,
¿nacxi caz gaca uluíꞌi loꞌ lotuꞌ netuꞌ,
en bitiꞌ uluíꞌi loꞌ lógaca bönachi yödzölió?
23 Bubiꞌë didzaꞌ Jesús,
rëꞌ lëꞌ:
―Nu bönniꞌ nadxíꞌinëꞌ nedaꞌ gunëꞌ ca rnna xtídzaꞌa,
ateꞌ Xuzaꞌ Dios idxíꞌinëꞌ bönniꞌ naꞌ,
ateꞌ guídatuꞌ idisóalentuꞌ-nëꞌ bönniꞌ naꞌ lu icja ládxiꞌdaꞌahuëꞌ.
24 Bönniꞌ naꞌ bitiꞌ nadxíꞌinëꞌ nedaꞌ bitiꞌ runëꞌ ca rnna xtídzaꞌa.
Didzaꞌ naꞌ biyö́niliꞌ bëꞌa nedaꞌ,
calë́gasö quiaꞌ naꞌ,
pero naca queëꞌ Dios Xuz nasö́l-lëꞌë nedaꞌ.
25 ’Rë cazaꞌ libíꞌiliꞌ yuguꞌ lë ni tsanni ni zóalenaꞌ libíꞌiliꞌ,
26 pero Dios Böꞌ Láꞌayi gácalenëꞌ libíꞌiliꞌ,
en utipëꞌ ládxiꞌliꞌ.
Xuzaꞌ Dios isö́l-lëꞌë Lëꞌ queë́liꞌ tuꞌ ugunliꞌ dxin Laꞌ nedaꞌ.
Usédinëꞌ libíꞌiliꞌ yúguꞌtë,
en usë́ꞌë ládxiꞌliꞌ ca naca yúguꞌtë didzaꞌ naꞌ chigudxaꞌ libíꞌiliꞌ.
27 ’Rucáꞌanaꞌ queë́liꞌ le cuéqui dxi ládxiꞌliꞌ.
Runnaꞌ queë́liꞌ yöl-laꞌ röꞌö dxi ladxiꞌ quiaꞌ.
Yöl-laꞌ röꞌö dxi ladxiꞌ naꞌ runnaꞌ queë́liꞌ bitiꞌ naca ca le tunna queë́liꞌ bönachi yödzölió ni.
Bitiꞌ ichixi icja ládxiꞌdoꞌoliꞌ,
en bitiꞌ gadxi idzö́biliꞌ.
28 Chibiyö́niliꞌ ca naꞌ chigudxaꞌ libíꞌiliꞌ:
Huöjaꞌ,
ateꞌ huödaꞌ udusóalenaꞌ libíꞌiliꞌ.
Laꞌtuꞌ nadxíꞌiliꞌ nedaꞌ,
udzéjaliꞌ cateꞌ niꞌ gudxaꞌ libíꞌiliꞌ huöjaꞌ ga zoëꞌ Dios Xuz,
tuꞌ nayë́pisëtërëꞌ Dios Xuz ca nedaꞌ.
29 Naꞌa,
chigudxaꞌ libíꞌiliꞌ zíꞌalö ca siꞌ gaca,
para cateꞌ gaca caní,
tséajlëꞌëliꞌ nedaꞌ.
30,31 ’Bítiꞌrö güíꞌilenaꞌ libíꞌiliꞌ didzaꞌ zián, tuꞌ zaꞌ tuꞌ xihuiꞌ, nu rinná beꞌe bönachi yödzölió ni. Sal-laꞌ bitiꞌ bi dë lu nëꞌe bi gun quiaꞌ nedaꞌ, ral-laꞌ gaca caní para iléquibeꞌe bönachi yödzölió ni nadxíꞌidaꞌ-nëꞌ Dios Xuz, en runaꞌ ca naꞌ chigudxëꞌ nedaꞌ gunaꞌ. Guliꞌchasa, uzáꞌaruꞌ ni.