LE GULUNËꞌ BÖNNIꞌ GUBÁZ NASÖ́L-LËꞌË CRISTO
Los Hechos
Le guzxíꞌ lu nëꞌë Dios, isö́l-lëꞌë Dios Böꞌ Láꞌayi
1
Cateꞌ buzúajaꞌ lu guichi zíꞌalö,
quiuꞌ liꞌ,
Teófilo,
nedaꞌ,
Lucas,
buzúajaꞌ yúguꞌtë le gusí lahuëꞌ runëꞌ Jesús,
en rusédinëꞌ
2 ga bidxintë dza buëpëꞌ yehuaꞌ yubá.
Cateꞌ siꞌ huëpëꞌ Jesús yehuaꞌ yubá,
dzáguiëꞌ Dios Böꞌ Láꞌayi Lëꞌ,
gunná bëꞌë ca ral-laꞌ ilunëꞌ gubáz queëꞌ,
yuguꞌ bönniꞌ naꞌ gurö́ cazëꞌ.
3 Gudödi gudíꞌi guzxáquëꞌë Jesús,
gútiëꞌ.
Níꞌirö bubanëꞌ,
en buluíꞌi lahuëꞌ lógaquiëꞌ gubáz queëꞌ naꞌ.
Buluíꞌinëꞌ légaquiëꞌ zián le gulaca bëꞌ zoëꞌ nabanëꞌ,
le cabí gaca nu táꞌbagaꞌ.
Zián luzuí buluíꞌi lahuëꞌ lógaquiëꞌ idú ca choáꞌ dza,
en bë́ꞌlenëꞌ légaquiëꞌ didzaꞌ ca rinná bëꞌë Dios.
4 Cateꞌ niꞌ nacuꞌë tsözxö́n,
gunná béꞌenëꞌ légaquiëꞌ cabí uluꞌzë́ꞌë Jerusalén.
Jesús gudxëꞌ légaquiëꞌ,
rnnëꞌ:
―Guliꞌcö́z niꞌ le guzxíꞌ lu nëꞌë Xuzaꞌ isö́l-lëꞌë queë́liꞌ ca naꞌ chibusiyö́n quézidaꞌ libíꞌiliꞌ.
5 Gunnë́ꞌ caꞌ:
―Le nácatë Juan buquilëꞌ bönachi nisa lu nisa.
Naꞌa bitiꞌ tse xidzé gaca queë́liꞌ le ruluíꞌi yöl-laꞌ ridila nisa ni,
idisóalenëꞌ Dios Böꞌ Láꞌayi libíꞌiliꞌ.
Ruhuëpëꞌ Jesús yehuaꞌ yubá
6 Níꞌirö yuguꞌ bönniꞌ taꞌyéajlëꞌë Jesús,
nudúbigaquiëꞌ niꞌ,
gulaꞌnábinëꞌ Lëꞌ,
taꞌnnë́ꞌ:
―Xan,
¿naruꞌ gunuꞌ ga ilaꞌnná bëꞌ bönachi Israel leyúbölö dza ni zóaruꞌ naꞌa?
7 Jesús gudxëꞌ légaquiëꞌ:
―Bitiꞌ nequi queë́liꞌ inö́ziliꞌ bizxi dza o bizxi dzöꞌ gunëꞌ Dios Xuz le nuzóëꞌ lu naꞌ cazëꞌ.
8 Síꞌiliꞌ yöl-laꞌ huáca cateꞌ guídëꞌ Dios Böꞌ Láꞌayi idisóalenëꞌ libíꞌiliꞌ.
Níꞌirö gunliꞌ ba nalí quiaꞌ nedaꞌ lu yödzö Jerusalén,
en idú luyú Judea,
en luyú Samaria,
en ga idxíntëliꞌ idútë yödzölió.
9 Cateꞌ budxi bë́ꞌlenëꞌ légaquiëꞌ didzaꞌ ni,
tsanni niꞌ tuꞌyusëꞌ caꞌ Lëꞌ,
laꞌ buë́pitëꞌ xitsáꞌ ga röꞌö tu böaj le bucacheꞌ Lëꞌ,
ateꞌ bítiꞌrö bilaꞌléꞌenëꞌ Lëꞌ.
10 Tsanni niꞌ tuꞌyúëꞌ lúzxibalö cateꞌ niꞌ buëpëꞌ Jesús,
buluꞌluíꞌi lógaquiëꞌ chopëꞌ gubáz láꞌayi ga naꞌ nacuꞌë,
nácugaquiëꞌ lariꞌ chiguíchidoꞌos.
11 Chopëꞌ ni gulë́ꞌ légaquiëꞌ,
taꞌnnë́ꞌ:
―Bönniꞌ Galilea,
¿bizx que ruyuliꞌ lúzxibalö?
Lë cazëꞌ Jesús ni siꞌ guzë́ꞌë ga zóaliꞌ,
buëpëꞌ yehuaꞌ yubá,
lëscaꞌ caní huödëꞌ leyúbölö ca naꞌ chibiléꞌeliꞌ-nëꞌ söhuö́jëꞌ yehuaꞌ yubá.
Taꞌbö́ëꞌ Matías para tsáziëꞌ xilatjëꞌ Judas
12 Níꞌirö gulaꞌzë́ꞌë ga naꞌ röꞌö guíꞌadoꞌ naꞌ nazíꞌi le Guíꞌa Yaga Olivo,
ateꞌ yöjhuö́jgaquiëꞌ Jerusalén.
Guíꞌadoꞌ ni dë gálaꞌsö ga dë Jerusalén,
tsca nazíꞌgaquiëꞌ lataj taꞌzë́ꞌë dza láꞌayi quégaquiëꞌ.
13 Cateꞌ buluꞌdxinëꞌ yödzö niꞌ,
gulaꞌbenëꞌ ga naca buropi cuía lu yuꞌu,
ga niꞌ taꞌcuꞌë Pedro,
en Jacobo,
en Juan,
en Andrés,
en Felipe en Tomás,
en Bartolomé,
en Mateo,
en Jacobo,
zxíꞌinëꞌ Alfeo,
en Simón,
bönniꞌ naꞌ ruíꞌi ládxëꞌë ladzëꞌ,
en Judas,
bö́chëꞌë Jacobo.
14 Yúguꞌtë bönniꞌ ni tuꞌlidzëꞌ Dios tsözxö́n,
ateꞌ yuguꞌ bö́chëꞌë Jesús,
en María,
xinë́ꞌë Jesús,
en iaꞌzícaꞌrönu nigula caꞌ núngaquiëꞌ légaquiëꞌ tsözxö́n.
15 Laꞌ dza náꞌasö guzuínëꞌ Pedro gatsaj láhuiꞌlö ga nacuꞌë böchiꞌ luzáꞌaruꞌ naꞌ taꞌyéajlëꞌë Cristo.
Gulaca idú ca xópalalaj bönachi nupa nudúbigaca niꞌ.
16 Pedro gudxëꞌ légaquiëꞌ,
rnnëꞌ:
―Böchiꞌ luzáꞌadoꞌ.
Ben bayudxi guca le nazúaj lu guichi láꞌayi,
ca naꞌ gunnë́ꞌ Dios Böꞌ Láꞌayi dza niꞌtë,
le buzúajëꞌ David lu guichi,
ca guca queëꞌ Judas,
bönniꞌ naꞌ guchë́ꞌë nupa niꞌ gulaꞌzö́n Jesús.
17 Judas naꞌ gubábalenëꞌ rëꞌu,
en bénlenëꞌ rëꞌu tsözxö́n dxin ni.
18 Gulaꞌzíꞌinëꞌ tu laꞌ yëla lazxaj que döꞌ naꞌ biꞌë bönniꞌ ni.
Judas ni gubixëꞌ,
en birözaꞌ lëꞌë,
ateꞌ bilaꞌrúaj yúguꞌtë le dzöꞌö lëꞌë.
19 Cateꞌ bilaꞌyöni bönachi nacuáꞌ Jerusalén lë ni,
guluꞌë le laꞌ yëla naꞌ Acéldama,
tu didzaꞌ hebreo le rnna lu didzaꞌ xidzaꞌ:
Laꞌ Yëla Rön.
20 Caní guca queëꞌ Judas,
ca naꞌ nazúaj lu guichi láꞌayi nazíꞌi le Salmos,
le rnna:
Ugáꞌana cáꞌasö lidxëꞌ,
en bitiꞌ idzöli nu soa yuꞌu naꞌ.
Rnna caꞌ:
Nu yúbölö tsaza xilatjëꞌ.
21,22 ’Run bayudxi naꞌa cöruꞌ-nëꞌ tu bönniꞌ gunëꞌ rëꞌu tsözxö́n para gunëꞌ ba nalí queëꞌ Jesús, ca guca, bubanëꞌ lu yöl-laꞌ guti. Ral-laꞌ gáquiëꞌ bönniꞌ nabábalenëꞌ bönniꞌ niꞌ gulaꞌcuáꞌlenëꞌ rëꞌu dza niꞌte cateꞌ niꞌ Xanruꞌ Jesús gudálenëꞌ rëꞌu. Gulaꞌsí lógaquiëꞌ nacuáꞌlenëꞌ rëꞌu cateꞌ niꞌ buquilëꞌ Juan bönachi nisa, ga bidxintë dza buëpëꞌ Jesús yehuaꞌ yubá, cateꞌ buzë́ꞌë ga zóaruꞌ.
23 Níꞌirö buluꞌluꞌë chopëꞌ,
José,
en Matías.
José naꞌ lëꞌ caꞌ Barsabás,
en zoa iaꞌtú lëꞌ Justo.
24 Níꞌirö buluꞌlidzëꞌ Dios,
taꞌnnë́ꞌ:
―Xantuꞌ Dios,
nunbëꞌ cazuꞌ icja ládxiꞌdoꞌgaca yúguꞌtë bönachi.
Buluíꞌi netuꞌ nulëꞌ chopëꞌ ni chigurö́ cazuꞌ Liꞌ
25 para tsáziëꞌ lu dxin ni para gáquiëꞌ gubáz quiuꞌ.
Tsáziëꞌ xilatjëꞌ Judas,
bönniꞌ niꞌ bunítiëꞌ xilatjëꞌ tuꞌ benëꞌ dul-laꞌ,
ateꞌ guyijëꞌ xilataj cazëꞌ lataj chul-la.
26 Níꞌirö buluꞌzúajëꞌ yuguꞌ lu guichi lágaquiëꞌ,
tu queëꞌ José,
en iaꞌtú queëꞌ Matías.
Buluꞌgútsiꞌnëꞌ luzë́ꞌeguequi,
en buluꞌbéajëꞌ tu,
ateꞌ birúaj le nazúaj lëꞌ Matías.
Caní guca,
Matías naꞌ gubábalenëꞌ iaꞌchinéajëꞌ gubáz queëꞌ Cristo.