Ruluíꞌi lahuëꞌ Jesús lógaquiëꞌ gadxëꞌ bönniꞌ usëda queëꞌ
21
Gudödi guca lë ni,
leyúbölö buluíꞌi lahuëꞌ Jesús lógaquiëꞌ bönniꞌ usëda queëꞌ ga naca raꞌ nísadoꞌ que Tiberias,
ateꞌ caní guca ca naꞌ buluíꞌi lahuëꞌ lógaquiëꞌ.
Jesús en el mar de Galilea (Juan 21.1-25)
2 Nudúbigaquiëꞌ Simón Pedro,
en Tomás,
bönniꞌ naꞌ tuꞌë caꞌ lëꞌ Bönniꞌ Bilidiꞌ,
en Natanael,
bönniꞌ yödzö Caná que luyú Galilea,
en chopëꞌ bönniꞌ zxíꞌinëꞌ Zebedeo,
en iaꞌchopëꞌ caꞌ bönniꞌ usëda queëꞌ Jesús.
3 Simón Pedro rëꞌ légaquiëꞌ:
―Tseajaꞌ tsöjxönaꞌ-baꞌ böla.
Tëꞌ lëꞌ iaꞌzícaꞌrëꞌ,
taꞌnnë́ꞌ:
―Guntuꞌ liꞌ tsözxö́n.
Níꞌirö yöjáquiëꞌ,
en gulaꞌbenëꞌ tu lëꞌe bárcodoꞌ,
ateꞌ rëla niꞌ nitubaꞌ böla bitiꞌ gulaꞌzönëꞌ-baꞌ.
4 Cateꞌ chizáꞌ reníꞌ,
yöjsóëꞌ Jesús luyú raꞌ nisa naꞌ,
pero bitiꞌ téquibeꞌenëꞌ bönniꞌ usëda queëꞌ Jesús Lëꞌ naꞌ.
5 Níꞌirö Jesús rëꞌ légaquiëꞌ:
―Zxíꞌinaꞌdoꞌ,
¿naruꞌ cabí debaꞌ latiꞌ böla queë́liꞌ?
Buluꞌbiꞌë didzaꞌ,
tëꞌ Lëꞌ:
―Nitubaꞌ.
6 Níꞌirö Jesús rëꞌ légaquiëꞌ:
―Guliꞌchílaj yöxaj böla queë́liꞌ tsöláꞌa ibëla barco,
ateꞌ sö́ngacaliꞌ-baꞌ.
Níꞌirö gulaꞌchiljëꞌ le,
ateꞌ bítiꞌrö guca uluꞌbéajëꞌ le,
tuꞌ naguírabaꞌ böla lëꞌe yöxaj böla naꞌ.
7 Níꞌirö bönniꞌ usëda naꞌ nadxíꞌinëꞌ Jesús lëꞌ rëꞌ Pedro,
rnnëꞌ:
―¡Xanruꞌ naꞌ!
Cateꞌ biyönnëꞌ Simón Pedro,
“Xanruꞌ naꞌ”,
böácuëꞌ lariꞌ gúcuëꞌ,
tuꞌ nagǘëꞌ le zíꞌalö,
ateꞌ guyáziëꞌ lu nisa.
8 Bilaꞌdxinëꞌ iaꞌzícaꞌrëꞌ bönniꞌ usëda naꞌ,
tuꞌsë́ꞌë barco naꞌ,
sunáꞌayöjgaquiëꞌ yöxaj ga naꞌ dzö́ꞌöbaꞌ böla,
tuꞌ cabí naca ziꞌtuꞌ ga dë luyú bidxi.
Nácatë ca tu gayuáꞌ lögaꞌ níꞌaruꞌ.
9 Cateꞌ bilaꞌdxinëꞌ luyú bidxi naꞌ,
bilaꞌléꞌenëꞌ röꞌö tu guíꞌ boꞌ yalaj niꞌ,
en zxóabaꞌ tubaꞌ böla láhuilö,
en dë caꞌ yöta niꞌ.
10 Jesús rëꞌ légaquiëꞌ:
―Guliꞌdiguáꞌa-baꞌ ni böla naꞌ siꞌ guzxö́ngacaliꞌ-baꞌ.
11 Gurenëꞌ Pedro lëꞌe barco naꞌ,
ateꞌ gúꞌuyöjëꞌ yöxaj naꞌ zacaꞌ luyú bidxi,
nalírö-baꞌ böla zxön,
idú tu gayuáꞌ yuꞌ chíꞌinu-unbaꞌ.
Sal-laꞌ nácagacabaꞌ böla zián,
bitiꞌ birözaꞌ yöxaj naꞌ.
12 Níꞌirö Jesús rëꞌ légaquiëꞌ:
―Guliꞌdá gáguliꞌ.
Bitiꞌ burúguinëꞌ nitúëꞌ bönniꞌ usëda queëꞌ naꞌ inábinëꞌ Lëꞌ,
innë́ꞌ:
“¿Nuzxi Liꞌ?”
Nö́zguequi quézinëꞌ náquiëꞌ Xanruꞌ.
13 Níꞌirö gubíguiꞌë Jesús,
en gudélëꞌë yöta naꞌ,
encaꞌ böla naꞌ,
ateꞌ bëꞌë quégaquiëꞌ.
14 Lë ni naca le bunni luzuí buluíꞌi lahuëꞌ Jesús lógaquiëꞌ bönniꞌ usëda queëꞌ gudödi bubanëꞌ lu yöl-laꞌ guti.
Jesús ruíꞌilenëꞌ Simón Pedro didzaꞌ
15 Cateꞌ budxi gulahuëꞌ,
Jesús rëꞌ Simón Pedro:
―Simón,
zxíꞌinëꞌ Jonás,
¿naruꞌ nadxíꞌirönuꞌ nedaꞌ ca nadxíꞌiguequinëꞌ bönniꞌ ni nedaꞌ?
Bubiꞌë didzaꞌ Pedro,
rëꞌ Lëꞌ:
―Ön,
Xan.
Liꞌ nöz quézinuꞌ raza ládxaꞌa Liꞌ.
Jesús rëꞌ lëꞌ:
―Bugagu yuguꞌ böꞌcuꞌ zxílaꞌdoꞌ quiaꞌ.
16 Jesús rëꞌ lëꞌ le buropi luzuí,
rnnëꞌ:
―Simón,
zxíꞌinëꞌ Jonás,
¿naruꞌ nadxíꞌinuꞌ nedaꞌ?
Bubiꞌë didzaꞌ Pedro,
rëꞌ Lëꞌ:
―Ön,
Xan.
Liꞌ nöz quézinuꞌ raza ládxaꞌa Liꞌ.
Jesús rëꞌ lëꞌ:
―Bugagu yuguꞌ böꞌcuꞌ zxilaꞌ quiaꞌ.
17 Jesús rëꞌ lëꞌ le bunni luzuí:
―Simón,
zxíꞌinëꞌ Jonás,
¿raza ládxuꞌu nedaꞌ?
Buíꞌinnëꞌ Pedro tuꞌ le chibunni luzuí rinabi yúdxinëꞌ lëꞌ,
gunnë́ꞌ:
“¿Raza ládxuꞌu nedaꞌ?”
Bubiꞌë didzaꞌ Pedro,
rëꞌ Lëꞌ:
―Xan,
yúguꞌtë nöz quézinuꞌ Liꞌ.
Nö́zinuꞌ raza ládxaꞌa Liꞌ.
Jesús rëꞌ lëꞌ:
―Bugagu yuguꞌ böꞌcuꞌ zxilaꞌ quiaꞌ.
18 Le nácatë reaꞌ liꞌ,
cateꞌ niꞌ nacuꞌ raꞌbandoꞌ,
rácasö quiuꞌ bugacu cuinuꞌ,
en ca gunnásö quiuꞌ gudóꞌ.
Cateꞌ iguluꞌ,
ulí noꞌo,
ateꞌ nu yúbölö ugacu liꞌ lariꞌ,
en ichë́ꞌ liꞌ ga niꞌ bitiꞌ guë́ꞌënnuꞌ tseajuꞌ.
19 Yuguꞌ didzaꞌ ni bëꞌë Jesús naca bëꞌ naca gátiëꞌ Pedro,
tsöjtë́ꞌë lëꞌe yaga cruz,
para gaca yöl-laꞌ ba queëꞌ Dios.
Cateꞌ budxi gunnë́ꞌ caní Jesús,
gunnë́ꞌ caꞌ iaꞌtú:
―Gudáꞌ nedaꞌ.
Ruꞌë didzaꞌ Jesús ca gaca queëꞌ bönniꞌ usëda naꞌ nadxíꞌinëꞌ
20 Buécjëꞌ Pedro,
en biléꞌenëꞌ söjnáhuëꞌ légaquiëꞌ bönniꞌ usëda naꞌ Jesús nadxíꞌinëꞌ lëꞌ.
Náquiëꞌ bönniꞌ usëda naꞌ guröꞌë cuita lëꞌë Jesús cateꞌ niꞌ gulahuëꞌ,
en gudxëꞌ Jesús:
“Xan,
¿nuzxi naꞌ udödi Liꞌ?”
21 Cateꞌ Pedro biléꞌenëꞌ lëꞌ,
rëꞌ Jesús:
―Xan,
¿bizxi gunëꞌ bönniꞌ ni?
22 Jesús rëꞌ lëꞌ:
―Channö rë́ꞌëndaꞌ ugáꞌanëꞌ bönniꞌ ni ga idxinrö dza huödaꞌ,
bitiꞌ ral-laꞌ cöꞌu böniga.
Gudáꞌa nedaꞌ liꞌ.
23 Guzë́ didzaꞌ ni ga nacuꞌë bö́chiꞌruꞌ taꞌyéajlëꞌë Cristo.
Téquinëꞌ bitiꞌ gátiëꞌ bönniꞌ usëda naꞌ.
Jesús bitiꞌ gudxëꞌ lëꞌ bitiꞌ gátiëꞌ,
pero caní gunnë́ꞌ:
“Channö rë́ꞌëndaꞌ ugáꞌanëꞌ bönniꞌ ni ga idxinrö dza huödaꞌ,
bitiꞌ ral-laꞌ cöꞌu böniga.”
24 Bönniꞌ usëda ni nacaꞌ nedaꞌ,
Juan.
Runaꞌ ba nalí quéguequi lë ni,
en nuzúajaꞌ yuguꞌ lë ni lu guichi,
ateꞌ nö́ziliꞌ naca idútë li le runaꞌ ba nalí.
25 Ziánrö caꞌ le benëꞌ Jesús.
Channö nu uzúaj léguequi lu guichi tu tu,
rusacaꞌ quiaꞌ bitiꞌ guequi yödzölió ni ilaꞌcuáꞌ guichi naꞌ ral-laꞌ nu uzúaj.
Caꞌ caz.