Rubanëꞌ Jesús lu yöl-laꞌ guti
20
Cateꞌ chinaca zíladoꞌ dza domingo,
en niꞌ naca chul-la,
guyéajnu María Magdalena raꞌ yeru ba naꞌ,
ateꞌ biléꞌenu chinadúa guiö́jtaꞌa naꞌ busayaj ga nu riyaza yeru ba naꞌ.
2 Níꞌirö bö́ajnu carelö ga zoëꞌ Simón Pedro,
dzáguiëꞌ lëꞌ iaꞌtúëꞌ bönniꞌ usëda,
bönniꞌ naꞌ Jesús nadxíꞌinëꞌ lëꞌ,
ateꞌ rënu légaquiëꞌ:
―Buluꞌbéajëꞌ Xanruꞌ yeru ba niꞌ,
en bitiꞌ nöztuꞌ gazxi gulaꞌguꞌë Lëꞌ.
3 Níꞌirö bilaꞌrúajëꞌ Pedro,
en iaꞌtúëꞌ bönniꞌ usëda naꞌ,
söjáquiëꞌ raꞌ yeru ba naꞌ.
4 Tsözxö́n taꞌxítiꞌë iropëꞌ,
pero iaꞌtúëꞌ bönniꞌ usëda naꞌ guxítiꞌrëꞌ carelö ca Pedro,
ateꞌ zíꞌalö lëꞌ bidxinëꞌ raꞌ yeru ba naꞌ.
5 Biyéchuëꞌ,
en buyúëꞌ lu yeru ba naꞌ,
ateꞌ biléꞌenëꞌ yuguꞌ láriꞌdoꞌ naꞌ bilaꞌröli-nëꞌ Jesús,
nacuáꞌ niꞌ,
pero bitiꞌ guyáziëꞌ yeru ba naꞌ.
6 Níꞌirö bidxinëꞌ Simón Pedro cúdzuꞌlëꞌ iaꞌtúëꞌ bönniꞌ usëda naꞌ,
ateꞌ guyáziëꞌ lëꞌ yeru ba naꞌ,
en biléꞌenëꞌ láriꞌdoꞌ naꞌ nacuáꞌ niꞌ.
7 Lëscaꞌ biléꞌenëꞌ láriꞌdoꞌ naꞌ gulaꞌxóëꞌ icjëꞌ Jesús,
bitiꞌ dëlen iaꞌzícaꞌrö láriꞌdoꞌ naꞌ,
pero tsöláꞌalö nudubi quez.
8 Níꞌirö guyáziëꞌ caꞌ iaꞌtúëꞌ bönniꞌ usëda naꞌ bidxinëꞌ zíꞌalö raꞌ yeru ba naꞌ,
en biléꞌenëꞌ ca naꞌ naca,
ateꞌ guyéajlëꞌë didzaꞌ bëꞌë Jesús.
9 Caní guca,
tuꞌ cabí taꞌyéajniꞌininëꞌ le nazúaj lu guichi láꞌayi ca run bayudxi gaca queëꞌ Jesús,
ateꞌ ubanëꞌ lu yöl-laꞌ guti.
10 Níꞌirö iropëꞌ bönniꞌ usëda naꞌ yöjhuö́jgaquiëꞌ lídxigaquiëꞌ.
Ruluíꞌi lahuëꞌ Jesús lonu María Magdalena
11 Bugáꞌananu María níꞌilö raꞌ yeru ba naꞌ,
ribö́dxinu.
Tsanni niꞌ ribö́dxinu,
biyéchunu,
buyunu lu yeru ba naꞌ.
12 Biléꞌenu chopëꞌ gubáz láꞌayi queëꞌ Dios niꞌ,
nácugaquiëꞌ lariꞌ chiguichi.
Rö́ꞌögaquiëꞌ niꞌ,
tuëꞌ ícjalö ba naꞌ,
en iaꞌtúëꞌ xiníꞌalö ba naꞌ ga niꞌ gulaꞌguꞌë Jesús.
13 Yuguꞌ gubáz láꞌayi naꞌ tëꞌ lënu,
taꞌnnë́ꞌ:
―Nigúladoꞌ,
¿bizx que ribödxuꞌ?
Rënu légaquiëꞌ:
―Tuꞌ buluꞌúꞌë Xanaꞌ,
en bitiꞌ nözdaꞌ gazxi gulaꞌguꞌë Lëꞌ.
14 Cateꞌ budxi gunnánu caní,
buécjanu,
en biléꞌenu-nëꞌ Jesús,
zoëꞌ niꞌ,
pero bitiꞌ réquibeꞌenu Jesús naꞌ.
15 Níꞌirö Jesús gudxëꞌ-nu:
―Nigúladoꞌ,
¿bizx que ribödxuꞌ?
¿Nuzxi ruguiljuꞌ?
Tuꞌ réquinu náquiëꞌ Lëꞌ bönniꞌ rapa chiꞌë latja naꞌ,
rënu Lëꞌ:
―Bönniꞌ,
channö liꞌ buꞌu-nëꞌ,
gudíxjöiꞌi nedaꞌ gazxi gulúꞌu-nëꞌ,
ateꞌ nedaꞌ uꞌa-nëꞌ.
16 Níꞌirö Jesús gudxëꞌ-nu:
―María.
Níꞌirö buécjanu,
en lu didzaꞌ hebreo rënu Lëꞌ:
―Raboni.
Didzaꞌ ni rnna:
Bönniꞌ Usedi quiaꞌ.
17 Jesús rëꞌë-nu:
―Bitiꞌ canuꞌ nedaꞌ,
tuꞌ cabí ruhuë́pinidaꞌ ga zoëꞌ Xuzaꞌ.
Naꞌa,
guyéaj ga nacuꞌë böchiꞌ luzáꞌa,
ateꞌ yöjödxi-gáquiëꞌ:
“Caní rnnëꞌ Jesús:
Huëpaꞌ ga zoëꞌ Xuzaꞌ,
náquiëꞌ caꞌ Xúziliꞌ.
Náquiëꞌ Dios quiaꞌ,
en Dios queë́liꞌ.”
18 Níꞌirö guyéajnu María Magdalena naꞌ,
yöjtíxjöiꞌinu yuguꞌ bönniꞌ usëda queëꞌ Jesús chibiléꞌenu-nëꞌ Xanruꞌ,
en ca naca didzaꞌ naꞌ gudxëꞌ-nu.
Ruluíꞌi lahuëꞌ Jesús lógaquiëꞌ bönniꞌ usëda queëꞌ
19 Cateꞌ chigul-la laꞌ dza náꞌasö,
le naca dza risí lo gadxi dza,
nudúbigaquiëꞌ bönniꞌ usëda queëꞌ Jesús,
ateꞌ nayayaj yuꞌu ga naꞌ nacuꞌë tuꞌ tádxinëꞌ bönniꞌ judío unná bëꞌ.
Níꞌirö buluíꞌi lahuëꞌ Jesús gatsaj láhuiꞌlö ga naꞌ nacuꞌë,
en rëꞌ légaquiëꞌ:
―Guliꞌzóa dxi ládxiꞌliꞌ.
Jesús se aparece a los discípulos (Juan 20.19-31)
20 Cateꞌ budxi gudxëꞌ légaquiëꞌ didzaꞌ ni,
buluíꞌinëꞌ légaquiëꞌ nëꞌë,
en cuita lëꞌë.
Níꞌirö tuꞌdzéjanëꞌ yuguꞌ bönniꞌ usëda naꞌ tuꞌ tuꞌléꞌenëꞌ Xanruꞌ.
21 Níꞌirö Jesús rëꞌ légaquiëꞌ leyúbölö,
rnnëꞌ:
―Guliꞌzóa dxi ládxiꞌliꞌ.
Ca benëꞌ Xuzaꞌ,
gusö́l-lëꞌë nedaꞌ,
lëscaꞌ caní risö́l-laꞌa libíꞌiliꞌ tsöjenliꞌ xichinaꞌ.
22 Cateꞌ budxi gunnë́ꞌ caní,
bulubëꞌ lógaquiëꞌ,
en rëꞌ légaquiëꞌ:
―Guliꞌsíꞌ Dios Böꞌ Láꞌayi.
23 Nútiꞌtës nu uniti loliꞌ,
nu naꞌ ben dul-laꞌ,
chiyúꞌu yöl-laꞌ runiti lo que,
ateꞌ nútiꞌtës nu bitiꞌ uniti loliꞌ le,
ugáꞌana dul-laꞌ que nu naꞌ nun dul-laꞌ.
Bitiꞌ réajlëꞌë Tomás
24 Tomás bitiꞌ zóalenëꞌ légaquiëꞌ cateꞌ Jesús buduyúëꞌ légaquiëꞌ.
Náquiëꞌ Tomás tuëꞌ bönniꞌ chínnuëꞌ niꞌ,
en tuꞌë caꞌ lëꞌ Bönniꞌ Bilidiꞌ.
25 Gudödi niꞌ iaꞌzícaꞌrëꞌ bönniꞌ usëda naꞌ gulë́ꞌ Tomás,
taꞌnnë́ꞌ:
―Chibiléꞌetuꞌ-nëꞌ Xanruꞌ.
Tomás rëꞌ légaquiëꞌ:
―Channö cabí iléꞌedaꞌ nëꞌë ga gunnë́ꞌ bididaj,
en unëꞌa xibö́n naꞌa ga naꞌ gunë́ꞌgaca bididaj naꞌ,
en unëꞌa naꞌa cuita lëꞌë ga naꞌ gunnë́ꞌ yaga tuchiꞌ,
bitiꞌ caꞌ tséajlëꞌa.
26 Cateꞌ chigudödi iaꞌxunuꞌ dza,
nudúbigaquiëꞌ bönniꞌ usëda naꞌ leyúbölö lu yuꞌu,
ateꞌ Tomás naꞌ zóalenëꞌ légaquiëꞌ.
Sal-laꞌ nayayaj yuꞌu ga naꞌ nacuꞌë,
buluíꞌi lahuëꞌ Jesús gatsaj láhuiꞌlö ga naꞌ nacuꞌë,
en rëꞌ légaquiëꞌ:
―Guliꞌzóa dxi ládxiꞌliꞌ.
27 Níꞌirö Jesús rëꞌ Tomás naꞌ:
―Bunë́ꞌ xibö́n noꞌo ni,
en buyú naꞌa ni.
Bunë́ꞌ noꞌo cuita lëꞌa ni,
en bítiꞌrö gaca chopa ládxuꞌu,
pero guyéajlëꞌ nedaꞌ.
28 Níꞌirö bubiꞌë didzaꞌ Tomás,
rëꞌ Lëꞌ:
―Xánaꞌdoꞌ,
en Dios quiaꞌ.
29 Jesús rëꞌ lëꞌ:
―Tomás,
tuꞌ buléꞌenuꞌ nedaꞌ,
réajlëꞌu.
Bicaꞌ ba nupa niꞌ ilaꞌyéajlëꞌ nedaꞌ sal-laꞌ bitiꞌ ilaꞌléꞌeni nedaꞌ.
Le rë́ꞌëni gun didzaꞌ nazúaj lu guichi ni