Rubanëꞌ Jesús lu yöl-laꞌ guti
28
Cateꞌ chigudödi dza láꞌayi quégaquiëꞌ bönniꞌ judío,
en chizáꞌ reníꞌ dza domingo,
yöjyúgacanu María Magdalena en iaꞌtunu María naꞌ yeru ba queëꞌ Jesús.
2 Tsálidoꞌos gudödi budóꞌ zxuꞌ.
Caní guca,
tuꞌ bötjëꞌ tuëꞌ gubáz láꞌayi queëꞌ Xanruꞌ narúajëꞌ yehuaꞌ yubá.
Bidxinëꞌ raꞌ yeru ba naꞌ,
ateꞌ gudúëꞌ guiö́j blaga zxön naꞌ,
en guröꞌë lu guiö́j naꞌ.
3 Naláꞌ lahui gubáz láꞌayi naꞌ ca yösa beníꞌ,
ateꞌ zxílaꞌdoꞌos naca lariꞌ nácuëꞌ.
4 Cateꞌ yuguꞌ bönniꞌ naꞌ röjáquiëꞌ gudil-la tapa chiꞌë yeru ba naꞌ bilaꞌléꞌenëꞌ lëꞌ,
guládxinëꞌ,
en gulaꞌzxíziëꞌ.
Gulaꞌdzöꞌë lu yu,
en guláquiëꞌ ca bönniꞌ nati caz.
5 Níꞌirö gubáz láꞌayi naꞌ gudxëꞌ yuguꞌ nigula naꞌ,
rnnëꞌ:
―Bitiꞌ gádxiliꞌ.
Nözdaꞌ ruguíljaliꞌ-nëꞌ Jesús,
bönniꞌ naꞌ buluꞌdë́ꞌë lëꞌe yaga cruz.
6 Bitiꞌ zoëꞌ ni tuꞌ chibubanëꞌ ca naꞌ chigunná cazëꞌ Lëꞌ.
Guliꞌdá,
uyuliꞌ ga niꞌ gutëꞌ Xanruꞌ.
7 Guliꞌtséaj naꞌa,
guliꞌtsöjödxi yuguꞌ bönniꞌ usëda queëꞌ chibubanëꞌ Jesús lu yöl-laꞌ guti,
ateꞌ naꞌa Lë cazëꞌ inö́ruëꞌ loliꞌ sacaꞌ luyú Galilea.
Niꞌ uléꞌeliꞌ-nëꞌ.
Chigudxaꞌ libíꞌiliꞌ le guluꞌë Dios lu naꞌa.
8 Níꞌirö laꞌ buluꞌzáꞌtënu raꞌ yeru ba naꞌ,
tádxinu,
en tuꞌdzéjanu,
ateꞌ carelö söjácanu söjtíxjöiꞌiguequinu yuguꞌ bönniꞌ usëda queëꞌ.
9 Tsanni niꞌ söjácanu,
Jesús yöjtságuiëꞌ légacanu,
ateꞌ rëꞌ légacanu:
―Padiux.
Níꞌirö gulaꞌbígaꞌnu ga zoëꞌ Jesús,
en buluꞌnídaꞌnu niꞌë.
Gulaꞌyéaj ládxiꞌgacanu Lëꞌ.
10 Níꞌirö Jesús rëꞌ légacanu:
―Bitiꞌ gádxiliꞌ.
Guliꞌtséaj,
guliꞌtsöjtíxjöiꞌi yuguꞌ bö́chaꞌa tsöjáquiëꞌ sacaꞌ luyú Galilea,
ateꞌ niꞌ uluꞌléꞌenëꞌ nedaꞌ.
Le gulaꞌguíxjöꞌë yuguꞌ bönniꞌ röjáquiëꞌ gudil-la
11 Tsanni niꞌ söjácanu nigula naꞌ,
yuguꞌ bönniꞌ naꞌ röjáquiëꞌ gudil-la gulún chiꞌë yeru ba naꞌ buluꞌdxinëꞌ lu yödzö niꞌ,
ateꞌ gulaꞌguíxjöiꞌinëꞌ yuguꞌ bixúz unná bëꞌ yúguꞌtë lë naꞌ gulaca.
12 Cateꞌ chibuluꞌtubëꞌ yuguꞌ bönniꞌ gula tuꞌzéajniꞌinëꞌ,
gulún xtídzaꞌgaquiëꞌ.
Níꞌirö buluꞌnödzjëꞌ dumí zián quégaquiëꞌ bönniꞌ naꞌ röjáquiëꞌ gudil-la.
13 Tëꞌ légaquiëꞌ:
―Caní innaliꞌ:
“Bilaꞌdxinëꞌ bönniꞌ usëda queëꞌ chiꞌi dzö́ꞌölö,
en buluꞌbéajëꞌ Lëꞌ tsanni niꞌ rásituꞌ.”
14 Channö huayönnëꞌ bönniꞌ rinná bëꞌë lë ni,
netuꞌ uzéajniꞌituꞌ lëꞌ,
en guntuꞌ ga bitiꞌ bi gunëꞌ queë́liꞌ.
15 Níꞌirö yuguꞌ bönniꞌ röjáquiëꞌ gudil-la naꞌ gulaꞌziꞌë dumí naꞌ ateꞌ yöjéngaquiëꞌ ca naꞌ chinazë́dagaquiëꞌ.
Caní guca,
tuꞌzë́ꞌ bönniꞌ judío didzaꞌ ni ga ridxintë naꞌa dza.
Jesús risö́l-lëꞌë yuguꞌ bönniꞌ gubáz queëꞌ
16 Níꞌirö idxinéajtëꞌ bönniꞌ usëda queëꞌ Jesús yöjáquiëꞌ luyú Galilea,
ateꞌ bilaꞌdxinëꞌ lu guíꞌadoꞌ naꞌ chibuluíꞌinëꞌ Jesús légaquiëꞌ.
17 Cateꞌ buluꞌléꞌenëꞌ Jesús,
gulaꞌyéaj ládxiꞌgaquiëꞌ Lëꞌ,
pero bal-lëꞌ gulaca chopa ládxiꞌgaquiëꞌ.
18 Níꞌirö gubíguiꞌë Jesús ga naꞌ nacuꞌë,
en rëꞌ légaquiëꞌ:
―Dios chinudödëꞌ lu naꞌa yúguꞌtë yöl-laꞌ unná bëꞌ yehuaꞌ yubá,
en luyú ni.
19 Que lë ni naꞌ,
guliꞌtséaj,
guliꞌtsöjsëdi yúguꞌtë bönachi idútë yödzölió.
Buliꞌquíla légaquiëꞌ nisa,
ugunliꞌ dxin Lëꞌ Dios Xuz,
en Lëꞌ Dios Zxíꞌini,
en Lëꞌ Dios Böꞌ Láꞌayi.
20 Guliꞌsëdi légaquiëꞌ ilunëꞌ yúguꞌtë lë naꞌ gunná béꞌedaꞌ libíꞌiliꞌ.
Buliꞌyútsöcaꞌ,
nedaꞌ caz zóalenaꞌ libíꞌiliꞌ yúguꞌtë dza ga idxinrö dza údxi que yödzölió.
Caꞌ gaca.