19
Níꞌirö Pilato guchë́ꞌë Jesús,
en benëꞌ ga gulaꞌguínëꞌ yuguꞌ bönniꞌ röjáquiëꞌ gudil-la Lëꞌ.
2 Bönniꞌ röjáquiëꞌ gudil-la naꞌ gulunëꞌ tu breguiꞌ niꞌa nëꞌe yötsiꞌ,
ateꞌ buluꞌdxíëꞌ le icjëꞌ Jesús,
en buluꞌgácuëꞌ Lëꞌ tu lariꞌ tunna xiná chul-la ca naca le tácuëꞌ bönniꞌ taꞌnná bëꞌë.
Jesús condenado a muerte (Juan 19.1-16)
―¡Bicaꞌ boꞌ Liꞌ,
Bönniꞌ Rinná Béꞌenëꞌ Bönachi Judío!
Níꞌirö gulaꞌgápëꞌë lahuëꞌ.
4 Níꞌirö burúajëꞌ Pilato,
en rëꞌ yuguꞌ bönniꞌ judío unná bëꞌ,
rnnëꞌ:
―Buliꞌyú,
rubéajaꞌ-nëꞌ loliꞌ ni para inö́ziliꞌ bitiꞌ bi rudzö́lidaꞌ le naca döꞌ nuꞌë bönniꞌ ni.
5 Níꞌirö birúajëꞌ Jesús,
dxía icjëꞌ breguiꞌ niꞌa nëꞌe yötsiꞌ naꞌ,
en nácuëꞌ lariꞌ tunna xiná chul-la naꞌ.
Pilato rëꞌ légaquiëꞌ:
―Ni zoëꞌ bönniꞌ ni.
6 Cateꞌ yuguꞌ bixúz unná bëꞌ,
en yuguꞌ bönniꞌ niꞌa náꞌagaquiëꞌ bilaꞌléꞌenëꞌ Jesús,
zidzaj guluꞌë didzaꞌ,
taꞌnnë́ꞌ:
―¡Budë́ꞌë lëꞌe yaga cruz!
¡Budë́ꞌë lëꞌe yaga cruz!
Pilato rëꞌ légaquiëꞌ:
―Libíꞌi cázaliꞌ guliꞌchë́ꞌë,
en guliꞌtsöjdë́ꞌë lëꞌe yaga cruz.
Nedaꞌ bitiꞌ bi döꞌ budzö́lidaꞌ nuꞌë bönniꞌ ni.
7 Níꞌirö bönniꞌ judío naꞌ tëꞌ lëꞌ:
―Dë queë́tuꞌ tu xibá,
ateꞌ rinná bëꞌ xibá queë́tuꞌ naꞌ ral-laꞌ gátiëꞌ bönniꞌ ni tuꞌ gunnë́ꞌ náquiëꞌ Zxíꞌinëꞌ Dios.
―¿Gázxitë bönniꞌ Liꞌ?
Bitiꞌ bi didzaꞌ bubiꞌë Jesús.
10 Níꞌirö Pilato rëꞌ Lëꞌ:
―¿Naruꞌ cabí ubíꞌitsoꞌ didzaꞌ,
quíxjöiꞌinuꞌ nedaꞌ?
¿Naruꞌ cabí nö́zinuꞌ dë lu naꞌa udáꞌa Liꞌ lëꞌe yaga cruz,
en dë lu naꞌa usanaꞌ Liꞌ?
11 Bubiꞌë didzaꞌ Jesús,
rëꞌ lëꞌ:
―Bitiꞌ bi dë lu noꞌo gunuꞌ quiaꞌ laꞌtuꞌ cabí nudödëꞌ Dios yöl-laꞌ unná bëꞌ naꞌ lu noꞌo.
Que lë ni naꞌ,
bönniꞌ naꞌ budödëꞌ nedaꞌ lu noꞌo nabágaꞌrëꞌ xíguiaꞌ ca liꞌ.
12 Laꞌ níꞌisö rizóa riböꞌë Pilato usanëꞌ Jesús,
pero guluꞌë zidzaj didzaꞌ bönniꞌ judío unná bëꞌ,
taꞌnnë́ꞌ:
―Channö usanuꞌ-nëꞌ bönniꞌ ni,
bitiꞌ ridzaguꞌ-nëꞌ dxiꞌa César,
bönniꞌ rinná béꞌenëꞌ idútë yödzölió.
Nu bönniꞌ run cuinëꞌ bönniꞌ rinná bëꞌë,
ridáꞌbáguëꞌë César naꞌ.
13 Cateꞌ biyönnëꞌ Pilato didzaꞌ ni,
gunná béꞌenëꞌ nupa diguáꞌgaca Jesús,
ateꞌ guröꞌë xilatjëꞌ ga ruchiꞌa rusörö́ëꞌ,
lataj naꞌ nazíꞌi le Löꞌa Ga Zxóagaca Guiö́jtaꞌa,
en ca naca didzaꞌ hebreo nazíꞌi le Gabata.
14 Laꞌ dza náꞌasö naca dza siꞌ idxín Laní Pascua,
en naca idú hua gubidza.
Níꞌirö Pilato gudxëꞌ yuguꞌ bönniꞌ judío unná bëꞌ naꞌ,
rnnëꞌ:
―Ni zoëꞌ bönniꞌ rinná béꞌenëꞌ libíꞌiliꞌ.
15 Guluꞌë zidzaj didzaꞌ,
taꞌnnë́ꞌ:
―¡Bë́tiëꞌ!
¡Bë́tiëꞌ!
¡Budë́ꞌë lëꞌe yaga cruz!
Pilato rëꞌ légaquiëꞌ:
―¿Rinábitseliꞌ nedaꞌ udáꞌa-nëꞌ lëꞌe yaga cruz bönniꞌ rinná béꞌenëꞌ libíꞌiliꞌ?
Buluꞌbiꞌë didzaꞌ bixúz unná bëꞌ,
taꞌnnë́ꞌ:
―Cúnturö nu zoa rinná beꞌe netuꞌ.
Tuzëꞌ César rinná béꞌenëꞌ netuꞌ.
16 Que lë ni naꞌ Pilato budödëꞌ Jesús lu náꞌagaquiëꞌ,
para tsöjdáꞌagaquiëꞌ Lëꞌ lëꞌe yaga cruz.
Níꞌirö gulaꞌguélëꞌë Jesús,
en gulaꞌchë́ꞌë Lëꞌ níꞌilö.
La crucifixión (Juan 19.17-37)
Tuꞌdë́ꞌë Jesús lëꞌe yaga cruz
17 Birúajëꞌ Jesús niꞌ,
nuꞌë yaga cruz queëꞌ,
saꞌyéajëꞌ lataj naꞌ nazíꞌi le Lataj Que Bögaꞌ Ícjaruꞌ,
en ca naca didzaꞌ hebreo nazíꞌi le Gólgota.
18 Buluꞌdë́ꞌë Jesús lëꞌe yaga cruz niꞌ,
ateꞌ buluꞌdáꞌlenëꞌ Lëꞌ tsözxö́n lë́ꞌegaca yaga cruz iaꞌchopëꞌ bönniꞌ.
Tsöláꞌa huéaj taꞌdë́ꞌë,
ateꞌ Jesús dëꞌë gatsaj láhuiꞌlö chopëꞌ bönniꞌ naꞌ.
19 Gusö́l-lëꞌë Pilato tu bönniꞌ nuꞌë le buzúajëꞌ lu guichi le buzóëꞌ lëꞌe yaga cruz icjlëꞌ Jesús,
le rnna caní:
“Jesús,
Bönniꞌ Nazaret,
Bönniꞌ Rinná Béꞌenëꞌ Bönniꞌ Judío.”
20 Buluꞌlabëꞌ zián bönniꞌ judío didzaꞌ ni,
tuꞌ zoa ga naꞌ buluꞌdë́ꞌë Jesús lëꞌe yaga cruz gálaꞌsö raꞌ yödzö,
ateꞌ didzaꞌ naꞌ nuzúajëꞌ len didzaꞌ hebreo,
en len didzaꞌ griego,
en len didzaꞌ latín.
21 Yuguꞌ bixúz unná bëꞌ quégaquiëꞌ bönniꞌ judío tëꞌ Pilato,
taꞌnnë́ꞌ:
―Bitiꞌ uzúajuꞌ,
“Bönniꞌ Rinná Béꞌenëꞌ Bönniꞌ Judío.”
Buzúaj caní:
“Bönniꞌ ni gunnë́ꞌ:
Inná béꞌedaꞌ bönniꞌ judío.”
22 Bubiꞌë didzaꞌ Pilato,
rëꞌ légaquiëꞌ:
―Le chinuzúajaꞌ,
tsaz chinuzúajaꞌ.
23 Cateꞌ yuguꞌ bönniꞌ naꞌ röjáquiëꞌ gudil-la budxi buluꞌdë́ꞌë Jesús lëꞌe yaga cruz,
gulaꞌguélëꞌë lariꞌ gúcuëꞌ.
Gulaꞌbéajëꞌ tápalö,
tu cöꞌ huéaj gutaꞌ que queë́gaquiëꞌ.
Gulaꞌguélëꞌë caꞌ lariꞌ guxóa yenëꞌ Jesús,
ateꞌ lariꞌ naꞌ bitiꞌ nadía,
pero naduba tuz ca naduba.
24 Níꞌirö yuguꞌ bönniꞌ naꞌ röjáquiëꞌ gudil-la gulë́ luzáꞌagaquiëꞌ tuëꞌ iaꞌtúëꞌ,
taꞌnnë́ꞌ:
―Bitiꞌ ichúguruꞌ le,
pero dxíꞌarö gaca uyuruꞌ le gaca bëꞌ para inö́ziruꞌ nuzxi guequi que.
Caní guca,
budxín ca nazúaj lu guichi láꞌayi,
le rnna:
Gulaꞌguísiëꞌ que queë́gaquiëꞌ lariꞌ nacuáꞌ,
en que lariꞌ quiaꞌ buluꞌyúëꞌ le naca bëꞌ.
Caní gulunëꞌ bönniꞌ naꞌ röjáquiëꞌ gudil-la.
25 Xinë́ꞌë Jesús,
en nigula zxílanu xinë́ꞌë,
en María,
nigula queëꞌ Cleofas,
en María Magdalena gulaꞌcuáꞌanu galaꞌ ga naꞌ dëꞌë Jesús lëꞌe yaga cruz.
26 Cateꞌ Jesús biléꞌenëꞌ-nu xinë́ꞌë,
en biléꞌenëꞌ caꞌ zoëꞌ niꞌ bönniꞌ usëda queëꞌ naꞌ nadxíꞌinëꞌ,
gudxëꞌ-nu xinë́ꞌë:
―Naꞌa,
naꞌ zoëꞌ zxíꞌinuꞌ.
27 Níꞌirö gudxëꞌ bönniꞌ usëda queëꞌ naꞌ:
―Naꞌ zóanu xinóꞌo.
Bönniꞌ usëda naꞌ benëꞌ ga yöjsóanu lidxëꞌ laꞌ dza níꞌisö.
Le guca cateꞌ gutiëꞌ Jesús
28 Gudödi ni,
tuꞌ nö́zinëꞌ Jesús yúguꞌtë chibö́a budzaga lahui,
en para udxín le nazúaj lu guichi láꞌayi,
gunnë́ꞌ:
―Ribidxaꞌ nisa.
29 Dë niꞌ tu zxigaꞌ yudzu nupi zi.
Níꞌirö yuguꞌ bönniꞌ naꞌ röjáquiëꞌ gudil-la buluꞌguiꞌjëꞌ nupi zi naꞌ tu le bululu rizxupi nisa,
ateꞌ buluꞌzóëꞌ le tu lahui gui,
en buluꞌdë́ꞌë le ruꞌë Jesús para xupëꞌ.
30 Budxi guꞌë Jesús nupi zi naꞌ,
gunnë́ꞌ:
―Chinácatë.
Níꞌirö buzötaj icjëꞌ.
Burúajtë böꞌ naca cazëꞌ,
gútiëꞌ.
Tu bönniꞌ reajëꞌ gudil-la runë́ꞌë yaga tuchiꞌ cuita lëꞌë Jesús
31 Níꞌirö,
tuꞌ naca dza siꞌ idxín Laní Pascua naꞌ,
en tuꞌ cabí ral-laꞌ uluꞌgáꞌana nupa nátigaca lë́ꞌegaca yaga cruz cateꞌ naca dza láꞌayi quégaquiëꞌ,
le naca tu dza láꞌayi zxöntë,
que lë ni naꞌ yuguꞌ bönniꞌ judío gulátaꞌyuëꞌ lahuëꞌ Pilato guíëꞌ bönniꞌ röjáquiëꞌ gudil-la tsöjtítsjagaquiëꞌ xiguíchjagaquiëꞌ bönniꞌ dáꞌgaquiëꞌ lë́ꞌegaca yaga cruz,
en uluꞌzötjëꞌ légaquiëꞌ lë́ꞌegaca yaga cruz naꞌ.
32 Que lë ni naꞌ gulaꞌbiguëꞌë bönniꞌ röjáquiëꞌ gudil-la,
ateꞌ gulaꞌguítsjëꞌ xiguichjëꞌ bönniꞌ zíꞌalö,
en lëscaꞌ caní gulunëꞌ queëꞌ iaꞌtúëꞌ bönniꞌ naꞌ dáꞌlenëꞌ Jesús lëꞌe yaga cruz.
33 Cateꞌ bilaꞌdxinëꞌ ga naꞌ dëꞌë Jesús,
en bilaꞌléꞌenëꞌ chinátiëꞌ,
bitiꞌ gulaꞌguítsjëꞌ xiguichjëꞌ.
34 Níꞌirö tuëꞌ bönniꞌ naꞌ reajëꞌ gudil-la bunë́ꞌë yaga tuchiꞌ cuita lëꞌë Jesús,
ateꞌ laꞌ birúajtë rön,
en nisa.
35 Nedaꞌ,
Juan,
biléꞌedaꞌ lë ni,
en runaꞌ ba nalí que,
ateꞌ le runaꞌ ba nalí naca idútë li.
Nöz quézidaꞌ ruáꞌa didzaꞌ idútë li,
para tséajlëꞌëliꞌ caꞌ libíꞌiliꞌ ca naca queëꞌ Jesús.
36 Gulaca yuguꞌ lë ni para budxín le nazúaj lu guichi láꞌayi,
le rnna:
“Bitiꞌ gatsaj nitú dxita yuꞌë.”
37 Iaꞌtú le nazúaj caꞌ lu guichi rnna caní:
“Uluꞌyúëꞌ bönniꞌ naꞌ buluꞌnë́ꞌë lëꞌ yaga tuchiꞌ.”
Tuꞌcáchëꞌë Jesús
38 Gudödi guca yúguꞌtë lë ni,
guyijëꞌ José,
bönniꞌ yödzö Arimatea,
bönniꞌ dëꞌë Jesús,
pero bagáchiꞌsö tuꞌ rádxinëꞌ yuguꞌ bönniꞌ judío unná bëꞌ,
ateꞌ gunábinëꞌ Pilato guꞌë lëꞌ lataj uꞌë Jesús.
Pilato bëꞌë lëꞌ lataj.
Níꞌirö bidxinëꞌ José ga naꞌ dëꞌë Jesús lëꞌe yaga cruz,
ateꞌ buꞌë Lëꞌ.
La resurrección (Juan 19.38-20.18)
39 Lëscaꞌ bidxinëꞌ Nicodemo niꞌ,
bönniꞌ naꞌ guyijëꞌ zíꞌalö yöjyúëꞌ Jesús chiꞌi dzö́ꞌölö,
nuꞌë tu le nutsíꞌi nöri siláꞌ que mirra,
en tu le riláꞌ zxixi,
le naca ca tu gayuáꞌ guíë.
40 Níꞌirö José,
en Nicodemo naꞌ gulaꞌguélëꞌë Jesús,
en buluꞌchö́linëꞌ Lëꞌ yuguꞌ láriꞌdoꞌ,
ateꞌ gulaꞌguꞌë láhuilö lë naꞌ nutsíꞌi nöri siláꞌ que mirra,
en le riláꞌ zxixi.
Gulunëꞌ ca nalë́biguequinëꞌ tunëꞌ bönniꞌ judío cateꞌ tuꞌcáchëꞌë tu bönniꞌ nati.
41 Galaꞌ ga naꞌ buluꞌdë́ꞌë Jesús lëꞌe yaga cruz dë tu luyú ga zeaj daꞌ yaga olivo,
ateꞌ gatsaj láhuiꞌlö lataj naꞌ zoa tu yeru ba cubi le nadaj lëꞌe guíꞌa guiö́j,
yeru ba naꞌ cuntu nu taꞌgüíꞌinëꞌ.
42 Lu yeru ba naꞌ gulaꞌguꞌë Jesús tuꞌ dë gálaꞌsö yeru ba naꞌ,
en tuꞌ naca dza tuꞌpë́ꞌë bönniꞌ judío que Laní Pascua.