Ridxinëꞌ Jesús lahuëꞌ Pilato, bönniꞌ rinná bëꞌë uláz queëꞌ César
23
Níꞌirö gulazuínëꞌ yúguꞌtë bönniꞌ zián niꞌ,
ateꞌ gulaꞌchë́ꞌë Jesús lahuëꞌ Pilato,
San Lucas 23:1-25
―Bönniꞌ ni,
budzö́lituꞌ ca runëꞌ.
Runëꞌ ga taꞌdáꞌbagaꞌ bönachi uládz queë́tuꞌ yúlahuiꞌ,
en ruzáguëꞌë xinö́zigaca nupa taꞌguízxaj laz ruquízxjëꞌ César,
en rnnëꞌ lë cazëꞌ náquiëꞌ Cristo,
bönniꞌ ral-laꞌ inná bëꞌë.
3 Níꞌirö Pilato gunábinëꞌ Jesús,
rnnëꞌ:
―¿Naruꞌ nacuꞌ Liꞌ nu inná beꞌe bönachi judío?
Bubiꞌë didzaꞌ Jesús,
rnnëꞌ:
―Le nácasö rnnoꞌ.
4 Níꞌirö Pilato gudxëꞌ yuguꞌ bixúz unná bëꞌ,
en bönachi nacuáꞌ niꞌ,
rnnëꞌ:
―Bitiꞌ bi rudzö́lidaꞌ le naca xíguiaꞌ nunëꞌ bönniꞌ ni.
5 Níꞌirö gulunrëꞌ tsutsu xtídzaꞌgaquiëꞌ,
taꞌnnë́ꞌ:
―Runëꞌ ga tuꞌtsatsa bönachi,
en rusédinëꞌ caní bönachi idú luyú Judea.
Gusí lahuëꞌ benëꞌ caní luyú Galilea ga ridxintë runëꞌ caꞌ ni.
Ridxinëꞌ Jesús lahuëꞌ Herodes, bönniꞌ rinná bëꞌë luyú Galilea
6 Cateꞌ biyönnëꞌ Pilato didzaꞌ ni,
tuꞌë didzaꞌ que luyú Galilea,
níꞌirö gunábinëꞌ légaquiëꞌ channö náquiëꞌ Jesús bönniꞌ Galilea.
7 Cateꞌ gunö́zinëꞌ nababëꞌ Jesús ga niꞌ rinná bëꞌë Herodes,
gusö́l-lëꞌë Lëꞌ lahuëꞌ Herodes naꞌ,
tuꞌ zoëꞌ caꞌ Herodes Jerusalén yuguꞌ dza naꞌ.
8 Cateꞌ Herodes naꞌ biléꞌenëꞌ Jesús,
budzéjanëꞌ,
tuꞌ chiguca xidzé rë́ꞌënëꞌ iléꞌenëꞌ Lëꞌ tuꞌ chibiyönnëꞌ le zián ca naca queëꞌ Jesús,
en runëꞌ löza iléꞌenëꞌ tu yöl-laꞌ huáca gunëꞌ.
9 Níꞌirö Herodes gunábinëꞌ Jesús le zián,
pero Jesús bitiꞌ bi didzaꞌ bubiꞌë.
10 Nacuꞌë caꞌ niꞌ yuguꞌ bixúz unná bëꞌ,
len bönniꞌ yudoꞌ tuꞌsédinëꞌ,
ateꞌ buluꞌzéguidëꞌë Jesús didzaꞌ.
11 Níꞌirö Herodes,
en bönniꞌ queëꞌ röjáquiëꞌ gudil-la buluꞌcáꞌanëꞌ Jesús cáꞌasö,
en para uluꞌtitjëꞌ Lëꞌ,
buluꞌgácuëꞌ Lëꞌ tu lariꞌ nazacaꞌ ca rácuëꞌ tu bönniꞌ unná bëꞌ,
ateꞌ leyúbölö buluꞌsudxinëꞌ Lëꞌ lahuëꞌ Pilato.
12 Dza naꞌ buluꞌdzáguiëꞌ dxiꞌa Pilato,
en Herodes,
tuꞌ zíꞌalö gulaꞌlé luzë́ꞌë tuëꞌ iaꞌtúëꞌ.
Taꞌchúguiëꞌ queëꞌ Jesús gátiëꞌ
13 Níꞌirö butubëꞌ Pilato yuguꞌ bixúz unná bëꞌ,
en bönniꞌ dë lu náꞌagaquiëꞌ,
en bönachi lu yödzö,
14 ateꞌ rëꞌ légaquiëꞌ:
―Dujuáꞌaliꞌ-nëꞌ bönniꞌ ni lahuaꞌ nedaꞌ,
rnnaliꞌ queëꞌ runëꞌ ga tuꞌtsatsa bönachi,
pero cateꞌ gunabi yúdxidaꞌ-nëꞌ,
ateꞌ zóatëliꞌ caꞌ ni,
bitiꞌ bi budzö́lidaꞌ le naca xíguiaꞌ nabáguëꞌë,
yuguꞌ lë naꞌ ruzéguiliꞌ-nëꞌ didzaꞌ.
15 Cateꞌ gusö́l-laꞌa libíꞌiliꞌ lahuëꞌ Herodes,
bitiꞌ bi budzö́linëꞌ le benëꞌ bönniꞌ ni le naca xíguiaꞌ nabáguëꞌë para nu ichugu queëꞌ gátiëꞌ.
16 Naꞌa usacaꞌ ziꞌa-nëꞌ,
ateꞌ tödi naꞌ usanaꞌ-nëꞌ.
17 Run bayudxi tu le gunëꞌ Pilato,
usanëꞌ lu náꞌagaca bönachi tuëꞌ bönniꞌ nadzunëꞌ cateꞌ raca laní naꞌ,
ca naꞌ run cazëꞌ.
18 Níꞌirö guluꞌë zidzaj didzaꞌ yúguꞌtë bönniꞌ nacuꞌë niꞌ,
taꞌnnë́ꞌ:
―Bëtiëꞌ bönniꞌ ni,
en busanëꞌ queë́tuꞌ Barrabás.
19 Nadzunëꞌ Barrabás naꞌ lidxi guíë tuꞌ gudíl-lalenëꞌ yúlahuiꞌ lu yödzö naꞌ,
en tuꞌ bë́tiëꞌ bönachi.
20 Bulidzëꞌ Pilato légaquiëꞌ leyúbölö,
tuꞌ rë́ꞌënëꞌ usanëꞌ Jesús.
21 Leyúbölö guluꞌë zidzaj didzaꞌ,
taꞌnnë́ꞌ:
―¡Budë́ꞌë lëꞌe yaga cruz!
¡Budë́ꞌë lëꞌe yaga cruz!
22 Níꞌirö Pilato gudxëꞌ légaquiëꞌ le bunni luzuí,
rnnëꞌ:
―¿Bizxi caz le ruáꞌ döꞌ benëꞌ bönniꞌ ni?
Bitiꞌ bi budzö́lidaꞌ nunëꞌ le run ga nabáguëꞌë xíguiaꞌ gátiëꞌ.
Usacaꞌ ziꞌa-nëꞌ,
ateꞌ níꞌirö usanaꞌ-nëꞌ.
23 Zídzajrö guluꞌë didzaꞌ,
taꞌnabëꞌ tëꞌë Jesús lëꞌe yaga cruz.
Tuꞌ gulaꞌbö́dxiꞌë yenniꞌ yuguꞌ bönniꞌ naꞌ,
en yuguꞌ bixúz unná bëꞌ,
gulaꞌdéliꞌnëꞌ gaca ca naꞌ të́ꞌënnëꞌ.
24 Níꞌirö Pilato guchúguiëꞌ queëꞌ Jesús,
para gaca queëꞌ ca naꞌ taꞌnabëꞌ.
25 Busanëꞌ quégaquiëꞌ bönniꞌ naꞌ nadzunëꞌ lidxi guíë tuꞌ gudíl-lalenëꞌ yúlahuiꞌ,
en bë́tiëꞌ bönachi,
bönniꞌ naꞌ chigulaꞌnabëꞌ,
ateꞌ budödëꞌ Jesús para gaca queëꞌ ca naꞌ të́ꞌënnëꞌ.
Dëꞌë Jesús lëꞌe yaga cruz
26 Cateꞌ niꞌ taꞌchë́ꞌë Jesús tsöjdáꞌgaquiëꞌ Lëꞌ lëꞌe yaga cruz,
gulaꞌzönëꞌ Simón,
bönniꞌ yödzö Cirene,
suzë́ꞌë laꞌ guixiꞌ,
ateꞌ gulaꞌxóëꞌ yen zxicjëꞌ yaga cruz naꞌ para guꞌë le,
en tsejëꞌ cúdzuꞌlëꞌ Jesús.
San Lucas 23:26-43
27 Bönachi zián,
encaꞌ yuguꞌ nigula söjnógaca Jesús,
taꞌbö́dxinu nigula naꞌ,
en taꞌbödxi yéchiꞌnu queëꞌ Lëꞌ.
28 Níꞌirö buécjëꞌ Jesús,
en ruyúëꞌ légacanu,
ateꞌ rëꞌ légacanu:
―Libíꞌiliꞌ nigula Jerusalén.
Bitiꞌ cö́dxiliꞌ quiaꞌ nedaꞌ,
pero guliꞌcödxi que quéziliꞌ,
en quégacabiꞌ zxíꞌiniliꞌ
29 tuꞌ huadxín dza ilaꞌnná:
“Bicaꞌ bágaca yuguꞌ nigula huödx,
en nigula bitiꞌ guluáꞌanu-biꞌ bíꞌidoꞌ,
en bitiꞌ buluꞌgádxiꞌnu-biꞌ bíꞌidoꞌ.”
30 Níꞌirö ilaꞌsí lógaca ilaꞌnná bönachi,
ilë́ꞌ yuguꞌ guíꞌa sibi:
“Guliꞌdubágaꞌ netuꞌ”,
en ilë́ꞌ caꞌ yuguꞌ guíꞌadoꞌ:
“Guliꞌcachiꞌ netuꞌ.”
31 Channö caní tunëꞌ quiaꞌ nedaꞌ,
nacaꞌ ca tu yaga yaꞌa,
¿naruꞌ cabí ilúntërëꞌ caꞌ queë́liꞌ,
nácaliꞌ ca yaga bidxi?
32 Gulaꞌchë́ꞌë caꞌ chopëꞌ bönniꞌ tuáꞌ döꞌ,
para ilútiëꞌ légaquiëꞌ tsözxö́n len Jesús.
33 Cateꞌ bilaꞌdxinëꞌ lataj nazíꞌi le Calavera,
le rnna len didzaꞌ xidzaꞌ Lataj Que Bögaꞌ Ícjaruꞌ,
buluꞌdë́ꞌë Jesús lëꞌe yaga cruz.
Buluꞌdë́ꞌë caꞌ lë́ꞌegaca yaga cruz chopëꞌ bönniꞌ tuáꞌ döꞌ.
Tuëꞌ buluꞌdë́ꞌë cuita lëꞌë ibëla Jesús,
en iaꞌtúëꞌ buluꞌdë́ꞌë cuita lëꞌë yö́göla.
34 Níꞌirö Jesús rnnëꞌ:
―Xuz,
buniti lo légaquiëꞌ,
tuꞌ cabí nö́zguequinëꞌ bi tunëꞌ.
Bönniꞌ röjáquiëꞌ gudil-la nacuꞌë niꞌ buluꞌlë́ꞌë que queë́gaquiëꞌ le nácuëꞌ Jesús,
en buluꞌquitjëꞌ le gaca bëꞌ lahui.
35 Bönachi nacuáꞌ niꞌ tuꞌyú,
en yuguꞌ bönniꞌ dë lu náꞌagaquiëꞌ buluꞌtitjëꞌ Jesús,
taꞌnnë́ꞌ:
―Yuguꞌ nu yúbölö busölë́ꞌ bönniꞌ ni.
Naꞌa ral-laꞌ usölá cuinëꞌ channö náquiëꞌ Cristo,
bönniꞌ gurö́ cazëꞌ Dios.
36 Yuguꞌ bönniꞌ naꞌ röjáquiëꞌ gudil-la buluꞌtitjëꞌ caꞌ Jesús.
Gulaꞌbiguëꞌë ga naꞌ zoëꞌ,
en buluꞌguiꞌjëꞌ Lëꞌ nupi zi,
37 taꞌnnë́ꞌ:
―Channö nacuꞌ Liꞌ bönniꞌ inná béꞌenëꞌ bönachi judío,
busölá cuinuꞌ.
38 Daꞌ caꞌ lëꞌe yaga cruz icjlëꞌ Jesús tu le nazúaj lu guichi lu didzaꞌ griego,
en lu didzaꞌ latín,
en lu didzaꞌ hebreo,
le rnna caní:
“Bönniꞌ Rinná Béꞌenëꞌ Bönachi Judío.”
39 Tuëꞌ bönniꞌ huiáꞌ döꞌ naꞌ dëꞌë lëꞌe yaga cruz bulidza ziꞌë Jesús,
rnnëꞌ:
―Channö nacuꞌ Liꞌ Cristo,
busölá cuinuꞌ,
encaꞌ netuꞌ.
40 Bubiꞌë didzaꞌ iaꞌtúëꞌ bönniꞌ huiáꞌ döꞌ naꞌ,
en gudil-lëꞌ luzë́ꞌë naꞌ,
rnnëꞌ:
―¿Naruꞌ cabí rádxinuꞌ-nëꞌ Dios?
Lëscaꞌ liꞌ narugu quiuꞌ gátiuꞌ.
41 Le nácatë rëꞌu,
le rál-laꞌsö gaca queë́ruꞌ riguíꞌi rizácaꞌruꞌ,
ca naꞌ saꞌyéaj döꞌ biáꞌaruꞌ,
pero Bönniꞌ ni,
bitiꞌ bi döꞌ nuꞌë.
42 Níꞌirö bönniꞌ ni rëꞌ Jesús:
―Yöjné nedaꞌ cateꞌ idxinuꞌ ga niꞌ inná bëꞌu.
43 Jesús rëꞌ lëꞌ:
―Le nácatë reaꞌ liꞌ,
naꞌa dza ni sóalenuꞌ nedaꞌ lataj lachi quiaꞌ.
Ratiëꞌ Jesús
44 Cateꞌ bidxín idú huagubidza,
guchul-la idútë yödzölió ga bidxinrö idú ridödi xihuö́.
San Lucas 23:44-56
45 Guchul-la gubidza,
ateꞌ lariꞌ nal-laꞌ lu yudoꞌ birözaꞌ chopa díꞌilö.
46 Níꞌirö bëꞌë zidzaj didzaꞌ Jesús,
rnnëꞌ:
―Xuz,
riguꞌa lu noꞌo böꞌ naca cazaꞌ.
Cateꞌ budxi gunnë́ꞌ caní,
birúajtë böꞌ naca cazëꞌ,
gútiëꞌ.
47 Cateꞌ bönniꞌ rinná béꞌenëꞌ bönniꞌ röjáquiëꞌ gudil-la biléꞌenëꞌ ca naꞌ guca,
guluꞌë Dios yöl-laꞌ ba,
rnnëꞌ:
―Le nácatë bönniꞌ ni gúquiëꞌ bönniꞌ tsahuiꞌ.
48 Cateꞌ yúguꞌtë bönniꞌ nacuꞌë niꞌ tuꞌyúëꞌ bilaꞌléꞌenëꞌ lë naꞌ guca,
yöjhuö́jgaquiëꞌ yödzö,
taꞌgapaꞌ luchúꞌugaquiëꞌ tuꞌ tuꞌbáninëꞌ.
49 Zíꞌtuꞌsö buluꞌgáꞌana yúguꞌtë nupa niꞌ núnbëꞌgaca Jesús,
en yuguꞌ nigula naꞌ yöjácalennu Lëꞌ cateꞌ niꞌ gudë́ꞌ luyú Galilea,
ateꞌ tuꞌyúëꞌ lë ni raca.
Rigáchëꞌë Jesús yeru ba
50 Zoëꞌ caꞌ niꞌ tu bönniꞌ yödzö Arimatea que luyú Judea,
lëꞌ José.
Bönniꞌ ni náquiëꞌ dxiꞌa,
en tsahuiꞌ,
en nabábalenëꞌ yuguꞌ bönniꞌ yudoꞌ tuꞌchiꞌa tuꞌsörö́ëꞌ.
51 Bitiꞌ benëꞌ tuz nupa naꞌ gulaꞌchugu queëꞌ Jesús gátiëꞌ,
tuꞌ ribözëꞌ caꞌ José ni le rinná bëꞌë Dios.
52 Níꞌirö guyijëꞌ José naꞌ lahuëꞌ Pilato,
en gunabëꞌ lataj uꞌë Jesús.
53 Cateꞌ chinuzötjëꞌ Lëꞌ,
buchö́linëꞌ Lëꞌ lariꞌ,
ateꞌ guluꞌë Jesús yeru ba,
le nadaj lëꞌe guíꞌa guiö́j,
ateꞌ lu ba naꞌ,
cuntu nu nagüíꞌiguequinëꞌ.
54 Dza naꞌ naca dza tuꞌpë́ꞌë que dza láꞌayi quégaquiëꞌ bönniꞌ judío,
tuꞌ siꞌ idxín dza naꞌ.
55 Yöjácanu caꞌ niꞌ nigula naꞌ gulaꞌzáꞌlennu Jesús,
cateꞌ niꞌ gudë́ꞌ luyú Galilea,
ateꞌ bilaꞌléꞌenu yeru ba naꞌ,
en ca na guca,
gulaꞌguꞌë Lëꞌ niꞌ.
56 Cateꞌ yöjhuö́jgacanu yuꞌu,
buluꞌpáꞌanu nöri riláꞌ zxixi,
en yuguꞌ le za riláꞌ zxixi.
Níꞌirö buluꞌzíꞌ ládxiꞌgacanu dza láꞌayi naꞌ quégaquiëꞌ bönniꞌ judío ca naꞌ rinná bëꞌ xibá queëꞌ Dios.