DIDZAꞌ GUSÖ́L-LËꞌË PABLO YÖDZÖ ROMA
Pablo rugapëꞌ Dios bönachi queëꞌ Cristo nacuꞌë Roma
1
Nedaꞌ,
Pablo,
nacaꞌ bönniꞌ nadóꞌo queëꞌ Jesucristo,
en gubáz queëꞌ,
tuꞌ bulidzëꞌ Dios nedaꞌ,
en gurö́ cazëꞌ nedaꞌ para gunaꞌ libán que didzaꞌ dxiꞌa queëꞌ.
2 Dza niꞌte guzxíꞌ lu nëꞌë Dios isö́l-lëꞌë didzaꞌ dxiꞌa naꞌ queë́ruꞌ.
Gunnë́ꞌ caní lu ruáꞌagaquiëꞌ bönniꞌ guluꞌë didzaꞌ uláz queëꞌ,
ateꞌ légaquiëꞌ buluꞌzúajëꞌ le lu guichi láꞌayi queëꞌ Dios.
3 Buluꞌzúajëꞌ lu guichi yúguꞌtë le ral-laꞌ gunëꞌ Zxíꞌinëꞌ Dios,
Nu naꞌ naca Xanruꞌ Jesucristo.
Lu yöl-laꞌ bönachi queëꞌ náquiëꞌ zxíꞌini xiꞌsóëꞌ David,
4 pero ca naca böꞌ naca cazëꞌ,
le naca láꞌayi,
naca bëꞌ náquiëꞌ Zxíꞌinëꞌ Dios,
en nápadëꞌë yöl-laꞌ huáca.
Naca bëꞌ náquiëꞌ caní tuꞌ bubanëꞌ lu yöl-laꞌ guti.
5 Niꞌa que le benëꞌ Jesucristo ruzíꞌiruꞌ xibé le ruzáꞌ ládxëꞌë queë́ruꞌ Dios,
ateꞌ benëꞌ ga nacaꞌ gubáz queëꞌ para uláz queëꞌ Lëꞌ gunaꞌ ga ilaꞌyéajlëꞌ bönachi idútë yödzölió Lëꞌ,
en ilún ca rnna xtídzëꞌë.
6 Bítsaꞌliꞌ libíꞌiliꞌ ládjagaca bönachi yödzölió naꞌ,
pero naꞌa nulidzëꞌ Dios libíꞌiliꞌ para guéquiliꞌ queëꞌ Jesucristo.
7 Rugapaꞌ Dios libíꞌiliꞌ,
yúguꞌtëliꞌ zóaliꞌ Roma.
Dios nadxíꞌinëꞌ libíꞌiliꞌ,
en bulidzëꞌ libíꞌiliꞌ para gácaliꞌ quez queëꞌ.
Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo,
gunnëꞌ queë́liꞌ le ruzáꞌ ládxëꞌë queë́ruꞌ,
en le ribequi dxi ládxiꞌruꞌ.
Rë́ꞌënëꞌ Pablo tsöjyúëꞌ bönachi queëꞌ Cristo nacuꞌë Roma
8 Lë ni risí lahuaꞌ ruzúajaꞌ lu guichi:
Tuꞌ néquiruꞌ queëꞌ Jesucristo reaꞌ-nëꞌ Dios:
“Xclenuꞌ” ca naca queë́liꞌ yúguꞌtëliꞌ,
ateꞌ taꞌguixjöꞌ bönachi idútë yödzölió ca réajlëꞌëliꞌ Jesucristo.
9 Idú ládxaꞌa runaꞌ xichinëꞌ Dios,
runaꞌ libán que didzaꞌ dxiꞌa ca naca queëꞌ Zxíꞌinëꞌ.
Nö́zinëꞌ Dios rulídzaticaꞌsaꞌ-nëꞌ,
en rinábidaꞌ-nëꞌ gaca tsahuiꞌ queë́liꞌ.
10 Rinábiticaꞌsidaꞌ Dios,
channö naca le rë́ꞌënëꞌ Lëꞌ,
gunnëꞌ nedaꞌ lataj uduyúaꞌ libíꞌiliꞌ.
11 Caní rinábidaꞌ-nëꞌ tuꞌ raca ládxaꞌa iléꞌedaꞌ libíꞌiliꞌ para gaca gunaꞌ ga gataꞌ queë́liꞌ tu le unödzjëꞌ Dios Böꞌ Láꞌayi queë́liꞌ,
le gun ga gácaliꞌ tsutsu.
12 Lë naꞌ rë́ꞌëndaꞌ naca utipa ládxiꞌruꞌ turuꞌ iaꞌturuꞌ,
tuꞌ réajlëꞌëruꞌ Jesucristo yúguꞌtëruꞌ.
13 Böchiꞌ luzáꞌadoꞌ,
rë́ꞌëndaꞌ inö́ziliꞌ lë ni.
Zián luzuí bëꞌ ládxaꞌa guídaꞌ ga zóaliꞌ,
pero ga ridxintë naꞌa bitiꞌ runni quiaꞌ.
Rë́ꞌëndaꞌ guídaꞌ ga zóaliꞌ para gunaꞌ ga uzíꞌiliꞌ xibé libán naꞌ runaꞌ,
ca naꞌ tuꞌzíꞌ xibé iaꞌbal-la bönachi yödzölió ni.
14 Dë le ral-laꞌ gunaꞌ quégaca yúguꞌtë bönachi,
quégaca bönachi nazë́dagaca,
en quégaca bönachi cabí nazë́dagaca,
quégaca bönachi taꞌyéajniꞌi,
en quégaca bönachi cabí taꞌyéajniꞌi.
15 Que lë ni naꞌ,
tsca gaca gunaꞌ,
zoaꞌ ribözaꞌ gunaꞌ caꞌ libán que didzaꞌ dxiꞌa ga niꞌ zóaliꞌ libíꞌiliꞌ,
zóaliꞌ Roma.
Yöl-laꞌ huáca zxön que didzaꞌ dxiꞌa
16 Bitiꞌ caꞌ rutuíꞌidaꞌ runaꞌ libán que didzaꞌ dxiꞌa,
tuꞌ napa yöl-laꞌ huáca queëꞌ Dios para gun ga uluꞌlágaca yúguꞌtë nupa taꞌyéajlëꞌ le.
Ga risí lo,
rë́ꞌënëꞌ Dios ilaꞌyönnëꞌ bönniꞌ judío le,
ateꞌ tödi naꞌ ilaꞌyöni caꞌ bönachi izáꞌa.
17 Didzaꞌ dxiꞌa ni ruluíꞌi rëꞌu gunëꞌ Dios ga huöácaruꞌ tsahuiꞌ,
channö uyéajlëꞌëruꞌ Lëꞌ,
en bitiꞌ gaca chopa ládxiꞌruꞌ.
Ca naca lë ni nazúaj caꞌ lu guichi láꞌayi,
rnna:
“Nu naca tsahuiꞌ tuꞌ réajlëꞌ Dios,
gataꞌ yöl-laꞌ naꞌbán que nu naꞌ.”
Xíguiaꞌ nabágaꞌgaca bönachi
18 Dios,
Nu zoa yehuaꞌ yubá,
buluꞌe lahui bitiꞌ riléꞌenëꞌ dxiꞌa yúguꞌtë le ruáꞌ döꞌ,
en le cabí naca tsahuiꞌ tun bönachi.
Gunëꞌ xíguiaꞌ yuguꞌ bönniꞌ naꞌ,
lu yöl-laꞌ bitiꞌ naca tsahuiꞌ quégaquiëꞌ taꞌdáꞌbaguëꞌë le naca idútë li.
19 Caní gaca quégaquiëꞌ tuꞌ naláꞌ lahui lógaca yúguꞌtë bönachi le naca bëꞌ zoa cazëꞌ Dios,
tuꞌ buluíꞌi quézinëꞌ Dios lë ni ga naꞌ nacuꞌë.
20 Dza niꞌte cateꞌ siꞌ gutaꞌ yödzölió,
ga ridxintë naꞌa dza,
yuguꞌ le nunëꞌ Dios nácagaca bëꞌ le cabí gaca iléꞌeruꞌ queëꞌ Dios,
ca naca yöl-laꞌ huáca idú queëꞌ,
en le naca cazëꞌ Dios.
Que lë ni naꞌ,
bitiꞌ gaca ilaꞌnnë́ꞌ bitiꞌ nabágaꞌgaquiëꞌ xíguiaꞌ.
21 Cateꞌ niꞌ gulúnbëꞌë Dios,
bitiꞌ gulaꞌyéaj ládxiꞌgaquiëꞌ Lëꞌ ca ral-laꞌ tseaj ládxiꞌruꞌ-nëꞌ Dios,
en bitiꞌ gulë́ꞌ Lëꞌ:
“Xclenuꞌ.”
Que lë ni naꞌ,
cáꞌasö böáca le gulaꞌzáꞌ ládxiꞌgaquiëꞌ,
ateꞌ gulaꞌchul-la gulaꞌnítiëꞌ tuꞌ nazidi icja ládxiꞌdoꞌgaquiëꞌ.
22 Sal-laꞌ guléquinëꞌ taꞌyéajniꞌinëꞌ yenniꞌ,
buluꞌhuöáquiëꞌ bönniꞌ bitiꞌ bi nö́zguequinëꞌ
23 tuꞌ buluꞌcáꞌanëꞌ yöl-laꞌ beníꞌ queëꞌ Dios Nu zóaticaꞌsö,
ateꞌ gulaꞌyéaj ládxiꞌgaquiëꞌ budóꞌ guiö́j budóꞌ yaga,
budóꞌ naꞌ nácagaca ca yuguꞌ bönniꞌ tati cazëꞌ,
en ca yuguꞌ böaꞌdoꞌ zoa xíligacabaꞌ,
en ca yuguꞌ böaꞌ guixiꞌ taꞌdabaꞌ lu yu,
en ca yuguꞌ böaꞌ bëla táꞌayöj lë́ꞌëbaꞌ lu yu ni.
24 Que lë ni naꞌ Dios guléaj ládxëꞌë légaquiëꞌ para ilunëꞌ yuguꞌ le taꞌzë́ ládxiꞌgaquiëꞌ le ruáꞌ döꞌ,
ateꞌ caní guca,
buluꞌcáꞌana cuíngaquiëꞌ lu yöl-laꞌ stuꞌ tuëꞌ len iaꞌtúëꞌ.
25 Guca caní tuꞌ buluꞌcáꞌanëꞌ xtídzëꞌë Dios,
le naca idútë li,
ateꞌ gulaꞌzíꞌ lu náꞌagaquiëꞌ tu le cabí nácatë.
Gulunëꞌ bal,
en gulaꞌyéaj ládxiꞌgaquiëꞌ yuguꞌ le benëꞌ Dios,
en calëga Lë cazëꞌ Dios,
Nu naꞌ ral-laꞌ gácaticaꞌsö queëꞌ yöl-laꞌ ba.
¡Caꞌ gaca!
26 Que lë ni naꞌ Dios guléaj ládxëꞌë légaquiëꞌ para ilunëꞌ yuguꞌ le taꞌzë́ ládxiꞌgaquiëꞌ le ruáꞌ döꞌ.
Yuguꞌ nigula buluꞌcáꞌananu yöl-laꞌ rizóalen bönniꞌ,
para ilunnu le ruáꞌ döꞌ.
27 Lëscaꞌ caní gulunëꞌ yuguꞌ bönniꞌ biguiúꞌ,
buluꞌcáꞌanëꞌ yöl-laꞌ rizóalen nigula,
ateꞌ gulaꞌzë́ ládxiꞌgaquiëꞌ le ruáꞌ döꞌ túnlenëꞌ tuëꞌ iaꞌtúëꞌ,
en gulunëꞌ le tun ga nu rutuíꞌi,
tuꞌ gulaꞌcuáꞌlenëꞌ laꞌ luzáꞌa bö́nniꞌgacasëꞌ.
Que lë ni naꞌ gulaꞌguíꞌi gulaꞌzáquiëꞌ lu xipë́laꞌgaquiëꞌ yuguꞌ bönniꞌ gulunëꞌ caní tuꞌ bubiꞌë Dios quégaquiëꞌ ca saꞌyéaj dul-laꞌ naꞌ gulunëꞌ tuꞌ nucáꞌanagaquiëꞌ Dios.
28 Tuꞌ cabí gulë́ꞌënnëꞌ ilunëꞌ Dios bal,
que lë ni naꞌ guléaj ládxëꞌë Dios légaquiëꞌ para ilaꞌzáꞌ ládxiꞌgaquiëꞌ le bitiꞌ naca dxiꞌa,
en ilunëꞌ le cabí nazacaꞌ.
29 Túnticaꞌsëꞌ yúguꞌtë le cabí naca tsahuiꞌ,
en yuguꞌ le naca stuꞌ.
Tunëꞌ le ruáꞌ döꞌ,
en tuꞌhuídiꞌnëꞌ.
Bitiꞌ taꞌléꞌenëꞌ dxiꞌa luzáꞌagaquiëꞌ,
en tuꞌzxéꞌenëꞌ luzáꞌagaquiëꞌ.
Tutiëꞌ luzáꞌagaquiëꞌ,
en taꞌdíl-lalenëꞌ luzáꞌagaquiëꞌ.
Taꞌzíꞌ yéꞌenëꞌ bönachi,
en ziꞌtë nácagaquiëꞌ xihuiꞌ.
Taꞌnnë́ꞌ que luzáꞌagaquiëꞌ.
30 Taꞌnnë́ꞌ le cabí nácatë que luzáꞌagaquiëꞌ.
Bitiꞌ taꞌléꞌenëꞌ Dios dxiꞌa,
en nácagaquiëꞌ bönniꞌ bizxaj.
Tun cuíngaquiëꞌ lo,
en tun ba zxön cuíngaquiëꞌ.
Taꞌguiljëꞌ le ruáꞌ döꞌ ilunëꞌ,
en taꞌdáꞌbaguëꞌë xuz xináꞌagaquiëꞌ.
31 Nácagaquiëꞌ bönniꞌ bitiꞌ taꞌyéajniꞌinëꞌ,
en tun dítjagaquiëꞌ xtídzaꞌgaquiëꞌ.
Bitiꞌ nácagaquiëꞌ dxiꞌi ladxiꞌ ca ral-laꞌ ilácagaquiëꞌ.
Bitiꞌ tuꞌniti lahuëꞌ luzáꞌagaquiëꞌ.
Bitiꞌ tuꞌhuechiꞌ ládxiꞌgaquiëꞌ luzáꞌagaquiëꞌ.
32 Nö́zguequi quézinëꞌ le nuzóëꞌ tsaz Dios ca ral-laꞌ gaca quégaca nupa tun yuguꞌ le caní,
ilátigaca tsaz.
Sal-laꞌ nö́ziguequinëꞌ lë ni,
calë́gasö caní tunëꞌ,
pero taꞌyaza ládxiꞌgaquiëꞌ nupa tun caꞌ caní.