Le benëꞌ Pablo luyú bidxi nazíꞌi le Malta
28
Cateꞌ chibulatuꞌ yúguꞌtëtuꞌ,
gunöztuꞌ luyú bidxi ga naꞌ zóatuꞌ nazíꞌi le Malta.
2 Bönniꞌ xidzaꞌ nacuꞌë luyú bidxi naꞌ lu yöl-laꞌ dxiꞌi ladxiꞌ quégaquiëꞌ gulunëꞌ netuꞌ bal.
Gulaꞌbéquiëꞌ guíꞌ,
ateꞌ buluꞌlidzëꞌ netuꞌ yúguꞌtëtuꞌ iditsëꞌe cuintuꞌ,
tuꞌ ralaj guiö́j,
en rundaꞌ ziaga.
3 Níꞌirö Pablo gúchëꞌë tu tsölén huága zxisi bídxidoꞌ,
en cateꞌ guluꞌë le lu guíꞌ,
birúajbaꞌ tubaꞌ bëla síniaꞌ lëꞌe huágadoꞌ,
rizxúnnajbaꞌ bö́chila que guíꞌ naꞌ,
ateꞌ yöjtíꞌinibaꞌ yen nëꞌë Pablo.
4 Cateꞌ bönniꞌ xidzaꞌ naꞌ bilaꞌléꞌenëꞌ bëla naꞌ,
nálaꞌbaꞌ yen nëꞌë Pablo,
gulë́ꞌ tuëꞌ iaꞌtúëꞌ:
―Le nácatë bönniꞌ ni náquiëꞌ nu ruti bönachi.
Sal-laꞌ bulë́ꞌ lu nísadoꞌ,
dios queë́ruꞌ lëꞌ Tsahuiꞌ bitiꞌ ruꞌë lëꞌ lataj soëꞌ ibanëꞌ.
5 Gudxibi nëꞌë Pablo,
en busládzuꞌë-baꞌ bëla síniaꞌ naꞌ.
Yöjxóatëbaꞌ lu guíꞌ,
ateꞌ lëꞌ bitiꞌ bi guca queëꞌ.
6 Bönniꞌ xidzaꞌ nacuꞌë niꞌ tuꞌyúëꞌ Pablo,
bátacalö cöꞌë gui,
o tsö́ꞌötëꞌ gátiëꞌ.
Níꞌirö cateꞌ chigudzé taꞌbözëꞌ,
en bilaꞌléꞌenëꞌ bitiꞌ bi raca queëꞌ,
iaꞌtú le guléquinëꞌ,
ateꞌ gulaꞌnnë́ꞌ naca cazëꞌ tu dios.
7 Lataj níꞌisö dë xiyúëꞌ Publio,
bönniꞌ lo que luyú bidxi naꞌ,
ateꞌ bönniꞌ ni benëꞌ netuꞌ bal.
Lu yöl-laꞌ dxiꞌi ladxiꞌ queëꞌ guluꞌë netuꞌ lidxëꞌ idú tsonna dza.
8 Dza naꞌ dëꞌ réꞌenëꞌ xuzëꞌ Publio naꞌ,
yuꞌë xilá,
en réꞌenëꞌ huëꞌ rön.
Guyáziëꞌ Pablo söjyúëꞌ lëꞌ,
en gudödi bulidzëꞌ Dios,
níꞌirö guxóa nëꞌë bönniꞌ huëꞌ naꞌ,
en bunëꞌ lëꞌ.
9 Tuꞌ benëꞌ Pablo lë ni,
lëscaꞌ bilaꞌdxín nupa teꞌe ga zoëꞌ,
nacuáꞌ luyú bidxi niꞌ,
en buluꞌhuöáquiëꞌ.
10 Yuguꞌ bönniꞌ ni gulunëꞌ netuꞌ bal,
en zián le gulunëꞌ queë́tuꞌ.
Cateꞌ chizóa uzáꞌatuꞌ luyú niꞌ,
buluꞌnödzjëꞌ yuguꞌ le naquínituꞌ queë́tuꞌ.
Ridxinëꞌ Pablo lu yödzö Roma
11 Cateꞌ chiguca tsonna beoꞌ zóatuꞌ niꞌ,
níꞌirö gurentuꞌ tu lëꞌe barco que yödzö Alejandría,
le bugáꞌana luyú bidxi naꞌ yuguꞌ beoꞌ ziaga.
Barco ni dáꞌgaca tsöláꞌa láhuilö budóꞌ yaga lë́guequi Cástor,
en Pólux,
dios bilidiꞌ quégaca bönachi Alejandría naꞌ.
12 Buzáꞌa barco naꞌ ga niꞌ,
ateꞌ bidxín yödzö Siracusa,
ga niꞌ bugáꞌanatuꞌ tsonna dza.
13 Buzáꞌatuꞌ niꞌ,
ateꞌ gudö́dituꞌ tsöláꞌalö luyú niꞌ,
en bidxintuꞌ yödzö Regio.
Cateꞌ zaꞌ reníꞌ iaꞌtú dza,
tuꞌ recja böꞌ zaꞌ sacaꞌ ga ridödi gubidza beoꞌ ziaga,
buzáꞌatuꞌ niꞌ,
ateꞌ dza buropi naꞌ bidxíntëtuꞌ yödzö Puteoli luyú Italia.
14 Lu yödzö naꞌ yöjxácaꞌtuꞌ yuguꞌ bö́chiꞌruꞌ taꞌyéajlëꞌë Cristo,
ateꞌ gulátaꞌyuëꞌ lotuꞌ ugáꞌanalentuꞌ légaquiëꞌ idú xunuꞌ dza.
Cateꞌ bizáꞌa dza naꞌ buzáꞌatuꞌ niꞌ para tséajtuꞌ yödzö Roma,
rizëꞌe níꞌatuꞌ.
15 Chibilaꞌyönnëꞌ bö́chiꞌruꞌ nacuꞌë Roma chizóa idxintuꞌ niꞌ,
ateꞌ bilaꞌrúajëꞌ idixíꞌgalaꞌgaquiëꞌ netuꞌ.
Bilaꞌdxinëꞌ tu yö́dzödoꞌ nazíꞌi le Yë́ꞌëyi Que Apio.
Iaꞌbal-lëꞌ bilaꞌdxinëꞌ tu lataj nazíꞌi le Tsonna Yuꞌu Quégaquiëꞌ Bönniꞌ Yúꞌugaquiëꞌ Nöza.
Cateꞌ Pablo biléꞌenëꞌ légaquiëꞌ,
bidipa ládxëꞌë,
en gudxëꞌ Dios:
“Xclenuꞌ.”
16 Cateꞌ bidxintuꞌ Roma,
bönniꞌ naꞌ rinná béꞌenëꞌ bönniꞌ röjáquiëꞌ gudil-la,
guchë́ꞌë bönniꞌ naꞌ nadzúngaquiëꞌ,
ateꞌ budödëꞌ légaquiëꞌ lu nëꞌë tu bönniꞌ lo rinná béꞌenëꞌ bönniꞌ röjáquiëꞌ gudil-la,
ateꞌ bëꞌë Pablo lataj soëꞌ queë́zëꞌ,
zóalenëꞌ lëꞌ tu bönniꞌ rejëꞌ gudil-la ruyúëꞌ lëꞌ.
Runëꞌ Pablo libán lu yödzö Roma
17 Cateꞌ chigudödi tsonna dza,
bulidzëꞌ Pablo yuguꞌ bönniꞌ lo quégaquiëꞌ bönniꞌ judío nacuꞌë Roma.
Cateꞌ chibuluꞌdubëꞌ ga naꞌ zoëꞌ Pablo,
lëꞌ gudxëꞌ légaquiëꞌ:
―Libíꞌiliꞌ,
bö́chaꞌa,
sal-laꞌ bitiꞌ bi benaꞌ quégaca bönachi ládzaruꞌ,
en calëga que le nalë́biruꞌ runruꞌ ca naꞌ gulunëꞌ xuz xtóꞌoruꞌ,
yuguꞌ bönniꞌ judío nacuꞌë Jerusalén buluꞌdödëꞌ nedaꞌ lu náꞌagaquiëꞌ bönniꞌ Roma nacuꞌë Jerusalén,
ateꞌ buluꞌsayjëꞌ nedaꞌ lidxi guíë.
18 Níꞌirö cateꞌ chigulaꞌnabi yúdxinëꞌ nedaꞌ bönniꞌ Roma,
gulë́ꞌënnëꞌ uluꞌsanëꞌ nedaꞌ,
tuꞌ guléquibeꞌenëꞌ bitiꞌ nabágaꞌa xíguiaꞌ gátiaꞌ.
19 Yuguꞌ bönniꞌ judío niꞌ gulaꞌdáꞌbáguëꞌë nupa naꞌ gulë́ꞌëni uluꞌsán nedaꞌ,
ateꞌ ben bayudxi gunabaꞌ tsejaꞌ lahuëꞌ César ga uchiꞌa usörö́ëꞌ nedaꞌ,
en calëga para uzéguiaꞌ bönachi uládz queë́ruꞌ didzaꞌ.
20 Que lë ni naꞌ bulidzaꞌ libíꞌiliꞌ para iléꞌedaꞌ libíꞌiliꞌ,
en güíꞌilenaꞌ libíꞌiliꞌ didzaꞌ,
tuꞌ nágaꞌa du guíë ni tuꞌ runaꞌ löza le runruꞌ löza rëꞌu,
bönachi Israel,
gácatë lë naꞌ guzxíꞌ lu nëꞌë Dios gataꞌ queë́ruꞌ.
21 Níꞌirö légaquiëꞌ gulë́ꞌ Pablo:
―Bitiꞌ ridxini queë́tuꞌ guichi le zaꞌ luyú Judea ca naca lë naꞌ raca quiuꞌ,
en cuntu nu ridxini nu naca bö́chiꞌruꞌ judío,
nu usiyöni netuꞌ channö nu bi rnnë quiuꞌ le ruáꞌ döꞌ.
22 Naꞌa,
rë́ꞌënituꞌ yö́nituꞌ xtídzuꞌu,
lë naꞌ riguinnaj icjuꞌ,
tuꞌ chinö́zituꞌ taꞌnnë́ bönachi yúguꞌtë lataj quégaca nupa nazíꞌ lu në́ꞌeguequi xibá cubi ni.
23 Caní guca,
buluꞌdxíëꞌ bëꞌ tu dza,
ateꞌ dza naꞌ bilaꞌdxinëꞌ ziánëꞌ ga naꞌ zoëꞌ Pablo.
Gusí lahuëꞌ Pablo zíladoꞌ,
ateꞌ niꞌ gúl-liꞌni buzéajniꞌinëꞌ légaquiëꞌ,
en buchila láꞌanëꞌ le rinná bëꞌë Dios.
Gúꞌunnëꞌ uluíꞌinëꞌ légaquiëꞌ naca idútë li libán runëꞌ queëꞌ Jesús.
Para gunëꞌ caní bugunëꞌ dxin le rinná bëꞌ xibá queëꞌ Moisés,
encaꞌ le gulaꞌnnë́ꞌ bönniꞌ guluꞌë didzaꞌ uláz queëꞌ Dios.
24 Bal-lëꞌ gulaꞌzíꞌ lu náꞌagaquiëꞌ didzaꞌ bëꞌë Pablo,
pero iaꞌbal-lëꞌ bitiꞌ caꞌ gulaꞌyéajlëꞌë.
25 Tuꞌ bilaꞌrúajëꞌ choplö,
gulaꞌsí lógaquiëꞌ tuꞌzë́ꞌë niꞌ,
ateꞌ Pablo gudxëꞌ légaquiëꞌ,
rnnëꞌ:
―Didzaꞌ nácatë bëꞌë Dios Böꞌ Láꞌayi,
lë naꞌ gunnë́ꞌ Isaías,
bönniꞌ bëꞌë didzaꞌ uláz queëꞌ Dios,
ca naꞌ buzéajniꞌinëꞌ xuz xtóꞌoruꞌ,
gunnë́ꞌ:
26 Guyéaj lógaca bönachi niꞌ,
yöjödxi légaquiëꞌ:
Yöni nágaliꞌ,
pero bitiꞌ tséajniꞌiliꞌ.
Uyuliꞌ ináꞌaliꞌ,
pero bitiꞌ iléꞌeliꞌ.
27 Yuguꞌ bönniꞌ ni chinazidi icja ládxiꞌdoꞌgaquiëꞌ,
en bitiꞌ bi riyaza icja nágagaquiëꞌ.
Gulunëꞌ ca tun nupa nachul-la guiö́j lóguequi
para cabí ilaꞌléꞌe len guiö́j lóguequi,
en cabí ilaꞌyöni nágaguequi
para cabí uluꞌzéajniꞌi ládxiꞌguequi,
en cabí ilë́ꞌëni uluꞌhuöáca queëꞌ Dios
para gaca unaꞌ léguequi.
28 Naꞌa,
ral-laꞌ inö́ziliꞌ lë ni.
Dios risö́l-lëꞌë netuꞌ lógaca bönachi izáꞌa para uluꞌlágaca,
ateꞌ légaquiëꞌ ilaꞌyönnëꞌ.
29 Cateꞌ Pablo budxi bëꞌë didzaꞌ ni,
bilaꞌrúajëꞌ bönniꞌ judío,
taꞌdíl-ladaꞌ dídzëꞌë laꞌ légacasëꞌ.