DIDZAꞌ ZÍꞌALÖ GUSÖ́L-LËꞌË PABLO YÖDZÖ CORINTO
Pablo rugapëꞌ Dios bönachi queëꞌ Cristo nacuꞌë Corinto
1
Ca rë́ꞌëni quézinëꞌ Dios bulidzëꞌ nedaꞌ,
Pablo,
para gacaꞌ gubáz queëꞌ Jesucristo.
Bö́chiꞌruꞌ Sóstenes runëꞌ nedaꞌ tsözxö́n.
2 Rugapaꞌ Dios libíꞌiliꞌ,
böchiꞌ luzáꞌadoꞌ,
rudúbiliꞌ queëꞌ Dios lu yödzö Corinto,
en nácaliꞌ quez queëꞌ Dios tuꞌ nácaliꞌ tuz len Jesucristo.
Dios caz bulidzëꞌ libíꞌiliꞌ para guéquiliꞌ quez queëꞌ tsözxö́n len yúguꞌtë nupa nacuáꞌ yúguꞌtë lataj,
en tuꞌlidzëꞌ Dios,
tuꞌgunëꞌ dxin La laꞌayi queëꞌ Xanruꞌ Jesucristo,
Xángaquiëꞌ,
encaꞌ Xanruꞌ.
3 Rátaꞌyuaꞌ lahuëꞌ Xúziruꞌ Dios,
en lahuëꞌ Xanruꞌ Jesucristo uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Yuguꞌ le ruzíꞌiruꞌ xibé tuꞌ néquiruꞌ queëꞌ Cristo
4 Rë́ticaꞌsaꞌ-nëꞌ Dios:
“Xclenuꞌ” ca naca queë́liꞌ,
tuꞌ zoa le buzáꞌ ládxëꞌë Dios queë́liꞌ tuꞌ nácaliꞌ tuz len Jesucristo.
5 Tuꞌ nácaliꞌ tuz len Cristo,
Dios chinagúꞌudëꞌë xinö́ziliꞌ yúguꞌtë le nequi queëꞌ.
Rácalenëꞌ libíꞌiliꞌ ca naca yúguꞌtë didzaꞌ ruíꞌiliꞌ,
en runëꞌ ga réajniꞌiliꞌ yúguꞌtë.
6 Caní naca,
tuꞌ guzxíꞌ lu náꞌaliꞌ idú ládxiꞌliꞌ le runtuꞌ lináꞌ lo ca naca queëꞌ Cristo.
7 Que lë ni naꞌ,
bitiꞌ bi riyadzaj queë́liꞌ que le runnëꞌ Dios Böꞌ Láꞌayi queë́ruꞌ,
tsanni ni ribö́zaliꞌ dza naꞌ iláꞌ lahuëꞌ Xanruꞌ Jesucristo.
8 Lë cazëꞌ utipëꞌ ládxiꞌliꞌ para gaca guáꞌ ilenliꞌ yúguꞌtë ga idxintë dza údxi,
para cabí gaca nu bi innë́ queë́liꞌ dza niꞌ huödëꞌ Xanruꞌ Jesucristo.
9 Dios runëꞌ ca rnnëꞌ,
en Lë cazëꞌ bulidzëꞌ libíꞌiliꞌ para gácaliꞌ tuz len Zxíꞌinëꞌ,
Xanruꞌ Jesucristo.
Narúajgaca choplö bönachi queëꞌ Cristo nacuꞌë Corinto
10 Niꞌa queëꞌ Xanruꞌ Jesucristo rátaꞌyuaꞌ loliꞌ,
böchiꞌ luzáꞌadoꞌ,
guliꞌgún tuz xtídzaꞌliꞌ yúguꞌtëliꞌ.
Bitiꞌ irúajliꞌ choplö,
pero guliꞌgaca tuz ca rizáꞌ ládxiꞌliꞌ,
en ca runi libíꞌiliꞌ.
11 Caní reaꞌ libíꞌiliꞌ,
böchiꞌ luzáꞌadoꞌ,
tuꞌ gulaꞌguíxjöiꞌinëꞌ nedaꞌ bönniꞌ nacuꞌë lídxinu Cloé ca runliꞌ,
taꞌnnë́ꞌ ridil-la dídzaꞌliꞌ.
12 Lë ni rnníaꞌ:
Nadzáꞌlö didzaꞌ ruíꞌiliꞌ tu tuliꞌ.
Bál-laliꞌ rnnaliꞌ dáꞌaliꞌ Pablo.
Iaꞌbál-laliꞌ rnnaliꞌ dáꞌaliꞌ Apolos.
Iaꞌbál-laliꞌ rnnaliꞌ dáꞌaliꞌ Cefas,
ateꞌ iaꞌbál-laliꞌ rnnaliꞌ dáꞌaliꞌ Cristo.
13 ¿Naruꞌ birúajtsëꞌ choplö Cristo?
¿Naruꞌ gudáꞌatsaꞌ nedaꞌ,
Pablo,
lëꞌe yaga cruz uláz queë́liꞌ?
¿Naruꞌ bidílatsaliꞌ nisa para gácaliꞌ tuz len nedaꞌ?
14 Reaꞌ-nëꞌ Dios:
“Xclenuꞌ”,
tuꞌ cabí buquilaꞌ nisa niturö libíꞌiliꞌ,
pero chópasëꞌ Crispo,
en Gayo.
15 Que lë ni naꞌ bitiꞌ gaca innaliꞌ bidílaliꞌ nisa para gácaliꞌ tuz len nedaꞌ.
16 Lëscaꞌ buquilaꞌ nisa Estéfanas,
en nupa nacuáꞌ lidxëꞌ.
Bitiꞌ röjnedaꞌ channö buquilaꞌ nisa nu yúbölö.
17 Gusö́l-lëꞌë Cristo nedaꞌ,
calëga para uquilaꞌ bönachi nisa,
pero para gunaꞌ libán que didzaꞌ dxiꞌa.
Ruꞌa didzaꞌ,
calëga lu yöl-laꞌ rácadaꞌ que cazaꞌ,
para cabí ucáchaꞌa yöl-laꞌ huáca que le benëꞌ Cristo lëꞌe yaga cruz.
Cristo napa cazëꞌ yöl-laꞌ huáca, en yöl-laꞌ réajniꞌi queëꞌ Dios
18 Nupa nácagaca chul-la niti téquiguequi cáꞌasö naca libán runruꞌ ca naca queëꞌ Jesús,
ca naꞌ gútiëꞌ lëꞌe yaga cruz,
pero rëꞌu naꞌ nuláruꞌ,
réquibeꞌeruꞌ dzaga le yöl-laꞌ huáca queëꞌ Dios le rusölá rëꞌu.
19 Caní naca,
tuꞌ nazúaj lu guichi láꞌayi le rnna:
Gunaꞌ ga huöáca nítisö yöl-laꞌ rácadaꞌ
quégaca nupa taca yenniꞌ.
Tsöláꞌalö ucáꞌanaꞌ yöl-laꞌ réajniꞌi
quégaca nupa taꞌyéajniꞌi yenniꞌ.
20 ¿Bizxi caz uziꞌtsëꞌ xibé bönniꞌ réajniꞌinëꞌ yenniꞌ?
¿Bizxi caz uziꞌtsëꞌ xibé bönniꞌ nazë́dadëꞌë?
¿Bizxi caz uziꞌtsëꞌ xibé bönniꞌ nabéꞌedeꞌenëꞌ ruꞌë didzaꞌ?
Dios chibenëꞌ ga böáca cáꞌasö yöl-laꞌ réajniꞌi quégaca bönachi yödzölió ni.
21 Dios,
lu yöl-laꞌ réajniꞌi queëꞌ,
bitiꞌ bëꞌë lataj ilúnbeꞌe bönachi yödzölió ni Lëꞌ niꞌa que yöl-laꞌ rácadaꞌ quégaquiëꞌ.
Dios guyaza ládxëꞌë busölë́ꞌ nupa taꞌyéajlëꞌ Lëꞌ niꞌa que libán naꞌ runruꞌ,
sal-laꞌ téquiguequi bönachi cáꞌasö naca.
22 Të́ꞌënnëꞌ yuguꞌ bönniꞌ judío ilaꞌléꞌenëꞌ yöl-laꞌ huáca nácagaca bëꞌ,
ateꞌ bönniꞌ ziꞌtuꞌ taꞌguiljëꞌ yöl-laꞌ réajniꞌi.
23 Rëꞌu ni runruꞌ libán queëꞌ Cristo,
ca naꞌ gútiëꞌ lëꞌe yaga cruz.
Le nácatë,
libán runruꞌ ca gútiëꞌ Cristo,
run ga taꞌchixi taꞌnigui bönachi judío,
ateꞌ iaꞌzícaꞌrö bönachi téquiguequi cáꞌasö naca.
24 Bönniꞌ naꞌ bulidzëꞌ Dios légaquiëꞌ,
sal-laꞌ nácagaquiëꞌ bönniꞌ judío o bönniꞌ ziꞌtuꞌ,
téquibeꞌenëꞌ napa cazëꞌ Cristo yöl-laꞌ huáca queëꞌ Dios,
en yöl-laꞌ réajniꞌi queëꞌ Dios.
25 Téquiguequi bönachi yödzölió ni le benëꞌ Dios naca bëꞌ bitiꞌ bi nö́zinëꞌ,
pero lë naꞌ benëꞌ náparö yöl-laꞌ réajniꞌi ca yöl-laꞌ réajniꞌi quégaca bönachi.
Téquiguequi le benëꞌ Dios naca bëꞌ nacuídiꞌnëꞌ,
pero lë naꞌ benëꞌ náparö yöl-laꞌ huáca ca yöl-laꞌ huáca quégaca bönachi.
26 Naꞌa,
böchiꞌ luzáꞌadoꞌ,
guliꞌtsöjné ca gúcaliꞌ cateꞌ bulidzëꞌ Dios libíꞌiliꞌ.
Bitiꞌ gulaꞌcuꞌë ládjaliꞌ zián bönniꞌ taꞌyéajniꞌinëꞌ lu yöl-laꞌ bönáchisö quégaquiëꞌ,
en bitiꞌ gulaꞌcuꞌë ládjaliꞌ zián bönniꞌ unná bëꞌ,
en calëga zián bönniꞌ nácagaquiëꞌ lo.
27 Téquiguequi bönachi yödzölió ni yuguꞌ bönniꞌ naꞌ gurö́ëꞌ Dios bitiꞌ bi nö́zguequinëꞌ.
Caní benëꞌ Dios para gunëꞌ ga uluꞌtuíꞌi nupa taꞌyéajniꞌi.
Lëscaꞌ caní gurö́ëꞌ Dios nupa nacuídiꞌgaca yödzölió ni para gunëꞌ ga uluꞌtuíꞌi nupa nál-lagaca.
28 Lëscaꞌ caní,
téquiguequi bönachi yödzölió ni nupa naꞌ gurö́ëꞌ Dios nácagaca cáꞌasö,
en bitiꞌ bi nácagaca,
en nacuídiꞌgaca.
Caní benëꞌ Dios para gunëꞌ ga uluꞌgáꞌana cáꞌasö lë naꞌ tun zxön bönachi yödzölió ni.
29 Que lë ni naꞌ,
cuntu nu gaca gun ba zxön cuini lahuëꞌ Dios.
30 Dios caz benëꞌ ga nácaruꞌ tuz len Jesucristo,
en benëꞌ ga náparuꞌ yöl-laꞌ réajniꞌi queëꞌ Cristo.
Tuꞌ náquiëꞌ Cristo tuz len rëꞌu,
nuhuöácaruꞌ tsahuiꞌ,
en néquiruꞌ quez queëꞌ Dios,
en nuláruꞌ.
31 Naca ca naꞌ nazúaj lu guichi láꞌayi,
le rnna:
“Channö zoa nu bi rë́ꞌëni gun zxön,
ral-laꞌ gun zxön Xanruꞌ.”