DIDZAꞌ BUROPI GUSÖ́L-LËꞌË PABLO YÖDZÖ CORINTO
Pablo rugapëꞌ Dios bönachi queëꞌ Cristo nacuꞌë Corinto
1
Nedaꞌ,
Pablo,
nacaꞌ gubáz queëꞌ Jesucristo tuꞌ rë́ꞌënëꞌ caní Dios.
Biꞌi bö́chiꞌruꞌ Timoteo runbiꞌ nedaꞌ tsözxö́n.
Rugapaꞌ Dios libíꞌiliꞌ,
rudúbiliꞌ queëꞌ Dios lu yödzö Corinto,
encaꞌ yúguꞌtëliꞌ néquiliꞌ quez queëꞌ Dios luyú Acaya ga naꞌ nababa Corinto.
2 Rinábidaꞌ-nëꞌ Xúziruꞌ Dios,
en Xanruꞌ Jesucristo uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Yuguꞌ le gudíꞌi guzxáquëꞌë Pablo
3 ¡Yöl-laꞌ ba Dios,
Xuzëꞌ Xanruꞌ Jesucristo,
tuꞌ náquiëꞌ Xúziruꞌ,
en ruhuéchiꞌ ládxëꞌë rëꞌu,
en náquiëꞌ caꞌ Dios,
Nu ruhuë́ tsáhuiꞌticaꞌsö rëꞌu!
4 Dios ruhuë́ tsáhuëꞌë rëꞌu cateꞌ raca bítiꞌtës bi raca queë́ruꞌ,
para gaca huë tsáhuiꞌruꞌ caꞌ nupa bi raca quéguequi.
Ruhuë́ tsáhuiꞌruꞌ légaquiëꞌ ca naꞌ Dios ruhuë́ tsáhuëꞌë rëꞌu.
5 Tsca taꞌyán le riguíꞌi rizácaꞌruꞌ,
ca naꞌ gudíꞌi guzxáquëꞌë Cristo,
lëscaꞌ caní taꞌyán le tuꞌhuë́ tsahuiꞌ rëꞌu,
tuꞌ nácaruꞌ tuz len Cristo.
6 Que lë ni naꞌ,
channö bi riguíꞌi rizácaꞌtuꞌ,
raca caní queë́tuꞌ para gaca huë tsáhuiꞌtuꞌ libíꞌiliꞌ,
en guntuꞌ ga uláliꞌ.
Channö Dios ruhuë́ tsáhuëꞌë netuꞌ,
raca caní para gaca huë tsáhuiꞌtuꞌ libíꞌiliꞌ,
ateꞌ lu yöl-laꞌ riböza zxön ladxiꞌ queë́liꞌ,
gaca guáꞌ ilenliꞌ yuguꞌ le quíꞌi sácaꞌliꞌ,
ca naꞌ raca caꞌ queë́tuꞌ.
7 Ruzxöni ládxiꞌtuꞌ-nëꞌ Dios gúnticaꞌsëꞌ ga gaca dxiꞌa queë́liꞌ,
tuꞌ chinö́zituꞌ ca naꞌ riguíꞌi rizácaꞌliꞌ tsözxö́n len netuꞌ,
lëscaꞌ caní ruzíꞌiliꞌ xibé tsözxö́n len netuꞌ le ruhuë́ tsáhuëꞌë Dios rëꞌu.
8 Rë́ꞌënituꞌ inö́ziliꞌ,
böchiꞌ luzáꞌadoꞌ,
ca naca le zián le gulaca queë́tuꞌ luyú Asia.
Gudö́ditë bëꞌ lë naꞌ guca queë́tuꞌ,
ateꞌ guca zíꞌtërö ca le guca guáꞌ ilentuꞌ.
Caꞌ guca,
bítiꞌrö bentuꞌ löza sóatuꞌ ibantuꞌ.
9 Gúquituꞌ guca queë́tuꞌ ca raca quégaquiëꞌ bönniꞌ chinarugu quégaquiëꞌ ilátiëꞌ.
Guca caní queë́tuꞌ para cabí uzxöni ládxiꞌtuꞌ laꞌ cuínsituꞌ,
pero uzxöni ládxiꞌtuꞌ-nëꞌ Dios,
Nu rusubán nupa chinátigaca.
10 Dios busölë́ꞌ netuꞌ lu lë naꞌ ben ga guzóa bönadxi gátituꞌ,
ateꞌ rusölë́ꞌ netuꞌ yúguꞌtë dza.
Runtuꞌ löza usölë́ꞌ Lëꞌ netuꞌ caní leyúbölö
11 channö gácalenliꞌ netuꞌ,
ulídzaliꞌ-nëꞌ Dios,
en inábiliꞌ-nëꞌ gácalenëꞌ netuꞌ.
Dios gunëꞌ ca naꞌ inábiliꞌ-nëꞌ tsözxö́n len bönachi zián,
uzáꞌ ládxëꞌë queë́tuꞌ,
ateꞌ ilaꞌnná:
“Xclenëꞌ Dios” niꞌa queë́tuꞌ.
Riguíxjöꞌë Pablo bizx que ridzenëꞌ idxinëꞌ Corinto
12 Lë ni le run ga rudzéjatuꞌ.
Böꞌ naca caztuꞌ ruluíꞌi netuꞌ,
len yöl-laꞌ baꞌa ladxiꞌ queë́tuꞌ,
en idú ládxiꞌtuꞌ runtuꞌ bi runtuꞌ yödzölió ni,
ateꞌ caní bentuꞌ caꞌ ga niꞌ zóaliꞌ.
Caní bentuꞌ,
tuꞌ gúcalen netuꞌ le buzáꞌ ládxëꞌë Dios queë́tuꞌ,
en calëga len yöl-laꞌ réajniꞌi queë́ztuꞌ bentuꞌ caní.
13 Ruzúajsötuꞌ queë́liꞌ lu guichi le gaca ulábaliꞌ,
en le gaca tséajniꞌiliꞌ.
Raca ládxaꞌa tséajniꞌiliꞌ idú
14 lë naꞌ réajniꞌiliꞌ latiꞌ.
Níꞌirö cateꞌ idxín dza huödëꞌ Xanruꞌ Jesucristo,
gaca gunliꞌ netuꞌ zxön ca naꞌ netuꞌ guntuꞌ libíꞌiliꞌ zxön.
15,16 Tuꞌ benaꞌ löza lë ni, guzáꞌ ládxaꞌa guídaꞌ ga zóaliꞌ zíꞌalö cateꞌ gudödaꞌ luyú Macedonia, ateꞌ guídaꞌ ga zóaliꞌ leyúbölö cateꞌ uzáꞌa ni para uzíꞌiliꞌ xibáꞌ chopa luzuí. Tödi niꞌ huáca gácalenliꞌ nedaꞌ ugúꞌuliꞌ nedaꞌ nöza tsejaꞌ luyú Judea. Caní gúꞌunidaꞌ gunaꞌ.
17 ¿Naruꞌ réquitseliꞌ guzxíꞌ yëꞌa tuꞌ butsáꞌa ca gunaꞌ?
¿Naruꞌ réquitseliꞌ lu yöl-laꞌ bönáchisö quiaꞌ runaꞌ le rizáꞌasö icjaꞌ,
en bë́ꞌësaꞌ caꞌ didzaꞌ cateꞌ gunníaꞌ:
“Caní gunaꞌ”?
18 Niꞌa queëꞌ Xanruꞌ Dios,
Nu run idútë ca rnna xtídzëꞌë,
bitiꞌ bë́ꞌësaꞌ caꞌ didzaꞌ cateꞌ bë́ꞌlenaꞌ libíꞌiliꞌ xtídzëꞌë Dios.
19 Jesucristo,
Zxíꞌinëꞌ Dios,
Nu naꞌ bentuꞌ libán que ga zóaliꞌ,
nedaꞌ len Silvano,
en Timoteo,
bitiꞌ ruíꞌisëꞌ caꞌ didzaꞌ.
Lëꞌ ruꞌë didzaꞌ idútë li.
20 Cristo caz runëꞌ ga naca idútë löza yúguꞌtë le guzxíꞌ lu nëꞌë Dios,
ateꞌ niꞌa queëꞌ Lëꞌ gaca innaruꞌ:
“Caꞌ gaca”,
para gaca queëꞌ Dios yöl-laꞌ ba.
21 Dios caz runëꞌ ga runtuꞌ löza tsözxö́n len libíꞌiliꞌ néquiruꞌ queëꞌ Cristo,
en budödëꞌ lu naꞌtuꞌ dxin queëꞌ runtuꞌ.
22 Bennëꞌ queë́ruꞌ le naca bëꞌ néquiruꞌ queëꞌ,
tuꞌ guchíziëꞌ icja ládxiꞌdoꞌoruꞌ Dios Böꞌ Láꞌayi,
Nu naca queë́ruꞌ le run ga naca löza yúguꞌtë le gunnëꞌ Dios queë́ruꞌ.
23 Niꞌa queëꞌ Xanruꞌ Dios,
Nu nözi le rizáꞌ ládxaꞌa,
ruáꞌa didzaꞌ idútë li.
Nö́zinëꞌ Lëꞌ bitiꞌ bidaꞌ ga zóaliꞌ lu yödzö Corinto,
para cabí gun bayudxi gunaꞌ ga huíꞌiniliꞌ.
24 Bitiꞌ rë́ꞌënituꞌ inná béꞌetuꞌ libíꞌiliꞌ ca réajlëꞌëliꞌ Cristo,
tuꞌ chinácaliꞌ tsutsu ca réajlëꞌëliꞌ Lëꞌ.
Rë́ꞌënituꞌ guntuꞌ le gun ga udzeja ládxiꞌliꞌ.