Yuguꞌ bönachi Corinto tuꞌnödzaj quégaquiëꞌ bö́chiꞌgaca taꞌyádzjanëꞌ
16
Naꞌa,
ca naca que dumí naꞌ unö́dzjaliꞌ,
le gácalen bö́chiꞌruꞌ taꞌyéajlëꞌë Cristo nacuꞌë Jerusalén,
guliꞌgún naꞌa ca naꞌ gunná béꞌedaꞌ yuguꞌ cöꞌ bönachi queëꞌ Cristo,
nacuáꞌ luyú Galacia.
2 Yuguꞌ dza domingo,
tu tuliꞌ ral-laꞌ cúꞌuliꞌ quez latiꞌ dumí,
tsca naꞌ Dios runnëꞌ queë́liꞌ.
Guliꞌgún chiꞌi le,
para cabí gun bayudxi bi utúbiliꞌ cateꞌ idxinaꞌ ga zóaliꞌ.
3 Cateꞌ niꞌ idxinaꞌ ga zóaliꞌ,
isö́l-laꞌa Jerusalén bönniꞌ naꞌ cöliꞌ libíꞌiliꞌ.
Uzúajaꞌ tu lu guichi le gun ga ilaca bë́ꞌgaquiëꞌ,
ateꞌ iluꞌë dumí naꞌ unö́dzjaliꞌ.
4 Channö ral-laꞌ tsejaꞌ caꞌ nedaꞌ,
tsöjácalenëꞌ nedaꞌ.
Le rë́ꞌënëꞌ gunëꞌ Pablo
5 Guídaꞌ ga zóaliꞌ cateꞌ údxi tödaꞌ yuguꞌ yödzö luyú Macedonia,
tuꞌ run bayudxi tödaꞌ yuguꞌ yödzö naꞌ.
6 Réquidaꞌ ugáꞌanalenaꞌ libíꞌiliꞌ tu chiꞌi,
o nadxi caꞌ ugáꞌanaꞌ niꞌ yuguꞌ beoꞌ ziaga.
Níꞌirö huáca gácalenliꞌ nedaꞌ,
ugúꞌuliꞌ nedaꞌ nöza gátiꞌtës ga ral-laꞌ tsejaꞌ.
7 Cateꞌ guídaꞌ uduyúaꞌ libíꞌiliꞌ bitiꞌ rë́ꞌëndaꞌ tö́disaꞌ niꞌ.
Runaꞌ löza sóalenaꞌ libíꞌiliꞌ xidzé,
channö gunnëꞌ Xanruꞌ nedaꞌ lataj.
8 Ugáꞌanaꞌ ni lu yödzö Éfeso ga idxinrö dza Pentecostés
9 tuꞌ dë lataj ni gunaꞌ tu dxin zxön queëꞌ Xanruꞌ,
sal-laꞌ zián nupa taꞌdáꞌbagaꞌ nedaꞌ.
10 Channö idxinbiꞌ biꞌi Timoteo ga naꞌ zóaliꞌ,
guliꞌgüíꞌi ládxiꞌliꞌ-biꞌ,
para cabí ubi uguíꞌibiꞌ tsanni niꞌ sóalenbiꞌ libíꞌiliꞌ,
tuꞌ runbiꞌ xichinëꞌ Xanruꞌ ca naꞌ runaꞌ nedaꞌ xichinëꞌ.
11 Que lë ni naꞌ,
cuntu nu ral-laꞌ uzóa lëbiꞌ tsöláꞌalö.
Guliꞌgácalen-biꞌ,
ugúꞌuliꞌ-biꞌ nöza idú tsáhuiꞌdoꞌ,
para udxinbiꞌ ga ni zoaꞌ nedaꞌ,
tuꞌ ribözaꞌ-biꞌ lëbiꞌ,
encaꞌ yuguꞌ bö́chiꞌruꞌ túnlenëꞌ-biꞌ tsözxö́n dxin.
12 Ca naca queëꞌ bö́chiꞌruꞌ Apolos,
gútaꞌyuaꞌ lahuëꞌ tsejëꞌ tsöjyúëꞌ libíꞌiliꞌ tsözxö́n len yuguꞌ bö́chiꞌruꞌ,
pero bitiꞌ rë́ꞌënëꞌ tsejëꞌ naꞌa.
Guídëꞌ cateꞌ séquiꞌnëꞌ.
Didzaꞌ ruꞌë Pablo ga ruúdx
13 Buliꞌsubán ládxiꞌliꞌ,
en guliꞌgaca tsutsu ca réajlëꞌëliꞌ-nëꞌ Cristo.
Guliꞌgaca rugu ladxiꞌ,
en buliꞌtipa ládxiꞌliꞌ.
14 Len yöl-laꞌ nadxíꞌi guliꞌgún bítiꞌtës bi gunliꞌ.
15 Naꞌa,
böchiꞌ luzáꞌadoꞌ,
chinö́z quéziliꞌ ca naca queëꞌ Estéfanas,
encaꞌ quégaca diꞌa dza queëꞌ.
Nácagaca nupa gulaꞌsí lógaca taꞌyéajlëꞌ Cristo ladaj bönachi nacuáꞌ luyú Acaya.
Buluꞌdödi cuíngaquiëꞌ para ilunëꞌ xichíngaca bönachi queëꞌ Dios.
16 Rátaꞌyuaꞌ loliꞌ,
böchiꞌ luzáꞌadoꞌ,
gunliꞌ bal nupa nácagaca ca bö́chiꞌruꞌ naꞌ,
encaꞌ ca nácagaca nupa tunlen légaquiëꞌ tsözxö́n dxin,
en tácalen légaquiëꞌ.
17 Rudzéjadaꞌ tuꞌ bilaꞌdxinëꞌ Estéfanas,
en Fortunato,
en Acaico ga zoaꞌ,
tuꞌ gúcalengaquiëꞌ nedaꞌ uláz queë́liꞌ.
18 Buluꞌhuë́ tsáhuëꞌë nedaꞌ ca naꞌ buluꞌhuë́ tsáhuëꞌë caꞌ libíꞌiliꞌ.
Guliꞌgún bal bönachi caní.
19 Yuguꞌ cöꞌ bönachi queëꞌ Dios luyú Asia ni tuꞌgapa Dios libíꞌiliꞌ.
Aquilo,
en Priscila,
encaꞌ nupa tuꞌdubi queëꞌ Dios ga naca lu yuꞌu lídxigaquiëꞌ tuꞌgapëꞌ Dios libíꞌiliꞌ.
20 Yúguꞌtë bö́chiꞌruꞌ ni tuꞌgapëꞌ Dios libíꞌiliꞌ.
Guliꞌgapa Dios tuliꞌ iaꞌtuliꞌ,
en unídaꞌliꞌ luzáꞌaliꞌ.
21 Nedaꞌ,
Pablo,
len naꞌ cuin cazaꞌ ruzúajaꞌ lu guichi lë ni,
rnníaꞌ:
Rugapaꞌ Dios libíꞌiliꞌ.
22 Nu bitiꞌ nadxíꞌi Xanruꞌ Jesucristo,
chinabía döꞌ nu naꞌ.
Gudá Xanruꞌ.