Bubanëꞌ Cristo lu yöl-laꞌ guti
15
Naꞌa,
böchiꞌ luzáꞌadoꞌ,
riguíxjöiꞌidaꞌ libíꞌiliꞌ ca naca didzaꞌ dxiꞌa naꞌ benaꞌ libán que ga zóaliꞌ,
lë naꞌ guzxíꞌ lu náꞌaliꞌ,
ateꞌ run ga nácarö idú ca réajlëꞌëliꞌ Cristo.
2 Niꞌa que didzaꞌ ni uláliꞌ,
channö gunliꞌ ca rnna didzaꞌ dxiꞌa naꞌ benaꞌ libán que ga zóaliꞌ,
channö le nácatë guyéajlëꞌëliꞌ-nëꞌ Cristo.
3 Ga gusí lo budödaꞌ lu náꞌaliꞌ le budödëꞌ Dios lu naꞌa nedaꞌ.
Caní rnna:
“Gútiëꞌ Cristo uláz queë́ruꞌ tuꞌ nabágaꞌruꞌ dul-laꞌ.”
Ca naca lë ni nazúaj lu guichi láꞌayi le rnna ben bayudxi benëꞌ.
4 Rnna caꞌ:
“Bigachëꞌë yeru ba,
en cateꞌ bizáꞌa tsonna dza,
bubanëꞌ lu yöl-laꞌ guti”,
ca naꞌ nazúaj caꞌ lu guichi láꞌayi le rnna ben bayudxi guca queëꞌ.
5 Gudödi niꞌ buluíꞌi lahuëꞌ Cristo,
ateꞌ biléꞌenëꞌ Pedro Lëꞌ,
en gudödi niꞌ idxínnutëꞌ gubáz queëꞌ bilaꞌléꞌenëꞌ Lëꞌ.
6 Níꞌirö buluíꞌi lahuëꞌ lógaquiëꞌ ziánrö ca gayuꞌ gáyuꞌë böchiꞌ luzáꞌaruꞌ taꞌyéajlëꞌë Cristo,
cateꞌ niꞌ nudúbigaquiëꞌ tsözxö́n.
Laꞌtuꞌbiquiꞌ yúguꞌtëꞌ bö́chiꞌruꞌ ni nacuꞌë nabángaquiëꞌ naꞌa,
sal-laꞌ bal-lëꞌ chinátigaquiëꞌ.
7 Níꞌirö Jacobo biléꞌenëꞌ Lëꞌ,
en gudödi niꞌ buluíꞌi lahuëꞌ lógaquiëꞌ yúguꞌtë bönniꞌ gubáz queëꞌ.
8 Ga yöjsetë buluíꞌi lahuëꞌ caꞌ lahuaꞌ nedaꞌ.
Ca guca lë ni,
nacaꞌ ca tu bíꞌidoꞌ gúljabiꞌ cateꞌ chigudödi dza ral-laꞌ gáljabiꞌ.
9 Caní naca,
tuꞌ nácaraꞌ nedaꞌ cáꞌasö ca yúguꞌtë bönniꞌ gubáz queëꞌ,
en bitiꞌ nacaꞌ nedaꞌ lesacaꞌ siꞌ laꞌ gubáz queëꞌ,
tuꞌ gudxía ládxaꞌa bönachi queëꞌ Dios.
10 Naꞌa,
tuꞌ buzáꞌ ládxëꞌë quiaꞌ Dios nacaꞌ le nacaꞌ naꞌa,
en calëga nítisö buzáꞌ ládxëꞌë quiaꞌ.
Béntëraꞌ nedaꞌ xichinëꞌ ca iaꞌzícaꞌrëꞌ gubáz queëꞌ,
sal-laꞌ calëga rácasö quiaꞌ benaꞌ dxin naꞌ.
Dios caz,
lu yöl-laꞌ ruzáꞌ ladxiꞌ queëꞌ,
bugunëꞌ nedaꞌ dxin.
11 Naꞌa,
channö benaꞌ libán nedaꞌ o channö gulunëꞌ libán iaꞌzícaꞌrëꞌ bönniꞌ,
lë ni le runtuꞌ libán que,
en le guyéajlëꞌëliꞌ libíꞌiliꞌ.
Ubanruꞌ lu yöl-laꞌ guti
12 Runtuꞌ libán queëꞌ Cristo ca naꞌ bubanëꞌ lu yöl-laꞌ guti.
Channö caní naca,
¿nacxi caz naca,
rnnaliꞌ bál-laliꞌ:
“Bitiꞌ uluꞌbán nupa chinátigaca”?
13 Laꞌtuꞌ cabí uluꞌbán nupa chinátigaca,
bitiꞌ bubanëꞌ Cristo,
14 en laꞌtuꞌ cabí bubanëꞌ Cristo,
nítisö naca le bentuꞌ libán que,
en nítisö naca yöl-laꞌ réajlëꞌ queë́liꞌ Lëꞌ.
15 Iaꞌstú,
laꞌtuꞌ cabí bubanëꞌ Cristo,
rizíꞌ yë́ꞌëtuꞌ cateꞌ runtuꞌ ba nalí queëꞌ Dios,
rnnatuꞌ busubanëꞌ Cristo,
ateꞌ laꞌtuꞌ cabí usubanëꞌ nupa chinátigaca,
Dios bitiꞌ busubanëꞌ Cristo.
16 Laꞌtuꞌ cabí uluꞌbán nupa chinátigaca,
bitiꞌ bubanëꞌ Cristo,
17 en laꞌtuꞌ cabí bubanëꞌ Cristo,
nítisö naca yöl-laꞌ réajlëꞌ queë́liꞌ Lëꞌ,
ateꞌ nagáꞌanagaca dul-laꞌ nabágaꞌliꞌ.
18 Lëscaꞌ caní,
nupa naꞌ chinátigaca,
en gulaꞌyéajlëꞌ Cristo,
tsaz gulati channö cabí bubanëꞌ Lëꞌ.
19 Channö tsánnisö ni zóaruꞌ nabanruꞌ huáca uzíꞌiruꞌ xibë́ꞌ Cristo,
nácaröruꞌ bayechiꞌ ca yúguꞌtë bönachi.
20 Naꞌa,
le nácatë bubanëꞌ Cristo lu yöl-laꞌ guti,
en náquiëꞌ nu gusí lo bubán tsaz ladaj yúguꞌtë nupa uluꞌbán tsaz lu yöl-laꞌ guti.
21 Ca naꞌ guyúꞌu yöl-laꞌ guti niꞌa que le benëꞌ tuëꞌ bönniꞌ,
lëscaꞌ caní,
niꞌa que le benëꞌ iaꞌtúëꞌ bönniꞌ guyúꞌu yöl-laꞌ rubán quégaca nupa chinátigaca.
22 Ca naꞌ tati yúguꞌtë bönachi tuꞌ náljlengaca Adán,
lëscaꞌ caní uluꞌbán yúguꞌtë nupa naꞌ náljlengaca Cristo.
23 Tu tuëꞌ ubanëꞌ ca ral-laꞌ gaca.
Zíꞌalö bubanëꞌ Cristo,
ateꞌ tödi ni uluꞌbán nupa néquiguequi queëꞌ Cristo cateꞌ huödëꞌ.
24 Níꞌirö idxín dza údxi cateꞌ ugǘëꞌ Cristo idútë le dë lu nëꞌe,
en idútë yöl-laꞌ unná bëꞌ,
en idútë yöl-laꞌ huáca que tuꞌ xihuiꞌ,
ateꞌ udödëꞌ yöl-laꞌ unná bëꞌ queëꞌ lu nëꞌë Dios Xuz.
25 Run bayudxi inná bëꞌë Cristo ga idxinrö dza chibenëꞌ Dios ga uluꞌzechu zxíbigaca lahuëꞌ Lëꞌ yúguꞌtë nupa taꞌdáꞌbagaꞌ Lëꞌ.
26 Le ridáꞌbagaꞌ Lëꞌ le usunítiëꞌ ga údxi naca yöl-laꞌ guti.
27 Dios chinudödëꞌ yúguꞌtë lu nëꞌë Zxíꞌinëꞌ para inná béꞌenëꞌ le.
Nazúaj lu guichi láꞌayi,
rnna:
“Budödëꞌ yúguꞌtë lu nëꞌë para inná béꞌenëꞌ le.”
Naꞌa,
naca bëꞌ bitiꞌ budödi cuinëꞌ lu nëꞌë Zxíꞌinëꞌ,
tuꞌ naca cazëꞌ Lëꞌ Nu rudödi yúguꞌtë lu nëꞌë Zxíꞌinëꞌ.
28 Cateꞌ idxín dza niꞌ chinudödëꞌ Dios lu nëꞌë Cristo yúguꞌtë para inná béꞌenëꞌ le,
níꞌirö Lë cazëꞌ Zxíꞌinëꞌ udödi cuinëꞌ lu nëꞌë Dios,
Nu naꞌ budödi lu nëꞌë Zxíꞌinëꞌ yúguꞌtë,
ateꞌ ga údxi,
Dios inná béꞌenëꞌ tsaz yúguꞌtë.
29 Bál-laliꞌ ridílaliꞌ nisa uláz quégaca nupa chinátigaca.
Channö réquiliꞌ bitiꞌ uluꞌbán nupa naꞌ chinátigaca,
¿bizx que ridílaliꞌ nisa uláz quégaca nupa chinátigaca?
30 Zoa bönadxi queë́tuꞌ gátituꞌ yúguꞌtë dza.
¿Bizx que ruíꞌituꞌ lataj gaca caní channö cabí ubanruꞌ lu yöl-laꞌ guti?
31 Yúguꞌtë dza zoa bönadxi gátiaꞌ.
Riguíxjöiꞌidaꞌ libíꞌiliꞌ lë ni,
böchiꞌ luzáꞌadoꞌ,
tuꞌ raza ládxaꞌa le benaꞌ.
Caní naca tuꞌ benaꞌ ga réajlëꞌëliꞌ Xanruꞌ Jesucristo.
32 Channö tuꞌ gúꞌunisidaꞌ gudíl-lalenaꞌ böaꞌ guixiꞌ síniaꞌ lu yödzö Éfeso,
¿bizxi caz uziꞌa xibé?
Channö cabí uluꞌbán nupa chinátigaca,
ral-laꞌ gunruꞌ ca taꞌnná bönachi:
“Guiꞌaj gáguruꞌ tuꞌ huátiruꞌ cuxö́ huidzaj.”
33 Bitiꞌ güíꞌiliꞌ lataj nu siꞌ yeꞌe libíꞌiliꞌ.
Channö siꞌ lu náꞌaliꞌ látiꞌdoꞌos le cabí nácatë,
idútëliꞌ huöácaliꞌ chul-la niti.
34 Buliꞌbíꞌi ládxiꞌliꞌ,
en bitiꞌ gunliꞌ dul-laꞌ tuꞌ cabí núnbëꞌëliꞌ-nëꞌ Dios bál-laliꞌ libíꞌiliꞌ.
Rnníaꞌ caní para gunaꞌ ga utuíꞌiliꞌ.
Ca ilaca nupa uluꞌbán lu yöl-laꞌ guti
35 Nadxi caꞌ zoa nu inná:
“¿Nacxi uluꞌbán nupa chinátigaca?
¿Nacxi gaca idú ca nácagaca cazëꞌ cateꞌ uluꞌdxinëꞌ?”
36 Liꞌ,
bönniꞌ bitiꞌ bi nö́zinëꞌ.
Lë naꞌ rázuꞌ luyú bitiꞌ ilén channö cabí initi.
37 Lë naꞌ rázuꞌ luyú naca tu xisédoꞌos,
nadxi caꞌ que zxoaꞌ xtila o que iaꞌtú guixiꞌ cuandoꞌ.
Lë naꞌ rázuꞌ bitiꞌ naca guixiꞌ cuandoꞌ naꞌ ral-laꞌ ilén.
38 Dios runëꞌ ga gaca guixiꞌ cuandoꞌ ca nun cazëꞌ que.
Ca naca tu tu xisedoꞌ naꞌ runëꞌ ga gaca guixiꞌ cuandoꞌ que.
39 Lëscaꞌ caní,
bitiꞌ naca lë́bisö bëlaꞌ que queë́gacabaꞌ yúguꞌtëbaꞌ böaꞌ guixiꞌ.
Zoa tu bëlaꞌ quégaca bönachi,
en iaꞌtú ca naca bëlaꞌ quégacabaꞌ böaꞌ guixiꞌ.
Iaꞌtú ca naca bëlaꞌ quégacabaꞌ biguínni,
en iaꞌtú ca naca bëlaꞌ quégacabaꞌ böla.
40 Lëscaꞌ caní nadzáꞌ idú ca nácagaca caz nupa nacuáꞌ yehuaꞌ yubá ca naca idú ca nácagaca caz nupa nacuáꞌ luyú ni.
Zoa tu yöl-laꞌ lachi quégaca nupa nacuáꞌ yehuaꞌ yubá,
en iaꞌtú ca naca yöl-laꞌ lachi quégaca nupa nacuáꞌ luyú ni.
41 Zoa tu yöl-laꞌ lachi que gubidza,
en iaꞌtú que beoꞌ,
en iaꞌtú quéguequi bölaj lúzxiba.
Yöl-laꞌ lachi que tu bölaj lúzxiba nadzáꞌ ca naca yöl-laꞌ lachi que iaꞌtú bölaj lúzxiba.
42 Lëscaꞌ caní gaca cateꞌ uluꞌbán nupa chinátigaca.
Cateꞌ rigachiꞌ lu yeru ba naca tu bëlaꞌ initi.
Cateꞌ ubán,
níꞌirö gaca tu le soa tsaz.
43 Cateꞌ rigachiꞌ lu yeru ba naca tu bëlaꞌ cáꞌasö,
en le nacuidiꞌ.
Cateꞌ ubán,
níꞌirö gaca tu le lachi,
en le nál-la.
44 Cateꞌ rigachiꞌ lu yeru ba naca tu bëlaꞌ que yödzölió ni.
Cateꞌ ubán,
níꞌirö gaca tu le soa tsaz yehuaꞌ yubá.
Zoa tu bëlaꞌ que yödzölió ni,
en iaꞌtú ca gaca le idzaga böꞌ naca cázaruꞌ.
45 Nazúaj lu guichi láꞌayi le rnna:
“Bönniꞌ naꞌ gusí lahuëꞌ zoëꞌ luyú ni,
lëꞌ Adán,
Dios benëꞌ lëꞌ bönniꞌ ban”,
pero Bönniꞌ naꞌ guyáziëꞌ xilatjëꞌ Adán,
Lëꞌ Cristo,
Dios benëꞌ ga náquiëꞌ Böꞌ nabániruꞌ.
46 Bitiꞌ blëꞌë zíꞌalö Bönniꞌ naꞌ náquiëꞌ Böꞌ.
Blaꞌ zíꞌalö nu naꞌ naca bönáchisö,
ateꞌ níꞌirö blëꞌë Bönniꞌ naꞌ náquiëꞌ Böꞌ.
47 Bönniꞌ niꞌ blëꞌë zíꞌalö,
gúquinëꞌ yu.
Bönniꞌ naꞌ blëꞌë burópilö,
Nu naꞌ naca Xanruꞌ,
birúajëꞌ yehuaꞌ yubá.
48 Nupa nacuáꞌ luyú ni nácagaca ca gúquiëꞌ bönniꞌ naꞌ gúquinëꞌ yu,
ateꞌ nupa ral-laꞌ tsöjcuáꞌ yehuaꞌ yubá ilaca ca naca Nu naꞌ birúaj yehuaꞌ yubá.
49 Ca naꞌ naꞌa dë queë́ruꞌ tu bëlaꞌ le naca ca guca bëlaꞌ queëꞌ bönniꞌ naꞌ gúquinëꞌ yu,
lëscaꞌ ral-laꞌ huöéquiruꞌ ca néquinëꞌ Nu naꞌ birúaj yehuaꞌ yubá.
50 Caní rë́ꞌëni inná lë ni reaꞌ libíꞌiliꞌ,
böchiꞌ luzáꞌadoꞌ,
rnníaꞌ:
Le néquini bëlaꞌ,
en rön bitiꞌ gaca tsaz ga niꞌ rinná bëꞌë Dios,
en lëscaꞌ caní,
lë naꞌ initi bitiꞌ gaca ideliꞌ lë naꞌ soa tsaz.
51 Buliꞌyútsöcaꞌ,
reaꞌ libíꞌiliꞌ tu le bigachiꞌ:
Bitiꞌ gátiruꞌ yúguꞌtëruꞌ,
pero Dios utsë́ꞌë ca nácaruꞌ yúguꞌtëruꞌ.
52 Tsálidoꞌos gaca,
tsca naca tu le rutásö guiö́j loruꞌ,
cateꞌ cödxi lúzubaꞌ böaꞌ le röjsetë.
Cödxi lúzubaꞌ naꞌ,
ateꞌ uluꞌbán nupa chinátigaca,
en iléquini tu le soa tsaz,
ateꞌ Dios utsë́ꞌë le néquiniruꞌ yúguꞌtëruꞌ.
53 Lë naꞌ nácaruꞌ le riniti ral-laꞌ huöáca le soa tsaz,
ateꞌ le néquiniruꞌ,
lë naꞌ ral-laꞌ gati,
huöáca tu le catu caz gati.
54 Cateꞌ lë naꞌ riniti chinuhuöáca le soa tsaz,
encaꞌ lë naꞌ ral-laꞌ gati chinuhuöáca le catu caz gati,
níꞌirö idxín lë naꞌ nazúaj lu guichi láꞌayi,
le rnna:
Nadúa tsaz yöl-laꞌ guti.
Chibidéliꞌnëꞌ Cristo.
55 Bítiꞌrö inná beꞌe yöl-laꞌ guti rëꞌu.
Bítiꞌrö gaca yöl-laꞌ guti bi gun queë́ruꞌ.
56 Huáca bi gun yöl-laꞌ guti queë́ruꞌ tuꞌ nabágaꞌruꞌ dul-laꞌ,
ateꞌ nabágaꞌruꞌ dul-laꞌ tuꞌ ridáꞌbagaꞌruꞌ xibá queëꞌ Dios.
57 ¡Xclenëꞌ Dios!
¡Lë cazëꞌ runëꞌ ga nuláruꞌ lu yöl-laꞌ guti niꞌa que le benëꞌ Xanruꞌ Jesucristo!
58 Que lë ni naꞌ,
böchiꞌ luzáꞌadoꞌ,
guliꞌsóa tsutsu.
Guliꞌgaca idú ládxiꞌliꞌ,
gúnticaꞌsiliꞌ xichinëꞌ Xanruꞌ tuꞌ nöz quéziliꞌ bitiꞌ runliꞌ nítisö xichinëꞌ Xanruꞌ.