DIDZAꞌ GUSÖ́L-LËꞌË PABLO LUYÚ GALACIA
Ruzúajëꞌ Pablo quégaca bönachi luyú Galacia
1
Nedaꞌ,
Pablo,
nacaꞌ gubáz queëꞌ Cristo.
Bitiꞌ gulaꞌsöl-laꞌ bönachi nedaꞌ.
Jesucristo caz gusö́l-lëꞌë nedaꞌ,
en nunëꞌ Xúziruꞌ Dios tu zxön Lëꞌ.
Lëꞌ busubanëꞌ Jesús lu yöl-laꞌ guti.
2 Ruzúajaꞌ queë́liꞌ lu guichi ni,
libíꞌiliꞌ,
yuguꞌ cöꞌ bönachi tuꞌdubi queëꞌ Cristo luyú Galacia.
Núngaquiëꞌ yuguꞌ bö́chiꞌruꞌ ni tu zxön nedaꞌ.
3 Rinábidaꞌ Xúziruꞌ Dios,
encaꞌ Xanruꞌ Jesucristo uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
4 Jesucristo caz budödi cuinëꞌ lu yöl-laꞌ guti tuꞌ nözi dul-laꞌ nabágaꞌruꞌ para busölë́ꞌ rëꞌu lu le naxihuiꞌ raca dza ni zóaruꞌ naꞌa.
Benëꞌ caní tuꞌ naca ca rë́ꞌëni quézinëꞌ Xúziruꞌ Dios.
5 ¡Gácaticaꞌsö queëꞌ Dios yöl-laꞌ ba!
¡Caꞌ caz!
Tuz naca le rinnë́ dxiꞌa queëꞌ Jesucristo
6 Rubánideꞌedaꞌ ca runliꞌ,
rucáꞌanatëliꞌ Dios.
Lëꞌ bulidzëꞌ libíꞌiliꞌ para guéquiliꞌ queëꞌ tuꞌ nözi le ruzáꞌ ládxëꞌë Jesucristo queë́ruꞌ,
ateꞌ naꞌa rë́ꞌëniliꞌ siꞌ ladxiꞌ náꞌaliꞌ tu le rinnë́ dxiꞌa izáꞌa.
7 Le nácatë bitiꞌ caꞌ zoa iaꞌtú le rinnë́ dxiꞌa pero ruáꞌa caní didzaꞌ tuꞌ nacuꞌë bönniꞌ tuꞌtsë́ꞌë libíꞌiliꞌ,
en të́ꞌënëꞌ uluꞌtsë́ꞌë le rinnë́ dxiꞌa queëꞌ Cristo.
8 Channö zoa nu gun ba nalí que tu le rinnë́ dxiꞌa le cabí naca tuz ca naca lë naꞌ bentuꞌ ba nalí que loliꞌ libíꞌiliꞌ,
rinábidaꞌ-nëꞌ Dios udxíëꞌ döꞌ nu naꞌ run caní.
Ral-laꞌ udxíëꞌ nedaꞌ döꞌ channö gunaꞌ caní,
en channö gunëꞌ caní tu gubáz queëꞌ Dios zëꞌë yehuaꞌ yubá,
Dios caz udxíëꞌ caꞌ lëꞌ döꞌ.
9 Chigunná cazaꞌ caní zíꞌalö,
ateꞌ naꞌa rnníaꞌ caní leyúbölö:
Channö zoa nu gun ba nalí que tu le rinnë́ dxiꞌa le cabí naca tuz ca naca lë naꞌ chiguzxíꞌ ladxiꞌ náꞌaliꞌ,
rinábidaꞌ-nëꞌ Dios udxíëꞌ döꞌ nu naꞌ.
10 ¿Réquitseliꞌ rë́ꞌëndaꞌ cúꞌuliꞌ nedaꞌ yöl-laꞌ zxön cateꞌ ruꞌa caní didzaꞌ?
¡Bitiꞌ caꞌ!
Rë́ꞌëndaꞌ urúajaꞌ tsahuiꞌ lahuëꞌ Dios.
¿Réquiliꞌ rë́ꞌëndaꞌ uzacaꞌ baládxiꞌlengaca bönachi nedaꞌ?
Laꞌtuꞌ rë́ꞌëndaꞌ uzacaꞌ baládxiꞌlengaca bönachi nedaꞌ,
bitiꞌ gacaꞌ huen dxin queëꞌ Cristo.
Naca böáquiëꞌ Pablo bönniꞌ gubáz queëꞌ Cristo
11 Ral-laꞌ inö́ziliꞌ lë ni,
böchiꞌ zánaꞌdoꞌ.
Le rinnë́ dxiꞌa naꞌ runaꞌ ba nalí que bitiꞌ gulén icja lo ládxiꞌdaꞌahuiguequi bönachi.
12 Cuntu nu bönniꞌ budödëꞌ lu naꞌa le rinnë́ dxiꞌa naꞌ,
en calëga nu bönniꞌ busédinëꞌ nedaꞌ le.
Jesucristo caz buzéajniꞌinëꞌ nedaꞌ ca naca le rinnë́ dxiꞌa queëꞌ.
13 Chibiyö́n quéziliꞌ ca naꞌ ben cazaꞌ nedaꞌ zíꞌatëlö cateꞌ niꞌ nazíꞌ lu naꞌa ca tequi le bach Dios bönniꞌ judío.
Nö́ziliꞌ ca benaꞌ,
yenniꞌ gudxía nahuaꞌ bönachi queëꞌ Dios taꞌyija ladxiꞌ Cristo,
en gúꞌundaꞌ usulu usunítiaꞌ léguequi.
14 Lu le tequi le bach Dios bönniꞌ judío,
guyë́pisëtëraꞌ nedaꞌ ca láꞌtuꞌbiquiꞌ yúguꞌtë luzáꞌa bönniꞌ judío yúꞌugaquiëꞌ iz ca yuꞌa nedaꞌ,
tuꞌ guzxiꞌrö ladxiꞌ naꞌa ca léguequi le buluꞌdödëꞌ xuz xtóꞌoruꞌ loruꞌ ca tun cazëꞌ.
15 Caní benaꞌ nedaꞌ,
pero tuꞌ náquiëꞌ dxiꞌi ladxiꞌ Dios,
gurö́ cazëꞌ nedaꞌ zíꞌatëlö ca guljaꞌ,
ateꞌ bulidzëꞌ nedaꞌ para gunaꞌ xichinëꞌ.
16 Níꞌirö,
cateꞌ gúꞌuni quézinëꞌ Dios,
benëꞌ ga núnbëꞌa-nëꞌ zxíꞌinëꞌ,
en gusö́l-lëꞌë nedaꞌ tsöjenaꞌ libán que le rinnë́ dxiꞌa ca naca queëꞌ Lëꞌ lógaca bönachi izáꞌa.
Cateꞌ benëꞌ caní,
bitiꞌ yödiljaꞌ nu naca bönachi nu usedi nedaꞌ.
17 Cabí guyijaꞌ yödzö Jerusalén para tsöyúaꞌ nupa niꞌ nácagaca bönniꞌ gubáz queëꞌ Cristo zíꞌalö ca nedaꞌ,
pero guyijaꞌ luyú Arabia,
ateꞌ gudödi niꞌ böjaꞌ yödzö Damasco.
18 Caní guca,
chigudödi tsonna iz cateꞌ niꞌ guyijaꞌ yödzö Jerusalén,
yöyúaꞌ-nëꞌ Pedro,
ateꞌ bugáꞌanalenaꞌ lëꞌ idú ca chidáꞌ gubidza.
19 Tsanni niꞌ zoaꞌ niꞌ bitiꞌ caꞌ biléꞌedaꞌ iaꞌturëꞌ bönniꞌ gubáz queëꞌ Cristo,
pero tuzëꞌ Jacobo,
bönniꞌ bö́chëꞌë Xanruꞌ biléꞌedaꞌ.
20 Didzaꞌ ni ruzúajaꞌ queë́liꞌ lu guichi nácatë.
Niꞌa queëꞌ Dios bitiꞌ caꞌ rizíꞌ yëꞌa.
21 Gudödi niꞌ guyijaꞌ,
gudödaꞌ yuguꞌ yödz luyú Siria,
en luyú Cilicia.
22 Yuguꞌ dza niꞌ bitiꞌ núnbëꞌgaquiëꞌ nedaꞌ bö́chiꞌruꞌ tuꞌdubëꞌ queëꞌ Cristo gapa naca luyú Judea.
23 Gulaꞌnö́zisinëꞌ lë naꞌ gúlaꞌguixjöꞌ quiaꞌ iaꞌzícaꞌrö bönachi,
gulaꞌnná:
“Bönniꞌ naꞌ gudxía nahuëꞌ rëꞌu zíꞌalö,
runëꞌ libán naꞌa que le reja ládxiꞌruꞌ,
lë naꞌ gúꞌunëꞌ usulu usunítiëꞌ.”
24 Caní guca,
gulaꞌguꞌë yöl-laꞌ ba Dios tuꞌ nözdaꞌ nedaꞌ.