Bönniꞌ gubáz queëꞌ Cristo guzxíꞌ lu náꞌagaquiëꞌ Pablo
2
Cateꞌ chigudödi chidáꞌ iz,
guyéajlenaꞌ Bernabé,
en budxinaꞌ yödzö Jerusalén.
Guchëꞌa-biꞌ Tito,
dzágabiꞌ nedaꞌ.
2 Guyijaꞌ niꞌ,
en bëꞌlenaꞌ didzaꞌ tsöláꞌalö bönniꞌ niꞌ yuꞌu lu náꞌagaquiëꞌ dxin queëꞌ Cristo,
ateꞌ gudíxjöiꞌidaꞌ légaquiëꞌ ca naca libán runaꞌ que le rinnë́ dxiꞌa lógaca bönachi izáꞌa.
Caní benaꞌ tuꞌ gúꞌundaꞌ cabí ugáꞌana nítisö dxin naꞌ chibenaꞌ,
encaꞌ dxin ni runaꞌ naꞌa.
3 Sal-laꞌ nácabiꞌ Tito,
biꞌi luzáꞌa,
biꞌi griego,
bitiꞌ gulunëꞌ bönniꞌ ni ga irugu lu xpë́laꞌbiꞌ lë naꞌ naca bëꞌ bönachi queëꞌ Dios ca tun cazëꞌ bönniꞌ judío.
4 Le nácatë gulaꞌcuáꞌ bal-la bönachi niꞌ,
nupa niꞌ taꞌzíꞌ yëꞌ,
taꞌná nácagaca bö́chiꞌruꞌ,
ateꞌ gulë́ꞌëni ilún ga irugu lu xpë́laꞌbiꞌ Tito lë naꞌ naca bëꞌ.
Yuguꞌ bönniꞌ ni núngaquiëꞌ tu zxön rëꞌu pero tuꞌyusëꞌ ca runruꞌ para iléquibeꞌenëꞌ ca nuláruꞌ lu yöl-laꞌ unná bëꞌ que le rinná bëꞌ xibá queëꞌ Moisés tuꞌ nácaruꞌ tuz len Jesucristo.
Gulë́ꞌënëꞌ ilunëꞌ ga huöácaruꞌ leyúbölö huen dxin tsaz lu xibá naꞌ.
5 Bitiꞌ caꞌ bëꞌtuꞌ légaquiëꞌ lataj.
Caní bentuꞌ para gun chíꞌituꞌ le nácatë que le rinnë́ dxiꞌa para gaca uzíꞌiliꞌ xibé le rinnë́ dxiꞌa naꞌ.
6 Yuguꞌ bönniꞌ niꞌ réquiruꞌ yuꞌu lu náꞌagaquiëꞌ dxin queëꞌ Cristo bitiꞌ bi gulaꞌnná beꞌe nedaꞌ le naca cubi,
pero bitiꞌ ruíꞌi ládxaꞌa ca nácagaquiëꞌ.
Dios bitiꞌ ruchiꞌa rusörö́ëꞌ rëꞌu ca tuꞌchiꞌa tuꞌsörö́ bönachi rëꞌu.
7 Bitiꞌ bi gulaꞌnná beꞌe nedaꞌ tuꞌ guléquibeꞌenëꞌ Dios nudödëꞌ lu naꞌa dxin queëꞌ,
para tsöjenaꞌ libán que le rinnë́ dxiꞌa lógaca bönachi izáꞌa,
ca naꞌ nudödëꞌ lu nëꞌë Pedro dxin queëꞌ,
para gunëꞌ libán que le rinnë́ dxiꞌa lógaca bönachi judío.
8 Len yöl-laꞌ huáca queëꞌ,
Dios benëꞌ nedaꞌ bönniꞌ gubáz queëꞌ para usédidaꞌ bönachi izáꞌa,
ca naꞌ benëꞌ Pedro bönniꞌ gubáz queëꞌ para usédinëꞌ bönachi judío.
9 Jacobo,
en Pedro,
en Juan,
bönniꞌ niꞌ réquiruꞌ yuꞌu lu naꞌagaquiëꞌ dxin queëꞌ Cristo,
guléquibeꞌenëꞌ Dios nudödëꞌ lu naꞌa dxin ni.
Que lë ni naꞌ guzxíꞌ ladxiꞌ náꞌagaquiëꞌ nedaꞌ,
encaꞌ Bernabé,
ateꞌ bentuꞌ tuz didzaꞌ tsöjentuꞌ xichinëꞌ Dios lógaca bönachi izáꞌa nedaꞌ,
en Bernabé,
ateꞌ légaquiëꞌ ilunëꞌ xichinëꞌ Dios lógaca bönachi judío.
10 Guláꞌtaꞌyusëꞌ lotuꞌ tsönetuꞌ gácalentuꞌ bönachi yechiꞌ,
ateꞌ lë ni naca tu le ruíꞌiticaꞌsö ládxaꞌa runaꞌ.
Ca guca cateꞌ Pablo gudíl-lalenëꞌ Pedro lu yödzö Antiquía
11 Cateꞌ bidxinëꞌ Pedro lu yödzö Antioquía,
gudíl-lalenaꞌ lëꞌ didzaꞌ tuꞌ lë cazëꞌ guchíxinëꞌ ca benëꞌ.
12 Caní guca tuꞌ zíꞌatëlö gudágulenëꞌ tsözxö́n yuguꞌ bönachi izáꞌa niꞌ.
Benëꞌ caní ga bilaꞌdxinrëꞌ bal-la bönniꞌ dáꞌgaquiëꞌ Jacobo.
Níꞌirö gusí lahuëꞌ rubíguiëꞌ,
en bítiꞌrö gudágulenëꞌ tsözxö́n bönachi izáꞌa naꞌ tuꞌ gúdxinëꞌ bi ilunëꞌ bönniꞌ naꞌ nazíꞌ lu náꞌagaquiëꞌ ilunëꞌ ga irugu lu xpë́laꞌgaca bönachi izáꞌa ca rinná bëꞌ xibá queëꞌ Moisés.
13 Níꞌirö iaꞌzícaꞌrëꞌ bönniꞌ judío niꞌ taꞌyija ládxëꞌë Cristo gulunëꞌ tu zxön Pedro ca runëꞌ lu yöl-laꞌ radxi queëꞌ,
ateꞌ caní guca ga bidxintë gulunëꞌ ga gúdxinëꞌ caꞌ Bernabé,
ateꞌ lëꞌ benëꞌ tu zxön légaquiëꞌ.
14 Cateꞌ biléꞌedaꞌ bitiꞌ tunëꞌ ca naca le nácatë le rusedi rëꞌu le rinnë́ dxiꞌa,
gudxaꞌ-nëꞌ Pedro lógaca yúguꞌtë nupa niꞌ nudúbigaca queëꞌ Cristo,
gunníaꞌ:
“Liꞌ nacuꞌ bönniꞌ judío,
pero runuꞌ liꞌ ca túngaca bönachi izáꞌa,
en calëga ca tunëꞌ bönniꞌ judío.
¿Bizx queë rë́ꞌënuꞌ gunuꞌ ga ilúngaca bönachi izáꞌa ca tunëꞌ bönniꞌ judío?”
Nulágaca bönachi judío ca naꞌ nulágaca caꞌ bönachi izáꞌa
15 Gudxaꞌ caꞌ Pedro:
“Rëꞌu ni nácaruꞌ bönniꞌ judío tuꞌ nácagaquiëꞌ xuz xináꞌaruꞌ judío,
en calëga bönachi izáꞌa,
nupa cabí núnbëꞌgaca Dios.
16 Nöz quéziruꞌ cuntu nu huöáca tsahuiꞌ lahuëꞌ Dios tuꞌ run nu naꞌ tsca rinná bëꞌ xibá queëꞌ Moisés,
pero huöáca tsahuiꞌ tuzi nu naꞌ reja ladxiꞌ Jesucristo.
Lës caní caꞌ rëꞌu reja ládxiꞌruꞌ Jesucristo para huöácaruꞌ tsahuiꞌ lahuëꞌ Dios,
en calëga tuꞌ runruꞌ tsca rinná bëꞌ xibá queëꞌ Moisés.
Cuntu caz nu huöáca tsahuiꞌ lahuëꞌ Dios tuꞌ run tsca rinná bëꞌ xibá queëꞌ Moisés.
17 ’Naꞌa,
réquiruꞌ nuhuöácaruꞌ tsahuiꞌ tuꞌ reja ládxiꞌruꞌ Cristo,
pero channö naca bëꞌ nácaruꞌ bönniꞌ dul-laꞌ ca nácagaca bönachi izáꞌa,
¿innátsaruꞌ runëꞌ Cristo ga runruꞌ dul-laꞌ?
¡Bitiꞌ caz!
18 Channö ruíꞌi ládxaꞌa uchisaꞌ le chibuquinjaꞌ,
lë ni naca bëꞌ riguitsjaꞌ xibá le gunná bëꞌë Dios.
19 Tuꞌ cabí guca uzóaꞌ didzaꞌ xibá naꞌ gunná bëꞌë Moisés,
guca quiaꞌ tsca chinátiaꞌ.
Tuꞌ caní naca,
nuláꞌ naꞌa lu xibá naꞌ para soaꞌ ibanaꞌ,
en gunaꞌ ca rë́ꞌënëꞌ Dios.
20 Naca quiaꞌ ca chigútilenaꞌ tsözxö́n Cristo lëꞌe yaga cruz ga naꞌ gútiëꞌ Lëꞌ.
Que lë ni naꞌ calëga nedaꞌ ni zoaꞌ nabanaꞌ,
pero Cristo zoëꞌ nabanëꞌ lu icja ládxiꞌdaꞌahuaꞌ.
Tsca naca zoaꞌ nabanaꞌ naꞌa,
naca tuꞌ reja ládxaꞌa Lëꞌ zxíꞌinëꞌ Dios,
Bönniꞌ naꞌ bidxíꞌinëꞌ nedaꞌ,
en budödi cuinëꞌ lu yöl-laꞌ guti uláz quiaꞌ nedaꞌ.
21 Bitiꞌ rë́ꞌëndaꞌ uzóaꞌ tsöláꞌalö le ruzáꞌ ládxëꞌë queë́ruꞌ Dios.
Channö huáca huöáquiëꞌ tsahuiꞌ tu bönniꞌ lahuëꞌ Dios tuꞌ runëꞌ tsca rinná bëꞌ xibá queëꞌ Moisés,
níꞌirö nítisö gútiëꞌ Cristo.”