DIDZAꞌ GUSÖ́L-LËꞌË PABLO YÖDZÖ ÉFESO
Pablo rugapëꞌ Dios bönachi queëꞌ Cristo nacuáꞌ Éfeso
1
Nedaꞌ,
Pablo,
nacaꞌ gubáz nasö́l-lëꞌë Jesucristo tuꞌ gúꞌuni quézinëꞌ Dios gacaꞌ caní.
Rugapaꞌ Dios libíꞌiliꞌ,
zóaliꞌ Éfeso.
Néquiliꞌ quez queëꞌ Dios,
en réajlëꞌëliꞌ Jesucristo.
2 Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Le naca queëꞌ Dios Böꞌ Láꞌayi rataꞌ queë́ruꞌ
3 ¡Ral-laꞌ cúꞌuruꞌ-nëꞌ yöl-laꞌ ba Dios,
Xuzëꞌ Xanruꞌ Jesucristo!
Tuꞌ nácaruꞌ tuz len Cristo,
Dios chibuzáꞌ ládxëꞌë queë́ruꞌ yúguꞌtë le naca dxiꞌa que yehuaꞌ yubá,
le runëꞌ Dios Böꞌ Láꞌayi ga rataꞌ queë́ruꞌ.
4 Zíꞌatëlö ca benëꞌ Dios yödzölió ni,
gurö́ cazëꞌ rëꞌu para guéquiruꞌ quez queëꞌ tsözxö́n len Cristo,
en gácaruꞌ bönachi láꞌayi queëꞌ,
en gácaruꞌ idú dxiꞌa lahuëꞌ Lëꞌ.
5 Dios bucözëꞌ zíꞌatëlö siꞌ lu nëꞌë rëꞌu ca zxíꞌini cazëꞌ tsözxö́n len Jesucristo,
tuꞌ guyaza ládxëꞌë gaca caní,
en tuꞌ naca le gúꞌuni quézinëꞌ gunëꞌ.
6 ¡Ral-laꞌ cúꞌuticaꞌsiruꞌ-nëꞌ Dios yöl-laꞌ ba niꞌa que le buzáꞌ ládxëꞌë queë́ruꞌ,
yuguꞌ le bénnasëꞌ queë́ruꞌ tuꞌ nácaruꞌ tuz len Zxíꞌinëꞌ,
Nu naꞌ nadxíꞌinëꞌ!
7 ¡Cristo böáꞌuëꞌ rëꞌu cateꞌ niꞌ gútiëꞌ uláz queë́ruꞌ para gaca uniti lahuëꞌ Dios rëꞌu ca naca dul-laꞌ nabágaꞌruꞌ!
¡Zxö́ntërö naca le buzáꞌ ládxëꞌë Dios queë́ruꞌ,
8 lë naꞌ rúnnadëꞌë Lëꞌ queë́ruꞌ!
¡Lu yöl-laꞌ rácadaꞌ queëꞌ,
en lu yöl-laꞌ réajniꞌi queëꞌ
9 benëꞌ Dios le bucözëꞌ queë́ruꞌ,
ateꞌ buluíꞌinëꞌ rëꞌu lë naꞌ bigachiꞌ,
le buzóa cazëꞌ zíꞌatëlö usudxinëꞌ lu nëꞌë Cristo!
10 Lë naꞌ buzóa cazëꞌ Dios usudxinëꞌ cateꞌ izáꞌa dza,
naca gunëꞌ ga ilaca tuz,
en ilaꞌcuáꞌ lu nëꞌë Cristo yúguꞌtë le dë,
le nacuáꞌ yehuaꞌ yubá,
en le nacuáꞌ yödzölió ni.
11 Tuꞌ nácaruꞌ tuz len Cristo,
Dios gurö́ cazëꞌ rëꞌu zíꞌatëlö para guequi queë́ruꞌ le nequi queëꞌ Xúziruꞌ Dios,
lë naꞌ bucözëꞌ queë́ruꞌ ca naca le gúꞌuni quézinëꞌ Dios,
Nu run yúguꞌtë ca rë́ꞌëni quézinëꞌ Lëꞌ.
12 Caní benëꞌ Dios para cúꞌuruꞌ-nëꞌ yöl-laꞌ ba ca naca yöl-laꞌ zxön queëꞌ,
rëꞌu ni ruzxöni ládxiꞌruꞌ-nëꞌ Cristo zíꞌatëlö ca iaꞌzícaꞌrö bönachi.
13 Lëscaꞌ caní guca queë́liꞌ.
Cateꞌ biyö́niliꞌ didzaꞌ idútë li,
didzaꞌ dxiꞌa ca gaca uláruꞌ,
guyéajlëꞌëliꞌ Cristo,
ateꞌ Dios buzóëꞌ queë́liꞌ le naca bëꞌ nácaliꞌ queëꞌ,
tuꞌ guchíziëꞌ icja ládxiꞌdoꞌoliꞌ Dios Böꞌ Láꞌayi,
Nu naꞌ guzxíꞌ lu nëꞌë Dios isö́l-lëꞌë queë́ruꞌ.
14 Tuꞌ zóalenëꞌ Dios Böꞌ Láꞌayi rëꞌu,
naca löza guequi queë́ruꞌ le nequi queëꞌ Xúziruꞌ Dios cateꞌ údxi huöáꞌuëꞌ rëꞌu,
rëꞌu naꞌ chinéquiruꞌ queëꞌ.
Caní naca para gaca yöl-laꞌ ba que yöl-laꞌ zxön queëꞌ.
Pablo rinábinëꞌ Dios gunnëꞌ queë́ruꞌ yöl-laꞌ réajniꞌi
15 Que lë ni naꞌ,
cateꞌ biyöndaꞌ ca réajlëꞌëliꞌ-nëꞌ Xanruꞌ Jesús,
en ca nadxíꞌiliꞌ yúguꞌtë bönachi queëꞌ Dios,
ga ridxintë naꞌa dza
16 bitiꞌ caꞌ rusanaꞌ reaꞌ-nëꞌ Dios:
“Xclenuꞌ”,
ca naca queë́liꞌ.
Röjnedaꞌ libíꞌiliꞌ cateꞌ rulidzaꞌ-nëꞌ Dios.
17 Rinábidaꞌ-nëꞌ Dios queëꞌ Xanruꞌ Jesucristo,
Dios naꞌ náquiëꞌ Xúziruꞌ nayë́pisëtërëꞌ,
rinábidaꞌ-nëꞌ isö́l-lëꞌë Dios Böꞌ Láꞌayi queë́liꞌ,
Böꞌ naꞌ runna yöl-laꞌ réajniꞌi queë́ruꞌ,
en ruluíꞌi rëꞌu ca naca cazëꞌ Dios,
para gaca idú ca núnbëꞌëruꞌ-nëꞌ.
18 Rinábidaꞌ-nëꞌ Dios uzéajniꞌinëꞌ libíꞌiliꞌ lu icja ládxiꞌdoꞌoliꞌ para gaca inö́ziliꞌ ca naca le runruꞌ löza,
lë naꞌ bulidzëꞌ libíꞌiliꞌ para uzíꞌiliꞌ xibé,
en para inö́ziliꞌ ca naca yöl-laꞌ tsahuiꞌ que yehuaꞌ yubá,
le guequi quégaca nupa néquiguequi queëꞌ Dios,
19 encaꞌ para inö́ziliꞌ cateꞌ zxön naca yöl-laꞌ huáca queëꞌ,
le rácalen rëꞌu ni réajlëꞌëruꞌ Lëꞌ.
Yöl-laꞌ huáca zxön ni naca laꞌ lë́bisö naꞌ buluꞌe lahui Dios
20 cateꞌ niꞌ busubanëꞌ Cristo lu yöl-laꞌ guti,
en benëꞌ ga guröꞌë cuita lëꞌë Lë cazëꞌ ga nayë́pisëtërëꞌ niꞌ yehuaꞌ yubá.
21 Rinná béꞌenëꞌ nupa niꞌ taꞌnná bëꞌ,
en nupa niꞌ dë lu në́ꞌeguequi,
en nupa niꞌ nadéliꞌgaca yöl-laꞌ huáca,
en nupa niꞌ nácagaca xan.
Cristo nayë́pisëtërëꞌ ca yúguꞌtë nupa nadéliꞌgaca yöl-laꞌ unná bëꞌ yödzölió ni,
en lu yödzölió siꞌ zaꞌ.
22 Dios budödëꞌ lu nëꞌë Cristo yúguꞌtë le dë para inná béꞌenëꞌ le,
en buzóëꞌ Lëꞌ quégaca bönachi queëꞌ para gáquiëꞌ Xanruꞌ lu yúguꞌtë le nequi queë́ruꞌ.
23 Yuguꞌ bönachi queëꞌ Cristo nácagaca ca idútë le naca cazëꞌ,
ateꞌ raquiëꞌ Lëꞌ idú lu le naca cazëꞌ naꞌ.
Run cazëꞌ Lëꞌ ga raca idú yúguꞌtë le dë.