DIDZAꞌ GUSÖ́L-LËꞌË PABLO YÖDZÖ FILIPOS
Pablo rugapëꞌ Dios bönachi queëꞌ Cristo nacuáꞌ Filipos
1
Nedaꞌ,
Pablo,
encaꞌ biꞌi Timoteo,
nactuꞌ huen dxin queëꞌ Jesucristo.
Rugapaꞌ Dios libíꞌiliꞌ,
réajlëꞌëliꞌ Cristo,
en libíꞌiliꞌ,
dë lu náꞌaliꞌ xichinëꞌ Cristo,
en libíꞌiliꞌ,
run chíꞌiliꞌ bönachi queëꞌ Cristo.
Zóaliꞌ Filipos,
en néquiliꞌ queëꞌ Dios,
en nácaliꞌ tuz len Jesucristo.
2 Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo gunnëꞌ queë́liꞌ le ruzáꞌ ládxëꞌë queë́ruꞌ,
en gunëꞌ ga soa dxi icja ládxiꞌdoꞌoliꞌ.
Pablo rinábinëꞌ Dios bi gunëꞌ quégaca bönachi taꞌyéajlëꞌ Cristo
3 Reaꞌ-nëꞌ Dios:
“Xclenuꞌ”,
cateꞌ rizáꞌ ládxaꞌa queë́liꞌ.
4 Cateꞌ rulidzaꞌ-nëꞌ Dios,
en rinábidaꞌ-nëꞌ gácalenëꞌ libíꞌiliꞌ,
rudzeja ládxaꞌa
5 tuꞌ röjnedaꞌ ca bénlenliꞌ nedaꞌ tsözxö́n dxin que didzaꞌ dxiꞌa.
Gusí loliꞌ runliꞌ dxin naꞌ dza niꞌ siꞌ biyö́niliꞌ,
en runliꞌ le ga ridxintë naꞌa dza.
6 Dios gusí lahuëꞌ runëꞌ tu le naca dxiꞌa lu icja ládxiꞌdoꞌoliꞌ.
Ruzxöni ládxaꞌa Lëꞌ gúnticaꞌsëꞌ caní ga idxintë dza huödëꞌ Jesucristo.
7 Ca naꞌ rizáꞌ ládxaꞌa queë́liꞌ naca ca ral-laꞌ gunaꞌ tuꞌ nadxíꞌideꞌedaꞌ libíꞌiliꞌ.
Yúguꞌtëliꞌ ruzíꞌiliꞌ xibé tsözxö́n len nedaꞌ le ruzáꞌ ládxëꞌë Dios queë́ruꞌ,
tsanni ni yuꞌa lidxi guíë,
en lëscaꞌ caní benliꞌ cateꞌ niꞌ bëꞌa didzaꞌ,
cateꞌ naꞌ benaꞌ libán que didzaꞌ dxiꞌa le benaꞌ ga bidxín queë́liꞌ tsaz.
8 Nö́zinëꞌ Dios ca nadxíꞌideꞌedaꞌ libíꞌiliꞌ.
Naca ca naꞌ nadxíꞌideꞌenëꞌ Lë cazëꞌ Jesucristo rëꞌu.
9 Rinábidaꞌ-nëꞌ Dios gunëꞌ ga idxíꞌiröliꞌ luzáꞌaliꞌ,
en gátaꞌdaꞌ queë́liꞌ yöl-laꞌ rácadaꞌ,
en yöl-laꞌ réajniꞌi idú
10 para gaca cöliꞌ le nácatërö dxiꞌa.
Channö gaca caní queë́liꞌ,
gácaliꞌ idú dxiꞌa,
ateꞌ cuntu nu gaca bi innë́ queë́liꞌ dza niꞌ huödëꞌ Cristo.
11 Le nácaliꞌ naca bëꞌ le naca dxiꞌa runëꞌ Cristo lu icja ládxiꞌdoꞌoliꞌ para iláꞌ lahui yöl-laꞌ zxön queëꞌ Dios,
en gaca queëꞌ yöl-laꞌ ba.
Zóaruꞌ nabanruꞌ para gácaruꞌ ca náquiëꞌ Cristo
12 Böchiꞌ luzáꞌadoꞌ,
rë́ꞌëndaꞌ inö́ziliꞌ lë ni:
Yúguꞌtë le guca quiaꞌ gulácalen nedaꞌ para guzxéquiꞌrödaꞌ benaꞌ libán que didzaꞌ dxiꞌa.
13 Caní guca,
yúguꞌtë niꞌa náꞌagaquiëꞌ bönniꞌ yúlahuiꞌ,
en iaꞌzícaꞌrëꞌ bönniꞌ ni nö́zguequinëꞌ yuꞌa lidxi guíë ni tuꞌ runaꞌ xichinëꞌ Cristo.
14 Tuꞌ yuꞌa nedaꞌ lidxi guíë ni ben ga látuꞌbiquiꞌ yúguꞌtë bö́chiꞌruꞌ nácagacarëꞌ rugu ladxiꞌ,
ateꞌ tuꞌzxöni ládxiꞌgaquiëꞌ Xanruꞌ,
en bítiꞌrö tádxinëꞌ tunëꞌ libán que xtídzëꞌë Dios.
15 Le nácatë bal-lëꞌ tunëꞌ libán queëꞌ Cristo tuꞌ tuꞌzxéꞌenëꞌ nedaꞌ,
en taꞌdil-lëꞌ,
pero iaꞌbal-lëꞌ tunëꞌ libán queëꞌ idú ládxiꞌgaquiëꞌ.
16 Yuguꞌ bönniꞌ tuꞌzxéꞌenëꞌ naꞌ tunëꞌ libán queëꞌ Cristo lu yöl-laꞌ run ba zxön cuíngaquiëꞌ,
en calëga idú ládxiꞌgaquiëꞌ.
Të́ꞌënnëꞌ uluꞌsacaꞌ ziꞌë nedaꞌ tsanni ni yuꞌa lidxi guíë.
17 Yuguꞌ bönniꞌ idú ládxiꞌgaquiëꞌ naꞌ,
lu yöl-laꞌ nadxíꞌi quégaquiëꞌ tunëꞌ libán queëꞌ,
tuꞌ nö́zguequinëꞌ Dios caz budödëꞌ lu naꞌa dxin runaꞌ,
runaꞌ libán que didzaꞌ dxiꞌa.
18 Bitiꞌ run lë naꞌ ga röꞌa böniga.
Rudzéjadaꞌ tuꞌ raca libán queëꞌ Cristo nácatiꞌtës,
sal-laꞌ tunëꞌ libán idú ládxiꞌgaquiëꞌ o bitiꞌ tunëꞌ le caní.
Naꞌa,
rudzéjarödaꞌ
19 tuꞌ chinö́zidaꞌ uláꞌ lu le raca quiaꞌ,
yuꞌa lidxi guíë ni,
tuꞌ rulídzaliꞌ-nëꞌ Dios,
en tuꞌ rácalenëꞌ Dios Böꞌ Láꞌayi nedaꞌ.
Náquiëꞌ Böꞌ risö́l-lëꞌë Jesucristo queë́ruꞌ.
20 Caní rë́ꞌëndaꞌ,
en ruzxöni ládxaꞌa-nëꞌ Dios,
gunëꞌ ga bitiꞌ utuíꞌidaꞌ,
en gunëꞌ ga gaca guꞌa didzaꞌ lu yöl-laꞌ rugu ladxiꞌ,
ateꞌ lu naꞌa nedaꞌ gácaticaꞌsö yöl-laꞌ ba queëꞌ Cristo naꞌa dza,
en yuguꞌ dza záꞌgaca,
sal-laꞌ gun bayudxi gátiteaꞌ,
o soaꞌ ibanaꞌ.
21 Ca runi nedaꞌ,
channö zoaꞌ nabanaꞌ,
naca para gacaꞌ ca náquiëꞌ Cristo,
en channö gátiaꞌ,
naca tu le uzíꞌiraꞌ xibé.
22 Channö huáca gunaꞌ dxin le gácalen didzaꞌ dxiꞌa queëꞌ Cristo channö sóasaꞌ ibanaꞌ,
bitiꞌ nözdaꞌ bízxilö ral-laꞌ cö́aꞌ.
23 Naca böniga cö́aꞌ.
Rë́ꞌëndaꞌ gátiteaꞌ para tsöjsóalenteaꞌ-nëꞌ Cristo,
tuꞌ gácatërö dxiꞌa quiaꞌ,
24 pero runrö bayudxi sóasaꞌ ibanaꞌ para séquiꞌdaꞌ gácalenaꞌ libíꞌiliꞌ.
25 Tuꞌ chinö́zidaꞌ naca caní,
nözdaꞌ caꞌ ugáꞌanalenaꞌ libíꞌiliꞌ para gácalenaꞌ libíꞌiliꞌ para gácarö idú ca réajlëꞌëliꞌ Cristo,
ateꞌ udzéjaröliꞌ tuꞌ réajlëꞌëliꞌ Lëꞌ.
26 Caní naca,
udusóalenaꞌ libíꞌiliꞌ leyúbölö,
le gun ga tsaz ládxiꞌliꞌ-nëꞌ Jesucristo niꞌa que le gunëꞌ,
gácalenëꞌ nedaꞌ.
27 Guliꞌgüíꞌsö ladxiꞌ gácaliꞌ ca saꞌyéaj didzaꞌ dxiꞌa queëꞌ Cristo.
Caní gaca,
channö uduyúaꞌ libíꞌiliꞌ o channö soaꞌ ziꞌtuꞌ,
huayö́nidaꞌ nácaliꞌ tsutsu,
en nácaliꞌ tuz,
runliꞌ tsözxö́n dxin que le réajlëꞌëruꞌ le zaꞌ queë́ruꞌ niꞌa que didzaꞌ dxiꞌa.
28 Bitiꞌ güíꞌiliꞌ nupa bitiꞌ taꞌléꞌe libíꞌiliꞌ dxiꞌa lataj ilún gadxi libíꞌiliꞌ.
Lë ni uluíꞌi légaquiëꞌ ilaꞌnítiëꞌ,
pero uláliꞌ libíꞌiliꞌ,
le gaca bëꞌ rácalenëꞌ Dios caz libíꞌiliꞌ.
29 Dios ruꞌë libíꞌiliꞌ lataj gunliꞌ xichinëꞌ Cristo,
calë́gasö ca réajlëꞌëliꞌ Lëꞌ,
pero lëscaꞌ ca riguíꞌi rizácaꞌliꞌ cateꞌ runliꞌ xichinëꞌ.
30 Naꞌa,
gaca gunliꞌ nedaꞌ tsözxö́n güíꞌi ládxiꞌruꞌ gunruꞌ libán que didzaꞌ dxiꞌa.
Biléꞌe quéziliꞌ ca gudíꞌi guzxácaꞌa cateꞌ benaꞌ caní zíꞌalö,
ateꞌ riyö́niliꞌ ca riguíꞌi rizácaꞌa caꞌ naꞌa.