6
Libíꞌiliꞌ,
yuguꞌ bíꞌidoꞌ,
ral-laꞌ gunliꞌ ca rnna xtídzaꞌgaquiëꞌ xuz xináꞌaliꞌ para caní gunliꞌ ca rnna xtídzëꞌë Xanruꞌ.
Ral-laꞌ gunliꞌ le naca tsahuiꞌ.
2 Xibá zíꞌalö naꞌ benëꞌ Dios le nachë́ꞌ tu le guzxíꞌ lu nëꞌë gunëꞌ,
naca lë naꞌ rnna:
“Ben bal xuz xinóꞌo,
3 ateꞌ gaca dxiꞌa quiuꞌ,
ateꞌ xidzé suꞌ ibanuꞌ yödzölió ni.”
4 Libíꞌiliꞌ,
yuguꞌ xuz,
bitiꞌ gun leliꞌ zxíꞌiniliꞌ,
pero buliꞌxö́n légacabiꞌ,
en guliꞌsínaꞌ légacabiꞌ,
en buliꞌsëdi légacabiꞌ ca raza ládxëꞌë Xanruꞌ.
5 Libíꞌiliꞌ,
núlöliꞌ nácaliꞌ bönniꞌ nadóꞌogaca,
guliꞌgún ca rnna xtídzaꞌgaquiëꞌ xanliꞌ luyú ni idú ládxiꞌliꞌ,
gunliꞌ légaquiëꞌ bal lu yöl-laꞌ radxi queë́liꞌ,
en gunliꞌ xichíngaquiëꞌ ca ral-laꞌ gunliꞌ xichinëꞌ Cristo.
6 Guliꞌgún xichíngaquiëꞌ,
calë́gasö cateꞌ niꞌ tuꞌyúëꞌ libíꞌiliꞌ para urúajliꞌ dxiꞌa lógaquiëꞌ,
pero idú ládxiꞌliꞌ guliꞌgún xichíngaquiëꞌ ca raza ládxëꞌë Dios,
ca naꞌ ral-laꞌ gunliꞌ xichinëꞌ Cristo.
7 Idú ládxiꞌliꞌ guliꞌgún xichíngaquiëꞌ,
ateꞌ caní gaca,
gunliꞌ xichinëꞌ Xanruꞌ,
en calë́gasö xichíngaca bönachi.
8 Nöz quéziliꞌ ca gunëꞌ Xanruꞌ.
Ubiꞌë que queë́ruꞌ tsca naca le dxiꞌa runruꞌ sal-laꞌ nadzanruꞌ,
o sal-laꞌ nácaruꞌ bönniꞌ nadóꞌogaquiëꞌ.
9 Libíꞌiliꞌ,
nacuáꞌ queë́liꞌ bönniꞌ nadóꞌogaca,
guliꞌgún dxiꞌa caní quégaca huen dxin queë́liꞌ naꞌ,
en bitiꞌ uzéliꞌ ba nadx légaquiëꞌ.
Guliꞌtsöjné ca naca queë́liꞌ,
yúꞌuliꞌ lu nëꞌë Xanruꞌ zoëꞌ yehuaꞌ yubá laꞌ ca nácatë quégaquiëꞌ,
ateꞌ Lëꞌ bitiꞌ rutsë́ꞌë ca runëꞌ que que bönachi.
Dios runnëꞌ queë́ruꞌ le tun chiꞌi rëꞌu
10 Naꞌa,
böchiꞌ luzáꞌadoꞌ,
guliꞌgaca tsutsu tuꞌ nácaliꞌ tuz len Xanruꞌ,
en zóalen libíꞌiliꞌ yöl-laꞌ huáca zxön queëꞌ.
11 Guliꞌgún chiꞌi cuinliꞌ,
ugunliꞌ dxin yuguꞌ le runnëꞌ Dios queë́ruꞌ,
le tun chiꞌi rëꞌu,
para gaca sóaliꞌ tsutsu cateꞌ guë́ꞌëni siꞌ bëꞌ tuꞌ xihuiꞌ libíꞌiliꞌ.
12 Bitiꞌ ridíl-lalenruꞌ bönachi néquiguequini bëlaꞌ,
en dxita,
pero ridíl-lalenruꞌ yöl-laꞌ unná bëꞌ quégaca böꞌ xihuiꞌ taꞌdá lu böꞌös,
en dzágagaca nupa taꞌnná bëꞌ,
en nupa nadéliꞌgaca yöl-laꞌ unná bëꞌ,
en nupa dë lu náꞌagaca,
nupa nacuáꞌ yödzölió ni ga naca chul-la que dul-laꞌ.
13 Que lë ni naꞌ:
Guliꞌsíꞌ yúguꞌtë le runnëꞌ queë́ruꞌ Dios le tun chiꞌi rëꞌu,
para cateꞌ idxín queë́ruꞌ dza niꞌ ilaca le nácagaca xihuiꞌ,
gaca guáꞌ ilenliꞌ,
en cateꞌ údxi gunliꞌ caní,
ugáꞌanaliꞌ tsutsu.
14 Guliꞌsóa tsutsu.
Guliꞌsíꞌ le naca idútë li,
le gaca queë́liꞌ ca tu guídi gugaꞌ lë́ꞌëliꞌ.
Guliꞌgaca tsahuiꞌ tuꞌ gun chiꞌi libíꞌiliꞌ le naca tsahuiꞌ
ca run tu lariꞌ yödx run chiꞌi luchuꞌë bönniꞌ rejëꞌ gudil-la.
15 Guliꞌsóa sinaꞌ para gunliꞌ libán que didzaꞌ dxiꞌa
le ribequi dxi icja ládxiꞌdoꞌoruꞌ lahuëꞌ Dios,
ca naꞌ ruzóa cuinëꞌ sinaꞌ,
en ridë́ꞌë xiráchuëꞌ tu bönniꞌ rejëꞌ gudil-la.
16 Le naca lo,
yöl-laꞌ réajlëꞌ queë́liꞌ Cristo
gaca queë́liꞌ ca tu le naca tsutsu uzëliꞌ loliꞌ,
para cabí gál-laꞌ yuguꞌ le usán tuꞌ xihuiꞌ libíꞌiliꞌ,
le nácagaca ca yaga túchiꞌdoꞌ zoa guíꞌ láhuilöguequi.
17 Yöl-laꞌ rusölá gaca queë́liꞌ ca tu luꞌu guíë le gun chiꞌi ícjaliꞌ.
Xtídzëꞌë Dios gaca queë́liꞌ ca tu guíë tuchiꞌ
le runnëꞌ Dios Böꞌ Láꞌayi queë́ruꞌ,
para utíl-lalenruꞌ le naca xihuiꞌ.
18 Guliꞌgún yúguꞌtë lë ni,
en buliꞌlidzëꞌ Dios inábiliꞌ-nëꞌ gácalenëꞌ libíꞌiliꞌ.
Buliꞌlídzaticaꞌsëꞌ Dios zóalenëꞌ Dios Böꞌ Láꞌayi libíꞌiliꞌ.
Para gunliꞌ caní ral-laꞌ usubán ládxiꞌliꞌ en cabí huö́aj ládxiꞌliꞌ,
inábiliꞌ-nëꞌ Dios gácalenëꞌ nupa néquiguequi queëꞌ.
19 Buliꞌlidzëꞌ Dios,
inábiliꞌ-nëꞌ gácalenëꞌ caꞌ nedaꞌ,
en gunnëꞌ quiaꞌ didzaꞌ cateꞌ ral-laꞌ guꞌa didzaꞌ,
en gunëꞌ ga gacaꞌ rugu ladxiꞌ cateꞌ gunaꞌ libán para uzéajniꞌidaꞌ bönachi ca naca le bigachiꞌ que didzaꞌ dxiꞌa.
20 Dios budödëꞌ lu naꞌa didzaꞌ dxiꞌa naꞌ para gunaꞌ libán que,
ateꞌ tuꞌ benaꞌ caní yuꞌa lidxi guíë ni.
Buliꞌlidzëꞌ Dios channö,
inábiliꞌ-nëꞌ gunëꞌ ga gacaꞌ rugu ladxiꞌ para gunaꞌ libán que didzaꞌ dxiꞌa ca ral-laꞌ gunaꞌ.
Ruúdx didzaꞌ bëꞌë Pablo
21 Tíquico,
bö́chiꞌruꞌ naꞌ nadxíꞌiruꞌ-nëꞌ,
en runëꞌ xichinëꞌ Xanruꞌ idú ládxëꞌë,
quíxjöiꞌinëꞌ libíꞌiliꞌ idú ca raca quiaꞌ,
en ca runaꞌ nedaꞌ ni.
22 Que lë ni naꞌ,
isö́l-laꞌa-nëꞌ queë́liꞌ,
ateꞌ uluíꞌinëꞌ libíꞌiliꞌ ca raca queë́tuꞌ,
ateꞌ caní utipëꞌ ládxiꞌliꞌ.
23 Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo gunëꞌ ga soa dxi icja ládxiꞌdoꞌoliꞌ,
en gataꞌ queë́liꞌ yöl-laꞌ nadxíꞌi le dzaga yöl-laꞌ réajlëꞌ queë́liꞌ Cristo,
yúguꞌtëliꞌ naꞌ néquiliꞌ queëꞌ.
24 Le ruzáꞌ ládxëꞌë Dios queë́ruꞌ gaca queë́liꞌ,
yúguꞌtëliꞌ naꞌ nadxíꞌiliꞌ-nëꞌ Xanruꞌ Jesucristo,
naca idú yöl-laꞌ nadxíꞌi queë́liꞌ Lëꞌ.
¡Caꞌ gaca!