Ca ral-laꞌ ilaca nupa nácagaca ca biꞌi queë cazëꞌ Dios
5
Tuꞌ nácaliꞌ ca biꞌi queë cazëꞌ Dios,
ateꞌ nadxíꞌinëꞌ libíꞌiliꞌ,
guliꞌgüíꞌ ladxiꞌ gácaliꞌ ca náquiëꞌ Lëꞌ.
2 Ca naca yúguꞌtë le runliꞌ:
Ral-laꞌ idxíꞌiliꞌ luzáꞌaliꞌ ca naꞌ benëꞌ Cristo.
Bidxíꞌinëꞌ rëꞌu,
en budödi cuinëꞌ lu yöl-laꞌ guti uláz queë́ruꞌ.
Ben cuinëꞌ ca böaꞌ bë́dxidoꞌ rútiruꞌ-baꞌ lahuëꞌ Dios tuꞌ nözi dul-laꞌ nabágaꞌruꞌ.
Gúquiëꞌ caꞌ ca tu le riláꞌ zxixi le raza ládxëꞌë Dios le rigúꞌuruꞌ lu bucugu láꞌayi queëꞌ.
3 Tuꞌ nácaliꞌ queëꞌ Dios,
bitiꞌ caꞌ gunliꞌ le ruáꞌ döꞌ,
en bitiꞌ gunliꞌ le cabí ral-laꞌ gunliꞌ,
en bitiꞌ uhuídiꞌliꞌ.
Níꞌirö cuntu nu gaca bi innë́ queë́liꞌ.
4 Bitiꞌ güíꞌiliꞌ didzaꞌ xihuiꞌ,
o didzaꞌ canö́z,
o didzaꞌ cáꞌasö,
yuguꞌ le cabí ral-laꞌ gunliꞌ,
pero nácarö dxiꞌa guië́liꞌ-nëꞌ Dios:
“Xclenuꞌ.”
5 Chinö́z quéziliꞌ nitúëꞌ bönniꞌ runëꞌ le ruáꞌ döꞌ bitiꞌ caꞌ tsáziëꞌ ga rinná bëꞌë Cristo tsözxö́n len Dios,
o nu bönniꞌ runëꞌ le cabí ral-laꞌ gunëꞌ,
o nu bönniꞌ ruhuídiꞌnëꞌ.
Nu naꞌ ruhuidiꞌ naca ca nu reaj ladxiꞌ budóꞌ guiö́j budóꞌ yaga.
6 Bitiꞌ güíꞌiliꞌ lataj nu siꞌ yeꞌe libíꞌiliꞌ len didzaꞌ bitiꞌ nácatë.
Tuꞌ nözi dul-laꞌ caní Dios gunëꞌ xíguiaꞌ nupa bitiꞌ túngaca ca rnna xtídzëꞌë.
7 Bitiꞌ caꞌ gunliꞌ tuz bönachi caní.
8 Zíꞌatëlö guzóaliꞌ ga naca chul-la que dul-laꞌ,
pero naꞌa zóaliꞌ lu beníꞌ,
tuꞌ nácaliꞌ tuz len Xanruꞌ.
Guliꞌgaca ca bönachi taꞌdá lu beníꞌ,
9 tuꞌ run beníꞌ naꞌ ga gácaruꞌ dxiꞌi ladxiꞌ,
en ga güíꞌiruꞌ didzaꞌ le naca idútë li,
en ga gácaruꞌ tsahuiꞌ.
10 Guliꞌgüíꞌ ladxiꞌ inö́ziliꞌ le raza ládxëꞌë Xanruꞌ.
11 Bitiꞌ gútsaꞌliꞌ nupa tun le ruáꞌ döꞌ,
lë naꞌ tunëꞌ ga naca chul-la que dul-laꞌ,
pero buliꞌbéaj ga lináꞌ yuguꞌ lë naꞌ tunëꞌ.
12 Utuíꞌiruꞌ güíꞌiruꞌ didzaꞌ ca naca le tun bönachi naꞌ bagáchiꞌsö.
13 Cateꞌ bi ubéajruꞌ ga lináꞌ,
gaca bëꞌ yúguꞌtë tsca nácagaca,
tuꞌ gun le naca beníꞌ ga gaca bëꞌ yúguꞌtë.
14 Que lë ni naꞌ nazúaj lu guichi lë naꞌ rnna:
Bubán,
liꞌ naꞌ rasiuꞌ.
Guyasa ladaj nupa nátigaca.
Cristo uzeníꞌë quiuꞌ.
15 Buliꞌyú cuinliꞌ ca runliꞌ.
Bitiꞌ gácaliꞌ nupa bitiꞌ taꞌyéajniꞌini,
pero guliꞌgaca bönachi taꞌyéajniꞌi.
16 Guliꞌsíꞌ xibé lataj dë queë́liꞌ tuꞌ chizóaruꞌ dza bitiꞌ raca dxiꞌa queë́ruꞌ.
17 Bitiꞌ gácaliꞌ bönniꞌ bitiꞌ bi nö́zguequinëꞌ.
Guliꞌgüíꞌ ladxiꞌ tséajniꞌiliꞌ le rë́ꞌënëꞌ Xanruꞌ gunliꞌ.
18 Bitiꞌ súdxiliꞌ,
tuꞌ gun yöl-laꞌ rizudxi ga nítiliꞌ tsaz.
Guliꞌgüíꞌidaꞌ lataj inná béꞌenëꞌ Dios Böꞌ Láꞌayi libíꞌiliꞌ.
19 Guliꞌgüíꞌilen luzáꞌaliꞌ didzaꞌ tuliꞌ iaꞌtuliꞌ,
ugunliꞌ dxin yuguꞌ le rul-la lë́gaca salmo,
en yuguꞌ le rul-la yöl-laꞌ ba Dios,
en yuguꞌ le rul-la naguꞌë Dios Böꞌ Láꞌayi icja ládxiꞌdoꞌoruꞌ.
Idú ládxiꞌruꞌ ral-laꞌ gúl-laruꞌ queëꞌ,
le cúꞌuruꞌ-nëꞌ Dios yöl-laꞌ ba.
20 Guliꞌgún dxin Lëꞌ Xanruꞌ Jesucristo,
en guliꞌguíëticaꞌsëꞌ Xúziruꞌ Dios:
“Xclenuꞌ” ca naca yúguꞌtë.
Ca ral-laꞌ gunruꞌ quégaca diꞌa dza queë́ruꞌ
21 Guliꞌgún ca rnna xtidzaꞌ luzáꞌaliꞌ tuliꞌ iaꞌtuliꞌ para caní gunliꞌ-nëꞌ Dios zxön.
22 Libíꞌiliꞌ,
yuguꞌ nigula,
guliꞌgún ca rnna xtídzaꞌgaquiëꞌ bönniꞌ que queë́liꞌ,
ca naꞌ ral-laꞌ gunliꞌ ca rnna xtídzëꞌë Xanruꞌ.
23 Caní ral-laꞌ gunliꞌ,
tuꞌ rinná béꞌenëꞌ bönniꞌ nigula queëꞌ ca naꞌ runëꞌ Cristo,
rinná béꞌenëꞌ bönachi queëꞌ.
Cristo náquiëꞌ caꞌ Nu rusölá bönachi queëꞌ,
nupa naꞌ dzágagaca le naca cazëꞌ Lëꞌ.
24 Ca naꞌ tun bönachi queëꞌ Cristo ca rnna xtídzëꞌë,
lëscaꞌ caní ral-laꞌ ilunnu nigula ca rnna xtídzaꞌgaquiëꞌ bönniꞌ que queë́gacanu ca naca yúguꞌtë le raca.
25 Libíꞌiliꞌ,
yuguꞌ bönniꞌ,
ral-laꞌ idxíꞌiliꞌ-nu nigula que queë́liꞌ ca naꞌ Cristo nadxíꞌinëꞌ bönachi queëꞌ,
en budödi cuinëꞌ,
gútiëꞌ uláz quégaquiëꞌ.
26 Gútiëꞌ Cristo para bubéajëꞌ quez queëꞌ Dios bönachi queëꞌ naꞌ,
ateꞌ nayárigaca tu lu nisa le naca xtídzëꞌë.
27 Gútiëꞌ uláz quégaquiëꞌ para gaca usudxinëꞌ légaquiëꞌ lahuëꞌ Dios,
nácagaquiëꞌ ca tu lariꞌ lachi,
bitiꞌ nuáꞌ bösaj le nëꞌaj,
en bitiꞌ naxúꞌuna,
en bitiꞌ zoa nitú le run ditaj le,
pero runëꞌ ga ilácagaquiëꞌ idú dxiꞌa,
cuntu nu gaca bi innë́ quégaquiëꞌ.
28 Ral-laꞌ idxíꞌiliꞌ-nu nigula que queë́liꞌ ca naꞌ nadxíꞌi cuinliꞌ.
Nu bönniꞌ nadxíꞌinëꞌ-nu nigula queëꞌ,
nadxíꞌi cuinëꞌ.
29 Cuntu nu bönniꞌ runi ziꞌ cuinëꞌ,
pero rugahuëꞌ,
en run chiꞌi cuinëꞌ,
ca runëꞌ caꞌ Cristo,
ca rúnlenëꞌ bönachi queëꞌ,
30 nupa dzágagaca idútë le naca cazëꞌ.
¡Rëꞌu ni dzágaruꞌ le naca cazëꞌ Lëꞌ!
¡Néquiniruꞌ xipë́lëꞌë,
en dxita queëꞌ!
31 Lëscaꞌ caní nazúaj lu guichi láꞌayi le rnna:
“Que lë ni naꞌ tu bönniꞌ ral-laꞌ ucáꞌanëꞌ xuz xinë́ꞌë para tsöjsóalenëꞌ-nu nigula queëꞌ,
ateꞌ irópatëꞌ uluꞌhuöáquiëꞌ tuz.”
32 Lë naꞌ nazúaj lu guichi ni ruluíꞌi lahui tu le naca idútë li,
ateꞌ nedaꞌ réquidaꞌ ruíꞌi didzaꞌ caꞌ ca naca queëꞌ Cristo,
en quégaca bönachi queëꞌ naꞌ.
33 Lëscaꞌ ruíꞌi didzaꞌ ca naca queë́liꞌ.
Yúguꞌtëliꞌ libíꞌiliꞌ,
bönniꞌ,
ral-laꞌ idxíꞌiliꞌ-nu nigula que queë́liꞌ ca naꞌ nadxíꞌi cuinliꞌ,
ateꞌ yuguꞌ nigula ral-laꞌ ilunnu bal bönniꞌ que queë́gacanu.