Dios Böꞌ Láꞌayi nunëꞌ rëꞌu tuz
4
Naꞌa,
nedaꞌ rátaꞌyuaꞌ loliꞌ,
yuꞌa lidxi guíë ni tuꞌ runaꞌ libán queëꞌ Cristo,
rinábidaꞌ libíꞌiliꞌ gunliꞌ idú ca ral-laꞌ ilún nupa bulidzëꞌ Dios para ilequi queëꞌ,
ca naꞌ bulidzëꞌ caꞌ libíꞌiliꞌ.
2 Guliꞌgaca nöxaj ladxiꞌ,
en dxiꞌi ladxiꞌ.
Guliꞌcö́z zxön ladxiꞌ.
Guliꞌgüíꞌ ladxiꞌ luzáꞌaliꞌ tuliꞌ iaꞌtuliꞌ lu yöl-laꞌ nadxíꞌi queë́liꞌ.
3 Guliꞌgüíꞌ ladxiꞌ gácaticaꞌsiliꞌ tuz ca naꞌ chinunëꞌ Dios Böꞌ Láꞌayi libíꞌiliꞌ,
gunliꞌ caní lu yöl-laꞌ riböza tsáhuiꞌdoꞌ queë́liꞌ le rutsaga libíꞌiliꞌ.
4 Tuz naca idútë le naca cazëꞌ Cristo le nadzágaruꞌ rëꞌu.
Tuzëꞌ náquiëꞌ Dios Böꞌ Láꞌayi dzáguiëꞌ rëꞌu.
Tuz naca le runruꞌ löza,
lë naꞌ bulidzëꞌ rëꞌu Dios para uzíꞌiruꞌ xibé.
5 Tuzëꞌ náquiëꞌ Xanruꞌ.
Tuz le réajlëꞌëruꞌ.
Tuz le bidílaruꞌ nisa.
6 Tuzëꞌ náquiëꞌ Dios Nu naca Xúziruꞌ yúguꞌtëruꞌ.
Lëꞌ rinná béꞌenëꞌ yúguꞌtëruꞌ.
Rugunëꞌ dxin yúguꞌtëruꞌ.
Riböza cazëꞌ Lëꞌ lu icja ládxiꞌdoꞌoruꞌ yúguꞌtëruꞌ.
7 Tu turuꞌ nazíꞌiruꞌ tu yöl-laꞌ huáca queëꞌ Dios tsca naca le bennëꞌ Cristo que queë́ruꞌ.
8 Naca caní ca naꞌ nazúaj lu guichi láꞌayi le rnna:
Buëpëꞌ yehuaꞌ yubá,
guchë́ꞌë zián bönachi gulaꞌdzúngaca.
Gudísiëꞌ quégaca bönachi le runö́dzjasëꞌ quégaquiëꞌ.
9 ¿Bizxi rë́ꞌëni inná lë naꞌ rnna:
buëpëꞌ?
Rusëdi rëꞌu bötjëꞌ zíꞌalö,
en bidxinëꞌ yödzölió cadxíꞌilö ni.
10 Nu naꞌ bötaj naca Bönniꞌ naꞌ buëpëꞌ xitsáꞌtërö niꞌ yehuaꞌ yubá para budzë́ꞌë yúguꞌtë len le naca cazëꞌ Lëꞌ.
11 Cristo caz bennëꞌ que queë́ruꞌ yuguꞌ yöl-laꞌ huáca queëꞌ:
Bëꞌ lataj bal-lëꞌ bönniꞌ iláquiëꞌ gubáz queëꞌ.
Benëꞌ ga tuꞌë didzaꞌ uláz queëꞌ Dios iaꞌbal-lëꞌ bönniꞌ.
Gusö́l-lëꞌë iaꞌbal-lëꞌ tsöjéngaquiëꞌ libán que didzaꞌ dxiꞌa.
Bucuꞌë iaꞌbal-lëꞌ para ilún chiꞌë bönachi queëꞌ.
Bucuꞌë iaꞌbal-lëꞌ para uluꞌsë́dinëꞌ bönachi queëꞌ.
12 Cristo caz bupë́ꞌë bönachi queëꞌ caní para gaca ilún xichinëꞌ,
para ilún ga ilaca idú nupa nácagaca ca idútë le naca cazëꞌ Lëꞌ.
13 Caní gaca ga idxintë dza huöácaruꞌ tuz yúguꞌtëruꞌ ca réajlëꞌëruꞌ Cristo,
en ca núnbëꞌëruꞌ-nëꞌ Zxíꞌinëꞌ Dios.
Gácaruꞌ nál-la,
en huöácaruꞌ idú ca náquiëꞌ Lë cazëꞌ Cristo.
14 Bítiꞌrö gácaruꞌ ca yuguꞌ bíꞌidoꞌ,
ca nácagaca nupa naꞌ tuꞌtsaꞌtë ca túngaca,
en nácagaca ca tu le nachë́ꞌ lu yegu,
o ca tu le röjchë́ꞌ bítiꞌtës böꞌ recja,
tuꞌ taꞌzíꞌ lu në́ꞌeguequi bítiꞌtës didzaꞌ nu rusëdi léguequi,
nu naꞌ rizíꞌ yeꞌe léguequi len yöl-laꞌ sinaꞌ que,
en run ga taꞌchixi taꞌnigui.
15 Naꞌa,
rëꞌu ni,
tuꞌ nadxíꞌiruꞌ luzáꞌaruꞌ,
ral-laꞌ güíꞌiruꞌ didzaꞌ le naca idútë li para gaca huöácaruꞌ idú ca náquiëꞌ Cristo,
en gácaruꞌ tuz len Lëꞌ,
Nu naca Xani idú le naca cazëꞌ,
le nácaruꞌ rëꞌu.
16 Cristo caz runëꞌ ga rutsaga dxiꞌa idútë le naca cazëꞌ,
le nácaruꞌ rëꞌu,
ateꞌ idútë le naca cazëꞌ naꞌ naguelaꞌ tsözxö́n niꞌa que lë naꞌ run tuz idútë le naca cazëꞌ.
Cateꞌ tu turuꞌ runruꞌ xichinruꞌ,
rëꞌu naꞌ dzágaruꞌ le naca cazëꞌ,
idútë rizxö́n,
en raca idú,
ca naꞌ zeaj rácarö idú ca nadxíꞌiruꞌ luzáꞌaruꞌ.
Yöl-laꞌ naꞌbán cubi náparuꞌ tuꞌ nácaruꞌ tuz len Cristo
17 Uláz queëꞌ Xanruꞌ reaꞌ libíꞌiliꞌ lë ni,
en riguꞌa le lu náꞌaliꞌ,
rnníaꞌ:
Bítiꞌrö gunliꞌ ca tun nupa bitiꞌ núnbëꞌgaquiëꞌ Dios,
nupa naꞌ tun ca taꞌzaꞌsö ládxiꞌguequi,
18 en nachul-la nanítigaca icja ládxiꞌdoꞌguequi.
Tuꞌ cabí nö́zguequinëꞌ le nácatë,
en nazídigaquiëꞌ,
bitiꞌ nazíꞌgaquiëꞌ yöl-laꞌ naꞌbán naꞌ runnëꞌ Dios queë́ruꞌ.
19 Bitiꞌ caꞌ tuꞌtuíꞌinëꞌ.
Nudödi cuíngaquiëꞌ lu le ruáꞌ döꞌ.
Idú ládxiꞌgaquiëꞌ tunëꞌ yúguꞌtë le cabí naca tsahuiꞌ.
20 Nupa niꞌ buluꞌsedi libíꞌiliꞌ ca naca queëꞌ Cristo,
bitiꞌ caꞌ buluꞌsedi libíꞌiliꞌ gunliꞌ ca tun bönachi caní.
21 Le naca idútë li biyö́niliꞌ ca naca queëꞌ Cristo,
en le nácaliꞌ queëꞌ tuꞌsédinëꞌ libíꞌiliꞌ le naca idútë li naꞌ zóalen Jesús.
22 Guliꞌnná beꞌe yöl-laꞌ bönáchisö queë́liꞌ le gúcaliꞌ zíꞌalö,
lë naꞌ riniti niꞌa que yöl-laꞌ rizë́ ladxiꞌ queë́liꞌ le ruáꞌ döꞌ le guzxíꞌ yeꞌe libíꞌiliꞌ.
23 Ral-laꞌ huöácaliꞌ cubi lu icja ládxiꞌdoꞌoliꞌ,
en lu böꞌ naca cázaliꞌ.
24 Ral-laꞌ síꞌiliꞌ yöl-laꞌ bönachi cubi le nunëꞌ Dios ca naca cazëꞌ Lëꞌ,
le ruluíꞌi cuini niꞌa que le naca dxiꞌa,
en le naca tsahuiꞌ runliꞌ,
en run ga gaca gunliꞌ caní.
25 Que lë ni naꞌ,
bítiꞌrö siꞌ yë́ꞌëliꞌ.
Yúguꞌtëruꞌ ral-laꞌ güíꞌilenruꞌ luzáꞌaruꞌ didzaꞌ le nácatë,
tuꞌ dzágaruꞌ yúguꞌtëruꞌ idútë le naca cazëꞌ Cristo.
26 Channö hualéliꞌ,
bitiꞌ ral-laꞌ gunliꞌ dul-laꞌ.
Bitiꞌ ileliꞌ xidzé.
27 Bitiꞌ bi gunliꞌ le güíꞌi lataj tuꞌ xihuiꞌ ucúl-la libíꞌiliꞌ.
28 Nu bönniꞌ ribanëꞌ ral-laꞌ usanëꞌ yöl-laꞌ gubán queëꞌ,
en tsáziëꞌ huen dxin para gataꞌ queëꞌ bi unödzjëꞌ quégaca nupa taꞌyadzaj.
29 Bitiꞌ güíꞌiliꞌ didzaꞌ xihuiꞌ,
pero guliꞌgüíꞌ didzaꞌ dxiꞌa,
yuguꞌ le ilácalen nu yöni,
en ilún ga gaca dxiꞌa que nu naꞌ.
30 Bitiꞌ usuhuíꞌiniliꞌ Dios Böꞌ Láꞌayi,
tuꞌ naca bëꞌ néquiliꞌ queëꞌ Dios tuꞌ zóalenëꞌ Dios Böꞌ Láꞌayi libíꞌiliꞌ,
ateꞌ idxín dza údxi usölë́ꞌ libíꞌiliꞌ lu dul-laꞌ.
31 Guliꞌcúa ladaj libíꞌiliꞌ
yöl-laꞌ ruzxëꞌe,
en yöl-laꞌ ridzáꞌa,
en yöl-laꞌ rilé,
en yöl-laꞌ ridil-la didzaꞌ,
en yöl-laꞌ rutsaga yudxi,
en yúguꞌtë yöl-laꞌ bitiꞌ riléꞌe luzáꞌaliꞌ dxiꞌa.
32 Ral-laꞌ gácaliꞌ dxiꞌi ladxiꞌ,
en huéchiꞌ ládxiꞌliꞌ luzáꞌaliꞌ tuliꞌ iaꞌtuliꞌ,
en uniti loliꞌ luzáꞌaliꞌ tuliꞌ iaꞌtuliꞌ,
ca naꞌ benëꞌ Dios,
buniti lahuëꞌ libíꞌiliꞌ tuꞌ nácaliꞌ tuz len Cristo.