Náquiëꞌ Pablo huen libán que didzaꞌ dxiꞌa lógaca bönachi izáꞌa
3
Que lë ni naꞌ,
nedaꞌ,
Pablo,
yuꞌa lidxi guíë tuꞌ runaꞌ libán queëꞌ Jesucristo para uzíꞌiliꞌ xibë́ꞌ,
libíꞌiliꞌ,
bönachi izáꞌa.
2 Réquidaꞌ chinö́z quéziliꞌ ca benëꞌ Dios,
budödëꞌ lu naꞌa dxin runaꞌ para uzíꞌiliꞌ xibé le ruzáꞌ ládxëꞌë queë́ruꞌ.
3 Dios buluꞌe lahui le bigachiꞌ queëꞌ,
en buzéajniꞌinëꞌ nedaꞌ ca naca.
Ca naca lë ni chibuzúajaꞌ látiꞌdoꞌ queë́liꞌ lu guichi.
4 Cateꞌ ulábaliꞌ lë ni,
gúnbëꞌëliꞌ le réajniꞌidaꞌ ca naca le bigachiꞌ ca naca queëꞌ Cristo.
5 Dza niꞌte cuntu nu buzéajniꞌinëꞌ Dios ca naca le bigachiꞌ naꞌ,
pero naꞌa,
lu nëꞌë Dios Böꞌ Láꞌayi,
chibuluꞌë lahui Dios ca naca,
tuꞌ buluíꞌinëꞌ yuguꞌ bönniꞌ gubáz láꞌayi queëꞌ,
en yuguꞌ bönniꞌ tuꞌë didzaꞌ uláz queëꞌ.
6 Caní rnna lë naꞌ bigachiꞌ:
“Niꞌa que didzaꞌ dxiꞌa ilaꞌdeliꞌ bönachi izáꞌa tsözxö́n len bönachi judío le nequi queëꞌ Dios,
ateꞌ uluꞌhuöáquiëꞌ ca tuz bönachi,
en uluꞌziꞌë xibé tsözxö́n len légaquiëꞌ le guzxíꞌ lu nëꞌë Dios unödzjëꞌ quégaquiëꞌ tuꞌ dáꞌgaquiëꞌ Jesucristo.”
7 Dios buzáꞌ ládxëꞌë quiaꞌ le bennëꞌ quiaꞌ.
Lu yöl-laꞌ huáca zxön queëꞌ benëꞌ nedaꞌ huen libán que didzaꞌ dxiꞌa queëꞌ.
8 Nacraꞌ cáꞌasö ca yúguꞌtë bönachi queëꞌ Dios,
pero Lëꞌ buzáꞌ ládxëꞌë quiaꞌ gacaꞌ huen libán lógaca bönachi izáꞌa que didzaꞌ dxiꞌa ca naca yöl-laꞌ tsahuiꞌ queëꞌ Cristo,
le nazácaꞌdaꞌ.
9 Dios budödëꞌ lu naꞌa gunaꞌ ga iléquibeꞌe yúguꞌtë bönachi ca naca le buzóa cazëꞌ Dios dza niꞌte,
lë naꞌ naca tu le bigachiꞌ queëꞌ Dios,
Nu ben yúguꞌtë le riléꞌeruꞌ.
10 Caní guca,
para iléquibeꞌe yúguꞌtë nupa taꞌnná bëꞌ,
en nupa dë lu në́ꞌeguequi niꞌ yehuaꞌ yubá,
idú ca naca yöl-laꞌ réajniꞌi queëꞌ Dios cateꞌ ilaꞌléꞌe ca nácagaca bönachi queëꞌ Cristo.
11 Dios benëꞌ lë ni,
busudxinëꞌ lë naꞌ buzóa cazëꞌ dza niꞌte,
le benëꞌ lu nëꞌë Xanruꞌ Jesucristo.
12 Tuꞌ nácaruꞌ tuz len Cristo,
nazíꞌiruꞌ lataj ibígaꞌruꞌ idú ladxiꞌruꞌ lahuëꞌ Dios,
tuꞌ réajlëꞌëruꞌ Lëꞌ.
13 Que lë ni naꞌ rátaꞌyuaꞌ loliꞌ bitiꞌ gaca chopa ládxiꞌliꞌ tuꞌ nözi le riguíꞌi rizácaꞌa nedaꞌ para gácalenaꞌ libíꞌiliꞌ,
le naca tu le uzíꞌiliꞌ xibé.
Ca naca yöl-laꞌ nadxíꞌi queëꞌ Cristo
14 ¡Que lë ni naꞌ,
ruzechu zxibaꞌ lahuëꞌ Xuzëꞌ Xanruꞌ Jesucristo!
15 Ca lëꞌ,
nazíꞌi caꞌ lágaca yúguꞌtë bönachi queëꞌ,
nupa nacuáꞌ yehuaꞌ yubá,
en nupa nacuáꞌ yödzölió ni.
16 Rinábidaꞌ-nëꞌ Xúziruꞌ Dios,
lu yöl-laꞌ zxön queëꞌ,
le nazácaꞌdaꞌ,
gunnëꞌ queë́liꞌ yöl-laꞌ huáca queëꞌ Dios Böꞌ Láꞌayi,
en gunëꞌ ga gálaliꞌ lu icja ládxiꞌdoꞌoliꞌ.
17 Rinábidaꞌ-nëꞌ Cristo soëꞌ icja ládxiꞌdoꞌoliꞌ tuꞌ réajlëꞌëliꞌ Lëꞌ.
Rinábidaꞌ-nëꞌ gunëꞌ ga sóaliꞌ tsaz lu yöl-laꞌ nadxíꞌi queëꞌ,
en bitiꞌ tséaj böꞌ icja ládxiꞌdoꞌoliꞌ ca nadxíꞌiliꞌ-nëꞌ,
18 para gaca tséajniꞌiliꞌ tsözxö́n len yúguꞌtë bönachi queëꞌ Cristo ca naca yöl-laꞌ nadxíꞌi queëꞌ,
tsca ga ridxín níꞌilö,
en náꞌalö,
en cadxíꞌilö,
en xitsáꞌalö.
19 Rinábidaꞌ-nëꞌ Dios gunëꞌ ga gúnbëꞌëliꞌ yöl-laꞌ nadxíꞌi naꞌ,
le cabí gaca gúnbëꞌëruꞌ idú ca naca,
para sóalen libíꞌiliꞌ idú le naca cazëꞌ Dios.