Nuláruꞌ tuꞌ nadxíꞌinëꞌ Dios rëꞌu
2
Dios chibennëꞌ yöl-laꞌ naꞌbán idú queë́liꞌ,
sal-laꞌ gúcaliꞌ zíꞌatëlö ca bönniꞌ nátigaca tuꞌ nözi dul-laꞌ nabágaꞌliꞌ,
en niꞌa que döꞌ biáꞌaliꞌ.
2 Dza niꞌ benliꞌ lë́bisö ca tun bönachi bitiꞌ nácagaca tsahuiꞌ nacuáꞌ yödzölió ni,
en benliꞌ ca gúꞌuni tuꞌ xihuiꞌ,
nu rinná bëꞌ lu böꞌös,
en rugún dxin nupa bitiꞌ túngaca ca rnna xtídzëꞌë Dios.
3 Lëscaꞌ caní gúcaruꞌ yúguꞌtëruꞌ rëꞌu.
Benruꞌ ca guzësö ládxiꞌruꞌ,
en ca guyaza ládxiꞌruꞌ lu yöl-laꞌ bönáchisö queë́ruꞌ.
Que lë ni naꞌ gubágaꞌruꞌ dul-laꞌ lahuëꞌ Dios le nun ga gunëꞌ rëꞌu xíguiaꞌ ca gunëꞌ quéguequi iaꞌzícaꞌrö bönachi.
4,5 Níꞌirö cateꞌ niꞌ nácaruꞌ ca bönniꞌ nátigaca tuꞌ nözi dul-laꞌ gubágaꞌruꞌ, Dios busubanëꞌ rëꞌu lu yöl-laꞌ guti tsözxö́n len Cristo tuꞌ buéchiꞌ ládxëꞌë rëꞌu, en bidxíꞌideꞌenëꞌ rëꞌu. Nuláliꞌ tuꞌ zoa le buzáꞌ ládxëꞌë Dios queë́liꞌ. 6 Dios busubanëꞌ rëꞌu tsözxö́n len Cristo para gunëꞌ ga cö́ꞌöruꞌ tsözxö́n len Lëꞌ ga niꞌ rinná bëꞌë yehuaꞌ yubá.
7 Caní benëꞌ Dios,
en buluíꞌinëꞌ bönachi siꞌ záꞌgaca ca naca yöl-laꞌ tsahuiꞌ que le buzáꞌ ládxëꞌë queë́ruꞌ,
tuꞌ budödëꞌ Jesucristo niꞌa queë́ruꞌ,
le naca bëꞌ ca nadxíꞌideꞌenëꞌ rëꞌu.
8 Nuláliꞌ tuꞌ zoa le buzáꞌ ládxëꞌë Dios queë́liꞌ tuꞌ réajlëꞌëliꞌ Cristo.
Busölë́ꞌ libíꞌiliꞌ,
calëga tuꞌ nacuáꞌ le naca dxiꞌa benliꞌ libíꞌiliꞌ,
pero tuꞌ naca le runsëꞌ Dios.
9 Cuntu nu gaca gun ba zxön cuini tuꞌ nulá,
tuꞌ cabí nulá nu naꞌ tuꞌ nacuáꞌ le naca dxiꞌa nun nu naꞌ.
10 Le nácaruꞌ naca le nun cazëꞌ Dios.
Tuꞌ nácaruꞌ tuz len Jesucristo,
bucuꞌë rëꞌu para gunruꞌ le nácagaca dxiꞌa,
le bucözëꞌ zíꞌatëlö gunruꞌ.
Röꞌö dxi icja ládxiꞌdoꞌoruꞌ lahuëꞌ Dios niꞌa que le benëꞌ Cristo
11 Guliꞌtsöjné ca gúcaliꞌ zíꞌatëlö.
Gúcaliꞌ bönachi izáꞌa,
en que lë ni naꞌ yuguꞌ bönniꞌ judío,
bönniꞌ naꞌ taꞌchúguiëꞌ lu xipë́laꞌgaquiëꞌ le naca bëꞌ dáꞌgaquiëꞌ Dios,
en nazíꞌ lágaquiëꞌ bönniꞌ narugu lu xipë́laꞌgaquiëꞌ,
taꞌnnë́ꞌ nácaliꞌ libíꞌiliꞌ bönniꞌ bitiꞌ narugu lu xipë́laꞌgaquiëꞌ.
12 Dza niꞌ nubígaꞌliꞌ ga zoëꞌ Cristo.
Gúcaliꞌ bönniꞌ ziꞌtuꞌ lógaca bönachi Israel,
en bitiꞌ buzíꞌiliꞌ xibé didzaꞌ benëꞌ tsutsu Dios,
en guzxíꞌ lu nëꞌë bi gataꞌ quégaca bönachi queëꞌ.
Guzóaliꞌ yödzölió ni,
bitiꞌ zoa le runliꞌ löza,
en bitiꞌ núnbëꞌëniliꞌ-nëꞌ Dios.
13 ¡Naꞌa,
nácaliꞌ tuz len Jesucristo!
¡Zíꞌatëlö nubígaꞌliꞌ libíꞌiliꞌ ziꞌtuꞌ ga zoëꞌ Dios,
pero naꞌa nudxíguëꞌë Dios libíꞌiliꞌ gálaꞌsö tuꞌ gútiëꞌ Cristo uláz queë́ruꞌ!
14 Lë cazëꞌ Cristo runëꞌ ga röꞌö dxi icja ládxiꞌdoꞌoruꞌ lahuëꞌ Dios.
Lëꞌ benëꞌ ga yuguꞌ bönniꞌ judío,
en yuguꞌ bönniꞌ ziꞌtuꞌ buluꞌhuöáquiëꞌ tuz bönachi,
en busúluëꞌ yöl-laꞌ rilé le guléaj légaquiëꞌ choplö ca tu zöꞌö zxön.
15 Lë ni benëꞌ Cristo cateꞌ gútiëꞌ uláz queë́ruꞌ,
en gudúëꞌ yuguꞌ xibá,
en yuguꞌ le rinná bëꞌ nazúajgaca lu xibá quégaca bönachi judío,
ateꞌ chopa cöꞌ bönachi naꞌ,
bunëꞌ tuz bönachi cubi,
nupa nácagaca tuz len Lë cazëꞌ.
Caní benëꞌ,
en gulequi dxíëꞌ yöl-laꞌ rilé naꞌ.
16 Cateꞌ gútiëꞌ Cristo lëꞌe yaga cruz,
busúluëꞌ yöl-laꞌ rilé naꞌ,
ateꞌ chopa cöꞌ bönachi naꞌ,
bunëꞌ légaquiëꞌ ca tuz bönachi,
en gulequi dxíëꞌ icja ládxiꞌdoꞌgaquiëꞌ lahuëꞌ Dios.
17 Caní guca,
buluíꞌi lahuëꞌ Cristo,
en benëꞌ libán que didzaꞌ dxiꞌa ca ribequi dxíëꞌ yúguꞌtë bönachi,
libíꞌiliꞌ naꞌ nácaliꞌ bönachi izáꞌa,
en zóaliꞌ ziꞌtuꞌ ga zoëꞌ Dios,
encaꞌ bönachi judío nacuáꞌ gálaꞌsö.
18 Naꞌa,
niꞌa que le benëꞌ Cristo,
gaca ibígaꞌruꞌ lahuëꞌ Xúziruꞌ Dios,
tuꞌ zóalenëꞌ Lë cazëꞌ Dios Böꞌ Láꞌayi rëꞌu,
sal-laꞌ nácaruꞌ bönachi judío o bönachi izáꞌa.
19 Que lë ni naꞌ,
libíꞌiliꞌ,
bönachi izáꞌa,
bítiꞌrö nácaliꞌ ca bönachi ziꞌtuꞌ zóaliꞌ tu luyú bitiꞌ nequi queë́liꞌ,
pero nabábalenliꞌ bönachi queëꞌ Dios.
¡Chinácaliꞌ ca biꞌi queë cazëꞌ Dios!
20 Libíꞌiliꞌ nácaliꞌ ca tu yuꞌu zoa tsaz.
Nácaliꞌ ca yuguꞌ guiö́j zxóagaca lahui xilibi zöꞌö,
le buluꞌcuꞌë yuguꞌ bönniꞌ gubáz queëꞌ Cristo,
en yuguꞌ bönniꞌ guluꞌë didzaꞌ uláz queëꞌ Dios,
ateꞌ Lë cazëꞌ Jesucristo náquiëꞌ ca guiö́j lo que xilibi zöꞌö naꞌ.
21 Idútë yuꞌu naꞌ le nácaliꞌ libíꞌi cázaliꞌ riyasa lahui xilibi zöꞌö naꞌ naca cazëꞌ Cristo,
en nacuáꞌ tuꞌlapa yuguꞌ guiö́j que,
para gaca tu yudoꞌ láꞌayi le naca tuz len Xanruꞌ.
22 Libíꞌi cázaliꞌ nácaliꞌ tuz len Cristo Nu buzóa libíꞌiliꞌ para gácaliꞌ ca tu yuꞌu ga naꞌ yuꞌë Dios,
tuꞌ dzáguëꞌ Dios Böꞌ Láꞌayi libíꞌiliꞌ.